ნეტგაზეთი • RU

ბერძნულ ტანკერებს რუსული ნავთობი გადააქვთ სანქციების მიუხედავად – მედია

გერმანული მედიის ცნობით, საბერძნეთის დროშის ქვეშ მცურავ ტანკერებს კვლავ გადააქვთ ნედლი ნავთობი რუსეთიდან სანქციების მიუხედავად.

ინფორმაცია ამის შესახებ გაზეთმა Die Welt-მა გაავრცელა საზღვაო გამოცემა Lloyd’s List-ზე დაყრდნობით.

Lloyd’s-ის ცნობით, აპრილში 190-მა ტანკერმა დატოვა რუსეთის პორტები – პრიმორსკი, ნოვოროსიისკი, უსტ-ლუგა და სანკტ-პეტერბურგი და მათგან 76 საბერძნეთის დროშის ქვეშ მცურავი ტანკერი იყო.

საბერძნეთმა გაასამმაგა თავისი წილი რუსული ნავთობის ტრანსპორტირებაში წინა წელთან შედარებით – წერს Die Welt-ი.

აპრილის ბოლოს ბერძნულმა ტანკერმა Nissos Rhenia-მ როტერდამის პორტში რუსული ნავთობი ჩატვირთა და სინგაპურში გაემგზავრა, ნათქვამია Lloyd’s-ის ანგარიშში. გერმანული გამოცემა წერს, რომ მეტი ტანკერი მიემართება ინდოეთისკენ, ჩინეთისა და სამხრეთ კორეისკენ და ნავთობის ტანკერებით ტვირთის გადაზიდვის ტარიფები უკვე გაიზარდა 230 პროცენტით უკრაინაში ომის გამო.

ევროპის პორტები ოფიციალურად დაკეტილია რუსული გემებისთვის რუსეთის უკრაინაზე თავდასხმის გამო დაწესებული სანქციების ფარგლებში.

_________________

ფოტოზე: რუსული ნავთობტანკერი Ust Luga. ფოტო: EPA-EFE/OLE BERG-RUSTEN NORWAY OUT

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com