Batumelebi | ბათუმის მერია ქობულეთში, ზღვასთან ახლოს, მიწას 5,4 მილიონ ლარად ყიდის ბათუმის მერია ქობულეთში, ზღვასთან ახლოს, მიწას 5,4 მილიონ ლარად ყიდის – Batumelebi
ნეტგაზეთი • RU

ბათუმის მერია ქობულეთში, ზღვასთან ახლოს, მიწას 5,4 მილიონ ლარად ყიდის

ბათუმის მერია ქობულეთში, ზღვასთან ახლოს, მიწის ნაკვეთს და მასზე მდებარე ნაგებობებს 5,4 მილიონ ლარად ყიდის.

ელექტრონული აუქციონი, სადაც ბიჯი 200 ათასი ლარია, უკვე გამოცხადებულია და ის 25 მაისს დასრულდება.

ქობულეთი / ტერიტორია, რომელსაც ბათუმის მერია ყიდის / ფოტო აუქციონიდან

ქონება, რომელიც ბათუმის მუნიციპალიტეტის საკუთრებაშია და მერია აუქციონზე ყიდის, ქობულეთში, მეგობრობის ქუჩა №40-ში მდებარეობს. გასაყიდი მიწის ნაკვეთის ფართობი 12 506 კვ.მ, ხოლო მასზე განთავსებული შენობა-ნაგებობების [მათ შორის მრავალსართულიანი დაუსრულებელი შენობის] საერთო ფართობი – 9 127 კვ.მ-ია.

ელექტრონული აუქციონი პირობითაა გამოცხადებული, თუმცა, ერთადერთი პირობა – მომავალი მყიდველის მიერ თანხის გადახდას ეხება.

კონკრეტულად, აუქციონზე შეძენილი ქონების საპრივატიზებო საფასური გამარჯვებულმა სრულად უნდა გადაიხადოს შემდეგ ვადებში:

  • საბოლოო საპრივატიზებო საფასურის პირველი 30% – ხელშეკრულების გაფორმებიდან 4 თვეში;
  • საბოლოო საპრივატიზებო საფასურის მეორე 30% – ხელშეკრულების გაფორმებიდან 8 თვეში;
  • საბოლოო საპრივატიზებო საფასურის დარჩენილი 40% [„ბე“-ს თანხის გამოკლებით] – ხელშეკრულების გაფორმებიდან 12 თვეში;

„ბე“, აუქციონის პირობით, 1 620 000 ლარითაა განსაზღვრული.

ქობულეთი / ტერიტორია, რომელსაც ბათუმის მერია აუქციონზე ყიდის [შემოსაზღვრულია წითელი ხაზით]

აღნიშნული ქონება ბათუმის მერიამ საპრივატიზებო ობიექტთა ნუსხაში 2021 წლის ივლისში შეიტანა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com