უკრაინის ერთ-ერთ რეგიონში, ზაპოროჟიეს მახლობლად, 9 წლის ბავშვმა ორი თვე საომარი მოქმედებების ეპიცენტრში, მშობლების გარეშე გაატარა – ამის შესახებ უკრაინული მედია იუწყება. ამ დროისთვის ბავშვმა რუსების მიერ ოკუპირებული ტერიტორიიდან გამოსვლა მოახერხა.
9 წლის ბიჭმა მშობლების გარეშე ორი თვე გაატარა ოკუპანტების გარემოცვაში, სადაც განუწყვეტლივ ისროდნენ. ის სარდაფში შორეულ ნათესავებთან ერთად იმალებოდა.
ბიჭის დედა ცხრა თვის ფეხმძიმე იყო, როდესაც რუსებმა ზაპოროჟიეს რეგიონში, სოფელ სტეპოვოეს მიმართულებით სროლები დაიწყეს. ისე მოხდა, რომ ბიჭის მამამ ცოლი სამშობიაროში გადაიყვანა, საშა კი ნათესავებთან გაუშვა. მაგრამ როდესაც მის წასაყვანად დაბრუნდა, ყველა საევაკუაციო დერეფანი ჩაკეტილი დახვდა. საბოლოო ჯამში ბიჭის მშობლები უკრაინის კონტროლირებად ტერიტორიებზე აღმოჩნდნენ, ხოლო ბავშვი – რუსების მიერ ოკუპირებულ ტერიტორიაზე ჩარჩა.
„ჩვენ ყოველ დღეს ვურეკავდით. იყო ცრემლი, ტირილი. მე ვიძახდი, რომ „ფეხით წავალ“. ისტერიკა მქონდა… მისი წამოყვანა კი შეუძლებელი იყო“, – მოუყვა ჟურნალისტებს ბიჭის დედა, რომელმაც მეორე შვილზე ორი თვის წინ იმშობიარა.
ასეთ ვითარებაში მყოფ სასოწარკვეთილ ოჯახს მოხალისეთა გუნდი დაეხმარა. მგზავრობის დროს, მთელ გზაზე, ბიჭს ოკუპირებულ ტერიტორიებზე ხელიდან ხელში გადასცემდნენ. ასე გამოიყვანეს ის საომარი ზონიდან.
ახლა საშა ეჩვევა მშვიდ გარემოში ცხოვრებას და მშობლებს ახალშობილ დაზე ზრუნვაშიც ეხმარება. ოჯახი ამ ეტაპზე ცხოვრობს აფთიაქში, რომელიც დევნილების საცხოვრებლად არის გადაკეთებული.
