უკრაინის მმართველი პარტიის საპარლამენტო ფრაქციის თავმჯდომარე დავით არახამია ევროკავშირს და ამერიკის შეერთებულ შტატებს ბიძინა ივანიშვილისა და მისი აქტივების წინააღმდეგ დასავლეთში პირადი სანქციების დაწესების განხილვისკენ მოუწოდებს.
არახამია ტელეგრამზე წერს, რომ ქართველები და უკრაინელები ყოველთვის იყვნენ და დარჩებიან მოძმე ერებად. იგი ხაზს უსვამს ქართველი საზოგადო მოღვაწეების, აქტივისტებისა და უკრაინაში ომში მონაწილე მოხალისეების მხარდაჭერას და აღნიშნავს, რომ „სამწუხაროდ იმავეს ვერ იტყვის საქართველოს ხელისუფლებაზე”.
ამის მიზეზად უკრაინის მმართველი პარტიის საპარლამენტო ფრაქციის ხელმძღვანელი „ბიძინა ივანიშვილის რუსულ პოლიტიკურ ელიტასთან არსებულ ახლო კავშირებს“ ასახელებს, რის დასტურადაც 25 აპრილს გამოქვეყნებული აუდიოჩანაწერი მოჰყავს.
„საქართველოს დღევანდელი ხელისუფლების პოლიტიკის არსი უბრალოდ კრემლის მითითებების შესრულებაა. ეს არის მათი რიტორიკის – რუსეთის მიერ უკრაინის წინააღმდეგ ჩადენილი სამხედრო დანაშაულების არაღიარებისა და რუსეთისთვის სანქციების გვერდის ავლაში დახმარების მიზეზი.
დღეს ივანიშვილი საქართველოს იანუკოვიჩი გახდა. ის და მისი მეგობრები ატარებენ პოლიტიკას უკრაინის მიმართ, რომელსაც ქართველი ხალხი არ უჭერს მხარს. მათ სურთ ქართველებსა და უკრაინელებს შორის ჩამოაგდონ დაპირისპირება, რომელიც ათწლეულების განმავლობაში გაგრძელდება. ამის თავიდან ასაცილებლად, მივმართავ ევროკავშირისა და აშშ-ს ხელმძღვანელობას, განიხილონ ივანიშვილზე და მის აქტივებზე დასავლეთში პირადი სანქციების დაწესება. პასუხისმგებლობას არავინ უნდა გაექცეს – არც ოკუპანტები და არც ისინი, ვინც მათ ეხმარება,“ – წერს დავით არახამია.
