საქართველოს ექსპრეზიდენტის, მიხეილ სააკაშვილის ძმამ, გიორგი სააკაშვილმა, დღეს, 6 მაისს ბათუმში განაცხადა, რომ სათავეში ჩაუდგება მოძრაობას, რომელიც საქართველოს ქალაქებს მოიცავს.
„ოჯახის სახელით ვიღებ პასუხისმგებლობას, ჩავუდგე მოძრაობას, რომლის მიზანი იქნება მიშა გვყავდეს ჯანმრთელი
მიშა არის ციხეში, მისი ადგილი იქ არ არის. ეს არის რუსი ოლიგარქის „დამსახურება“, რომელმაც წაართვა მას სიცოცხლის უფლება და ჩვენ დავიცავთ მას ბოლომდე.
გუშინწინ დავაანონსე აქცია თბილისში მთავრობის სასახლესთან და პირობა მივეცი მოქალაქეებს, რომ ვიბრძოლებთ მიშას ჯანმრთელობისთვის. ეს არის დასაწყისი ჩვენი ბრძოლის, ბათუმი ითვლება თავისუფლების სიმბოლოდ, თქვენ უნდა დაგვიდგეთ გვერდზე, აქედან წავალთ ზუგდიდში, ქუთაისში, ყველა ქალაქში…
ჩვენ ვითხოვთ მიშას ჯანმრთელობას, ადამიანის უფლებას, იცოცხლოს.
დარწმუნებული ვარ, ყველა ქალაქი შემოგვიერთდება და გაიმართება დიდი აქცია“ – განაცხადა აქციაზე გიორგი სააკაშვილმა. მან ასევე აღნიშნა, რომ „ბათუმის აღმშენებლობა მისი ძმის დამსახურებაა“.
დღეს, 6 მაისს, ბათუმში, მიხეილ სააკაშვილის საზღვარგარეთ სამკურნალოდ გადაყვანის მოთხოვნით აქცია იმართება. აქცია, რომლის სლოგანია „მიშას არ მოგაკვლევინებთ“, ბათუმის სახელმწიფო უნივერსიტეტთან დაიწყო.
ზუსტად 18 წლის წინ ეს ადგილი იყო აჭარის ვარდების რევოლუციის ეპიცენტრი, რომელიც მიხეილ სააკაშვილთან ასოცირდება, ამიტომაც, დღეს, 6 მაისს გამართულ აქციას ეს სიმბოლური დატვირთვაც აქვს.
