უკრაინის ტელევიზიისა და რადიომაუწყებლობის სახელმწიფო კომიტეტმა რუსეთის მიერ ჟურნალისტების წინააღმდეგ ჩადენილი 243 დანაშაული აღრიცხა.
კომიტეტის საიტზე გამოქვეყნებული ინფორმაციით, ეს დანაშაულები, რუსეთის უკრაინაში შეჭრიდან 27 აპრილის ჩათვლით, ქვეყნის 16 რეგიონში დაფიქსირდა.
ყველაზე მეტი თავდასხმა ჟურნალისტებზე კიევში და კიევის რეგიონში მოხდა, მათ შორის, ჟურნალისტების მკვლელობა, გაუჩინარება, დაჭრა, გატაცება, დამიზნებით სროლა და მუქარა, სატელევიზიო ანძებზე თავდასხმა და კიბერდანაშაულები.
კომიტეტის განცხადებით, დანაშაულების დიდი რაოდენობა აღრიცხეს ასევე ზაპოროჟიეში და ხერსონის რეგიონში. რუსული არმიის მიერ ოკუპირებულ ქალაქებში იტაცებენ, ესვრიან და ემუქრებიან ჟურნალისტებს. დაფიქსირდა კიბერდანაშაულები, რედაქციების დახურვისა და უკრაინული სამაუწყებლო არხების გათიშვის ფაქტები.
ომის დაწყების შემდეგ, 7 ჟურნალისტი მოკლეს პროფესიული მოვალეობის შესრულებისას, 15 – დაკარგულია, 14 ჟურნალისტი დაიღუპა ბრძოლაში ან რუსეთის თავდასხმის დროს, როდესაც ისინი არ ასრულებდნენ პროფესიულ მოვალეობას, 9 – დაიჭრა, ხოლო 8 ჟურნალისტი დააკავეს და გაიტაცეს.
კომიტეტის საიტზე აღნიშნულია სატელევიზიო ანძებზე საარტილერიო თუ საჰაერო თავდასხმის 11 შემთხვევა.
_________________
ფოტო: ArmiaInform.com.ua
