ავთო ქაჯაია იმ ქართულ ოცეულშია, რომელმაც, როგორც თავად ამბობენ, რამდენიმე დღის წინ დონეცკში რუსულ ძალებს მნიშვნელოვანი ზიანი მიაყენა. ავთო „ბათუმელებთან“ ამბობს, რომ ამ შეტევის შედეგად რუსებმა წლების განმავლობაში დაკავებული პოზიციები დაკარგეს.
„ეს იყო ყველაზე მაგარი ბრძოლა, რაც ყოველთვის მემახსოვრება. ნამდვილი საგიჟეთი მოვაწყვეთ, რა გავაკეთეთ ან რამ გადაგვარჩინა, ბიჭებს ახლაც გვიკვირს. იდეალურად დაგეგმილი შტურმი იყო, ოცეულის შეტევა რუსების რამდენიმეწლიან გამაგრებულ პოზიციებზე, ეს ისტორია ყველაზე მეტად დამამახსოვრდება,“ – გვეუბნება ავთო ქაჯაია.
ამ წარმატებული ოპერაციის შემდეგ ავთო და მისი თანამებრძოლები საავადმყოფოში მოხვდნენ. როგორც ავთო გვეუბნება, რუსებმა 7 მაისს, დღის ოთხ საათზე, აკრძალული იარაღი გამოიყენებს მათ წინააღმდეგ, რის შემდეგაც ქართველი მებრძოლები მოიწამლნენ და ახლა ათი მებრძოლი, მათ შორის, ავთო ქაჯაიაც, ჰოსპიტალში მკურნალობს.
სიმპტომები დაახლოებით ისეთივეა, რაზეც უფრო ადრე გოსტომელში მებრძოლი ქართველები საუბრობდნენ. 14 აპრილს ისინიც მსგავსი ქიმიური ნივთიერებით მოიწამლნენ.
რით მოიწამლნენ, ჯერ მებრძოლებს ინფორმაცია არ აქვთ. როგორც ავთო ქაჯაია გვეუბნება, ამ ეტაპზე კვლევები მიმდინარეობს.
ავთო ქაჯაიას თქმით, რუსებმა ისევ გამოიყენეს აკრძალული იარაღი. მოიწამლა ათი ქართველი მებრძოლი.
ავთო ქაჯაია უკრაინაშია მას შემდეგ, რაც ომი დაიწყო. ის პოლონეთში, ემიგრაციაში იმყოფებოდა, როცა რუსეთი უკრაინაში შეიჭრა.
„ოთხი წელია პოლონეთში ვარ, მანამდე საქართველოს შეიარაღებულ ძალებში ვმსახურობდი 15 წელი. გაჭირდა საქართველოში ცხოვრება, ამიტომ გადავწყვიტე ემიგრაციაში წამოსვლა. ომი როცა დაიწყო, წამოვედი უკრაინაში“, – გვითხრა მან.
დონეცკში ჩატარებულ ამ ოპერაციას ავთო ქაჯაი ერთ-ერთ ყველაზე წარმატებულ ბრძოლად აფასებს.
„ორდღიანი ძლიერი შეტაკებები გვქონდა, მთელი პოზიციები წავართვით რუსებს, ისეთი პოზიციები, სადაც რამდენიმე წელია გამაგრებულები იყვნენ. ჩვენ, ქართველების ოცეულმა, ავიღეთ ეს პოზიციები, გავუნადგურეთ ცოცხალი ძალა და ახლა უკრაინელებმა დაიკავეს ეს პოზიციები.
რა თქმა უნდა, ძალიან მნიშვნელოვანია ამ პოზიციების დაკავება, რადგან ერთ-ერთი სტრატეგიული ადგილია და უკრაინელები ვერ ახერხებდნენ დაკავებას.
სიგიჟეები ჩავიდინეთ, გადარეულები შევვარდით და დავცხეთ რუსებს. შეტევაზე ვიყავით. ალყაშიც მოვყევით, მაგრამ გავარღვიეთ ალყა და გამოვედით. მართალია, ცხრა მებრძოლი დაგვეჭრა, ერთი ტყვიით, რვა კი ჭურვის ნამსხვრევებით, მაგრამ მსხვერპლის გარეშე გამოვედით“, – გვითხრა ავთომ.
მისი თქმით, რუსეთი ყოველთვის ცდილობს სტრატეგიული ადგილების დაკავებას – ცდილობს გადაკეტოს მთავარი გზები, ავტობანები, „ამიტომ ამ ბრძოლის მოგება ძალიან მნიშვნელოვანი იყო უკრაინელებისთვის.“
ოცეულში მებრძოლი ყველა ქართველი ახლა უკრაინის შეიარაღებულ ძალებში ირიცხება. ყველა მათგანს სამხედრო გამოცდილება აქვს. „ერთი ჩინელიც არის ჩვენს ჯგუფში, ექიმია და ძალიან გვეხმარება“, – ამბობს ავთო ქაჯაია.
ავთო ამბობს, რომ ალყის გარღვევა და პოზიციების დაკავება მათი პროფესიული მოქმედებაა, თუმცა გამართლებაზეც არის ბევრი რამ დამოკიდებული.
„ეს ბრძოლაც ტყეებში იყო, ჩასაფრებული იყვნენ რუსები, თუმცა გავანადგურეთ. არც ისე რთულია რუსების დამარცხება.“
მებრძოლებს ბოლო პერიოდში ძალიან ეხმარება შეიარაღება, რომელსაც უკრაინა დასავლელი მეგობარი ქვეყნებისგან იღებს. „ალბათ ამის დამსახურებაა ის, რომ დიდი ხანია ცაზე რუსული ავიაცია არ დაგვინახავს“, – ამბობს ავთო.
ავთოს თქმით, გადამწვარი ტყეები და სახლები – ეს არის რუსული კვალი. „იმალებიან მიწაში, როგორც თხუნელები, ლოთები და სასტიკები. ომის ყველა წესს არღვევენ, პირველ რიგში იმას, რომ არ უნდა მოკლან ბავშვები და ქალები, არ გააუპატიურონ ისინი. არ დახოცონ მშვიდობიანი მოსახლეობა, თუმცა რუსებისთვის არანაირი კანონი და წესი არ არსებობს. ფეხებზე ჰკიდიათ ყველაფერი. ნამდვილი ღორები არიან.
ალბათ არასდროს დამავიწყდება ის, როგორ გადაატარეს პურის რიგში მდგომ ქალებს და ბავშვებს ავტომატის ჯერი. მაშინ ორი ბავშვი დაიღუპა. სადისტები არიან, სამხედროებს ვერ ერევიან და ბავშვებს კლავენ“, – გვეუბნება ავთო ქაჯაია.
მებრძოლის თქმით, ისინი ახლა უკრაინაში საქართველოსთვის იბრძვიან, რადგან რუსეთი ოკუპანტია: „რაც ჩვენ გაგვიკეთა, არასდროს დამავიწყდება. ყველგან, სადაც კი რუსები გაისვრიან მშვიდობიანი მოსახლეობის წინააღმდეგ, ქართველი მებრძოლებიც იქ ვიქნებით. ბევრი მეგობარი მოგვიკლეს აფხაზეთში, შემდეგ 2008 წელს, აგვისტოს ომში, მე იქაც ვიბრძოდი და ყველგან ვიბრძვი ოკუპანტების წინააღმდეგ.“
