ნეტგაზეთი • RU

ბათუმში პოლიციამ აქციაზე კარვები დაშალა, დააკავეს 10-მდე პირი

ბათუმის საპროტესტო აქციაზე პოლიციელებმა კარვები დაშალეს, დააკავეს 10-მდე აქციის მონაწილე, მათ შორის, უმაღლესი საბჭოს და ბათუმის საკრებულოს წევრები ოპოზიციიდან.

“ჩვენ განვმარტეთ,  რომ აღარ იყო აქციაზე ის რაოდენობა, ქუჩა გადაკეტილი ყოფილიყო ისევ,”- უპასუხეს პოლიციის ხელმძღვანელმა პირებმა უმაღლესი საბჭოს დეპუტატს ენმ-დან ელგუჯა ბაგრატიონს, რომელიც ადგილზე რჩება.

აჭარის მთავრობის სახლის წინ პოლიციელებმა 6 მაისის საღამოს 10-მდე კარავი დაშალეს.

რატომ იყო სამართლიანი კარვების დაშლა, როცა, მაგალითად, 2020 წელს ამავე ადგილას იყო კარვები გაშლილი “თავისუფლების კვარტალში” და გადაკეტილი იყო ქუჩა დაახლოებით 5 თვე? – ვკითხეთ დავით მაღრაძეს, პოლიციის ერთ-ერთ მაღალჩინოსანს, მან ჩვენი კითხვა უპასუხოდ დატოვა.

აქციის მონაწილეები პოლიციელებმა იმ დროს დააკავეს, როცა მათ კარვების ქუჩიდან გატანაზე უარი თქვეს.

აქციის მონაწილეების მოთხოვნა იყო საქართველოს მესამე პრეზიდენტის, მიხეილ სააკააშვილის სამკურნალოდ საზღვარგარეთ გადაყვანა. ბათუმში, აქციის მონაწილეები დაშლას არ აპირებდნენ, ვიდრე ეს მოთხოვნა არ შესრულდებოდა.

შსს-ს პრესცენტრიდან ჯერ არ მოუწოდებიათ ინფორმაცია დაკავების შესახებ.

საპოტესტო აქციის ადგილი კარვების დარბევის შემდეგ

ნეტგაზეთის მასალების სხვა გამოცემებში გადაბეჭდვის წესი
ავტორი