„თუ გვსურს უფრო ჯანსაღი, სწორად მოაზროვნე თაობა და ნაკლები მსხვერპლი, აუცილებლად უნდა გავზარდოთ ინფორმირების კამპანია. ამ მხრივ, არაფორმალური შეხვედრები, აქტივობები, ტრენინგები, კონკურსები და მასტერკლასები ძალიან მნიშვნელოვანია არა მარტო ბავშვების ცოდნისა და ინფორმირებულობისთვის, არამედ ზრდასრულთა ცნობიერების ამაღლებისთვისაც“, – ამბობს ქეთევან გოგაძე, შუახევის სოფელ ცხემლისის საჯარო სკოლის პედაგოგი.
ცხემლისის სკოლა ერთ-ერთია იმ 10 საჯარო სკოლიდან, რომლებიც არასამთავრობო ორგანიზაცია „თავისუფალ ჟურნალისტთა სახლმა“ კონკურსის წესით შეარჩია. სწორედ ამ სკოლაში მორიგი შეხვედრა გაიმართა ორგანიზაციის ინიციატივით დაგეგმილი დისკუსიათა ციკლიდან.
შეხვედრის თემა ამჯერად ბავშვთა მიმართ ძალადობა იყო.
შეხვედრა ცხემლისის საჯარო სკოლაში
გამომდინარე იქიდან, რომ ცხემლისის საჯარო სკოლა მცირეკონტინგენტიანია, ამავე სკოლის ინიციატივით აღნიშნულ შეხვედრას ასევე ესწრებოდნენ ჭვანის საჯარო სკოლის მოსწავლეები და პედაგოგები.
დისკუსიას მოდერაცია გაუწია ცხემლისის სკოლის პედაგოგმა და აღნიშნული შეხვედრის იდეის ავტორმა – ქეთევან გოგაძემ.
შეხვედრა ცხემლისის საჯარო სკოლაში
ქეთევან გოგაძე: „როდესაც მივიღე ინფორმაცია „თავისუფალ ჟურნალისტთა სახლის“ პროექტის ფარგლებში გამოცხადებული კონკურსის შესახებ, დავინტერესდი. ეს იყო შანსი, რომ სოფლის მცირეკონტიგენტიან სკოლაში მოსულიყვნენ კომპეტენტური ადამიანები და ბავშვებთან საინტერესო თემაზე ესაუბრათ. ჩვენ შევარჩიეთ თემა „ბავშვთა მიმართ ძალადობა და პრევენციის გზები“.
რამდენიმე სხვადასხვა თემაზე ვფიქრობდი, ყველა მათგანი ეხებოდა ბავშვთა უფლებებს, თუმცა არჩევანი მოსწავლეებს გავაკეთებინე. ერთად განვიხილეთ თითოეული პრობლემა და რომელზეც უფრო მეტის ცოდნა გვსურდა, სწორედ მასზე შევაჩერეთ არჩევანი.
ბავშვთა მიმართ ძალადობა დღემდე ძალიან მტკივნეული და სერიოზული პრობლემაა. სამწუხაროდ, ამ წუთებშიც სადღაც სხვადასხვა ფორმით ძალადობენ ბავშვებზე. ვფიქრობ, ჩვენს პატარა მეგობრებს რაც შეიძლება მეტი ინფორმაცია უნდა მივაწოდოთ, უნდა იცოდნენ, სად და რა ფორმით შეიძლება დაარღვიონ მათი უფლებები. ჩვენი შერჩეული თემის მიზანიც ჩემი მოსწავლეების მეტად ინფორმირებულობა და გაძლიერება იყო“.
ბავშვთა მიმართ ძალადობის საკითხებზე ისაუბრა ბავშვთა ფსიქოლოგმა, ქეთი დევაძემ.
შეხვედრა ცხემლისის საჯარო სკოლაში
„მოსწავლეებს ვუთხარით, რა არის ბავშვთა მიმართ ძალადობა, სად შეიძლება მოხდეს ძალადობა და ვინ შეიძლება გახდეს მსხვერპლი. ვიმსჯელეთ გავრცელებულ მითებზე ბავშვთა მიმართ ძალადობის თემის ირგვლივ. აღსანიშნავია, რომ მოსწავლეები ახერხებდნენ ამოეცნოთ არსებული მითები და შეძლეს რეალური ფაქტების იდენტიფიცირებაც.
მოსწავლეებთან დისკუსიისას გამოიკვეთა სექსუალური ძალადობის შესახებ ინფორმაციის დეფიციტი. საინტერესო იყო ის, რომ დისკუსიაში აქტიურად ჩაერთნენ პედაგოგებიც. ხშირ შემთხვევაში, ბავშვთა მიმართ ძალადობის მიმღებლობა მასწავლებლებთან და მშობლებთან დაბალია, თუმცა აღნიშნულ შეხვედრაზე განსაკუთრებული დაინტერესება შეიმჩნეოდა დამსწრე პედაგოგებში სწორედ ბავშვთა მიმართ ძალადობის საკითხებზე, პრევენციაზე და რეაგირების გზებზე.
შეხვედრის პროცესში მოსწავლეებმა რამდენიმე სავარჯიშოც შეასრულეს და იხილეს ძალადობის მსხვერპლი ბავშვების ნახატები [ანონიმური სახით]. საინტერესო იყო, თუ როგორ ხედავენ ბავშვები თანატოლების მიერ შესრულებულ ნახატებს, თუ როგორ აიდენტიფიცირებენ მსხვერპლის მიერ გადმოცემულ ემოციებს“, – ამბობს ქეთი დევაძე, ბავშვთა ფსიქოლოგი.
„თავისუფალ ჟურნალისტთა სახლის“ აღნიშნული აქტივობა მიზნად ისახავს აქტუალური პრობლემების შესახებ დისკუსიის წამოჭრასა და მათი გადაწყვეტის მიმართულებით ახალი შესაძლებლობების შექმნას.
ცხემლისის სკოლაში შეხვედრის მონაწილეებს მიაწოდეს ინფორმაცია ისეთი მნიშვნელოვანი საკითხების შესახებ, როგორიცაა:
- რა მიიჩნევა ბავშვზე ძალადობად და სად შეიძლება მოხდეს ის
- ბავშვთა მიმართ ძალადობის სახეები
- ფიზიკური, ემოციური და სექსუალური ძალადობა და უგულებელყოფა
- ძალადობის ყველაზე ხშირი ფორმები
შეხვედრაზე მოსწავლეებმა ასევე მიიღეს ინფორმაცია, თუ ვის უნდა შეატყობინონ ბავშვთა მიმართ ძალადობის ფაქტების შესახებ.
შეხვედრა ცხემლისის საჯარო სკოლაში
„დარწმუნებული ვარ, ჩვენი შეხვედრის თითოეული მსმენელი წაიღებდა ისეთ ინფორმაციას, რომელიც მომავალში დაეხმარება გახდეს უფრო მამაცი, ძლიერი და ყურადღებიანი მსგავსი პრობლემების წარმოჩენის დროს. ვფიქრობ, მიღებული ინფორმაციის, მოსმენილი ისტორიებისა და მაგალითების შემდეგ, ჩემი მოსწავლეები მეტად ფხიზლად იქნებიან, შეეწინააღმდეგებიან ძალადობას და დაიცავენ საკუთარ თავს, გააძლიერებენ სხვებს, ეცოდინებათ, ვის უნდა მიმართონ დასახმარებლად.
სამომავლოდ, ალბათ კარგი იქნება მშობელთა განათლების მხარდაჭერისთვისაც შეიქმნას მსგავსი ხასიათის პროექტები. ხშირად საკმარისი არ არის მხოლოდ ბავშვებთან მუშაობა, მშობლები უნდა მივიდნენ იმ კონდიციამდე, რომ საკუთარ შვილებს მოუსმინონ, მხარი დაუჭირონ, არ იძალადონ მათზე, გაუფრთხილდნენ მათ“, – ამბობს ქეთევან გოგაძე.
შეხვედრა დაიგეგმა და განხორციელდა პროექტის ფარგლებში „დემოკრატიული იდეებისა და ღირებულებების პოპულარიზაცია აჭარაში“. პროექტის მხარდამჭერია ფონდი „ეროვნული წვლილი დემოკრატიისთვის“ (NED).
სტატია მომზადებულია პროექტის ფარგლებში – „დემოკრატიული იდეების და ღირებულებების პოპულარიზაცია აჭარაში“. პროექტს ახორციელებს არასამთავრობო ორგანიზაცია „თავისუფალ ჟურნალისტთა სახლი“. პროექტის ფინანსური მხარდამჭერია ამერიკული ფონდი „ეროვნული წვლილი დემოკრატიისთვის“ [NED]. არ არის აუცილებელი სტატიაში გამოთქმული მოსაზრებები გამოხატავდეს დონორი ორგანიზაციის შეხედულებებს.
