ბათუმში, აჭარის მთავრობის სახლის წინ, „ოცნების ქალაქში“ მცხოვრებლები აქციას მართავენ.
აქციის მონაწილეთა ძიორითადი მოთხოვნაა განისაზღვროს და გასაჯაროვდეს ის კრიტერიუმები, რომლის მიხედვითაც „ოცნების ქალაქში“ მცხოვრებლებს ბინები უნდა გადასცენ.
ამასთან, ისინი მოითხოვენ დაუყოვნებლივ გაფორმდეს ოჯახებთან ხელშეკრულებები, რომლის საფუძველზეც ისინი ბინებს მიიღებენ.
„მთავრობა 580 ოჯახის დაკმაყოფილებას გეგმავს ამ ეტაპზე და შემდეგი ეტაპიც იქნებაო, მოვითხოვთ, რომ ხელშეკრულება გაფორმდეს ყველა კატეგორიის ოჯახთან. ასევე ვითხოვთ ექსპერტიზა ჩაუტარდეს იმ კორპუსებსაც, რომლებიც შენდება – მათი ხარისხის დასადგენად. თუ ჩვენი მოთხოვნები არ დაკმაყოფილდება, ხვალიდან აქციას განვაახლებთ და შესაძლოა გზაც კი გადავკეტოთ“ – ამბობს აქციის ერთ-ერთი მონაწილე მარინა ბერიძე.
აქციის მონაწილეები აჭარის მთავრობის თავმჯდომარესთან, თორნიკე რიჟვაძესთან შეხვედრას ითხოვენ.
აქციაზე მახინჯაურში, ჰორტენზიის, ასევე ჯინჭარაძის ქუჩაზე მცხოვრებლებიც იმყოფებიან და აჭარის ხელისუფლებისგან ყურადღებას ითხოვენ. მათი თქმით, ისინი ავტობანის მშენებლობის გამო დაზარალდნენ.
7 მაისს მთავრობის სახლთან აქცია, „ოცნების ქალაქში“ მცხოვრებლებმა რამდენიმე დღის წინ დააანონსეს.
აქციამდე 2 დღით ადრე კი, აჭარის ჯანმრთელობისა და სოციალური დაცვის სამინისტრომ გაავრცელა ინფორმაცია, რომ „კრიტერიუმებზე მუშაობა დასკვნით ეტაპზეა, ის უახლოეს პერიოდში გასაჯაროვდება და ოჯახები ამ დასახლებაში ეტაპობრივად მიიღებენ ბინებს“.
სამინისტროს ინფორმაციით, „ოცნების ქალაქში“ მცხოვრებ ოჯახებზე საცხოვრებელი ფართობების გადაცემისათვის საჭირო კრიტერიუმების განსაზღვრის მიზნით, სამუშაო ჯგუფის შეხვედრა 5 მაისს გაიმართა:
„კრიტერიუმები უზრუნველყოფს უსახლკარო მოწყვლადი ოჯახებისათვის თანაბარ ხელმისაწვდომობას სათანადო საცხოვრებლის უფლებაზე და მათ ეტაპობრივ დაკმაყოფილებას ობიექტურობის და სამართლიანობის პრინციპის დაცვით. ე.წ. „ოცნების ქალაქში“ საცხოვრებელი კორპუსების მშენებლობა გამოცხადებული კოვიდ პანდემიის მიუხედავად შეუფერხებლად მიმდინარეობდა, მშნებლობა დასასრულს უახლოვდება. პირველ ეტაპზე 3 საცხოვრებელი კორპუსი შენდება [582 ბინა]“.
გასული წლის ბოლოს აჭარის ფინანსთა და ეკონომიკის სამინისტროში „ბათუმელებს“ განუცხადეს, რომ მშენებლობა 2022 წლის პირველ კვარტალში დასრულდებოდა. სამინისტროში მაშინ ისიც აღნიშნეს, რომ იმ დროისთვის „კრიტერიუმებზე მუშაობა დასკვნით ეტაპზე“ იყო.
„პანდემიის გამო საკმაოდ ბევრჯერ შევფერხდით“ – გვითხრეს მაშინ მშენებელ კომპანიაში.
„ოცნების ქალაქში“ ადგილობრივი თვითმმართველობის შუალედურ არჩევნებამდე ცოტა ხნით ადრე 338-მდე პირი ჩაწერეს ერთ მისამართზე – ფრიდონ ხალვაშის გამზირის 188-ის მიმდებარედ.
არჩევნების შემდეგ, „ოცნების ქალაქში“ მცხოვრებლებმა აქცია 17 აპრილს გამართეს.
აქციის მონაწილეებმა აჭარის მთავრობისგან მოითხოვეს აქ მცხოვრები ოჯახების ადგილზე რეგისტრაცია – დამისამართება, „ოცნების ქალაქში“ ბინის მიმღებთა კრიტერიუმების შესახებ დოკუმენტური ინფორმაციის მიწოდება და უკვე აშენებული კორპუსების ექსპერტიზის დასკვნა უსაფრთხოებაზე.
აქციის მონაწილეებმა მაშინ აღნიშნეს, რომ აჭარის მთავრობასთან არჩევნების შემდეგ აღარ ჰქონიათ კომუნიკაცია: „თავის საქმეს იკეთებენ, ხალხის საქმე არაა გაკეთებული“ .
ვრცლად ამ თემაზე: