Batumelebi | ვინ მიიღებს 2021 წელს სასურსათო კალათას აჭარაში – პროდუქტებზე 1 მილიონი დაიხარჯება ვინ მიიღებს 2021 წელს სასურსათო კალათას აჭარაში – პროდუქტებზე 1 მილიონი დაიხარჯება – Batumelebi
RU | GE  

ვინ მიიღებს 2021 წელს სასურსათო კალათას აჭარაში – პროდუქტებზე 1 მილიონი დაიხარჯება

აჭარის 2021 წლის ბიუჯეტში 1 მილიონი ლარია გამოყოფილი პროგრამისთვის, რომელიც რეგიონში სოციალურად მოწყვლადი მოსახლეობის  საკვები პროდუქტებით უზრუნველყოფას გულისხმობს. ჯერჯერობით უცნობია, როდის დაიწყება პროდუქტების გაცემა.

დოკუმენტში აღნიშნულია, რომ „პროგრამა ითვალისწინებს აჭარის ავტონომიურ რესპუბლიკაში რეგისტრირებული მოსახლეობის მოწყვლადი ნაწილის ხელშეწყობასა და მათი მდგომარეობის გაუმჯობესებას საკვები პროდუქტების [სასურსათო კალათა] მიწოდების სახით“.

აჭარის ჯანდაცვის სამინისტრო აჭარის მუნიციპალიტეტების მერიებიდან მიიღებს მონაცემებს ბენეფიციარების რაოდენობის შესახებ, რომლის მიხედვითაც შეისყიდის პროდუქტებს და მიაწვდის მერიებს. ბენეფიციარებს კი, სასურსათო კალათას შესაბამისი მერიები გადასცემენ.

პროგრამის მიხედვით ბენეფიციარები არიან [ანუ კალათას მიიღებენ] სოციალურად დაუცველი ოჯახების ერთიან მონაცემთა ბაზაში 0-დან 100  000-ის ჩათვლით სარეიტინგო ქულით რეგისტრირებული:

  • შეზღუდული შესაძლებლობის მქონე პირები;
  • მარტოხელა პენსიონრები;
  • სარეცელს მიჯაჭვული პირები;
  • მრავალშვილიანი ოჯახები 3 და მეტი ბავშვით.

1 სასურსათო კალათას სარეკომენდაციო შემადგენლობაა: ზეთი; წიწიბურა; ბრინჯი; შაქარი; მაკარონი; ტომატი-პასტა; შესქელებული რძე; ქათამი გაყინული მთლიანი; სოკოს მარინადი; შვრიის ფანტელი (გერკულესი); მშრალი სუპი (ერთჯერადი); საფუარი; ჩაი (ერთჯერადი); ფქვილი; სუფრის მარილი იოდიზირებული; შოკოლადი; ბარდა (კონსერვი) 1 ცალი; კარაქი.

პროგრამის მიხედვით „აუცილებელი სურსათი“ არანაკლებ 14 700 ბენეფიციარს გადაეცემა.

რა პერიოდულობით და კონკრეტულად როდის გადასცემენ კალათას ბენეფიციარებს, პროგრამაში გაწერილი არ არის. აჭარის მთავრობაში „ბათუმელებს“ უთხრეს, რომ ეს დამოკიდებული იქნება ეპიდემიოლოგიურ სიტუაციაზე, დაწესებულ შეზღუდვებზე და სხვა ფაქტორებზე.

„საქართველოში ახალი კორონავირუსით გამოწვეულ ინფექციასთან დაკავშირებით დაწესებული შეზღუდვების პირობები განსაკუთრებულად აისახება მოსახლეობის გარკვეულ სოციალურ კატეგორიებზე“ – აღნიშნულია პროგრამაში. აჭარის მთავრობაში აცხადებენ, რომ აქედან გამომდინარე, ამ კატეგორიის მოსახლეობის დასახმარებლად „სასურსათო კალათას“ პროგრამული სახე მისცეს და 2021 წლის ბიუჯეტში თანხაც გაითვალისწინეს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com