ბათუმში, მეორე მსოფლიოს ომში მონაწილე მხოლოდ 8 ვეტერანია ცოცხალი. როგორც „ბათუმელებს“ ბათუმის მერიიდან აცნობეს, ხვალ, 9 მაისს, მერია ომის 8 ვეტერანს და ასევე ომის ვეტერანების 5 ოჯახს 400-400 ლარს გადასცემს.
მეორე მსოფლიო ომი 1939 წლის 1-ელ სექტემბერს დაიწყო, როდესაც ნაცისტური გერმანია თავს დაესხა პოლონეთს. გერმანია საბჭოთა კავშირში, რომლის შემადგენლობაში საქართველოც შედიოდა, 1941 წლის 22 ივნისს შეიჭრა.
1945 წლის 7 მაისს ქალაქ რეიმსში გერმანიამ, რომელსაც წარმოადგენდა ვერმახტის გენერალი ალფრედ იოდლი, ხელი მოაწერა უსიტყვო კაპიტულაციას. დოკუმენტი ძალაში მეორე დღეს, 8 მაისს, შევიდა. მეორე მსოფლიო ომი ევროპაში დამთავრდა.
საბჭოთა კავშირის ცენტრალური კომიტეტის გენერალურ მდივანს, იოსებ სტალინს სურდა ხაზი გაესვა ნაციზმზე გამარჯვებაში საბჭოთა კავშირის როლზე. ამიტომ 8 მაისს ბერლინში, საბჭოთა კავშირის შტაბ-ბინაში, 7 მაისს გაფორმებული კაპიტულაციის იდენტურ დოკუმენტს კიდევ ერთხელ მოეწერა ხელი.
გერმანიის მხრიდან უსიტყვო კაპიტულაციას ხელი ვერმახტის (ნაცისტური გერმანიის შეიარაღებული ძალების სახელწოდება 1935-1945 წლებში) გენერალ-ფელდმარშალმა, ვილჰემ კაიტელმა მოაწერა საბჭოთა კავშირის წინაშე. ამ დოკუმენტზე ხელმოწერით მეორე მსოფლიო ომში გერმანიის შეიარაღებული ძალების მოქმედება ოფიციალურად შეწყდა, 1945 წლის 8 მაისს, 23:01 საათზე.
მოსკოვის დროით საბჭოთა კავშირში უკვე 9 მაისი იყო.
მოკავშირეები – აშშ, დიდი ბრიტანეთი, პოლონეთი, ჩეხეთი, სლოვაკეთი, საფრანგეთი, ნორვეგია და ახლა უკვე უკრაინაც, ნაციზმზე გამარჯვებას 8 მაისს აღნიშნავენ.
ყოფილი საბჭოთა კავშირის რესპუბლიკები – რუსეთი, ბელარუსი, მოლდოვა, ტაჯიკეთი, ყაზახეთი, ყირგიზეთი, თურქმენეთი, უზბეკეთი, სომხეთი, აზერბაიჯანი და საქართველო კი – 9 მაისს.
თანამედროვე ისტორიკოსების თქმით, რადგანაც ქართული სახელმწიფოს იდენტობა დასავლურია, ფაშიზმზე გამარჯვების დღე 8 მაისს უნდა აღინიშნოს.
