დღეს, 9 მაისს, კრემლის პოლიტიკის მხარდამჭერი გამოცემის Lenta.ru-ს ვებგვერდზე გამოჩნდა კრიტიკული სათაურები პუტინისა და რუსეთის უკრაინაზე თავდასხმის შესახებ. აღნიშნულზე პასუხისმგებლობა გამოცემის ორმა თანამშრომელმა აიღო – წერს „ბიბისის“ რუსული რედაქცია.
„ბიბისის“ ცნობით, რედაქტორებმა სწრაფად წაშალეს ეს მასალები, მაგრამ ვებგვერდების ქეშირებულ მონაცემებში ინახება გამოცემის პირველი გვერდი, სადაც ჩანს სათაურები: „რუსეთმა მთლიანად გაანადგურა მარიუპოლი“, „პუტინმა იცრუა უკრაინაში რუსეთის გეგმების შესახებ“, „რუსეთი თავისი ჯარისკაცების ცხედრებს უკრაინაში ტოვებს“, „რუსეთის არმია აღმოჩნდა ქურდების და მაროდიორების არმია“ და ა.შ.
სტატიების დასაწყისში, აღწერაში ეწერა: „ეს მასალა არ არის შეთანხმებული ხელმძღვანელობასთან, მისი გამოქვეყნებისთვის პრეზიდენტის ადმინისტრაცია შავ დღეს დააყრის გამოცემას, სხვაგვარად რომ ვთქვათ, დროზე დასქრინე, სანამ წაუშლიათ“. მასალების ქეშირებული ვერსია ამ დროისთვისაც ხელმისაწვდომია.
სტატიების პოსტსკრიპტუმში აღნიშნული იყო, რომ ამ მასალებზე პასუხისმგებლობას იღებდა გამოცემის ეკონომიკის და გარემოს განყოფილებების ხელმძღვანელი ეგორ პოლიაკოვი და ამავე განყოფილებების რედაქტორი ალექსანდრა მიროშნიკოვა.
Lenta.ru-ს მთავარმა რედაქტორმა ვლადიმერ ტოდოროვმა განაცხადა, რომ მომხდართან დაკავშირებით კომენტარს არ გააკეთებენ.
