დიდი ბრიტანეთის დაზვერვის 6 მაისის მონაცემებით, რუსეთის დანაკარგები იზრდება, რაც სამხრეთ დონბასში მათ ოპერატიულ გეგმებს ჩაშლის. დაზვერვის დღევანდელი მონაცემები ასევე მიანიშნებს 9 მაისის მოახლოებაზე. როგორც ვკითხულობთ, აზოვსტალის ქარხნის განადგურების განახლებული ძალისხმევა რუსეთის მხრიდან, სწორედ ამ დღის მოახლოებასა და პუტინის სურვილს უკავშირდება, აღნიშნოს სიმბოლური გამარჯვება.
„მიუხედავად რუსი ოფიციალური პირების განცხადებებისა, რომ ისინი მხოლოდ აზოვსტალის ქარხნის დაბლოკვას ცდილობენ, მეორე დღეა რუსული ძალები მარიუპოლში აგრძელებენ სახმელეთო თავდასხმებს აზოვსტალის ფოლადის ქარხანაზე.
აზოვსტალის გაუვნებლებისა და მარიუპოლის სრულად აღებისთვის რუსეთის განახლებული ძალისხმევა, სავარაუდოდ, დაკავშირებულია 9 მაისის – გამარჯვების დღის მოახლოებასთან და პუტინის სურვილთან – გამოაცხადოს სიმბოლური გამარჯვება უკრაინაში.
ეს ძალისხმევა რუსეთს ადამიანური, აღჭურვილობის და საბრძოლო მასალის ფასად უჯდება. მანამ აზოვსტალში უკრაინული წინააღმდეგობა არსებობს, რუსული დანაკარგები კვლავაც გააგრძელებს ზრდასა და სამხრეთ დონბასში მათი ოპერატიული გეგმების ჩაშლას,“ – ვკითხულობთ ბრიტანული დაზვერვის ბოლო განახლებაში.
____
მთავარი ფოტო: აზოვსტალი
