Batumelebi | უშედეგო ოპერაციებს სხვა ორგანოებს ვეღარ შევწირავ – მომეხმარეთ, მინდა ვიცოცხლო I ვიდეო უშედეგო ოპერაციებს სხვა ორგანოებს ვეღარ შევწირავ – მომეხმარეთ, მინდა ვიცოცხლო I ვიდეო – Batumelebi
ნეტგაზეთი • RU

უშედეგო ოპერაციებს სხვა ორგანოებს ვეღარ შევწირავ – მომეხმარეთ, მინდა ვიცოცხლო I ვიდეო

32 წლის არჩილ შაქარიშვილს ორივე ფეხი ამპუტირებული აქვს. მან დაზიანება იმ დროს მიიღო, როდესაც მამის გადარჩენას ცდილობდა, რომელსაც სატვირთო მანქანამ გადაუარა სახლის წინ.

ფეხების დაზიანების შემდეგ არჩილს გულის პრობლემებიც შეექმნა. მას არაერთი ოპერაცია ჩაუტარეს ბათუმში, თუმცა მისი მდგომარეობა დღითიდღე მძიმდებოდა.

„თებერვალში ინფარქტი მივიღე, შემდეგ უკვე გამირთულდა მდგომარეობა. კლინიკაში გულის უკმარისობა დამიდგინდა, ამიტომ ხელოვნურ ჟანგბადზე ვიყავი დამოკიდებული.

არასტაბილური მდგომარეობის მიუხედავად, მაინც გამომწერეს სახლში, 3 დღის შემდეგ ისევ დამძიმდა ჩემი მდგომარეობა და ისევ მოვხვდი კლინიკაში.

აღმოჩნდა, რომ პლევრაში დიდი რაოდენობით სითხე მქონდა დაგროვილი, თუმცა ვერ ამოიღეს. მთელი სხეული შემიშუპდა. მაძლევდნენ მედიკამენტებს, რომლებსაც შეშუპება უნდა ჩაეცხრო, თუმცა არაფერი მშველოდა.

არჩილ შაქარიშვილს საზოგადოების დახმარება სჭირდება.

ოპერაცია 21 მარტს გამიკეთეს და ელენთა ამომაჭრეს, თითქოს ამას უნდა ჩაეცხროა შეშუპება, მაგრამ ისევ გართულდა მდგომარეობა.

ექიმი ჩემს მეგობრებს ეუბნებოდა, რომ გულის გადანერგვა იყო საჭირო. დედაჩემი ემიგრაციაში იყო გერმანიაში, როცა ჩამოვიდა, გადავწყვიტეთ, თურქეთში წავსულიყავი სამკურნალოდ. „მედიკალ პარკში“ 5 პროფესორი დამხვდა და 5 დღეში ხუთივე ორგანოზე არსებული ანთება ჩააქრეს“, – ამბობს არჩილი.

მან სწორედ თურქი ექიმებისგან გაიგო, რომ არც ელენთის ამოკვეთა იყო აუცილებელი. „ტყუილად ამოუღიათო – მითხრეს. მინდოდა დოკუმენტი მოეცათ, მაგრამ კოლეგიალობის გამო თავი შეიკავეს.

აქ 5 მედიკამენტს მაძლევდნენ, თურქეთში მითხრეს, რომ აქედან 2 საერთოდ არ იყო საჭირო, რადგან ეს მედიკამენტები იწვევდნენ სწორედ შეშუპებას. მინდოდა აქაური კლინიკებისთვის მეჩივლა, მაგრამ ახლა ჩემს ჯანმრთელობაზე ვფიქრობ და ჯერჯერობით ვერ ვახერხებ“, – გვეუბნება არჩილი.

სახელმწიფო უცხოეთში მკურნალობას მხოლოდ იმ შემთხვევაში აფინანსებს, თუ ქვეყანაში კონკრეტული ოპერაციის გაკეთება ვერ ხერხდება. გულის ოპერაციის გაკეთება ჯანდაცვის სამინისტრომ არჩილ შაქარიშვილს საქართველოში შესთავაზა, მხოლოდ ამ შემთხვევაში დაუფინანსებდნენ ოპერაციას, თუმცა, როგორც არჩილი ამბობს, ის ექიმებს ვეღარ ენდობა.

არჩილის დედა ემიგრანტია, ის საქართველოში შვილის გადასარჩენად დაბრუნდა.

„თბილისში ერთ-ერთ ცნობილ კლინიკაში როცა ოპერაცია გამიკეთეს, თურქეთში ორი წლის წინ გაკეთებული ანგიოგრაფიით იხელმძღვანელეს და ახალი არ გადამიღეს. შემდეგ აღმოჩნდა, რომ რეალურად არაფერი ჰქონდათ ჩატარებული და 8-8 ნაკერი ტყუილად დამადეს მუცელზე.

ამის შესახებ პრემიერ-მინისტრს მივწერე და შემდეგ ოპერაციის ფული აღარ გადამახდევინეს, იმ ექიმს კი, ვინც ოპერაცია გამიკეთა, ერთი თვით ლიცენზია შეუჩერეს.

ამიტომ არ ვენდობი ქართველ ექიმებს. როცა ფეხებზე მქონდა პრობლემა, არც მაშინ მიმკურნალეს სათანადოდ და ამპუტაცია დამჭირდა. კუჭი მაწუხებდა და ბრმა ნაწლავი ამომჭრეს, ახლა გულის უკმარისობა მქონდა და ელენთა ამომჭრეს.

ფეხები მოჭრილი, ყველაფერი მოჭრილი… მგონი აღარ მაქვს სამარჩიელოდ დრო, რომ არასწორ და უშედეგო ოპერაციებს კიდევ სხვა ორგანოები შეეწიროს“, – გვეუბნება არჩილ შაქარიშვილი.

ახლა მას სასწრაფოდ ესაჭიროება გულზე შუნტირება. ექიმებს ოპერაცია 20 მაისისთვის აქვთ დაგეგმილი, არჩილს კი საზოგადოების მხარდაჭერის იმედი აქვს. მისთვის ახლა 1 ლარსაც კი დიდი მნიშვნელობა აქვს. არჩილი დედასთან ერთად ბათუმში, ნაქირავებ ბინაში ცხოვრობს. დედა ამბობს, რომ მთელი დანაზოგი შვილის მკურნალობას მოახმარა, ახლა ის არსად მუშაობს, ოჯახს კი სხვა შემოსავალი არ აქვს, გარდა არჩილის შშმ პირის პენსიისა.

„ოპერაცია 110 ათასი ლირა ჯდება, რაც დაახლოებით 25 ათასი ლარია. ამიტომ ძალიან ვთხოვ ყველას, იქნება ეს თქვენი გამოცემის მკითხველი, მეზობელი, მეგობარი, ნათესავი, 1 ლარიც რომ გადმორიცხოს, ძალიან დიდი მნიშვნელობა აქვს ჩემთვის.

ჯერ მხოლოდ 32 წლის ვარ, მინდა სიცოცხლე გამიხანგრძლივდეს და შევძლო ნორმალური ცხოვრება“, – ამბობს არჩილი.

მისი თქმით, თურქეთში ექიმები 100-პროცენტიან გარანტიას აძლევენ, რომ ოპერაცია წარმატებული იქნება და ამის შემდეგ ის ნორმალურ ცხოვრებას შეძლებს.

„12 წელია საავადმყოფოდან საავადმყოფოში დამყავს ჩემი შვილი, ბევრი არასწორი მკურნალობის გამო ხედავთ რა დღეშია ის. გემუდარებით, დაგვეხმარეთ“, – ამბობს არჩილის დედა.

მისი თქმით, არჩილმა ბევრ რამეს გაუძლო და იმედი აქვს, რომ ხალხის თანადგომით, მისი ცხოვრება შეიცვლება.

___

მკითხველების თხოვნით ვაქვეყნებთ ანგარიშის ნომრებს დახმარების მსურველთათვის:
#GE59TB7647745061100028 – თიბისი [მიმღები არჩილ შაქარიშვილი]
#GE66LB0211119229960000 – ლიბერთი [მიმღები არჩილ შაქარიშვილი]
#GE42BG0000000534094761 – საქართველოს ბანკი [მიმღები ბადრი მგელაძე]

____

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com