Batumelebi

ევროკავშირმა უნდა განიხილოს რუსეთისთვის გაყინული უცხოური ვალუტის რეზერვების ჩამორთმევა და უკრაინისთვის გადაცემა აღდგენის პროცესისთვის, – განაცხადა ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჟოზეფ ბორელმა ჟურნალ Financial Times-თან ინტერვიუში. ბორელმა გაიხსენა ამერიკის შეერთებული შტატების მაგალითი და აღნიშნა, რომ თუკი აშშ-მ ავღანეთში ძალაუფლების თალიბების ხელში გადასვლის შემდეგ მილიარდობით დოლარი ჩამოართვა ავღანეთის ცენტრალურ ბანკს, მაშინ ეს რუსეთის გაყინული რეზერვების შემთხვევაშიც უნდა იყოს.

„ჩვენ ჯიბეებში გვაქვს ფული და ვიღაცამ უნდა ამიხსნას, რატომ არის ეს კარგი ავღანური ფულის შემთხვევაში და არ არის კარგი რუსული ფულისთვის,“ – უთხრა გამოცემას ბორელმა.

როგორც გამოცემა წერს, უკრაინის აღდგენის საკითხი დასავლეთში აქტიურად განიხილება და არსებობს დისკუსიები იმაზეც, თუ როგორ უნდა მიიღოს მონაწილეობა ამაში რუსეთმა. გაყინული აქტივების ჩამორთმევის იდეას ოფიციალური ბრიუსელი ჯერ არ გამოხმაურებია.

„ეს არის ერთ-ერთი ყველაზე მნიშვნელოვანი პოლიტიკური კითხვა მაგიდაზე: ვინ გადაიხდის უკრაინის რეკონსტრუქციისთვის?“ – თქვა ბორელმა.

აღნიშნულ საკითხზე ევროპული აბჭოს პრეზიდენტ შარლ მიშელს გამოცემა „ინტერფაქსმა“ კითხვა 5 მაისს დაუსვა. მიშელის თქმით, ის, როგორც პროფესიით იურისტი, მიიჩნევს, რომ სამართლიანი იქნება ამ ნაბიჯის გადადგმა. ეს, თავის მხრივ, საკმაოდ ხანგრძლივ პროცედურებთანაა დაკავშირებული:

„პირადად მე სრულიად დარწმუნებული ვარ, რომ კრიტიკულად მნიშვნელოვანია არა მხოლოდ აქტივების გაყინვა, არამედ მათი კონფისკაციის შესაძლებლობის შექმნა, რათა გამოყენებული იყოს ქვეყნის აღდგენის პროცესში. თუმცა როგორც პროფესიით იურისტმა ვიცი და ვაღიარებ, რომ იურიდიული დონე არც ისე მარტივია. ევროკავშირის მასშტაბით 27 სამართლებრივი სისტემაა და ევროკავშირის ბევრ წევრ ქვეყანაში ამას სასამართლოს გადაწყვეტილების მიღება დასჭირდება, რათა ეს შესაძლებელი გახდეს. ამას დრო სჭირდება, ეს რთული და ხანგრძლივი პროცესია. მაგრამ მე დავავალე საბჭოს იურიდიულ სამსახურს მოამზადოს რამდენიმე შესაძლო იდეა, კანონის უზენაესობის პრინციპების შესაბამისად, სამართლებრივი გადაწყვეტის მოსაძებნად, რაც შესაძლებელს გახდის ევროკავშირის ან მსოფლიოს სხვა ქვეყნების მიერ სანქცირებული ადამიანების აქტივების კონფისკაციას“.

როგორც „როიტერსი“ რუსულ  RIA-ზე დაყრდნობით წერს, რუსეთის საგარეო საქმეთა მინისტრის მოადგილემ, ალექსანდრე გრუშკომ თქვა, რომ ბორელის ინიციატივა არის „სრული უკანონობა“ და თუ მიიღებენ, ეს დააზარალებს ევროპას.

„ისინი (ზომები) დარტყმას მიაყენებენ თავად ევროპელებს, თანამედროვე ფინანსურ სისტემას და ძირს გამოუთხრიან ნდობას ევროპისა და მთლიანობაში დასავლეთის მიმართ“, – ციტირებს საინფორმაციო სააგენტო RIA გრუშკოს დღევანდელ განცხადებას.

„როიტერსის“ ცნობითვე, რუსეთის ელიტის გაყინული აქტივების უკრაინისთვის გადაცემის შესახებ აშშ-ის პრეზიდენტის, ჯო ბაიდენის წინადადების პასუხად რუსეთის ყველა მაღალჩინოსანმა დეპუტატმა გასულ კვირას განაცხადა, რომ მოსკოვმა უნდა ჩამოართვას დასავლეთის მოქალაქეებს საკუთრებაში არსებული ქონება.

28 აპრილს ბაიდენმა უკრაინის მხარდასაჭერად კონგრესს სთხოვა 33 მილიარდი დოლარის გამოყოფა, ასევე, აშშ-ის სახელმწიფოსთვის რუსი ოლიგარქების მეტი აქტივების დაპატიმრებისა და მათი კონფისკაციის უფლების მინიჭება, რათა შემოსული თანხა უკრაინას გადაეცეს.

ჯოზეფ ბორელის იდეას გამოეხმაურა უკრაინის პრეზიდენტის მრჩეველი მიხაილო პოდოლიაკი და აღნიშნა, რომ ეს იქნებოდა გზა სამართლიანობის აღდგენის, რადგან მისი სიტყვებით ევროკავშირისთვის ნედლეულის მიყიდვით აფინანსებს რუსეთი თავის ომს უკრაინაში.

„დანგრეული ინფრასტრუქტურა და ქალაქები – ვიღაცამ უნდა გადაიხადოს. მასობრივი მკვლელობების დასაფინანსებლად რუსეთი აგროვებდა რეზერვებს ევროკავშირისთვის ნედლეულის მიყიდვით. ჯოზეფ ბორელის რუსეთის ცენტრალური ბანკის გაყინული აქტივების უკრაინის სასარგებლოდ ჩამორთმევის წინადადება არის სამართლიანობის აღდგენის საშუალება,“ – წერს პოდოლიაკი.

უკრაინაში რუსეთი 24 თებერვალს შეიჭრა და ბომბავს მის ქალაქებს, ანადგურებს ინფრასტრუქტურას და ხოცავს მშვიდობიან მოსახლეობას.

უკრაინის პრეზიდენტის მრჩეველი, მიხაილო პოდოლიაკი კიდევ ერთხელ საუბრობს უკრაინაში ომის დაწყების მიზეზებზე და აცხადებს, რომ „რუსეთის ავადმყოფური იმპერიული ამბიციების გარდა სხვა რაციონალური მიზეზები არ არსებობდა“.

მისი თქმით, რამდენადაც არც ნატოს ქვეყნები აპირებდნენ რუსეთზე თავდასხმას და არც უკრაინა გეგმავდა ყირიმზე შეტევას, რუსი ჯარისკაცები კვდებიან არა საკუთარი ქვეყნის დასაცავად, არამედ სხვა ქვეყნის ოკუპაციისთვის.

„მოდი, ისევ ვთქვათ. ნატოს ქვეყნები არ აპირებდნენ რუსეთზე თავდასხმას. უკრაინა ყირიმზე თავდასხმას არ აპირებდა. რუსი სამხედროები კვდებიან არა თავიანთი ქვეყნის დასაცავად, არამედ სხვისი ოკუპირების მცდელობისთვის. რუსეთის ავადმყოფური იმპერიული ამბიციების გარდა, სხვა რაციონალური მიზეზები არ არსებობდა ამ ომისთვის,“ – წერს პოდოლიაკი.

დღეს, 9 მაისს, რუსეთში მოსკოვი მასშტაბური სამხედრო აღლუმით აღინიშნავს ფაშიზმზე გამარჯვების 77 წლისთავს. აღლუმზე რუსეთის ფედერაცია წარმოადგენს თავის სამხედრო აღჭურვილობასა და არმიის ნაწილს, როგორც ქვეყნის ღირსებისა და ძლიერების სიმბოლოს.

რუსული „რია ნოვოსტის ცნობით“, მოსკოვში გამარჯვების აღლუმის საავიაციო ნაწილი გაუქმდა. როგორც მედია იუწყება, მოსკოვში აღლუმის საავიაციო ნაწილის გაუქმება ცუდ ამინდს უკავშირდება. ამის შესახებ ჟურნალისტებს რუსეთის პრეზიდენტის პრესმდივანმა, დიმიტრი პესკოვმა განუცხადა.

გაერთიანებული სამეფოს დაზვერვის უახლესი მონაცემებით, რომელიც 9 მაისს გამოქვეყნდა, რუსეთს თავდაპირველად მხარდაჭერილი და საჯაროდ გაცხადებული სტრატეგია – რუს სამხედროებს მხოლოდ წერტილოვანი დაბომბვები განეხორციელებინათ და მაქსიმალურად აეცილებინათ კოლატერალური ზიანი, ზუსტი დამიზნების იარაღის მარაგების ამოწურვის გამო ვერ სრულდება. ეს იმიტომ, რომ ომი გაგრძელდა იმაზე დიდხანს, ვიდრე ამას რუსეთი მოელოდა.

ზუსტი დამიზნების იარაღის გარეშე დარჩენილი რუსეთი ძველ, ნაკლებად სანდო, ნაკლებად ზუსტ და ადვილად შესაჩერებელ იარაღს იყენებს. სწორედ ამიტომ იგი განურჩევლად ბომბავს უკრაინის დაბებსა და ქალაქებს. ბრიტანული დაზვერვა წერს, რომ რუსეთს სავარაუდოდ გაუჭირდება გახარჯული ზუსტი დამიზნების იარაღის ჩანაცვლება ახლო მომავალში.

ბრიტანული დაზვერვის ანალიზის მიხედვით, უკრაინაში რუსეთის ომმა აჩვენა ამ უკანასკნელის სისუსტეები დიდ მასშტაბზე ზუსტი დამიზნების დარტყმების განხორციელების თვალსაზრისით.

„უკრაინაში შეჭრის დაწყებისას, რუსეთმა საჯაროდ წაახალისა წერტილოვანი დაბომბვისა და კოლატერალური ზიანის შეზღუდვის შესაძლებლობა, განაცხადა, რომ უკრაინის ქალაქები დაცულები იქნებოდნენ დაბომბვისგან.

თუმცა იმის გამო, რომ კონფლიქტი რუსეთის ომამდელ მოლოდინს მიღმა გრძელდება, რუსეთის ზუსტი დამიზნების საბრძოლო მასალის მარაგი სავარაუდოდ სრულიად ამოიწურა.

ამან აიძულა ადვილად ხელმისაწვდომი, მაგრამ დაძველებული საბრძოლო მასალის გამოყენება, რომელიც ნაკლებად საიმედოა, ნაკლებად ზუსტი და ადვილად შესაჩერებელია. რუსეთს, სავარაუდოდ, გაუჭირდება იმ ზუსტი დამიზნების იარაღის შეცვლა, რომელიც უკვე ამოწურა“.

დღეს, 8 მაისს, აზოვსტალიდან მედიისთვის პრესკონფერენცია გამართეს „აზოვის“ პოლკის ოფიცრებმა, სადაც ბევრ საკითხთან ერთად პოლკის  გადარჩენის ვერსიები განიხილეს.

აზოვის პოლკის დაზვერვის ოფიცრის, ილია სამოილენკოს თქმით, პოლკის მებრძოლებისთვის დანებება სიკვდილის ტოლფასია. მისი თქმით, რუსები ავრცელებენ პროპაგანდისტულ ვიდეოებს, სადაც უკრაინელ სამხედროებს დანებების შემთხვევაში ღირსეულ მოპყრობას ჰპირდებიან, თუმცა შემდეგ მათ კლავენ.

ოფიცრის თქმით, ამ სიტუაციაში მათთვის არსებობს რამდენიმე ვარიანტი. პირველია დაყარო იარაღი და დაელოდო სიკვდილს, მეორე – დაივიწყო მოვალეობა, დადებული ფიცი და სცადო გაქცევა.

სამოილენკოს თქმით, ზუსტად ეს გააკეთა საზღვაო ქვეითთა ​​36-ე ბრიგადის მეთაურმა – მან უარი თქვა ბრძანების შესრულებაზე და სამხედრო აღჭურვილობით, ჯარისკაცების მცირე ჯგუფთან ერთად, პოზიციების გარღვევა და უკრაინულ ჯართან შეერთება ქალაქიდან გაქცევით სცადა.

მან აღნიშნა, რომ ახლა მარიუპოლში მყოფი სამხედროები უკრაინის პოზიციებიდან 100 კმ-ზე უფრო შორს იმყოფებიან, ამიტომ გარღვევა შეუძლებელია.

ოფიცირის თქმით, გარდა ამისა, არსებობს მესამე ვარიანტიც – დაყარო იარაღი და ჩაბარდე. სამოილენკომ ხაზგასმით აღნიშნა, რომ მარიუპოლის მცველებისთვის მტერზე ჩაბარება დაუშვებელია.

„მეოთხე ვარიანტი კი – ერთადერთი გზაა, რომელიც სიცოცხლის გარანტიას ისე გაძლევს, რომ არ შეგრცხვეს – ეს არის ბრძოლა. ჩვენ მთელი ეს პერიოდი ვიცოდით, რომ აზოვის პოლკს არ ჰქონდა გადარჩენის შანსი, თუ ტყვედ ჩავარდებოდა. დანებება მიუღებელია, რადგან მტრისთვის ამხელა საჩუქრის მიცემა არ შეგვიძლია. თითოეული ტყვე რუსეთის ფედერაციისთვის პოლიტიკური და სამხედრო ზეწოლის რესურსია“, – განმარტა სამოილენკომ.

სამოილენკომ გაიხსენა, რომ აზოვის ერთ-ერთი მებრძოლი მეტსახელად „დენი“ აპრილის ბრძოლების დროს ტყვედ ჩავარდა.

„ის უგონო მდგომარეობაში იყო, ჯგუფი ქალაქში რუსმა ჯარისკაცებმა დაატყვევეს. შემდეგ რუსულმა პროპაგანდამ გადაიღო ვიდეო, რომ თითქოს უკრაინელი ჯარისკაცები იარაღს ყრიან და ნებდებიან“, – თქვა მან.

შემდგომში ოკუპანტებმა ის დაახრჩვეს, ფოტო კი სამხედროს დედას გაუგზავნეს.

ოფიცრის თქმით, რუსები ავრცელებენ პროპაგანდისტულ ვიდეოებს ჩაბარების მოწოდებით და სამხედრო ტყვეების ღირსეულ მოპყრობას ჰპირდებიან, მაგრამ შემდეგ მათ კლავენ.

მან აღნიშნა, რომ მსგავსი ქმედებები ჟენევის კონვენციის დარღვევაა.

„ეს რუსებისთვის დამახასიათებელია. ჩვენ ვიცოდით, რომ აზოვის პოლკის მებრძოლებისთვის ტყვეობა სიკვდილს ნიშნავს, მაგრამ ახლა უკვე გვაქვს ამის ნათელი მტკიცებულება – მტერი არაადამიანურად იქცევა და არღვევს ომის ყველა კანონს“, – ხაზგასმით აღნიშნა სამოილენკომ.

ამერიკის შეერთებული შტატების პირველი ლედი ჯილ ბაიდენი უკვე უკრაინის ქალაქ უჟგოროდში იმყოფება. მას უკრაინის პირველი ლედი, ელენა ზელენსკა დახვდა.

უკრაინაში ჯილ ბაიდენის ვიზიტის შესახებ პირველად ინფორმაციებს უკრაინული მედია ავრცელებს.

უკრაინული მედიის ცნობით, ჯილ ბაიდენმა თქვა, რომ მას სურს დედის დღე გაატაროს უკრაინელ დედებთან და მათ შვილებთან ერთად.

ჯილ ბაიდენი უკვე ეწვია უჟგოროდის სკოლას, სადაც თავს აფარებენ დევნილები ქვეყნის იმ რეგიონებიდან, სადაც საომარი მოქმედებები მიმდინარეობს.

მარიუპოლში, აზოვსტალის ქარხანაში თავშეფარებულმა მებრძოლებმა დღეს, 8 მაისს, პრესკონფერენცია გამართეს. უკრაინელი სამხედროები, რომლებიც მარიუპოლს 24 თებერვლის შემდეგ იცავენ, ბლოკადაში არიან. რუსეთის შეიარაღებული ძალები განუწყვეტლივ ბომბავს აზოვსტალის ტერიტორიას.

პრესკონფერენციის ტრანსლაცია უკრაინულმა გამოცემა „Hromadske“-მ უზრუნველყო.  ჟურნალისტების კითხვებს „აზოვსტალის“ ბუნკერიდან აზოვის პოლკის მეთაურის მოადგილე სვიატოსლავ პალამარი (კალინა) და დაზვერვის ოფიცერი ილია სამოილენკო პასუხობდა.

ილია სამოილენკო დაადასტურა ღალატის ამბავი და თქვა, რომ რუს სამხედროებს „აზოვსტალის“ რუკები ქარხნის ყოფილმა თანამშრომელმა აჩვენა.

სამოლიენკოს თქმით, გარდა სამხედროებისა, „აზოვსტალის“ ტერიტორიაზე, სხვადასხვა გვირაბებში, სავარაუდოდ ისევ არიან სამოქალაქო პირები.

„ზოგი გვირაბი ჩამონგრეულია და ხალხის გადასარჩენად ნანგრევების გათხრა გვიწევს. მაგრამ უნდა გესმოდეთ, რომ ჩვენ არ ვართ გაწვრთნილები მაშველებად, არ გვაქვს შესაბამისი ტექნიკა და გვიჭირს ამის კეთება. მაქსიმალურად ვცდილობთ ყველა გადავარჩინოთ,“ – თქვა ილია სამოლიენკომ.

კითხვაზე, თუ აქვს კონტაქტი საკუთარ ოჯახთან, სამოლიენკომ თქვა, რომ ოჯახს ყოველდღე ელაპარაკება და ისინი კარგად არიან.

„მაგრამ ჩემთვის ამ ეტაპზე მათთან კონტაქტი არ არის უმთავრესი საზრუნავი. მე ჩვენს დანაყოფზე და ბრძოლაზე ვღელავ ყველაზე მეტად. არიან ჯარისკაცები, რომლებიც ოჯახის გამო ყველაზე შეწუხებულები არიან, მაგრამ არა მე,“ – თქვა დაზვერვის ოფიცერმა.

მორიგი კითხვა დაჭრილებს შეეხებოდა. რამდენი დაჭრილი ჯარისკაცი გყავთ და რამდენი დაიღუპა შესაბამისი სამედიცინო დახმარების არ არსებობის გამო? – ჰკითხეს მას.

„ჩვენი ექიმების წყალობით ბრძოლის ველზე დაჭრილი და საველე ჰოსპიტალში გადმოყვანილი მებრძოლების 95% გადარჩა. ასობით არიან, მაგრამ მნიშვნელოვანია გვახსოვდეს, რომ მათი გამოჯანმრთელების პროცესი საკმაოდ რთულად მიმდინარეობს. ისინი იღუპებიან ოპერაციის თუ პირველადი დახმარების შემდგომი გამოჯანმრთელების პროცესში, ისეთი თანმდევი დაავადებებისგან, როგორიცაა მაგალითად პნევმონია. ასევე ჩვენ არ გვაქვს სამედიცინო აღჭურვილობა, რაც საჭიროა სიცოცხლის შესანარჩუნებლად. მსგავსი ტექნიკის დიდი ნაწილი განადგურდა, დიდი ნაწილი კი არც არასდროს გვქონია. ასე რომ კრიტიკულად მნიშვნელოვანია, დაჭრილების ევაკუაცია“, – თქვა კითხვის პასუხად ილია სამოილენკომ.

კითხვაზე, ჰყავს თუ არა აზოვის პოლკს რუსი სამხედრო ტყვეები „აზოვსტალში“ და რამდენი, სამოილენკომ უპასუხა, რომ რამდენიმე ჰყავდათ და გაცვალეს.

„ისინი ძირითადად იღუპებიან ან იჭრებიან რუსული ბომბებისგან, ამიტომ ბევრი ტყვე არ გვყავს,“ – თქვა ილია სამოლიენკომ.

მისივე თქმით, „აზოვსტალში“ არიან ქალი სამხედროებიც და ისინი კარგად უმკლავდებიან იმ რთულ სიტუაციას, რომელშიც არიან.

ჟურნალისტებმა დაზვერვის ოფიცერს ჰკითხეს, თუ რომელ ქვეყანას მიმართავენ ევაკუაციისთვის და ვისგან ელიან დახმარებას.

„ახლა ვხედავთ, რომ ბევრი პეტიცია ვრცელდება ჩვენი გადარჩენის მოთხოვნით. ადამიანებს სურთ დაგვეხმარონ, მაგრამ არ იციან როგორ. სინამდვილეში ნებისმიერ ქვეყანას შეუძლია დახმარება, გარდა რუსეთის და მისი მოკავშირეებისა. ნებისმიერ ქვეყანას, რომელსაც შეუძლია მოგვცეს ევაკუირების პროცესში უსაფრთხოების გარანტია. მნიშვნლობა არ აქვს, რომელი ქვეყანა იქნება ეს“, –  უპასუხა ილია სამოილენკომ.

ილია სამოილენკოს თქმით, „აზოვსტალის“ მებრძოლები ხედავენ უპრეცედენტო  საინფორმაციო მხარდაჭერას მსოფლიო მედიაში, უხარიათ, რომ ხალხი მათ ცნობს და ენდობა.

„ჩვენ მარიუპოლში, ჩვენი ქვეყნისა და ხალხის კეთილდღეობისთვის ყველაფერს ვაკეთებთ. მეომრები ვართ და მიჩვეული ვართ პრობლემების გადაწყვეტას ბრძოლის ველზე. ესაა ჩვენი საქმე. დანარჩენი პოლიტიკური ბრძოლა ხელისუფლების საქმეა და მათ ვენდობით. ჩვენ გვჭირდება სახელმწიფოს, ხელისუფლების დახმარება, ვხედავთ ხალხის და მედიის უდიდეს მხარდაჭერას, განცხადებებს მედიაში და მადლიერები ვართ, მაგრამ ჩვენ გვჭირდება რეალური ნაბიჯები.

ჩვენ ყველაფერს ვაკეთებთ, რაც შეგვიძლია, დარწმუნებული ვარ არავინ ელოდა, რომ ამდენ ხანს გავძლებდით, მაგრამ ჯერ კიდევ ვიბრძვით… ჩვენ გვესმის, რომ მთელ ქვეყანაში მძიმე მდგომარეობაა და არ ვცდილობთ ფოკუსის ჩვენზე გადმოტანას, მიუხედავად ამისა ჩვენ შევაჩერეთ მტრის დიდი ძალა და ვწევთ დიდ წინააღმდეგობას. ვაკეთებთ ჩვენს საქმეს, რაც ქვეყნის დაცვაა,“ – თქვა ილია სამოილენკომ.

მისივე თქმით, ახლა ყველაზე მნიშვნელოვანია ორი ოპერაცია: დაჭრილების  და დანარჩენი სამხედროების ევაკუირება.

ჟურნალისტების კითხვაზე, რომელ ქვეყანაში სურთ ევაკუაცია, მესამე ქვეყანაში თუ უკრაინაში, დაზვერვის ოფიცერი ილია სამოილენკო ამბობს: „იდეალურ მდგომარეობაში უკრაინაში დარჩენა გვირჩევნია, მაგრამ არჩევანის პოზიციაში არ ვართ. ასე რომ ნებისმიერ ვარიანტზე, რაც უსაფრთხო იქნება, თანახმა ვართ. რადგან ერთხელაც დასრულდება ომი და რუსული არმიის ის წარმომადგენლები, როლებიც ომის დანაშაულებს სჩადიან გასამართლდებიან, ჩვენ კი ამ პროცესში აუცილებლად შევიტანთ ჩვენს წვლილს“.

ჟურნალისტების კითხვაზე, რა არის ყველაზე მძიმე ბრძოლის დროს, ილია სამოილენკომ თქვა, რომ უდანაშაულო ადამიანების სიკვდილის ნახვა: „როდესაც ტანკიდან ესვრიან, სამოქალაქო ადამიანებს. ადამიანს უმიზნებენ და ესვრიან მაგალითად გრადებს. ეს ამ ადამიანს ანადგურებს, მისი სხეულის ნაწილები ფრინავს ჰაერში. და შენ, შორიდან ვერაფერს აკეთებ. ეს და კიდევ ბევრი ბინძური რამ ხდება ომში, რაც რთული გასაგებია. ამიტომ მესამე მხარის ტერიტორიაზე გადაყვანაზეც თანახმა ვართ. მეორე მხრივ რუსებს შეუძლიათ დაგვხოცონ და, უბრალოდ, მორჩეს. რაც საფრთხეა უკრაინის და მსოფლიო უსაფრთხოებისთვის… მაგრამ გვჯერა, რომ მსოფლიო უსაფრთხოებისთვის ამას არ დაუშვებენ. თქვენი საინფორმაციო მხარდაჭერის იმედი გვაქვს, სხვა ქვეყნებს შეუძლიათ ითამაშონ მესამე მხარის, მედიატორი როლი“.

„რუსეთის ყველაზე თანამედროვე ტანკებიდან სულ მცირე ერთი T-90 M განადგურებულია. T-90M-ს, რომელიც რუსეთის არმიამ 2016-ში წარადგინა, მოდერნიზებული დაცვის, ცეცხლის მართვისა და სანავიგაციო სისტემები აქვს“, – წერს დიდი ბრიტანეთის დაზვერვა ტვიტერზე, 7 მაისის განახლებაში.

უწყების ინფორმაციით, რუსეთის საუკეთესოდ აღჭურვილ დანაყოფებს დაახლოებით 100 T-90M ჰყავთ.

ბრიტანეთის დაზვერვა აღნიშნავს, რომ ომი უკრაინაში რუსეთის ბრძოლისუნარიან დანაყოფებს დიდ ზიანს აყენებს, ეს დანაკარგები კი ხელს უშლის რუსეთის წინსვლას.

„რუსეთს საგრძნობლად დიდი დრო და ფინანსები დასჭირდება, რომ ამ კონფლიქტის შემდეგ თავისი სამხედრო ძალების აღადგინოს. მოდერნიზებული და თანამედროვე ტექსნიკის შეცვლა და განახლება განსაკუთრებით რთული იქნება რუსეთისთვის დაწესებული სანქციების ფონზე“.

გუშინდელ, 6 მაისის განახლებაში, დიდი ბრიტანეთის დაზვერვა აღნიშნავდა, რომ აზოვსტალის გაუვნებლებისა და მარიუპოლის სრულად აღებისთვის რუსეთის განახლებული ძალისხმევა, სავარაუდოდ, დაკავშირებულია 9 მაისის – გამარჯვების დღის მოახლოებასთან და პუტინის სურვილთან – გამოაცხადოს სიმბოლური გამარჯვება უკრაინაში.

მთავარი ფოტო: T-90M/armyrecognition.com