Batumelebi | „მადლობა“ – უკრაინელი მოხალისეების აქცია ბათუმში „მადლობა“ – უკრაინელი მოხალისეების აქცია ბათუმში – Batumelebi
ნეტგაზეთი • RU

„მადლობა“ – უკრაინელი მოხალისეების აქცია ბათუმში

დღეს, 9 მაისს, ბათუმში უკრაინელმა მოხალისეებმა მადლიერების აქცია გამართეს და ქალაქში იმ დაწესებულებებში მივიდნენ, რომლებიც თავიანთი საქმიანობით უკრაინელებს ეხმარებიან.

უკრაინელმა მოხალისეებმა მათ კარზე მადლობის სტიკერები მიაკრეს წარწერებით – „ერთად გამარჯვებისთვის”, „გულიდან გულამდე“ და „მადლობა“.

„მოვინახულებთ ყველა აფთიაქს, რომლებიც უფასოდ გასცემდნენ მედიკამენტებს, ყველა რესტორანს, რომლებიც ლტოლვილებს უფასოდ კვებავენ, ყველა სასტუმროს, სადაც უკრაინელებს უფასოდ იტოვებდნენ, საქართველოს ფოსტას, რომელიც ამანათებს უკრაინაში უფასოდ აგზავნიდა და სხვა დაწესებულებებს, რომლებმაც თავიანთი წვლილი შეიტანეს უკრაინის ბრძოლაში ამ ომში,“ – წერენ მოხალისეები.

„ჩვენ ძალიან მადლიერები ვართ და გვინდა პირადად გადავუხადოთ მადლობა ამ კომპანიებს, მათ თანამშრომლებს და კარზე მადლობის სტიკერი მივაკრათ, რათა ყველა გამვლელმა დაინახოს, რამდენი ადამიანი გაერთიანდა უკრაინის ომის წინააღმდეგ…

ეს აქცია ერთდღიანი არ იქნება, ჩვენ დღეს დავიწყეთ და გაგრძელდება იქამდე, სანამ ჩვენ არ შემოვივლით ყველა დაწესებულებას და კომპანიას, რომლებიც უკრაინას ან უკრაინელებს დაეხმარნენ,“ – ამბობს ერთ-ერთი უკრაინელი აქტივისტი, ლენურა მელგაზიევა, რომელიც ბათუმში 2014 წლიდან ცხოვრობს.

უკრაინელი მოხალისეები ამბობენ, რომ ბათუმში ასეთი დაწესებულება ბევრია, თუმცა ჯერ კიდევ მუშაობენ სიის დაზუსტებაზე.
ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან