Batumelebi

საქართველოს ავტოკეფალიური ეკლესიის უახლეს ისტორიაში პირველად, შესაძლოა ქართველმა სასულიერო პირებმა სამართლის საძიებლად მსოფლიო საპატრიარქოს მიმართონ.

ეს იმ შემთხვევაში მოხდება, თუკი წმინდა სინოდი, რომელიც აღდგომის შემდეგ უნდა შეიკრიბოს, ჭყონდიდის მიტროპოლიტ სტეფანეს მიერ დასჯილ სასულიერო პირებს დაკისრებულ სასჯელს არ გაუუქმებს.

საქართველოს ეკლესიის ავტოკეფალიის აღდგენიდან (1917 წელი) დღემდე არ ყოფილა შემთხვევა, როცა საპატრიარქოს აპელაცია მიეღოს თავის მიერ დასჯილი სასულიერო პირისგან და შემდეგ ამ სასულიერო პირს აპელაცია გაეგზავნოს მსოფლიო პატრიარქთან.

რა მოხდა?

2021 წლის 5 აპრილს საქართველოს საპატრიარქოში 16 სასულიერო პირის სააპელაციო მიმართვა შევიდა. აპელაციის ხელმომწერები ითხოვდნენ, მეორე ინსტანციის სასამართლომდე ანუ სინოდის სხდომამდე, წმინდა სინოდს შეეჩერებინა ჭყონდიდის მიტროპოლიტ სტეფანეს ბრძანება, რომლითაც ოთხ მღვდელს მსახურება აუკრძალა, ერთი კი სამღვდელო ხარისხიდან განკვეთა.

8 აპრილს საქართველოს საპატრიარქოში მღვდელმთავართა შეხვედრა გაიმართა. შეხვედრაზე, რომელსაც 15 მღვდელმთავარი ესწრებოდა, ერთ-ერთი მთავარი განსახილველი თემა ჭყონდიდის ეპარქიაში მიმდინარე მოვლენები იყო.

საპატრიარქოს პრესსამსახურის თანახმად, შეკრებაზე მყოფმა მღვდელმთავრებმა სრული მხარდაჭერა გამოუცხადეს მიტროპოლიტ სტეფანეს. ჭყონდიდის ეპარქიაში მიმდინარე ამბები კი შეაფასეს, როგორც „გარკვეული სასულიერო პირების დესტრუქციული ქმედებები, უხეში დარღვევა საეკლესიო კანონიკისა და ამბოხი ეკლესიისა და მისი ერთობის წინააღმდეგ“.

„იმ სასულიერო პირებს, ვინც მეუფე სტეფანესგან მიიღო სხვადასხვა ეპიტიმია, დაემორჩილონ და შეასრულონ მღვდელმთავრის მითითებსა და გადაწყვეტილებებს, მით უფრო იმ პირობებში, როდესაც მათ სააპელაციო წერილი აქვთ გაგზავნილი საპატრიარქოში. აღნიშნულ წერილს წმინდა სინოდი განიხილავს და სწორედ ამ აპელაციის შედეგს უნდა დაელოდონ სასულიერო პირები. მღვდელმთავართა თქმით, აპელაციის შედეგის დადგომამდე ისინი ვალდებულნი არიან, დაემორჩილონ მღვდელმთავრის გადაწყვეტილებებსა და კურთხევებს,“ – ვკითხულობთ საპატრიარქოს პრესსამსახურის განცხადებაში.

რატომ დასაჯა მიტროპოლიტმა სტეფანემ სასულიერო პირები

მიტროპოლიტმა სტეფანემ 11 თებერვლიდან დღემდე 6 ბრძანება გამოსცა. ამ ბრძანებების თანახმად, ჭყონდიდის მიტროპოლიტმა სტეფანემ სასულიერო პირებს სხვადასხვა საეკლესიო სასჯელი დაადო – ზოგს ღვთისმსახურება აუკრძალა, ზოგს – ზიარების მიღების უფლება, არქიმანდრიტ ათინოგენს წოდება ჩამოართვა და სამღვდელო ხარისხიდან განკვეთა, გადააყენა მარტვილის დედათა მონასტრის წინამძღვარი მონაზონი სოსანა, მოგვიანებით კი მისი სხვა მონასტერში გადაყვანის ბრძანება გამოსცა. მიტროპოლიტი სასულიერო პირებისთვის დასჯას „საქართველოს მართლმადიდებელ ეკლესიაში განხეთქილების მცდელობასა და დაუმორჩილებლობის ქმედებებში მონაწილეობის“ მოტივით ხსნის.

თეოლოგი ზვიად ცაბაძე ამბობს, რომ მიტროპოლიტის ბრძანებები პროცედურული ნორმების დარღვევითაა გამოცემული, რაც ამ გადაწყვეტილებებს უკანონოს ხდის.

„[მეუფე სტეფანეს ბრძანებებში] პროცედურული დარღვევებია, რადგან მეუფე სტეფანემ არ მოიწვია ადგილობრივი სასამართლო, რომელსაც თავად უხელმძღვანელებდა, სადაც გამოკითხავდა მამა ათინოგენესა და სხვა სასულიერო პირებს, მოუსმენდა მათ, გაიგებდა რაზე იყო საუბარი. თუ მოწმეები არსებობდა, მოწმეებს მოუსმენდა. ამ მოსმენის შემდეგ, თუკი ჩათვლიდა საჭიროდ, როგორც მღვდელმთავარს ჰქონდა უფლება ეს [საეკლესიო სასჯელის დადება] ერთპიროვნულად გადაეწყვიტა. მაგრამ რადგან მან პროცედურები დაარღვია, ეს ფაქტი უკანონოს ხდის მის გადაწყვეტილებას,“ – ამბობს თეოლოგი.

თეოლოგის თქმით, მიტროპოლიტმა სტეფანემ პროცედურული დარღვევებით გადააყენა დედათა მონასტრის წინამძღვრობიდან მონაზონი სოსანაც.

ჭყონდიდის მიტროპოლიტმა სტეფანემ მარტვილის წმინდა ნინოს სახელობის დედათა მონასტრის წინამძღვარს, დედა სოსანას წინამძღვრობა 29 მარტს ჩამოართვა.

„მეუფე სტეფანემ დედა სოსანას წინამძღვრობა ჩამოართვა გაცნობითი ხასიათის შეხვედრაზე. რა თქმა უნდა, სჯულის კანონი აქ თავისუფლებას აძლევს ეპისკოპოსს. ამ ნაწილში მეუფე სტეფანეს ვერ შევედავებით, მას ამის უფლება ჰქონდა, მაგრამ არა ისე, როგორც მან გააკეთა. მან ეს გააკეთა გაცნობითი ხასიათის შეხვედრაზე, ყოველგვარი დაწვრილებითი გამოკითხვისა იმ პრობლემებისა, რაც დედა სოსანას ჰქონდა. ეს იყო მიკერძოებითი, დედა სოსანასადმი წინასწარი ნეგატიური განწყობით მიღებული გადაწყვეტილება. ამ შემთხვევაშიც პროცედურების დარღვევასთან გვაქვს საქმე.

მიტროპოლიტი სტეფანე აკეთებს ყველაფერს ვითომ კანონით, მაგრამ კანონით დადგენილ პროცედურებს არ ითვალისწინებს. წინამძღვრობა რომ ჩამოართვა, იქ მხოლოდ მონაზვნები არ უნდა ყოფილიყვნენ. იქ უნდა ყოფილიყო ყველა, ეპარქიის სამღვდელოებიდან, ყველა მონაზონი. ეს გაწერილია როგორც სჯულის კანონში, ისე დებულებაში. საეპარქიო საბჭოზე უნდა მომხდარიყო ამ გადაწყვეტილების მიღება იმის შემდეგ, რაც დედა სოსანას მიეცემოდა თავის მართლების საშუალება,“ – განმარტავს თეოლოგი ზვიად ცაბაძე.

ამ გადაწყვეტილების მიღებიდან ორი დღის შემდეგ, მიტროპოლიტმა სტეფანემ ბრძანება გამოსცა და ორი მონაზონი ლასურიის დედათა მონასტერში გადაიყვანა. ბრძანება უჩვეულო ვითარებაში გამოიცა – მაშინ, როცა მონაზონი სოსანა მორჩილ ნინოსთან ერთად დედათა მონასტრის კართან იდგა და მონასტრის კარის გაღებას ითხოვდა.

მიტროპოლიტმა სტეფანემ მონაზვნის და მორჩილის სხვა მონასტერში გადაყვანის ბრძანება, 1-ელ აპრილს, დაახლოებით 23:00 საათზე გამოსცა. ბრძანებაში, რომელიც ეპარქიის ოფიციალურ ფეისბუქგვერდზე 23:18 საათზე გამოქვეყნდა, წერია: „მონასტრული წეს-განგების უხეში და დემონსტრაციული დარღვევების გამო, მონაზონი სოსანა (ბოლქვაძე) და მორჩილი ნინო გამყრელიძე გაირიცხონ მარტვილის წმინდა ნინოს სახელობის დედათა მონასტრიდან და სინანულისათვის განწესდნენ ლასურიაში ღვთისმშობლის შობის სახელობის დედათა მონასტერში“.

ბრძანება კომენდანტის საათის დროს გამოიცა. მაშინ, როცა მონაზონი და მორჩილი მარტვილის დედათა მონასტრის კართან იდგნენ და კარის გაღებას ითხოვდნენ. მიტროპოლიტ სტეფანეს ბრძანებით მათ არ გაუღეს იმ მონასტრის კარი, რომლის აშენებაშიც დიდი წვლილი ჰქონდათ შეტანილი, როგორც სასულიერო პირებს.

ამ გადაწყვეტილების მიღებიდან მალევე, 4 აპრილს, მიტროპოლიტმა სტეფანემ „საქართველოს მართლმადიდებელი ეკლესიის წინააღმდეგ მოწყობილ ამბოხში მონაწილეობისათვის და სასულიერო პირთათვის შეუფერებელი საქციელისათვის“ სამღვდელო ხარისხიდან განკვეთა არქიმანდრიტი ათინოგენი (მდივანი) და ჩამოართვა არქიმანდრიტის წოდება. ასევე მღვდელმსახურება აუკრძალა 4 სასულიერო პირს – იღუმენ დანიელს (გვილავა), მღვდელ მირიან მესხაძეს, მღვდელ-მონაზონ ლუკას (იბრაგიმოვი), დიაკონ ანანია კალანდიას.

სწორედ ამ გადაწყვეტილებას მოჰყვა სასულიერო პირების სააპელაციო მიმართვა, რომელიც საქართველოს საპატრიარქომ დასაშვებად ცნო და მიიღო.

როგორც თეოლოგი ზვიად ცაბაძე ამბობს – „სჯულის კანონის მიხედვით, ეს ავტომატურად ნიშნავს, რომ თუკი დასჯილი პირები წმინდა სინოდის გადაწყვეტილებით უკმაყოფილონი იქნებიან, სრული უფლება აქვთ მიმართონ მსოფლიო საპატრიარქოს საბოლოო განაჩენისთვის. საპატრიარქოს არ გააჩნია არანაირი სამართლებრივი ბერკეტი ამ პროცესის შესაჩერებლად“.

სად მდებარეობს და ვინ მართავს ჭყონდიდის ეპარქიას

ჭყონდიდის ეპარქია დასავლეთ საქართველოში ორ მუნიციპალიტეტს – მარტვილს, აბაშას და ამ მუნიციპალიტეტებში შემავალ სოფლებს მოიცავს.

დღევანდელი ჭყონდიდის ეპარქია მიტროპოლიტ პეტრე (ცაავას) სახელს უკავშირდება. ის 13 წლის განმავლობაში, 2006 წლის 21 დეკემბრიდან 2019 წლის 31 ოქტომბრამდე იყო ეპარქიის ხელმძღვანელი. თეოლოგთა თქმით, მეუფე პეტრე იყო პატრიარქის ფავორიტი მღვდელმთავარი. ამას ადასტურებს ისიც, რომ ეპარქიის პარალელურად მეუფე პეტრე 2008 წლიდან ხელმძღვანელობდა საპატრიარქოს ტელევიზია „ერთსულოვნებას“.

მიტროპოლიტ პეტრეს შემდეგ ჭყონდიდის ეპარქიის მმართველი აგარაკ-წალკის ეპისკოპოსი გრიგოლი (კაცია) იყო. მიტროპოლიტი გრიგოლი ეპარქიაში 2019 წლის 31 ოქტომბერს გამართული სინოდის სხდომის შემდეგ განაწესეს.

წმინდა სინოდის განჩინებით, ჭყონდიდის ეპარქიას ორი თვის წინ კიდევ ერთხელ შეეცვალა მმართველი. ეპარქიას 2021 წლის 11 თებერვლიდან მიტროპოლიტი სტეფანე (კალაიჯიშვილი) ხელმძღვანელობს. ის ამავდროულად არის ცაგერისა და ლენტეხის მთავარეპისკოპოსიც.

რა მოხდა 2019 წლის 31 ოქტომბერს სინოდის სხდომაზე

2019 წლის 31 ოქტომბერს გამართულ სინოდის სხდომაზე ჭყონდიდის ეპარქიის მაშინდელ ხელმძღვანელს, მიტროპოლიტ პეტრე (ცაავას) მღვდელმთავრობა ჩამოართვეს. სინოდის სხდომიდან გამოსულმა პეტრე ცაავამ ჰომოფობიური ენით განაცხადა, რომ პატრიარქმა, მღვდელმთავრობიდან ეკლესიაში „მამათმავლობის ცოდვის მხილების გამო განაყენა”.

თუმცა მიტროპოლიტ პეტრეს ჩამოშორების პროცესი 2017 წლიდან დაიწყო. 2008 წლიდან 2017 წლამდე მეუფე პეტრე საპატრიარქოს ტელევიზია „ერთსულოვნებას“ ხელმძღვანელობდა. მას შემდეგ, რაც მეუფე პეტრემ საქართველოს საპატრიარქოში არსებული სიტუაციის საჯარო კრიტიკა დაიწყო, სინოდმა ის ტელევიზიის დირექტორობიდან გადააყენა.

რა აკავშირებთ მიტროპოლიტ პეტრესა და დასჯილ მღვდელმსახურებს 

მიტროპოლიტი პეტრე (ცაავა) და ჭყონდიდის ეპარქიის დაქვემდებარებაში მყოფი ათეულობით სასულიერო პირი საჯაროდ თუ პირად საუბრებში ჰომოფობიური ენის გამოყენებით ამბობენ, რომ საქართველოს პატრიარქი ჰომოსექსუალია.

იმ მღვდელმსახურთა უმრავლესობა, რომლებიც მიტროპოლიტმა სტეფანემ დასაჯა, მიტროპოლიტ პეტრეს უჭერს მხარს. ჭყონდიდის ეპარქიის მღვდელ-მონაზვნები სვამენ კითხვებს, ითხოვენ სინოდმა გამოიძიოს და განიხილოს ის ბრალდება, რომელიც პატრიარქს აქვს წაყენებული. თუმცა ამ დრომდე საკითხის განხილვა არ დაწყებულა.

საქართველოს კათოლიკოს-პატრიარქის მიმართ არსებულ ბრალდებებზე საუბრისას სასულიერო პირები ამბობენ, რომ არსებობენ მოწმეები, ვისაც პირადი ისტორიები აქვთ კათოლიკოს-პატრიარქ ილია მეორესთან. მათივე თქმით, ასევე არსებობს კადრები, რომლებიც პატრიარქის პირად ცხოვრებას ასახავს.

რატომ არ სურთ სასულიერო პირებს მიტროპოლიტ სტეფანესთან ერთად მღვდელმსახურება

ჭყონდიდის ეპარქიის დაქვემდებარებაში მყოფ სასულიერო პირთა ერთი ჯგუფი ღიად ამბობს, რომ მათ აქვთ კითხვები და სჭირდებათ ამ კითხვებზე პასუხები.

სამი თვის განმავლობაში, რაც მიტროპოლიტი სტეფანე ეპარქიას ხელმძღვანელობს, მიტროპოლიტსა და სასულიერო პირებს შორის რამდენიმე შეხვედრა გაიმართა. ყველა შეხვედრა დაპირისპირებით დასრულდა.

პატრიარქის მიმართ არსებული ბრალდების შესახებ კითხვების დასმა გახდა მარტვილის დედათა მონასტრის წინამძღვრის, მონაზონ სოსანას დასჯის მიზეზიც.

სასულიერო პირთა ნაწილი მიტროპოლიტ სტეფანეს ღიად უწოდებს „ცრუ მიტროპოლიტს“. ისინი უარს აცხადებენ მასთან ერთად მსახურებაზე. ზოგიერთი კი ითხოვს, რომ მიტროპოლიტმა სტეფანემ ნება დართოს, თავიან ლოცვებში აღარ მოიხსენიონ პატრიარქი.

ბერი ათინოგენი (მდივანი) ბალდის მონასტრის უკვე ყოფილი წინამძღვარია. მას მღვდლობა 2020 წელს შეუჩერეს, მაშინ, როცა ეპარქიას მიტროპოლიტი გრიგოლი (კაცია) მართავდა.

2021 წლის 4 აპრილამდე არქიმანდრიტის ხარისხი ჰქონდა, თუმცა მიტროპოლიტ სტეფანეს გადაწყვეტილებით ის სამღვდელო ხარისხიდანაც განკვეთეს.

ახლახან ბერმა ათინოგენმა მონაწილეობა მიიღო „გირჩი TV“-ის გადაცემაში „დიდი ამბები“. ის სწორედ ამ გადაცემაში ჰყვება, რომ ყველაფერი, რაც ახლა საპატრიარქოს ირგვლივ ხდება, 2016 წელს „მისგან“ დაიწყო, მას შემდეგ, რაც ერთ-ერთი სტიქაროსანი მასთან მივიდა და საპატრიარქოში მომხდარი ამბავი მოუყვა.

„ეს ადამიანი [სტიქაროსანი], თავისი ხელსაქმით შრომობდა, ცხოვრობდა. საპატრიარქოში სამუშაოდ მიიყვანეს, სადაც თავისი ხელსაქმით დაკავდა და უხაროდა, რომ იქ ადამიანებთან ურთიერთობით მეტი გაიცნობდა და თან პატრიარქთან ურთიერთობაც ექნებოდა,“ –  ასე ახასიათებს ბერი ათინოგენი სტიქაროსანს, რომელიც საქართველოს კათოლიკოს-პატრიარქ ილია მეორესთან მომხდარი ინცინდენტის შესახებ მოუყვა.

„როცა ის საპატრიარქოში შრომობდა, ერთ დღეს დაიბარეს მარხვის პერიოდში… [სტიქაროსანი] ამბობს: – „უშუალოდ პატრიარქმა მე ეს საძაგელი ცოდვის განცდა შემომთავაზაო“. შემეხოო, ასე ვთქვათ და მან ძლივს გამოასწრო იმ ოთახიდან. [ეს სტიქაროსანი] მივიდა ერთ-ერთ ეპისკოპოსთან, მოუყვა და მან უთხრა – შენ უშიშროების მოგზავნილი ხარ. მეორე ეპისკოპოსთან იყო მისული, მოუყვა თავისი გასაჭირი. ისევ უთხრეს, შენ ფული გაქვს ამაში აღებული და მოგზავნილი ხარო. მოკლედ, ეს ადამიანი ძალიან ცუდ მდგომარეობაში [იყო]. მთხოვა მეუფე პეტრემდე მიმაწვდენიე ხმაო“, – ჰყვება ბერი ათინოგენი.

ბერი ათინოგენის თქმით, თავდაპირველად თვითონ აპირებდა წასვლას საპატრიარქოში. თუმცა შემდეგ თავისი ეპარქიის მღვდელმთავართან, მიტროპოლიტ პეტრესთან (ცაავა) მივიდა და ყველაფერს მოუყვა.

„მეუფემ მითხრა: „მამაო, ვიცი მე ეს თემები, რამდენიმე ადამიანი არსებობს ასეთი. გპირდები, რომ აუცილებლად დავაყენებ ამ საკითხს და სინოდზე ამას განვიხილავთ“. სამი წელი დასჭირდა ამას. მანამდე, ამ სამი წლის განმავლობაში მე ვხედავდი, როგორ იყო ზრუნვა, რომ ეს ყველაფერი შიდა სამზარეულოში დარჩენილიყო და იქ გვესაუბრა ამ ყველაფერზე. შემდეგ ამ ციანიდის საქმე დაერთო ამ ყველაფერს,“ – ჰყვება ბერი ათინოგენი.

სამი წლის შემდეგ, 2019 წელს, ამ საკითხის სინოდზე დაყენებას მიტროპოლიტ პეტრეს მღვდელმთავრობიდან გადაყენება მოჰყვა. სინოდმა პეტრე ცაავა შიომღვიმის მონასტერში გაუშვა „მოსანანიებლად“.

ჭყონდიდის ეპარქიაში ახალი მღვდელმთავარი დანიშნეს – მიტროპოლიტი გრიგოლი. 2019 წლის შემდეგ ის სასულიერო პირები, რომლებიც ეპარქიაში მდებარე სხვადასხვა ეკლესია-მონასტერში მსახურობდნენ, პერიოდულად ხვდებოდნენ მიტროპოლიტ გრიგოლს და ითხოვდნენ – სინოდს განეხილა ის ბრალდებები, რომლებიც პატრიარქის მიმართ არსებობს. ბერ ათინოგენს კითხვების დასმა მღვდლობის შეჩერებად დაუჯდა.

„ჩემს ეკლესიაში, რომელთანაც მივედი და მთელი ჩემი ცხოვრება ეკლესიის წინაშე გავშალე, გავფინე და მივენდე, ამ ეკლესიაში ასეთი ბრალდებების ნაკადი ისმის. მე ვეღარ გავუძელი ამას. ჩემს ადგილას სხვა რას იზამდა? ასეთი ბრალდებების განცდაში როგორ უნდა ვილოცო? როგორ დავდგე ტრაპეზის წინ? ვერ წარმომიდგენია, იდგე, იძახოდე ტიტულებს, თან იცოდე, რომ ეს ბრალდებებია და არავის გამოძიება არ უნდა. თან გეუბნებიან – შენ ვინ გეკითხება ამას? როგორ მეუბნებით ამას, რომელიმე იერარქი, როცა ქრისტემ თავის მოწაფეებს ასე უთხრა – „მე ყოველივე განგიცხადეთ თქვენ, ამიტომ მონებს არ გიწოდებთ. მონამ არ იცის რას აკეთებს თავის ბატონი. მე თქვენ მეგობრად გიწოდეთ, მე თქვენ ყოველივე განგიცხადეთო“.

როგორ მეუბნებით რომელიმე იერარქი ამას, რომ მე არ უნდა ვიცოდე რა ხდება ჩვენს ოჯახში. როგორ მეუბნებით ამას, რომ მე არ უნდა ვიცოდე თქვენ როგორ ცხოვრობთ? ვერ დავეთანხმები, როდესაც იერარქი მეუბნება – ვინ გეკითხება შენი პატრიარქი როგორია. მე ვფიქრობ, რომ ეს ქრისტიანული სწავლება არ არის.

აქედან გამომდინარე მივედი მეუფე გრიგოლთან და ვუთხარი – მე ვეღარ ვლოცულობ, ვეღარ მოვიხსენიებ [ლოცვებში] ამას [პატრიარქს]. აქედან გამომდინარე გაარკვიეთ, მიშველეთ, მეც, რადგან მეც ეკლესიის შვილი ვარ. [მეუფე გრიგოლმა] მითხრა ასეთი რამე – მოხსენებითი ბარათი დაწერე და მე უფროსებთან წავიღებო. გამოვართვი ეს. მოხსენებითი ბარათი დავწერე, აღვწერე ყველაფერი და ვითხოვე – მომეხმარეთ, ვეღარ ვლოცულობ, ვეღარ ვიხსენიებ ამ ადამიანს [პატრიარქს]. არ ვიხსენიებსა და ვეღარ ვიხსენიებს შორის ხომ არის განსხვავება? არ შემიძლია ასე. წაიღო ეს უფროსებთან. რამდენიმე დღეში ფურცელი მომიტანეს, სადაც ეწერა, რომ მღვდლობა შემიჩერდა,“ – იხსენებს ბერი ათინოგენი ჭყონდიდის ეპარქიაში მომხდარ ამბებს.

რას ნიშნავს, როცა სასულიერო პირები პატრიარქს ლოცვებში აღარ იხსენიებენ

თეოლოგი ზვიად ცაბაძე განმარტავს, რომ კანონიკურად, როდესაც ღვთისმსახური შეწყვეტს პატრიარქის მოხსენიებას ლოცვებში, რომელიც მისი ვალდებულებაა, ის ექვემდებარება მღვდელმთავრისგან სასჯელს.

„ვისაც ადანაშაულებს ეს მღვდელი და არ იხსენიებს [ლოცვებში], სანამ მას [ბრალდებულს] კრება არ განსჯის, მღვდელს არ აქვს უფლება, რომ მასზე ლოცვა შეწყვიტოს.

ჩვენ რა ვითარება გვაქვს – ბრალდებულია პატრიარქი. გამოდიან საპატრიარქოს წარმომადგენლები, იგივე მეუფე სტეფანეც, სხვადასხვა მღვდელმთავრები და ამბობენ, რომ კრება, რომელმაც პატრიარქის ბრალეულობა უნდა განიხილოს, არ გაიმართება. ლაფსუსია ეს კანონიკურად. არ შეიძლება ბრალდებული ეპისკოპოსი დარჩეს ბრალდებულად და კრებამ ეს არ განიხილოს.

ამ შემთხვევაში იმ მღვდლებს ნამდვილად ჰქონდათ უფლება, როდესაც ეს ფაქტები გაჟღერდა, რომ მასზე ლოცვა შეეწყვიტათ. იმიტომ, რომ მათ წინასწარ უთხრეს – კრება ამას არ განიხილავს. მათთვის რომ ეთქვათ, რომ კრება განიხილავს ამ ამბავს და სანამ კრება განიხილავდა, მანამდე შეეწყვიტათ, მაშინ ისინი ნამდვილად იმსახურებდნენ საეკლესიო სასჯელს,“ – განმარტავს თეოლოგი.

სინოდის მოლოდინში – რა მოხდება თუკი სინოდი არ განიხილავს დასჯილი სასულიერო პირების საკითხს

საპატრიარქოს პრესსამსახურის ინფორმაციით, სინოდის სხდომა აღდგომის შემდეგ გაიმართება. ჯერ არ არის ცნობილი საკითხები, თუმცა არსებობს მოლოდინი, რომ სინოდი დასჯილი სასულიერო პირების აპელაციასაც განიხილავს.

რა მოხდება იმ შემთხვევაში, თუკი სინოდი აღდგომის შემდეგ დადგენილ კრებაზე ჭყონდიდის მიტროპოლიტის მიერ დასჯილ სასულიერო პირებს არ მოუსმენს. თეოლოგი ზვიად ცაბაძე ამბობს, რომ ამ შეთხვევაში მღვდელ-მონაზვნებს საშუალება ექნებათ აღარ დაელოდონ სინოდს და პირდაპირ მიმართონ მსოფლიო საპატრიარქოს.

„პირველ რიგში წინასწარ უნდა იყოს ცნობილი სინოდის თარიღი. ამის გაჭიანურება ეკლესიაში სიმშვიდის დასამყარებლად არ შეიძლება. თუ წმინდა სინოდი ამ საკითხს არ განიხილავს და იტყვის, რომ აი, მერე, მომდევნო სხდომაზე განვიხილავ, ეს უკვე სრულ უფლებას აძლევს დასჯილ მღვდლებს, რომ პირდაპირ მიმართონ მსოფლიო საპატრიარქოს. აღარ უნდა დაელოდონ მომდევნო სინოდს იმიტომ, რომ ეს არის ბრალდების/საჩივრის აცილება, უარის თქმა. დასჯილ სასულიერო პირებს აქვთ უფლება გაასაჩივრონ ეს სინოდის განჩინების გამოქვეყნებისთანავე,“ – განმარტავს თეოლოგი.

დღეს, 20 აპრილს, ბათუმის №3 საპყრობილეში 30 წლის მსჯავრდებულმა მუცლის არეში თვითდაზიანება მიიყენა.

პენიტენციური სამსახურის ცნობით, თვითდაზიანება მსჯავრდებულმა „აღელვების ნიადაგზე“ მიიყენა.

„დაწესებულების მედპერსონალის მიერ მას დაუყოვნებლივ გაეწია სამედიცინო  დახმარება და ორჯერ  შეეთავაზა სამედიცინო სექტორის კლინიკაში გადაყვანა, რაზეც მსჯავრდებულმა  განაცხადა უარი.

ამ პერიოდის განმავლობაში იგი დაწესებულების სამედიცინო პერსონალის მუდმივი მეთვალყურეობის ქვეშ იმყოფებოდა.  მხოლოდ მოგვიანებით, მომხდარიდან რამდენიმე საათის შემდეგ  მსჯავრდებული დათანხმდა ბათუმის ერთ-ერთ სამოქალაქო კლინიკაში გადაყვანას, სადაც  მას ჩაუტარდა ოპერაცია.

მსჯავრდებულის მდგომარეობა სტაბილურია და სამოქალაქო სექტორის მედპერსონალის მეთვალყურეობის ქვეშ იმყოფება,“ – აცხადებენ პენიტენციურ სამსახურში.

სამსახურის ცნობით, ფაქტის შესახებ ეცნობა იუსტიციის სამინისტროს საგამოძიებო დეპარტამენტს.

მსჯავრდებული 2013 წლიდან იხდის სასჯელს. სპეციალური პენიტენციური სამსახურის ცნობით, მას ამ პერიოდში არაერთხელ აქვს თვითდაზიანება მიყენებული და ჩატარებული აქვს  მრავალჯერადი ლაპარატომია.

დღეს დილიდან ტაქსი „მაქსიმის“ მძღოლები გაიფიცნენ, ისინი ტარიფის გაზრდას ითხოვენ. „კატავი“ გამოგვდისო“, – აცხადებენ მძღოლები. მძღოლები ამბობენ, რომ ამ ფასად ვერ იმუშავებენ, მით უფრო „კომენდანტის საათის პირობებში“.

„ლარ-ნახევრიანი დაკვეთა მოგდის ცხრა საათისკენ. შეიძლება ამ დროს 2000 ლარით დაგაჯარიმონ“, – წუხს ერთ-ერთი მძღოლი.

„ახლანდელი ფასების მიხედვით, როგორ ვიცხოვროთ. მთელი დღე მგზავრებს ვარბენინებთ ტყუილად. როცა ნორმალური ფასი იყო, ხელფასის სახით ოჯახში შემოსავალი მრჩებოდა. ახლა საწვავში 2,80 ლარს იხდი – ფიზიკურად არაფერი გრჩება. ძალიან მიზერულ თანხაზე ვმუშაობთ“, – უთხრა „ბათუმელებს“ კიდევ ერთმა მძღოლმა.

ამ დროისთვის [14:30] მძღოლები საპროტესტო მსვლელობით „მაქსიმის“ ოფისისკენ მიემართებიან.

გაფიცული მძღოლები ფასების გაზრდას ითხოვენ. მათი გათვლებით ათვლის საწყისი ფასი უნდა იყოს 2 ლარი მაინც, შემდეგ ყოველ კილომეტრზე 25 თეთრიდან 80 თეთრამდე. ერთი გამოძახება 5-6 ლარი მაინც რომ იყოს – ასეთია „მაქსიმის“ გაფიცული მძღოლების პოზიცია.

ამ ეტაპზე გაფიცულია 200 მძღოლი.

საქართველოს ექსპრეზიდენტი მიხეილ სააკაშვილი აცხადებს, რომ შემოდგომაზე, ადგილობრივი თვითმმართველობის არჩევნების წინ ჩამოვა საქართველოში.

„მეც, მიხეილ სააკაშვილი, წინასწარ ჩამოვალ საქართველოში, ფიზიკურად ვიქნები თქვენთან ერთად, რა რისკის ფასადაც არ უნდა იყოს ეს ჩემი სიცოცხლისთვის და ჩემი თავისუფლებისთვის.

მე აუცილებლად ვიქნები ამ პროცესის უშუალო მონაწილე, დამსწრე და თქვენთან ერთად ჩვენი გარდაუვალი გამარჯვების აქტიური შემოქმედი,“ – განაცხადა სააკაშვილმა დღეს, 20 აპრილს.

მან დღეს მოუწოდა „ერთიან ნაციონალურ მოძრაობას“ ხელი მოაწეროს შარლ მიშელის შეთავაზებულ შეთანხმების დოკუმენტს.

მიხეილ სააკაშვილმა აღნიშნა, რომ 2021 წლის შემოდგომაზე, ადგილობრივი მმართველობის არჩევნებთან ერთად, „პრაქტიკულად დაინიშნა რეფერენდუმი „ქართული ოცნების“ ხელისუფლებიდან ჩამოშორებაზე“.

„ეს არის უკვე დაშვება რიგგარეშე არჩევნების, ეს არის რეფერენდუმი ივანიშვილის მმართველობაზე. შემოდგომაზე იქნება ეს რეფერენდუმი და ჩვენ ის უნდა მოვიგოთ ადგილობრივი მმართველობის არჩევნების პარალელურად.

ამისათვის ჩვენ უნდა გამოვიყენოთ ყველა ინსტრუმენტი. ჩვენ უნდა შევიდეთ იმ პარლამენტში, რომელიც მიგვაჩნია უკანონოდ და მოპარული არჩევნების შედეგად, გამოვიყენოთ ეს ინსტრუმენტიც, ჩვენ უნდა გამოვიყენოთ ყველა სხვა ბრძოლის ფორმა, დემოკრატიულობის ფარგლებში, მაგრამ ჩვენ უნდა ვიყოთ ძალიან მკვეთრი

ჩვენ უნდა ვიყოთ ძალიან ქმედუნარიანები, მობილიზებულები,“ – განაცხადა მიხეილ სააკაშვილმა.

ევროსაბჭოს პრეზიდენტი შარლ მიშელი ხვალ, 20 აპრილს, ისევ ეწვევა საქართველოს.

„ხვალ ჩამოვალ საქართველოში და შევხვდები თითოეულ თქვენგანს… შემდეგ ნაბიჯებზე ჩვენ ერთად ვისაუბრებთ, როგორ გავაძლიეროთ კავშირები საქართველოსა და ევროკავშირს შორის,” – აღნიშნა შარლ მიშელმა.

დღეს, 19 აპრილს, პრეზიდენტის სასახლეში ოპოზიციური პარტიებისა და ხელისუფლების წარმომადგენლებმა მიშელის მიერ შეთავაზებულ დოკუმენტს ხელი მოაწერეს.

შეთანხმების დოკუმენტს ხელი მოაწერეს: “ლელომ”, “რესპუბლიკელებმა”, “სტრატეგია აღმაშენებელმა”, “გირჩმა”, “მოქალაქეებმა”, “ქართულმა ოცნებამ”. დოკუმენტს ინდივიდუალურად მოაწერეს ხელი სალომე სამადაშვილმა ენმ-დან, დავით ბაქრაძემ, “ევროპული საქართველოს” ყოფილმა თავმჯდომარემ.

ამ თემაზე:

„7 აფთიაქში ვიყავი და წამალი არ მომცეს. ვიცი, რომ ეს მედიკამენტები უფასოდ უნდა მივიღო, მაგრამ მითხრეს, რომ თუ ფულს გადავიხდი, მაშინ მომცემენ, ისე ვერა,“ – ამბობს ნინო ხინთიბიძე. ის 72 წლის ასიე ჯინჭარაძის შვილია. დედა-შვილი მარტო ცხოვრობს. ისინი სოციალურად დაუცველები არიან.

მიუხედავად იმისა, რომ სახელმწიფო საპენსიო ასაკის მქონე ადამიანებს და სხვადასხვა ჯგუფს მედიკამენტებს უფასოდ აწვდის, ზოგიერთი პენსიონერი წამალს უფასოდ ვერ იღებს. აფთიაქებში, სადაც პროგრამის მიხედვით პენსიონერებს მედიკამენტები უფასოდ უნდა მისცენ, ურთიერთსაპირისპირო პასუხი მიიღო „ბათუმელებმა“: მაგალითად, თუკი ერთი აფთიაქი ამბობს, რომ კონკრეტული მედიკამენტები აპრილში აღარ ფინანსდება, მეორე აფთიაქში გვიპასუხეს, რომ სახელმწიფოს ტენდერის ჩატარება დააგვიანდა, მესამეში კი ირწმუნებიან, რომ მედიკამენტების უფასოდ გაცემის პრობლემა არ აქვთ. თუმცა პენსიონერმა მედიკამენტი ვერც დღეს მიიღო, სტატიის მომზადების პროცესში.

ამ ვითარებაში კი, ჯანდაცვის სამინისტრომ დღის განმავლობაში ვერ მოიცალა „ბათუმელების“ კითხვებზე საპასუხოდ.

ნინო ხინთიბიძე, რომელიც ბათუმში ცხოვრობს და შეზღუდული შესაძლებლობის მქონე პირია [მეორე ჯგუფის სტატუსი აქვს], ამბობს, რომ ბათუმის თითქმის ყველა სააფთიაქო ქსელი მოიარა, დედისთვის წამლები რომ ეყიდა.

„აქამდე დედას არ დასჭირვებია ეს მედიკამენტები, წინა კვირას გამოგვიწერა ექიმმა ხუთი მედიკამენტი და აქედან ორი: „ლორისტა“ და „ეგილოგი“ ვერ ვიშოვე, არადა, ექიმმა თქვა, კომლექსურად ყველას მიღებაა საჭიროო,“ – გვიყვება ნინო ხინთიბიძე. – „PSP-ში მითხრეს გვაქვსო, მაგრამ უფასოდ ვერ მოგცემთო, „ფარმადეპომ“ არ ფინანსდება ეგ საერთოდო, ავერსში მითხრეს, თქვენ რაც გინდათ, ის რაოდენობა არ გვაქვსო… რამდენიმე ფილიალი მოვიარე აღმაშენებელზე, ჭავჭავაძეზე, გორგილაძეზეც ვიყავი… დედამ სამი თვე უნდა მიიღოს ეს წამლები. მთლიანობაში რომ დამიჯამეს, 500 ლარი გამოვიდა, ჩვენი შემოსავალი მხოლოდ ჩემი და დედაჩემის პენსიაა, ასევე სოციალური შემწეობა.

მეც ყოველთვიურად მჭირდება მედიკამენტი, რომელიც 80 ლარი ღირს, მაგას არავინ აფინანსებს,“ – ასრულებს ნინო ხინთიბიძე.

რა უთხრეს კონკრეტულად „ბათუმელებს“ აფთიაქებში? 

ნინო ხინთიბიძის მიერ დასახელებული „ლორისტა“ და „ეგილოგი“ რომ უფასოდ აღარ აქვთ, ეს „ფარმადეპოსა“ და „ჯიპისი“-ში დაგვიდასტურეს.

„სია პერიოდულად ახლდება სამინისტროსთან შეთანხმებით. აპრილში აღნიშნული მედიკამენტები არ არის სიაში,“ – მოგვწერეს კომპანია „მეფას“ პრესსამსახურიდან. ეს კომპანია აერთიანებს „ჯიპისის“ და „ფარმადეპოს“.

PSP-ს პრესსამსახურში კი განმარტეს, რომ სახელმწიფო ტენდერით შესყიდვები ზოგჯერ გვიანდება და ხარვეზს ეს იწვევს.

„სამინისტრო იღებს ამ გადაწყვეტილებებს, ჩვენ ვერაფერს ვწყვეტთ… კვოტებზეც სამინისტრო იღებს გადაწყვეტილებას, სად რამდენი მედიკამენტი უნდა წავიდეს ამ პროგრამის ფარგლებში, შესაძლოა, ბათუმში არ არის და სხვაგან იყოს,“ – გვიპასუხეს PSP-ში.

რაც შეეხება კომპანია „ავერსს“, აქ თქვეს, რომ „ლორისტა“ და „ეგილოგიც“ ქსელში არსებობს, თუმცა არ გამორიცხეს შესაძლო ტექნიკური ხარვეზიც.

„მივიდეს მოქალაქე ბათუმის რომელიმე ფილიალში და მისცემენ, არის ქსელში,“ – გვიპასუხეს „ავერსში“

„დღეს მითხრეს, რომ საერთოდ არ გვაქვს ქსელში „ლორისტაო“, მენეჯერსაც ვესაუბრე, მაგრამ არაფერი,“ – ამბობს ნინო ხინთიბიძე, რომელიც დღეს „ავერსის“ გრიბოედოვის ქუჩაზე არსებულ ფილიალში მივიდა.

საბოლოოდ „ავერსის“ პრესცენტრში გვიპასუხეს, რომ მედიკამენტები ქსელში არის, მაგრამ არაა საკმარისი რაოდენობა.

„შეფერხებაა სამინისტროდან… როგორც კი გვექნება და შეივსება მარაგი, თავად დავუკავშირდებით მოქალაქეს“, – დაგვპირდნენ „ავერსში“.

ეს არ არის პირველი შემთხვევა, როცა „ბათუმელებს“ მოქალაქეები უყვებიან, როგორ ვერ სარგებლობენ „უფასო მედიკამენტების პროგრამით.“ 2021 წლის 19 თებერვალს ასევე პენსიონერის შესახებ ვწერდით, ვის შვილსაც აფთიაქში უთხრეს, რომ მედიკამენტი აქვთ, მაგრამ უფასოდ არა.

ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამასთან დაკავშირებით დეტალური კითხვებით საქართველოს ჯანდაცვის სამინისტროს და ჯანმრთელობის ეროვნულ სააგენტოს „ბათუმელებმა“ წერილობით 2021 წლის 23 თებერვალს მიმართა. სამინისტროდან პასუხი დღემდე არ მიგვიღია.

რაც შეეხება ჯანდაცვის ეროვნულ სააგენტოს, ამ საკითხზე მათი პასუხი ნახეთ აქ

მთავარი ფოტო: ასიე ჯინჭარაძე

ვაქცინაციაზე წინასწარი რეგისტრაცია დაიწყო. წინასწარი რეგისტრაციით გეძლევათ ვაქცინებს შორის არჩევანის გაკეთების შესაძლებლობა. COVID 19 ვაქცინაციაში მონაწილეობა შეუძლია ყველას, 18 წლის ასაკიდან.

ჯანდაცვის სამინისტროს ინფორმაციით, ეს ვებგვერდი შეიქმნა იმისთვის, რომ მოქალაქეს შესაძლებლობა ჰქონდეს აცრისთვის წინასწარ გაიაროს რეგისტრაცია და ასევე თავად აირჩიოს მისთვის სასურველი ვაქცინა.

წინასწარი რეგისტრაცია შესაძლებელია ამ ბმულზე

ამავე თემაზე:

„სირცხვილიას“ კიდევ ერთი აქტივისტის – ირაკლი კუკანიას საქმეზე ბათუმის საქალაქო სასამართლომ ადმინისტრაციული საქმისწარმოება შეწყვიტა. „სირცხვილიას“ ბათუმის ოფისში პოლიციელები 3 აპრილს ღამით შეიჭრნენ და 3 პირი დააკავეს. პოლიციელებმა სასამართლო პროცესზე ვერ განმარტეს, კონკრეტულად რა სამართალდარღვევის გამო დააკავეს აქტივისტები.

დღეს, 19 აპრილს, ირაკლი კუკანია მოსამართლე როინ კახიძემ გაამართლა. მას ადვოკატი ლელი ბჟალავა იცავდა.

12 აპრილს მოსამართლე ირმა ტოგონიძემ გენრი დოლიძე გაამართლა. მის წინააღმდეგაც დაწყებული ადმინისტრაციული საქმისწარმოება შეწყდა.

პოლიციის მიერ „სირცხვილიას“ ოფისში დაკავებული სამი ადამიანიდან, მხოლოდ გიგა ნაკაშიძე დააჯარიმა სასამართლომ 500 ლარით.

ირაკლი კუკანია ამბობდა, რომ დაკავებისას მას ფეხები ურტყეს და დაზიანებები აღენიშნება. გენრი დოლიძის თქმით კი, მას სისხლნაჟღენთები აქვს და მრავლობითი ნაკაწრი. ამ შემთხვევებზე გამოძიება სახელმწიფო ინსპექტორის აპარატმა დაიწყო.

თურქეთში, ისევე როგორც მსოფლიოს ბევრ ქვეყანაში, კორონავირუსის საწინააღმდეგო პრევენციული შეზღუდვებია დაწესებული. დღეს თურქეთში კორონავირუსის 62 ათასზე მეტი ახალი შემთხვევა დაფიქსირდა.

როგორც თურქეთში დასაქმებული ქართველები გვიყვებიან, ეკონომიკურ კრიზისი, რაც თურქეთშიც დგას, ვირუსის მძვინვარების პარალელურად, აისახება ყველაზე: დიდი თუ მცირე ბიზნესების მფლობელებზე, რომლებსაც შეუმცირდათ შემოსავლები და დასაქმებულებზე, რომლებიც დამსაქმებელთა შემოსავლებზე იყვნენ დამოკიდებულები.

ლუდა ხუნდაძე 16 წელია მუშაობს თურქეთში. ბოლო 4 წელია სტამბოლშია. ასაკოვან ცოლ-ქმარს უვლის. ლუდას ხელფასს ამ ხნის განმავლობაში ასაკოვანი წყვილის შვილები უხდიდნენ. მაგრამ შარშან მარტის შემდეგ ყველაფერი შეიცვალა. ხან 2 თვე ვერ უხდიდნენ ხელფასს, ხან 3. მერე რასაც აძლევდნენ, იმასაც ნაწილ-ნაწილ და ცოტ-ცოტას.

თუ კორონაპანდემიამდე ლუდა ხელფასი დიდი სახლის დალაგების, მოხუცი წყვილის მოვლისა და საჭმლის მომზადებისთვის 700 დოლარი იყო, ახლა მას მხოლოდ 4000 ლირას უხდიან, რაც 500 დოლარიც არ არის. ამ გასამრჯელოსაც ნაწილ-ნაწილ აძლევენ, როგორც და როდესაც მოუხერხდებათ. წყვილის შვილებმა ლუდას აუხსნეს, რომ მათი ბიზნესი დაზარალდა და მხოლოდ ასე გადახდა შეუძლიათ.

„ახლაც ორი თვის ხელფასი მაქვს ასაღები. 4 წელია აქ ვმუშაობ და მერიდება ჩემით ავდგე და წამოვიდე. კი მერიდება, მაგრამ მეც რომ ოჯახი მყავს სარჩენი? სხვა სამსახურიც ვერ ვნახე, რომ გადავიდე. მიუხედავად იმისა, რომ კარგად ვიცი ენა და აქაური წესები. ვერც წარმოვიდგენდი აქ თუ ასეთი პრობლემები შემექმნებოდა. ნერვიულობისგან სულ წნევები მაქვს, ღამე არ მძინავს.

ძალიან გაძვირდა პროდუქტი მაღაზიებში. 100 ლირად ერთ დღეს რასაც ვყიდულობდით მარკეტში, ახლა იმ რაღაცეებს 400 ლირა სჭირდება, ასეთია საშუალოდ ყოველდღიური დანახარჯი პროდუქტის მაღაზიაში“.

მიუხედავად იმისა, რომ ლუდა ხუნდაძეს თურქეთში ლეგალურად მუშაობის უფლებაც აქვს და დაზღვევაც, მაინც ვერ აპროტესტებს ხელშეკრულებით შეთანხმებული ხელფასის დაგვიანებებს. გვეუბნება, რომ მისმა ბევრმა ნაცნობმა დატოვა სტამბოლი ხელფასის მკვეთრად შემცირების და რიგ შემთხვევებში სამსახურის დაკარგვის გამო.

„თუ 5000, 6000 ლირა ჰქონდათ ხელფასი საშუალოდ სტამბოლში დასაქმებულ ქართველებს, პანდემიის შემდეგ განახევრდა“ – ამბობს ლუდა ხუნდაძე.

მსგავსი ისტორია აქვს ნონა კაციტაძესაც. ოჯახმა, სადაც ის მუშაობდა 2020 წლის მაისში უთხრა, რომ ვეღარ გადაუხდიდნენ კუთვნილ ხელფასს, 1000 დოლარს და შეეძლოთ მხოლოდ 600 დოლარის გადახდა. ნონას საჭიროებებს ეს ხელფასი არ ჰყოფნიდა. მან სტამბოლი დატოვა, საქართველოში ჩამოვიდა და 6 თვე აქ დაჰყო. მერე ისევ სტამბოლში მოუწია დაბრუნება და ახლა ამბობს, რომ სტამბოლში უკვე შეუძლებელი ქართველმა ემიგრანტმა იპოვოს სამსახური, სადაც 1000 დოლარს გადაუხდიან, ისე, როგორც მას პანდემიამდე უხდიდნენ.

„ცოტა ხნის წინ ჩამოვედი სტამბოლში 6 თვის შემდეგ და მომიწია სხვა სამსახურის ძებნა, რამაც ისევ ახალი პრობლემები გამიჩინა, ახალი ფსიქოლოგიური წნეხი: შეჩვევა ახალ ოჯახთან, გარეთ კიდევ მოგეხსენებათ შეზღუდვები, ყველანაირად დაზიანდა ემიგრანტების მდგომარეობა სტამბოლში. არიან ემიგრანტები, რომლებიც თვეში მხოლოდ 400 დოლარის გამო მუშაობენ ყოველდღე.

გუშინ ავიღე ხელფასი, გადავახურდავე და 1 დოლარი 8 ლირა და 18 ქურუში ღირდა. ლარის მსგავსად აქაც კატასტროფულად უფასურდება ლირა დოლართან მიმართებაში. სულ რაღაც 3 თვის წინ თუ ბანანი ღირდა 6 ლირა, ახლა 12 ლირა ღირს“.

ნონა გვიყვება, რომ იმ უბანში, სადაც ის მუშაობს, 25 ქართველი ემიგრანტი ქალი იყო, ახლა მათგან მხოლოდ 8 დარჩა – დანარჩენები სამუშაოდ იტალიაში წავიდნენ.

„იტალიასაც აქვს ეკონომიკური კრიზისი, მაგრამ ვეკონტაქტები აქედან იტალიაში წასულ ჩემს ნაცნობ ქალებს და ხელფასი 1000, 1200 ევრო აქვთ – ოღონდ ენის ცოდნაა ასეთი ანაზღაურებისთვის საჭირო. თუ ენა არ იცი 800 დოლარს გიხდიან.

ოჯახში, სადაც ახლა ვმუშაობ სტამბოლში, მათ ფინანსური პრობლემები არ აქვთ, მაგრამ ასეთი შემთხვევები გამონაკლისია“, – ამბობს ნონა.

კორონავირუსის პანდემიის დაწყებიდან დღემდე თურქეთში 4 მილიონზე მეტი ადამიანი დაინფიცირდა ვირუსით, 35 608 პაციენტი გარდაიცვალა.

შაბათ-კვირას ქუჩაში გასვლა შეზღუდულია. მოქალაქეებს ქუჩაში გასვლა ეკრძალებათ კვირის სამუშაო დღეებშიც საღამოს 7-დან დილის 5 საათამდე.