Batumelebi

ბათუმის მერიამ გენგეგმასთან დაკავშირებული დოკუმენტის პირველი ნაწილი ჩაიბარა. როგორც ქალაქგანვითარებისა და ურბანული პოლიტიკის სამსახურში განგვიმარტეს, განაშენიანების გენერალური გეგმის შემუშავების პირველ ეტაპზე ტენდერში გამარჯვებულმა კომპანიამ  საბაზისო მონაცემები შეაგროვა. „ასევე დასრულდა ინდიკატორების სისტემის სამუშაო ვერსიის შემუშავება. წარმოდგენილია განაშენიანების დეტალური გეგმის კვლევები – შენობების მდგომარეობა კვარტლების მიხედვით და ასე შემდეგ“, – მოგვწერეს მერიიდან.

დოკუმენტი ჯერ არ გასაჯაროებულა. მერიაში გვითხრეს, რომ ის საკმაო მოცულობისაა, გარდა ამისა „სპეციალურ პროგრამაშია აწყობილი“.

ჩაბარებული დოკუმენტის შინაარსზე მეტი ინფორმაციის მისაღებად კომპანიის წარმომადგენელს მივმართეთ. „ბათუმელების“ კითხვებს გენგეგმაზე მომუშავე ჯგუფის ტექნიკური კოორდინატორი, სოფო თოდუა პასუხობს.

• ქალბატონო სოფო, მარტივად რომ აგვიხსნათ, რა წერია უკვე ჩაბარებულ დოკუმენტში, რა ინფორმაციას მოიცავს ის შინაარსობრივად?

გენგეგმა არის სტრატეგიული მნიშვნელობის დოკუმენტი, რომელმაც უნდა განსაზღვროს, შემდეგი ათი წლის განმავლობაში ქალაქი როგორ უნდა განვითარდეს. შესაბამისად, სანამ მივიღებთ კონკრეტულ გადაწყვეტილებებს, უნდა ვიცოდეთ არსებული მდგომარეობით რა ხდება ქალაქში. რა ტენდენციებია, რა საფრთხეები არსებობს, ეს მოიცავს სხვადასხვა დარგობრივ მიმართულებას და არამხოლოდ არქიტექტურულ და ქალაქგეგმარებით მონაცემებს, არამედ გარემოსდაცვითი კუთხით რა მდგომარეობაა, კულტურულ მემკვიდრეობაში რა მდგომარეობაა, საინჟინრო მიმართულებით და ასე შემდეგ…

ყველა დარგობრივი მიმართულება, რომლებიც ქალაქისთვის არის მნიშვნელოვანი და მის განვითარებასთან მოიაზრება, ასევე, განაპირობებს ცხოვრების ხარისხს – ამ ყველაფრის კვლევა ჩატარდა დეტალურად. კვლევაზე მუშაობდნენ დარგობრივი სპეციალისტები, თითოეულ მიმართულებაზე შესაბამისი ჯგუფი მუშაობდა და შეგროვდა ინფორმაცია, რომელიც გავაანალიზეთ. ეს დოკუმენტი საჯარო იქნება. ის 940 გვერდია და ამას ემატება 140 რუკა, რომლებიც შემუშავებულია.

• კვლევის ფარგლებში ქალაქისთვის ყველაზე მწვავედ რა საკითხები გამოიკვეთა?

ძალიან ბევრი საკითხია, თუმცა განსაკუთრებით მწვავე, რაც ბათუმისთვის მტკივნეულია და რაზეც მერიაც მუშაობს, ეს არის ავარიული და დეგრადირებული ინფრასტრუქტურა. არამარტო ქალაქის ცენტრში, არამედ გარეუბნებშიც საკმაოდ ცუდი მდგომარეობაა. შემდეგია ქაოსური განაშენიანება – ის, რომ ახლა უსისტემოდ ხდება ქალაქის განაშენიანება, ის, რომ ეს პროცესი ადგილობრივ ბაზარზე არ არის მორგებული და ქალაქის რესურსს გარკვეულწილად ჭამს.

გარემოსდაცვითი მიმართულებით არის ბევრი პრობლემა, მათ შორის შეუსაბამო ნაგავსაყრელი – პროექტი უკვე კეთდება, რომ ის დაიხუროს და სხვაგან გადავიდეს. თუმცა ეს საკითხი მაინც მწვავედ დგას… ასევე კულტურული მემკვიდრეობა – ის, რომ ბათუმს იდენტობა შეუნარჩუნდეს და სიცოცხლისუნარიანობა არ დაეკარგოს, არ მოხდეს ქალაქის მუზეუმიფიცირება, მაგრამ შევინარჩუნოთ იერ-სახე.

• ფიქრობთ, რომ ამის შანსი ისევ არის?

მართალია, ბევრ ადგილას უკვე აღარ არის ამის შანსი და ბევრად უარესი მდგომარეობაა, ვიდრე იყო ხუთი წლის წინ, შესაძლოა კიდევ უფრო უარესიც. შესაბამისად, მთავარია, შეჩერდეს ეს პროცესები და ყველამ გაიაზროს, რომ ადგილობრივი იერ-სახე ეს არის ქალაქის მიმზიდველობა. მთავარი მიზანია, რომ ცხოვრების ხარისხი შემოსულ ინვესტიციებთან ერთად მაღალი იყოს და პირიქით არ მოხდეს. ჯერჯერობით ახალი ინვესტიციები მხოლოდ მყისიერ შედეგს გვაძლევს ეკონომიკური მაჩვენებლებით, თუმცა გრძელვადიან პერსპექტივაში…

• თქვენ ჩააბარეთ პირველი ეტაპის სამუშაოები და გვეუბნებით, რომ ის 900 გვერდია, ანუ მის დამუშავებას დრო სჭირდება. ვიდრე ეს ყველაფერი დასრულდება, დიდ დრო გავა. შემდეგ განხილვა-დამტკიცების ეტაპი გაიწელება. რა მექანიზმი გეგულებათ, რომ გენგეგმის შექმნას აზრი არ დაეკარგოს? 

ჩვენი კანონმდებლობის მიხედვით, ეს ძალიან პრობლემური საკითხია. იმის მიუხედავად, რომ შემდეგი ეტაპი სწორედ დროებითი შეზღუდვებია [დროებითს იმიტომ ვუსვამ ხაზს, რომ სანამ გენგეგმა მუშავდება და კონცეფციამდე მივალთ] მანამდე სასურველია გარემო სტაბილურად შენარჩუნდეს. თუ შეიცვალა გარემო, რომელიც ვიკვლიეთ, შესაბამისად, ის კვლევა ჩვენთვის აღარ იქნება ინფორმაციული.

როდესაც ვლაპარაკობთ კონკრეტულ ნებართვებზე, სამწუხაროდ, ჩვენი კანონმდებლობა არ გვაძლევს იმის საშუალებას, რომ ეს პროცესები შევაჩეროთ – იძულებულები ვართ, მანამდე გაცემული ნებართვები ჩავთვალოთ, რომ ის აშენებულია. ჩვენი კვლევა მათ შორის მოიაზრებდა გაცემული ნებართვების გადახედვას და იმ მოცულობების ჩათვლას, რომ შემდეგი 5-10 წლის განმავლობაში ქალაქი რამდენად გაიზრდება.

• რადგან ასეა, ხომ არ გაქვთ რჩევა ბათუმის მერისთვის, რომ ამ მხრივ გარკვეული შეზღუდვები შემოიღოს?

ჩვენ გვაქვს არქიტექტურის სამსახურთან კომუნიკაცია, თვითონაც იციან, რომ შემდეგი ეტაპი არის დროებითი შეზღუდვები: ახალი გაცემული ნებართვები, როგორც ასეთი, აღარ ფიქსირდება. ძველი გაცემული ნებართვებია და რამდენიმე ახლა იწყებს მოქმედებას. ამას, ფაქტობრივად, ვერ ცვლიან ისინი. ჩვენი მითითებაც არის, რომ სანამ გენერალური გეგმა მუშავდება, მანამ თავი შეიკავონ, ან განხილვისას ჩვენ დაგვიძახონ.

მეორეც, როცა საუბარია, რომ ნებართვა გაცემულია ისეთ ზონაში, რომელიც შეუსაბამოა და გაცემული ისეთ ადგილას, რაც გარემოს დაცვით, ან კულტურული მემკვიდრეობის ზონაში ხვდება, ამ შემთხვევაში გენერალური გეგმა განიხილავს მიწათმონაცვლეობის, ალტერნატიული კომპრომისების სივრცეს. ესეც ჩვენი კვლევების საკითხია, ამაზე დავაფიქსირებთ ჩვენს პროფესიულ მოსაზრებას, გვექნება საჯარო განხილვები, კერძო და საჯარო განხილვები, მათ შორის დამკვეთთანა. მთავარია, რომ ისეთ კომპრომისს მივაღწიოთ, რომ ეს რეალისტური იყოს და ამის მართვითი ხელსაწყოები არსებობდეს.

თუ ვადაგასულ ნებართვებზეა საუბარი, რაღაც შეგვიძლია, მაგრამ თუ ნებართვა მოქმედია, ეს მთლიანად მუნიციპალიტეტზეა დამოკიდებული. ჩვენ შეგვიძლია დასაბუთებულად ვთქვათ, რომ ეს აქ არ უნდა იყოს, მაგრამ მუნიციპალიტეტს რამდენად  შეუძლია სასამართლოში წავიდეს…

• ხდება ხოლმე, როცა უცებ გამოჩნდება კომპანია, რომელიც ამბობს, რომ კონკრეტულ ნაკვეთზე აქვს მშენებლობის ნებართვა ხუთი ან მეტი წლის წინ გაცემული და იწყება აპელირება, რომ კანონით აქვს ააშენოს რაღაც შენობა. ამ დროს ჩნდება ეჭვი იმაზე, თუ რამდენად ნამდვილია ეს ნებართვა. ამის კონტროლი შესაძლებელია?

ნებართვების აღრიცხვის სისტემა რამდენჯერმე შეიცვალა ბოლო 5 წლის განმავლობაში. ჩვენ მუნიციპალიტეტს უზარმაზარი ცხრილი გამოვართვით. საარქივო მასალების გარდა გადამოწმების საშუალება არ არსებობს – ამ ყველაფრის გაციფრულება მხოლოდ ახლა დაიწყო. შესაბამისად, ძალიან რთულია გადამოწმება ხუთი წლის წინ რა ხდებოდა და როგორ.

ჩვენ შეგვიძლია შევაფასოთ ტენდენციურად, დაახლოებით რამდენი ნებართვა გაიცა, მაგრამ კონკრეტული პროექტების განხილვისთვის უზარმაზარი სამუშაოა ჩასატარებელი. ყოველწლიურად 15 000-მდე ნებართვაა გაცემული, მაგრამ ყველა არ არის სამშენებლო, მათ შორის არის სარესტავრაციო, სარემონტო…

სურსათის ეროვნული სააგენტო შოკოლად „ქინდერის“ კიდევ ერთი საეჭვო პარტიის შესახებ აქვეყნებს ინფორმაციას.

სააგენტოს ცნობით, მიიღეს შეტყობინება ბელგიაში, Ferrero-ს მიერ წარმოებული სხვადასხვა დასახელების შოკოლადის პროდუქტის Salmonella Typhimurium-ით სავარაუდო დაბინძურების შესახებ.

ოფიციალური დოკუმენტის თანახმად, საქართველოში შემოტანილი „ქინდერის“ ნაწილი, სავარაუდოდ ასევე დაბინძურებულია Salmonella Typhimurium-ით. კერძოდ საუბარია „ქინდერ სიურპრიზსა“ და „ქინდერის“ შოკოლადების ნაკრებზე (KINDER SCHOKOBONS,  KINDER SORPRESA MAXI).

სურსათის ეროვნული სააგენტოს ინფორმაციით, იმპორტიორ კომპანიას დაავალა კონკრეტული პარტიების რეალიზაციიდან ამოღება, ხოლო ბაზარზე გატანილი პროდუქციის ამოღება და დასაწყობება და, ასევე, რაოდენობის აღრიცხვა და გატარებული ქმედებების თაობაზე სააგენტოს დაუყოვნებლივ ინფორმირება.

სურსათის ეროვნული სააგენტოს ცნობით, ბიზნესოპერატორთან  ჩატარდება არაგეგმური ინსპექტირება. სააგენტო მოუწოდებს მომხმარებელს თუ უკვე შეძენილი აქვს პროდუქცია დასახელებული პარტიებიდან, არ გამოიყენოს.

ევროპაში – დიდ ბრიტანეთში, საფრანგეთში, გერმანიაში, ბელგიასა და სხვა ქვეყნებში სალმონელას ასობით შემთხვევა დაფიქსირდა, განსაკუთრებით 10 წლამდე ბავშვებში, რაც, სავარაუდოდ, დაკავშირებულია Ferrero-ს მიერ წარმოებული სხვადასხვა დასახელების „ქინდერის“ შოკოლადის პროდუქტის Salmonella Typhimurium-ით დაბინძურების ფაქტთან.

ამის გამო „ქინდერის“ შოკოლადი სხვადასხვა ქვეყნის ბაზრიდან გამოითხოვეს.

შემოსავლების სამსახურის განცხადებით, 25 მაისამდე ვალეს საბაჟო იკეტება. საბაჟოს დაკეტვის მიზეზი თურქეთის მხარეს მიმდინარე სარემონტო/სარეაბილიტაციო სამუშაოებია.

„საქართველოს საბაჟო საზღვარზე საქონლის შემოტანა-გატანა, აგრეთვე აღნიშნული საბაჟო გამშვები პუნქტის გავლით სახელმწიფო საზღვრის გადამკვეთ ფიზიკურ პირთა მიმართ საბაჟო კონტროლის პროცედურები ვერ განხორციელდება,” – ნათქვამია შემოსავლების სამსახურის განცხადებაში.

უწყების ცნობით, მას შემდეგ რაც თურქეთის მხარეს სარეაბილიტაციო სამუშაოები დასრულდება, საბაჟო გამშვები პუნქტი „ვალე“ ჩვეულ რეჟიმში, სრული დატვირთვით გააგრძელებს მუშაობას.

შემოსავლების სამსახურის ცნობით, სამცხე-ჯავახეთის მხრიდან, თურქეთის მიმართულებით საზღვრის კვეთა შესაძლებელია „კარწახის“ საბაჟო გამშვები პუნქტის საშუალებით, რომელიც გაზრდილი საერთაშორისო ტვირთბრუნვის გამო სრული დატვირთვით ფუნქციონირებს.

___________________

ფოტო: ვალეს საბაჟო პუნქტი/შემოსავლების სამსახური

აჭარის ტელევიზიიდან კიდევ ერთი თანამშრომელი გაუშვეს. კულინარული გადაცემა „უცხო სუნელის“ ავტორსა და წამყვანს, ალეკო თხილაიშვილს სამსახურიდან გათავისუფლების შესახებ ბრძანება გუშინ, 28 აპრილს ჩააბარეს.

„სასამართლოს მივმართავ, რადგან ვფიქრობ, რომ არასამართლიანია ის, რის გამოც მე გამათავისუფლეს სამსახურიდან,“  – უთხრა „ბათუმელებს“ ალეკო თხილაიშვილმა.

ფირუზ ბოლქვაძე, აჭარის საზოგადოებრივი მაუწყებლის  საზოგადოებასთან ურთიერთობის სამსახურის ხელმძღვანელი კი ამბობს, რომ ალეკო თხილაიშვილი სამსახურიდან  კანონის შესაბამისად გათავისუფლდა.

ალეკო თხილაიშვილმა „ბათუმელებს“ უთხრა, რომ მის გათავისუფლებას წინ უძღოდა საყვედური, რომელიც დაუმსახურებლად მიიღო.

„ტელევიზიასთან მაქვს ხელშეკრულება გაფორმებული. ამის მიხედვით, როგორც მე მაქვს ტელევიზიისთვის გარკვეული რაოდენობის გადაცემების ჩაბარების ვალდებულება, მაუწყებელსაც აქვს ვალდებულება, მე უზრუნველმყოს სამუშაო გარემოთი, ინვენტარი იქნება ეს თუ სხვა.

სამუშაო პირობებზე რომ არ ვთქვა, არ შემიძლია. 6 წელია ეს გადაცემა გადის ეთერში. 14 სეზონი გავიდა. მე-15 სეზონია ახლა. ყველა მაყურებელმა გადასარევად იცის, რომ ტყე-ღრე დავძვრები, ხან რომელ რესტორანს ვეხვეწები – შენთან გადავიღებ, ხან  რომელს. სტუდიას რომ თავი დავანებოთ, არანაირი გარემოპირობა არ მქონია ამ ექვსი წლის განმავლობაში, გარდა იმისა, რომ ყიდულობდნენ პროდუქტს. უღრმესი მადლობა ამისთვის, გულწრფელად. მეტი არაფერი ხელშეწყობა მე არ მქონია.

იანვრის მერე არის საუბარი, რომ გადაცემისთვის უზრუნველყონ ერთი ნივთის შეძენა, მაგრამ დღემდე არაა შეძენილი. აქედან გამომდინარე ჩავარდა ორი გადაცემა, რომელსაც მედავებოდნენ. ამას გარდა, დამემართა კოვიდი, რომელიც გადავიტანე თავისი გართულებებით. 22 დღე სახლიდან ვერ გამოვდიოდი. შესაბამისად, ამანაც გარკვეულწილად რაღაც როლი ითამაშა.

როდესაც გადაცემების ჩავარდნაზე მოკვლევა დაიწყო, დავწერე ახსნა-განმარტება. მიუხედავად იმისა, რომ იურიდიულად ჩემი ბრალეულობა არ იყო, მაინც გამომიცხადეს საყვედური,“ – ამბობს ალეკო თხილაიშვილი.

მისი თქმით, მას შემდეგ, რაც საყვედური გამოუცხადეს, განერვიულდა და ტელევიზიაში იყვირა.

„როცა საყვედურის შესახებ გავიგე, ვიყვირე, გავბრაზდი და ვიხმაურე. ეს ერთ-ერთმა დასაქმებულმა ქალბატონმა მიიღო საკუთარ თავზე. არადა, ამ ქალბატონს საერთოდ არ მიემართებოდა. შევედი და დავუსვი კითხვა – შენ გგონია, რომ ეს საყვედური ნორმალურია-მეთქი? ამას მოჰყვა ისტერიკა. მერე მითხრეს თანამშრომლებმა, ტირისო. შევედი ისევ და ვუთხარი – შენთვის მე კონკრეტულად შეურაცხყოფა არ მომიყენებია, ეს იცოდე-მეთქი.

დისციპლინური წარმოება დაიწყო ამის შემდეგ. კომისიის არც ერთ წევრს ჩემთვის არანაირი კითხვა არ დაუსვამს. არც წერილი მიმიღია, რომ მოკვლევა მიდის. ჩვეულებრივად მივიღე ბრძანება გათავისუფლებაზე. გუშინ, 28 აპრილს, გამათავისუფლეს,“ – უთხრა ალეკო თხილაიშვილმა „ბათუმელებს“.

თანამშრომლის გათავისუფლებას განცხადებით გამოეხმაურა აჭარის საზოგადოებრივი მაუწყებელი. მაუწყებელი უკვე ყოფილ თანამშრომელს, ალეკო თხილაიშვილს, ქალი თანამშრომლის შეურაცხყოფაში ადანაშაულებს:

„[ალეკო თხილაიშვილი] სამუშაო ოთახში შეუვარდა ქალ თანამშრომელს, მიაყენა სიტყვიერი შეურაცხყოფა, აგრესიულად და უცენზურო სიტყვებით მოიხსენია, რა დროსაც საჭირო გახდა სამართალდამცავების გამოძახება.  რის შემდეგაც ქალს, რომელიც გახდა შეურაცხყოფის ადრესატი, შექმნილი ჰქონდა მძიმე ემოციური ფონი და მაუწყებლის ხელმძღვანელობისგან მოითხოვა შესაბამისი რეაგირება,“ – ნათქვამია მაუწყებლის განცხადებაში.

ასევე, მაუწყებლის სახელით ჟურნალისტებთან განცხადება გააკეთა აჭარის საზოგადოებრივი მაუწყებლის ტელევიზიისა და რადიოს საზოგადოებასთან ურთიერთობის მენეჯერმა ფირუზ ბოლქვაძემ.

„მის გათავისუფლებას ჰქონდა კონკრეტული მიზეზი. მის წინააღმდეგ მიმდინარეობდა დისციპლინური წარმოება მაუწყებელში მომხდარ უსიამოვნო ფაქტთან დაკავშირებით. მან გარკვეული წინა დისციპლინარული პროცესის გამო პირადი შეურაცხყოფა მიაყენა და უცენზურო სიტყვები გამოიყენა კონკრეტული თანამშრომლის მისამართით. შესაბამისად დისციპლინურმა კომისიამ ჩაატარა ყველა შესაბამისი პროცედურა ამასთან დაკავშირებით და მიიღო ასეთი გადაწყვეტილება,“ – თქვა ფირუზ ბოლქვაძე.

„ბათუმელებმა“ მას ჰკითხა, რა უძღოდა წინ დისციპლინურ წარმოებას, რის შემდეგაც ალეკო თხილაიშვილი სამსახურიდან გაუშვეს.

„პირველი საყვედური დაკისრებული უფლებამოვალეობების შეუსრულებლობისთვის გამოეცხადა. წინა დისციპლინარული წარმოება უკავშირდებოდა ამას, რასაც მოჰყვა შემდეგში კონკრეტული თანამშრომლის შეურაცხყოფა ამ თანამშრომლის მიერ,“ – გვითხრა ფირუზ ბოლქვაძემ.

კითხვაზე, ასრულებდა თუ არა ტელევიზია თანამშრომლის წინაშე ხელშეკრულებით ნაკისრ ვალდებულებას, ფირუზ ბოლქვაძე პასუხობს:

„ტელევიზიას ყველა თანამშრომლის წინაშე აქვს აღებული ვალდებულებები. არის ცალკეული შემთხვევები, როდესაც კონკრეტული თანამშრომლები ითხოვენ კონკრეტული ვალდებულებების შესასრულებლად რაღაც დამატებით რესურსებს. თუ ეს რესურსი იმ მომენტისთვის ფიზიკურად არ არსებობს, ან მისი მიწოდება ვერ ხერხდება გარკვეული პერიოდის განმავლობაში, ეს არ შეიძლება არავითარ შემთხვევაში იქცეს საფუძვლად ვინმესთვის, რომ მან არ შეასრულოს დაკისრებული მოვალეობა.

ის გადაცემებს აკეთებდა მანამდეც. მანამდე არ ყოფილა გადაცემების მომზადების პრობლემა. თუ ასეთი კრიტიკულად მნიშვნელოვანი იყო ის, რასაც ითხოვდა, მაშინ როგორ ახერხებდა ის გადაცემების მომზადებას და ჩაბარებას? და რატომ ვერ მოხერხდა ეს მას შემდეგ, რაც დააყენა ეს მოთხოვნა?“

დღეს, 29 აპრილს, აჭარის საზოგადოებრივი მაუწყებლის ალტერნატიულმა პროფკავშირებმა და მასში გაწევრიანებულმა ჟურნალისტებმა მაუწყებლის წინ მდუმარე საპროტესტო აქცია მოაწყვეს. ჟურნალისტები ტელევიზიიდან კიდევ ერთი თანამშრომლის წასვლას აპროტესტებდნენ. აქციაზე, ასევე, შეაგროვეს ხელმოწერები.

მაუწყებლის ჟურნალისტები მრჩეველთა საბჭოს თავმჯდომარეს წერილით მიმართავენ და მოითხოვენ დაინიშნოს მრჩეველთა საბჭოს სხდომა, რომელზეც მაუწყებელში არსებულ მდგომარეობას განიხილავენ.

ეს არ არის პირველი შემთხვევა, როდესაც აჭარის ტელევიზიიდან თანამშრომლებს ათავისუფლებენ.

2022 წელს 3 თვეში საქართველოში  შესაბამისმა სამსახურებმა 2229 სამშენებლო ნებართვა გასცეს. ეს ჯამში 1 მილიონ 516 500 კვ.მეტრის ფართობის მშენებლობას ითვალისწინებს. საქსტატის ინფორმაციით, ეს მაჩვენებელი  წინა წლის შესაბამისი პერიოდის მაჩვენებელთან შედარებით 16,5 პროცენტით მეტია. ნებართვების რაოდენობა კი 15,4 პროცენტით გაიზარდა.

ნებართვების 83.8 პროცენტი ქვეყნის 5 რეგიონზე ნაწილდება. 53 პროცენტი თბილისზე მოდის, 11 პროცენტი – მცხეთა-მთიანეთის რეგიონზე, 7.4 პროცენტი – იმერეთზე, 7.1 პროცენტი – ქვემო ქართლზე, აჭარაში კი 5.3 პროცენტია.

2022 წლის იანვარ-მარტში ნებართვები გაიცა მრავალფუნქციური საცხოვრებელი კომპლექსების, სავაჭრო ობიექტების, სასტუმროების, სამრეწველო საწარმოების სასოფლო-სამეურნეო დანიშნულების ობიექტებისა და სხვა შენობა-ნაგებობების მშენებლობაზე. გაცემულ ნებართვებში შედარებით გამოიკვეთა ასევე ტენდენცია, რომ 2022 წელს დიდი წილით წარმოდგენილია მრავალფუნქციური
საცხოვრებელი კომპლექსების პროექტები.

თბილისი ლიდერობს ექსპლუატაციაში მიღებული ობიექტების პროცენტული განაწილების მიხედვითაც.

2022 წლის იანვარ-მარტში ექსპლუატაციაში მიუღიათ 545 900 კვ.მეტრი ფართობის 552 ობიექტი, ფართობი წინა წლის შესაბამის პერიოდთან შედარებით 59.7 პროცენტით მეტია. რაც შეეხება ობიექტების რაოდენობას, წინა წლის შესაბამის პერიოდთან შედარებით 1.8 პროცენტით ნაკლებია.

დასრულებული  მშენებლობების ნახევარზე მეტი ქვეყნის 4 რეგიონზე მოდის. კერძოდ, 33.5 პროცენტი – თბილისზე, 13.6 პროცენტი – კახეთის რეგიონზე, 10.5 პროცენტი – მცხეთა-მთიანეთზე, 10.5 პროცენტი – ქვემო ქართლზე.

„საერთაშორისო გამჭვირვალობა – საქართველოს“ (TI) კვლევის მიხედვით, 2021 წელს ღვინის კომპანიებზე სახელმწიფომ 107 მილიონი ლარის სახელმწიფო სუბსიდია გასცა. 80 კომპანიიდან 31 კომპანია „ქართული ოცნების“ მოქმედ ან ყოფილ წევრებს ეკუთვნით ან დაკავშირებულია მათთან და მათ ოჯახებთან.

კვლევის მიხედვით, აღნიშნულ 31 კომპანიაზე 30 343 512 ლარი გაიცა, რაც სუბსიდიის საერთო მოცულობის 22 პროცენტია.

„კვლევის შედეგად გამოიკვეთა ტენდენცია, რომ სუბსიდიის მიმღები კომპანიები ასევე იღებენ გრანტებს სახელმწიფო პროგრამიდან „აწარმოე საქართველოში“, სარგებლობენ შეღავათიანი, ფაქტობრივად, უპროცენტო აგროსესხებით და ამავდროულად, პარტია „ქართული ოცნების“ შემწირველები არიან.

მმართველი პარტიის სასარგებლოდ 2016-2021 წლების განმავლობაში მათ 3 626 420 ლარი გაიღეს“, – წერს საერთაშორისო გამჭვირვალობა საქართველო თავის მიმოხილვაში, რომელსაც ჰქვია „რთველი და არჩევნები – რთვლის სახელმწიფო სუბსიდირების პროგრამის მიმოხილვა“.

ამავე წყაროს მიხედვით, გამარტივებული შესყიდვები მიიღეს პრემიერ-მინისტრ ირაკლი ღარიბაშვილთან დაკავშირებულმა კომპანიებმა.

„მისი ცოლის ძმის, ალექსანდრე თამაზაშვილის „ვაინ კახეთმა“ 550 000 ლარის გამარტივებული შესყიდვა მიიღო.

პარლამენტის უმრავლესობის ყოფილი წევრის, კახეთის ყოფილი გუბერნატორის, ირაკლი შიოლაშვილის ღვინის მარანმა „ქინძმარაულმა“ – 150 000 ლარის ოდენობის გამარტივებული შესყიდვა მიიღო.

ყოფილი შს მინისტრის, ალექსანდრე ჭიკაიძის კომპანიამ – „რთველისმა“ ღვინის სააგენტოსგან სუბსიდიის სახით  57 368 ლარი მიიღო.

ჯამურად „ქართულ ოცნებასთან“ დაახლოებულმა კომპანიებმა 800 000 ლარზე მეტი ოდენობის თანხა მიიღეს“.

„გამჭვირვალობა საქართველოს“ მოკვლევით, 900 000 ლარის ღირებულების გამარტივებული შესყიდვა მიიღო 9 დღის დაარსებულმა კომპანიამ, შპს „დი ჯი ელმა“, რომლის მესაკუთრე თამარ ალუღიშვილი დედოფლისწყაროელი ბიზნესმენის, ნუგზარ ალუღიშვილის ქალიშვილია. მედიაში გავრცელებული ინფორმაციით, ნუგზარ ალუღიშვილი ირაკლი ღარიბაშვილის ოჯახის ახლო გარემოცვის წევრი და მისი ბიზნესის ფაქტობრივი განმკარგველია.

სუბსიდიის მიმღები 5 მსხვილი კომპანია დაკავშირებულია კომპანია „ბოლერო ენდ კომპანისთან“, რომლის ხელმძღვანელი ვახტანგ კარიჭაშვილია. ჯამურად ამ კომპანიებმა მიიღეს 6 მილიონზე  მეტი ლარი. ვახტანგ კარიჭაშვილი, მედიაში გავრცელებული ინფორმაციით, ბიძინა ივანიშვილის დეიდაშვილის, უჩა მამაცაშვილის ბიზნესპარტნიორია და მასთან ერთად  ფლობს კომპანიას ბრიტანეთში.

ჯამურად 2 მილიონზე მეტი ლარი მიიღო სააქციო საზოგადოება „კოტეხი-გურჯაანის ღვინის ქარხანამ“ და შპს „დუგლაძეების ღვინის კომპანიამ“, – წერს TI.

არასამთავრობო ორგანიზაციის ინფორმაციით, აღნიშნული კომპანიები უკავშირდება ზაალ დუგლაძეს, საქართველოს პარლამენტის წევრს „ქართული ოცნებიდან“.

„აღსანიშნავია ის ფაქტიც, რომ ღვინის კომპანიას იმ შემთხვევაში შეეძლო სუბსიდიის პროგრამაში მონაწილეობა, თუ მევენახისგან ჩაიბარებდა 1000 ტონაზე მეტ ყურძენს. ამ ხელოვნური  ბარიერის გამო მცირე მარნებმა სუბსიდიით ვერ ისარგებლეს“.

კვლევის მიხედვით, 2021 წელს მთავრობამ ჯამში 138 მილიონი ლარის სუბსიდია გასწია რთველზე. სუბსიდიის მიზეზად მან ჭარბი მოსავალი და გლობალური პანდემია დაასახელა.

ამ წელს ადგილობრივი თვითმმართველობის არჩევნებს დაემთხვა.

პარლამენტის წევრთან, ზაალ დუგლაძესთან დაკავშირებული კომპანიები

სს „კოტეხი-გურჯაანის ღვინის ქარხანა“

TI კვლევის მიხედვით, სააქციო საზოგადოება „კოტეხი-გურჯაანის ღვინის ქარხანამ“ ღვინის სააგენტოსგან სუბსიდიის სახით 1 342 509 ლარი მიიღო. ამ კომპანიის სამეთვალყურეო საბჭოს თავმჯდომარე დავით დუგლაძეა, წევრები კი – ეკატერინე დუგლაძე (დავით დუგლაძის ძმის, პარლამენტის ხაშურის და ქარელის მაჟორიტარი დეპუტატის, ზაალ დუგლაძის მეუღლე) და ბიძინა ივანიშვილის ძმა, ალექსანდრე ივანიშვილი არიან.

შპს „დუგლაძეების ღვინის კომპანია“

შპს „დუგლაძეების ღვინის კომპანიამ“ ღვინის სააგენტოდან სუბსიდიის სახით მიიღო 759 988 ლარი მიიღო.

„კომპანიას 23-23 პროცენტიანი წილით ფლობენ დავით დუგლაძე, ზაალ დუგლაძე (რომელმაც ამ კომპანიაში თავისი წილი ძმაზე გაასხვისა), ალექსანდრე ივანიშვილი და მალხაზ ყანჩაველი. 8 პროცენტის მფლობელია გიორგი კაპანაძე, რომელსაც ორმაგი, საქართველოსა და რუსეთის  მოქალაქეობა აქვს. კომპანიის დირექტორია დავით დუგლაძე.

დავით დუგლაძე „ქართული ოცნების“ მსხვილი შემწირველია. 2016-2020 წლებში მან 155 000 ლარი შესწირა მმართველ პარტიას. 2012 წელს მას 60 000 ლარი ჰქონდა შეწირული „ერთიანი ნაციონალური მოძრაობისთვის“; ზაალ დუგლაძემ 2016-2020 წლებში (ვიდრე დეპუტატი გახდებოდა) მმართველ პარტიას 115 000 ლარი მისცა; მალხაზ ყანჩაველმა 2016-2018 წლებში „ქართულ ოცნებასა“ და პრეზიდენტობის კანდიდატს, სალომე ზურაბიშვილს 105 000 ლარი შესწირა“, – წერს TI.

შეღავათიანი აგროკრედიტი – დამატებითი სარგებელი სახელმწიფოსგან

ზემოთჩამოთვლილი კომპანიები, გარდა იმისა, რომ იღებენ საბიუჯეტო სუბსიდიებს, მონაწილეობენ სახელმწიფოს მიერ გამოცხადებულ ტენდერებში და იგებენ გამარტივებულ შესყიდვებს. ისინი სხვადასხვა სახელმწიფო პროგრამების აქტიური ბენეფიციარები არიან და დაფინანსებას იღებენ ისეთი პროგრამებიდან, როგორებიცაა „აწარმოე საქართველოში“ და „შეღავათიანი აგროკრედიტი“.

სოფლის განვითარების სააგენტოდან გამოთხოვილი ინფორმაციის თანახმად, „შეღავათიანი აგროკრედიტის პროექტის“ ფარგლებში სააგენტო გასცემს თანხებს სესხის საპროცენტო განაკვეთების დასაფარად.

სააგენტოს მიერ 2013-2021 წლებში იმ ღვინის კომპანიებზე გაცემული თანადაფინანსება, რომლებიც ამავდროულად სახელმწიფო სუბსიდიითაც სარგებლობენ და „ქართული ოცნების“ შემწირველები არიან.

ასე გამოიყურება ღვინის მარნები, რომლებიც სარგებლობენ შეღავათიანი აგროკრედიტით:

TI სახელმწიფოს აძლევს რეკომენდაციას, რომ უსაფრთხოების სამსახურის ანტიკორუფციულმა სააგენტომ შეისწავლოს შპს „მოსავლის მართვის კომპანიის“ მიერ გამოცხადებული გამარტივებული ტენდერები და მოახდინონ მათზე რეაგირება.

ასევე უნდა შეისწავლოს ყურძენში შაქრის მზომი მოწყობილობების შესყიდვის გამჭვირვალობა და აუცილებლობა, რადგან გადასახადის გადამხდელებს აღნიშნული ხელსაწყოების შესყიდვა საკმაოდ ძვირი დაუჯდათ.

„აუცილებელია, რომ თითოეულ გამარტივებულ შესყიდვას ახლდეს ბაზრის კვლევის შედეგები. საჭიროა, შემსყიდველმა – შპს „მოსავლის მართვის კომპანიამ“ უფრო ცხადად განსაზღვროს ის კრიტერიუმები, რის საფუძველზეც არჩევს კონკრეტულ კომპანიასა თუ ფიზიკურ პირს.

ღვინის სააგენტომ პროცესი უნდა წარმართოს გამჭვირვალედ  და თანხებზე წვდომა ჰქონდეს მცირე მარნებს, რადგან სახელმწიფოს მხრიდან მხარდაჭერა მათ უფრო სჭირდებათ, ვიდრე იმ კომპანიებს, რომლებსაც საკმაოდ სოლიდური შემოსავლები და ბრუნვა აქვთ“, – ამბობს TI.

ორგანიზაციის განცხადებით, აუცილებელია ღვინის სააგენტომ გასცეს პასუხი კითხვაზე, თუ რა საჭიროა თანხების ორ ნაწილად ხარჯვა, „როდესაც მცირე ნაწილს გასცემს სააგენტო, თანხის უდიდეს ნაწილს კი რიცხავს შპს „მოსავლის მართვის კომპანიის“ ანგარიშზე“.

29 აპრილის მონაცემებით, ბოლო 24 საათში საქართველოში კორონავირუსის 148  ახალი შემთხვევა დადასტურდა, გარდაიცვალა 2 პაციენტი.

stopcov.ge-ზე გამოქვეყნებული მონაცემების მიხედვით, დღეს ქვეყანაში გამოვლენილი ინფიცირების 148 ახალი შემთხვევიდან: თბილისში გამოვლენილია 72 შემთხვევა, აჭარაში – 5, იმერეთში – 27, ქვემო ქართლში – 8, შიდა ქართლში – 4, გურიაში – 8, სამეგრელო – ზემო სვანეთში – 7, კახეთში – 11, მცხეთა-მთიანეთში -3, სამცხე-ჯავახეთში – 3, რაჭა-ლეჩხუმსა და ქვემო სვანეთში – 0

სტაციონარში მეთვალყურეობის ქვეშაა 296 ადამიანი. 

„უკვე 11 წელია, ეტლს ვარ მიჯაჭვული, ცალ ფეხში უკვე ვგრძნობ ძალას, მაგრამ ექიმთან ხომ უნდა მივიდე, რომ მითხრას, ოპერაცია მიშველის თუ ვერა?… საჭმლის ფულიც არ მაქვს ხშირად, მშიერი ვარ. მინდა გავიარო, მაგრამ სოციალური დახმარებაც მომიხსნეს. მარტო ვცხოვრობ, არ მკითხოთ, როგორ ვახერხებ ამას,“ – ამას ლევან მჟავანაძე ამბობს, რომელიც ქობულეთში, სოფელ ხუცუბანში ცხოვრობს.

ლევან მჟავანაძე 44 წლისაა. ის პირველი ჯგუფის შეზღუდული შესაძლებლობის მქონე პირია და პენსიის გარდა შემოსავალი არ აქვს. ეტლით მოსარგებლე პირი სოციალურ შემწეობას ითხოვს, რომ ექიმებთან მისვლა შეძლოს.

„დაახლოებით 4 წლის წინ შემიწყვიტეს სოციალური დახმარება. ბოლოს, ამ წლის იანვარში შემამოწმეს და ისევ მაღალი ქულები მოვიდა, რას წერენ, არ ვიცი… მხოლოდ სახლია აქ, ისიც ურემონტო და 2500 კვადრატი მიწა, რომელსაც მე ვერ დავამუშავებ, მოვიდეს ვინმე და ნახოს. რა ნახეს აქ, რით უნდა ვიარსებო? დღესაც მეზობლებმა მომიტანეს ფლავი და ლობიო, მეზობლად ბიცოლა გარდაიცვალა და სამძიმარზე რომ სადილებს აკეთებენ, ის მომიკითხეს,“ – გვიყვება ლევან მჟავანაძე. მისი თქმით, ცოლი თურქეთში მუშაობს უკვე მესამე წელია, შვილს კი, მეზობელ სოფელში ზრდიან ბებია და ბაბუა.

„ბიჭი გვყავს 14 წლის, საუკეთესო მოსწავლეა, ზენითის სკოლაშია, იქ წაიყვანეს ბებიამ და ბაბუამ, მე როგორ მიმეხედა, აბა?

მხოლოდ პენსია მაქვს პირველი კატეგორიის – 275 ლარი. პენსიის ფულსაც ბანკი მიქვითავს, რადგან სესხი მაქვს გამოტანილი. თვეში რეალურად 185 ლარს ვიღებ.

11 წლის წინ დავზიანდი, ტყეში შეშას ვამზადებდი და ხის ქვეშ მოვყევი… აღარაფერი მახსოვს. მითხრეს, რომ მკვდარი ვიყავი და გავცოცხლდი. მერე რეანიმობილით გადამიყვანეს თბილისის რესპუბლიკურში და იქ გამიკეთეს ოპერაცია, რკინები მქონდა ყველგან, 6 თვე პირაღმა ვიწექი, ერთხელაც გვერდულად არ დამიძინია. ახლა ეტლით გავდივარ, მაგრამ ესეც მიჭირს,“ – გვითხრა ლევან მჟავანაძემ.

„არ ცხოვრობს ეს კაცი მარტო, ასეა, ხშირად მალავენ ოჯახის წევრებს,“ – გვითხრა სოციალური მომსახურების სააგენტოს ქობულეთის ფილიალის ხელმძღვანელმა, თემურ ჭანტურიშვილმა. მისი მტკიცებით, ეტლით მოსარგებლე პირი სახელმწიფოსგან პენსიას იღებს, ხოლო მასთან ერთად დეკლარაციაში ოჯახის ქალი წევრიც ფიქსირდება, რომელიც სავარაუდოდ მისი ცოლია და შრომისუნარიანია.

„უფრო მეტად ქალი არ არის აქეთ… თურქეთში დადიოდა, ბოლო ინფორმაცია არ ვიცი,“ – გვითხრა ზვიად თამაზაშვილმა, ქობულეთის მერიის წარმომადგენელმა სოფელ ხუცუბანში. მასაც ვკითხეთ, მარტო ცხოვრობს თუ არა ეტლით მოსარგებლე ადამიანი.

„ეს ქალი საბავშვო ბაღში მუშაობდა დამლაგებლად და მერე თურქეთში წავიდა, ასე უფრო ვარჩენ ოჯახსო. პანდემიის დროს ვნახე ბოლოს. წელს არ მინახავს ოჯახში, მაგალითად,“ – გვითხრა ზვიად თამაზაშვილმა.

„ბათუმელები“ სოფელ ხუცუბანში მცხოვრებ კიდევ ერთ პირს დაუკავშირდა, რომლის თქმითაც, ლევან მჟავანაძე მარტო ცხოვრობს და მას მეზობლები ეხმარებიან. ხუცუბანში მცხოვრები ადამიანის თქმით, ლევან მჟავანაძის ცოლი თურქეთიდან პერიოდულად ჩამოდის და დაახლოებით ერთი კვირა ჩერდება.

სოციალური მომსახურების სააგენტოში უარყვეს ისიც, რომ ლევან მჟავანაძის ოჯახი წლების განმავლობაში იღებდა სოციალურ შემწეობას, რომელიც დაახლოებით 4 წლის წინ შეუწყვიტეს.

„ბოლო 10 წლის მონაცემებით, ის სოციალურ შემწეობას არ იღებდა,“ – გვითხრა თემურ ჭანტურიშვილმა, სოციალური მომსახურების სააგენტოს ქობულეთის ფილიალის ხელმძღვანელმა. ის დაგვპირდა, რომ პირადად შეამოწმებდა ლევან მჟავანაძის ოჯახს და ამას უახლოეს დღეებში გააკეთებს.

ქობულეთის მერიის წარმომადგენელმა სოფელ ხუცუბანში კი, ის დაადასტურა, რასაც ეტლით მოსარგებლე ამბობს.

„კი, დაახლოებით 3 – 4 წლის წინ შეუწყდა სოციალური დახმარება. მერე რატომ ვერ მოხერხდა მისი აღდგენა, არ ვიცი. შესაძლოა, რადგან ცოლი თურქეთში წავიდა სამუშაოდ, ამიტომაც მოხდა, ვერ გეტყვით,“ – აღნიშნა ზვიად თამაზაშვილმა „ბათუმელებთან“.

„მას გაეწია სხვადასხვა სახის დახმარება, მედიკამენტებით დახმარების პროგრამის ფარგლებში მისცეს 200 ლარი, სარეზერვო ფონდიდან გამოიყო ასევე თანხა,“ – გვითხრეს ქობულეთის მერიის პრესცენტრში. აქ ერთჯერად დახმარებაზე გააკეთეს აქცენტი, რაზეც ეტლით მოსარგებლე ლევან მჟავანაძეც გვესაუბრა და არა პრობლემის სისტემურად მოგვარებაზე, როცა ამ პირობებში მყოფ ადამიანს სახელმწიფო, ფაქტობრივად, არაადამიანურ პირობებთან პირისპირ ტოვებს სისტემური მხარდაჭერის გარეშე.

„კი, მირიან ქათამაძეც დამეხმარა რამდენჯერმე თავისი ჯიბიდან,“ – გვიყვება ისევ ლევან მჟავანაძე. – „ამ ბოლოს როცა შევეხმიანე, მითხრა, აღარ ვარ ქობულეთის მერიაშიო… ზაალ მიქელაძე პარლამენტარი გახდა და აღარ პასუხობს ჩემს ტელეფონს. ქობულეთის ახალმა მერმაც გამომიგზავნა პროდუქტები, დაუბარებია თან სოფლის დეპუტატისთვის, ჩემი ჯიბიდან ვეხმარებიო.

მე კი არავინ მინდა ასე შევაწუხო. სოციალური დამინიშნონ, რომ ექიმებამდე მივიდე.

ელექტროეტლიც კი არ მაქვს, ჩვეულებრივ ეტლით ვმოძრაობ. ელექტრონული ეტლი მირიან ქათამაძის მერობის დროს ვიღაც ბიზნესმენს აყიდინეს ჩემთვის, სამ თვეში გაფუჭდა, მერე სოფელში გარდაიცვალა ერთი ინვალიდი ბიჭი და იმის ეტლი ამომიტანეს, ისიც გაფუჭდა. ვითხოვ, ეზოს გასავლელი მაინც მომიწყონ, რომ ეტლი არ დაზიანდეს, დამპირდნენ, მაისში მოვალთო და ვნახოთ,“ – დაასრულა ლევან მჟავანაძემ.

ბათუმის ბოტანიკური ბაღის დათვალიერების ფასი იზრდება. პირველი მაისიდან ბაღში შესვლის საფასური საქართველოს მოქალაქეებისთვის 8 ლარის ნაცვლად 10 ლარი იქნება, უცხოელებისთვის კი – 20 ლარი.

ბოტანიკურ ბაღში შესვლის ბილეთის ფასი იზრდება მოსწავლეებისა და სტუდენტებისათვისაც. თუ აქამდე მოსწავლე 1 ლარად შედიოდა ბაღში, ახლა 2 ლარის გადახდა მოუწევს, სტუდენტი კი 2 ლარის ნაცვლად 5 ლარს გადაიხდის.

„ბათუმელების“ კითხვაზე, თუ რას უკავშირდება ტარიფების ცვლილება, ადმინისტრაციაში გვეუბნებიან, რომ ბაღს ბევრი ხარჯი აქვს, საკუთარი შემოსავლებით ხდება ინფრასტრუქტურის განახლება და მოვლა, ამიტომ გაიზარდა დათვალიერების ფასიც.

თუმცა ადმინისტრაციაში იმასაც ამბობენ, რომ შეღავათიანი პაკეტი საკმაოდ ბევრ ჯგუფზე გავრცელდება. მათ შორის: შშმ პირებზე, სამხედროებზე, სოციალურად დაუცველ პირებსა და პენსიონერებზე.

„სრულ ინფორმაციას სერვისებსა და პაკეტებთან დაკავშირებით მალე გამოვაქვეყნებთ ჩვენს გვერდზე“ – გვითხრეს ადმინისტრაციაში.

ბოტანიკური ბაღი ყოველი თვის პირველ რიცხვში უფასო იქნება უკრაინელი ლტოლვილებისთვის, რომლებიც საქართველოში ცხოვრობენ.

ადმინისტრაციის თქმით, ბოტანიკურ ბაღში შესვლა უფასო იქნება მნიშვნელოვან დღესასწაულებზე.

ადმინისტრაციის განცხადებით, ტარიფების ცვლილება შეთანხმებულია ბათუმის მერიასთან.

____________________