კიევის ოლქში მცხოვრები მოხუცი ქალი, რომელმაც ძაღლი შარფში გაახვია, სოციალური ქსელების ვარსკვლავად იქცა.
უკრაინელი მარია ეფიმოვა გორენკიდან სოციალურ ქსელებში გავრცელებული ფოტოთი გახდა ცნობილი, რომელშიც ჩანს, როგორ ჰყავს მარიას შეფუთული ძაღლი თავსაფარში. იგი ასე იცავდა ძაღლს ბომბების ხმისგან.
უკრაინული გამოცემის, „უნიანის“ ცნობით, რუსული ნაღმის ნამსხვრევები მარიას ეზოში დაეცა, მაგრამ ქალმა საყვარელი ძაღლის, ბონიას გარეშე ევაკუაციაზე უარი თქვა, დარჩა სახლში და დაბომბვას საყვარელ ცხოველთან ერთად გადაურჩა.
„ის ჩემთვის შვილივითაა და ძალიან მეცოდებოდა. არ შემიძლია აღგიწეროთ, როგორი ჭკვიანია… როგორც კი სროლა იწყება, ჩემი ცრემლების ლოკვას იწყებს,“ – ამბობს მარია.
მარიას შვილიშვილი დონბასში იბრძვის უკრაინის დასაცავად, მისი ცოლ-შვილი უცხოეთში წავიდა ლტოლვილად. ქალი ამბობს, რომ ძალიან ენატრება ოჯახი.
მარიას ძაღლი, 4 წლის ბონია, დაბომბვისას შიშისგან გაჭაღარავდა.
მარია და ბონია. კადრი „უნიანის“ ვიდეომასალიდან
„მარიას სახლის სახურავი ჭურვმა დააზიანა, მაგრამ ქალი არ წუწუნებს, უხარია, რომ სახლი ცოტათი მაინც გადარჩა.
მაისში მარია 80 წლის გახდება. ის გაზაფხულის დასრულებას ელოდება, თუმცა არა დაბადების დღის გამო – მარიას კარტოფილის დათესვა უნდა,“ – წერს „უნიანი“.
