დღეს, 8 მაისს, ბათუმის საქალაქო სასამართლოში გაიმართება იმ პირთა სასამართლო პროცესი, რომლებიც ორი დღის წინ აჭარის მთავრობის სახლთან გამართულ საპროტესტო აქციაზე დააკავეს.
„კონკრეტულად დოკუმენტები არ ჩაგვბარებია, თუ რის საფუძველზე დააკავეს. რამდენადაც ზოგადად ცნობილია, ედავებიან პოლიციელის კანონიერი მოთხოვნის დაუმორჩილებლობას და გინებას, უწმაწური სიტყვებით მიმართვას პოლიციელისადმი.
სტანდარტულად რასაც აკეთებენ ხოლმე. ამ დაკავების მიზანი არ ყოფილა მართლწესრიგის საკითხის დაცვა. იქ იყო მთავარი, აქცია დაშლილიყო, ეს ხალხი დაეკავებინათ და შემდგომ რას მოედავებოდნენ იურიდიულად, ეს უკვე კაბინეტებში დაწერეს. რეალურად რასაც ედავებიან, ეს ფაქტი არ მომხდარა და ეს ვიდეოკადრებშიც კარგად ჩანს,“ – უთხრა „ბათუმელებს“ „ნაციონალური მოძრაობის“ პოლიტსაბჭოს წევრმა მირდატ ქამადაძემ.
6 მაისის ღამეს აჭარის მთავრობის სახლის წინ მიმდინარე საპროტესტო აქციაზე პოლიციამ 24 ადამიანი დააკავა. მათ შორის 2 ქალი, რომლებიც დაკავებიდან რამდენიმე საათში, ხელწერილის საფუძველზე გაათავისუფლეს.
გუშინ, 7 მაისს, გაიმართა 11 დაკავებულის სასამართლო პროცესი. გათავისუფლებულთა შორის იყო ბათუმის მერობის კანდიდატი უმაღლესი საბჭოს დეპუტატი გიორგი კირთაძე, ასევე იყვნენ უმაღლესი საბჭოს დეპუტატები – ლევან ანთაძე, გია აბულაძე და ბათუმის საკრებულოს წევრები – რეზო ხარაზი, ლაშა კილაბერია, მამუკა ქობულაძე, ნოდარ დუმბაძე, ილო ჯინჭარაძე.
მოსამართლემ ისინი დროებით გაათავისუფლა და მათი სასამართლო 23-24 მაისს ჩანიშნა.
კიდევ 11 დაკავებულის პროცესი დღეს გაიმართება. ყველა დაკავებული „ერთიანი ნაციონალური მოძრაობის“ წევრია.
მთავარ ფოტოზე: ლევან ანთაძე, გიორგი კირთაძე და გია აბულაძე ბათუმის საქალაქო სასამართლოში გამართული პროცესის დროს / ფოტო: თეა ვაშალომიძე
ამავე თემაზე:
ბათუმში პოლიციამ აქციაზე კარვები დაშალა, დააკავეს 10-მდე პირი
