„ჩვენ ვაგრძელებთ ცის დახურვას რუსული საფრთხისგან“, – წერს უკრაინის შეიარაღებული ძალების საჰაერო ძალების სარდლობა ფეისბუქზე. უწყების ცნობით, უკრაინამ Zenit C-300 სარაკეტო კომპლექსი მიიღო პარტნიორი ქვეყნებისგან:
„სამხრეთ საჰაერო სარდლობის სარაკეტო ძალებმა მიიღეს C-300 სარაკეტო კომპლექსი პარტნიორი ქვეყნებიდან, რაც მნიშვნელოვნად გააძლიერებს საჰაერო თავდაცვას სამხრეთ რეგიონში.
C-300 ეფექტურად მუშაობს რუსი ოკუპანტების ობიექტების დიდი ნაწილის წინააღმდეგ და შეუძლია ჩამოაგდოს თვითმფრინავი, ფრთოსანი და ბალისტიკური რაკეტები 5-დან 150-მდე კილომეტრის მანძილზე. ამავე დროს, არ აქვს მნიშვნელობა რა სიმაღლეზე დაფრინავს სამიზნე – 10 მეტრის თუ 27 კილომეტრის სიმაღლეზე.
აღნიშნული კომპლექსი უკვე ასრულებს საბრძოლო ამოცანებს. ეს დასაწყისია, გაგრძელება იქნება“.
საზენიტო სარაკეტო სისტემა С-300 შეიქმნა ჯერ კიდევ საბჭოთა კავშირის დროს და 1979 წლიდან გამოიყენება მსოფლიოს ბევრ ქვეყანაში.
რუსეთის თავდასხმის პირველივე დღეებიდან უკრაინა ცის დახურვას სთხოვდა ნატოს, თუმცა ნატომ ამაზე უარი თქვა.
უკრაინის პრეზიდენტის, ვოლოდიმირ ზელენსკის მრჩეველმა, ოლექსეი არესტოვიჩმა რამდენიმე დღის წინ ჟურნალისტებთან საუბრისას განაცხადა, რომ უკრაინა თავად დახურავს ცას.
„ჩვენ გვჭირდება საჰაერო თავდაცვის სისტემა, რომელიც უკვე გვაქვს. ჩვენ თვითონ დავხურავთ ცას“, – თქვა მან.
