ბათუმის მერია ქობულეთში, ზღვასთან ახლოს, მიწის ნაკვეთს და მასზე მდებარე ნაგებობებს 5,4 მილიონ ლარად ყიდის.
ელექტრონული აუქციონი, სადაც ბიჯი 200 ათასი ლარია, უკვე გამოცხადებულია და ის 25 მაისს დასრულდება.
ქონება, რომელიც ბათუმის მუნიციპალიტეტის საკუთრებაშია და მერია აუქციონზე ყიდის, ქობულეთში, მეგობრობის ქუჩა №40-ში მდებარეობს. გასაყიდი მიწის ნაკვეთის ფართობი 12 506 კვ.მ, ხოლო მასზე განთავსებული შენობა-ნაგებობების [მათ შორის მრავალსართულიანი დაუსრულებელი შენობის] საერთო ფართობი – 9 127 კვ.მ-ია.
ელექტრონული აუქციონი პირობითაა გამოცხადებული, თუმცა, ერთადერთი პირობა – მომავალი მყიდველის მიერ თანხის გადახდას ეხება.
კონკრეტულად, აუქციონზე შეძენილი ქონების საპრივატიზებო საფასური გამარჯვებულმა სრულად უნდა გადაიხადოს შემდეგ ვადებში:
- საბოლოო საპრივატიზებო საფასურის პირველი 30% – ხელშეკრულების გაფორმებიდან 4 თვეში;
- საბოლოო საპრივატიზებო საფასურის მეორე 30% – ხელშეკრულების გაფორმებიდან 8 თვეში;
- საბოლოო საპრივატიზებო საფასურის დარჩენილი 40% [„ბე“-ს თანხის გამოკლებით] – ხელშეკრულების გაფორმებიდან 12 თვეში;
„ბე“, აუქციონის პირობით, 1 620 000 ლარითაა განსაზღვრული.
აღნიშნული ქონება ბათუმის მერიამ საპრივატიზებო ობიექტთა ნუსხაში 2021 წლის ივლისში შეიტანა.