Batumelebi

27 სექტემბერი სოხუმის დაცემის დღეა. აფხაზეთის ომის შემდეგ 29 წელი გავიდა. სოხუმის დაცემის მერე ადგილობრივებმა სვანეთის უღელტეხილის გავლით მიაღწია სამშვიდობოს. უღელტეხილზე  ასობით ადამიანი დაიღუპა თვითმხილველების მონათხრობის მიხედვით.

29 წლის შემდეგ, სოხუმიდან დევნილი ია კვაშილავა წამოსვლის ისტორიას იხსენებს. მაშინ 13 წლის იყო. ომის პირველი დღეც ახსოვს. პურის რიგში იდგა, როცა ავტომატის ჯერი რამდენჯერმე გაისროლეს, ხალხი გონს ვერ მოეგო, ვერ მიხვდნენ, უბრალოდ ვინმემ გაისროლა, თუ რამე უფრო სერიოზული დაიწყო.

ია კვაშილავას მონათხრობი:

პურის მაღაზიიდან სახლში დავბრუნდი და ვთქვი, ომი დაიწყო-მეთქი. გაოგნებულები მიყურებდნენ. ჩათვალეს, რომ რაღაც დაჯგუფებამ გაისროლა. მერე ომი მართლა დაიწყო. ჩვენი სახლის უკან, მთაზე სასროლი დანადგარები იყო დამონტაჟებული. ამ მთას ესროდნენ, ჩვენ კი ვითომც არაფერი, ვიყავით სახლში და ხან მეორე სართულზე ავდიოდით, ხან დაბლა ჩამოვდიოდით.

27 სექტემბერი იყო, სოფელ მერხელში წავედით. ეს იყო სოხუმის შემდგომი სოფელი, საიდანაც მერე უკვე გზა პირდაპირ სვანეთისკენ გრძელდებოდა. ვიცოდით, რომ მთელი სოხუმის მოსახლეობა ამ სოფელში იყო თავმოყრილი. ველოდებოდით დამაიმედებელ ინფორმაციას. ვერ ვიჯერებდით, რომ ქალაქი ოკუპირებული იყო და საშინელება გველოდა.

ჯარისკაცები გვეუბნებოდნენ: წადით, დატოვეთ სახლები, ქალები და ბავშვები მაინც წაიყვანეთო. ბიძაჩემს დიდი სატვირთო მანქანა ჰყავდა, მისაბმელიანი.

მორჩა, ჩაალაგეთ, რაც გჭირდებათ და გავდივართო – ბიძაჩემმა თქვა.

ქალები და ბავშვები ვიყავით ძირითადად. ჩავყარეთ ნივთები. რაც ხელში მოგვხვდა, გააზრებულად არაფერი წამოგვიღია, როცა გადმოვაღწიეთ სვანეთიდან გავხსენით ჩანთები. იქ იმდენი არასაჭირო ნივთი იყო… ქსოვილები, საზაფხულო ტანსაცმელი, არადა შემოდგომისპირი იდგა, წინ ზამთარი გველოდა. გვეგონა მოვდიოდით მაქსიმუმ ორი, სამი დღით. ვფიქრობდით გზად დაგვეწეოდა ამბავი და გვაუწყებდნენ, რომ ომი დასრულდა, მოლაპარაკება დაიწყო და ჩვენ შევძლებდით სახლში დაბრუნებას.

მალე ავტომობილით შეუძლებელი გახდა გზის გაგრძელება. ცუდი გზა იყო, ტალახი, აღმართები. მანქანას მისაბმელი ნაწილი მოხსნეს, მძღოლი ბიძაჩემი იყო, მანქანაში მისი შვილი და ხუთი დღის შვილიშვილი იყო. მისაბმელზე მე ვიყავი და ჩვენი ნათესავები, მეზობლები.

ჩვენი გზა 15 დღე გრძელდებოდა. ციოდა სვანეთის უღელტეხილზე, ხან წვიმდა. ბავშვებს თითქმის წელამდე გვწვდებოდა ტალახი.

საშინელებები გვხვდებოდა გზადაგზა, გვამები, ბავშვები, სისასტიკე… ემოციებისგან დაცლილი ხალხი…

ერთ რამეს ვიხსენებ სულ. ცეცხლთან ვისხედით და გზად ჩამვლელმა ჯარისკაცმა გვთხოვა ჩვენთან ღამე გაეთია, რა თქმა უნდა, დავთანხმდით, ქალებმა ჰკითხეს, როგორც ჯარისკაცს, რახან ჩვენზე მეტი რამ იცოდა, სავარაუდოდ რას ფიქრობდა, როდის სრულდებოდა ეს ყველაფერი, როდის შევძლებდით ისევ დაბრუნებას. ახლაც მახსოვს რა გაფაციცებით ველოდი ჯარისკაცის სიტყვებს. როგორ შევცქეროდი.

კაცმა თვალები დაბლა დახარა და თქვა: ალბათ ათი წელი მაინც ვერ დავბრუნდებით სოხუმშიო. ქალებს შეეცოდათ ეს კაცი. ამბობდნენ, შეიშალა საწყალი, კონტუზია აქვს ალბათ, არ არის თავის ჭკუაზეო.

ასე დაუჯერებლად ჟღერდა მაშინ სოხუმის დაკარგვა. არ დავიჯერეთ 10 წელი. თუმცა აგერ უკვე 30 წელი სრულდება და სოხუმი ისევ დაკარგულია…

მერე სვანეთის ტყის ნაწილი დასრულდა და უდაბნოს ნაწილი დაიწყო. საკმაოდ რთული იყო, მიდიოდი სიმაღლეზე, სადაც მიწა მტვრად იყო ქცეული და წინ მიმავალი ადამიანის მტვერი სახეში გეყრებოდა.

13 წლის ვიყავი. ჩვენი საახლობლო წრე ალბათ თხუთმეტიოდე ადამიანისგან შედგებოდა, ჩამოვრჩი მათ და წინსვლის ნაცვლად ფეხი უკან მისრიალებდა, ვერც ვთქვი მიშველეთ ან ხელი ჩამჭიდეთ-მეთქი, ხმას ვერ ვიღებდი.

ჩვენი ოჯახის ერთი ახლობელი კაცი იყო, თავის ბებიას მოჰყვებოდა და ჩვენთან ერთად გამოვიდა სოხუმიდან. საშველად არავისთვის დამიძახია, მაგრამ ამ კაცმა მოიხედა შემთხვევით უკან და ხელი გამომიწოდა, ამომქაჩა, ხრამში ჩასრიალებისგან გადამარჩინა.

უღელტეხილის თითქმის მწვერვალზე ვიყავით, როცა ვერტმფრენი დავინახეთ. შეგვნიშნეს, ჩვენკენ მოფრინავდნენ დასახმარებლად. მახსენდება, ჩემი 37 წლის ბიცოლა გაიძახოდა, მე არ წავალ, არსად წავალ, ვერ დაგტოვებო. ბიძაჩემს, თავის ქმარს ეუბნებოდა. ბიძაჩემი არწმუნებდა რომ უნდა წასულიყო  შვილთან და შვილიშვილთან ერთად.

ჩამოგვიყვანა ვერტმფრენმა, თავი რაღაც კლუბის შენობას შევაფარეთ. ძალიან ციოდა, შენობაში ცეცხლი ენთო, ყველაფერი იკვამლებოდა. ყველას იატაკზე გვეძინა. ვიღაცები წაკამათდნენ, ერთმა კაცმა დიდ ჭურჭელს, რაშიც ცეცხლი ენთო, ფეხი ჰკრა. ლითონის საშინელი ხმა იყო, ბიცოლაჩემმა თავი ცუდად და სწრაფად წამოწია, შვილი და შვილიშვილი მოიკითხა, სოფო და ბავშვი სად არიანო – დაიძახა.  მერე იქვე დაეცა მოწყვეტით, გონება დაკარგა. ბნელოდა, ვერ ვხვდებოდით რა მოხდა.

მე და ჩემხელა, 13 წლის ბიძაშვილი გარეთ გავვარდით და ვყვიროდით, დაგვეხმარეთ! დაგვეხმარეთ-მეთქი.

იქვე სადღაც წითელი ჯვრის მანქანა დადიოდა. შემოვიდნენ კლუბში, მაგრამ ბიცოლაჩემი უკვე გარდაცვლილიყო. 37 წლის ქალი.  ორი დღის შემდეგ ბიძაჩემიც ჩამოვიდა. მეუღლე ცოცხალი აღარ დახვდა.

მე და დედაჩემი დავრჩით მარტო. ჩემი 18 წლის ძმა აფხაზეთში დავტოვეთ, ბებია-ბაბუას ვერ დავტოვებო, მამაც იქ იყო. ძმაზე გვეუბნებოდნენ, რომ ტყვედ ჩავარდა, ნათლიაჩემსა და ბიძაჩემზეც იმავეს ამბობდნენ. მერე გავიგეთ, რომ ჩემი ძმა მართლა სომეხმა ბოევიკებმა დაატყვევეს.

ბიძაჩემი და ნათლიაჩემიც იყო აყვანილი ტყვედ. ზოგი გვეუბნებოდა, რომ აფხაზებს შეეწირა, ზოგი ამბობდა, რომ ცოცხალია და ბებია-ბაბუას იცავდა.

ჩემი ძმა ახლა რომ ჰყვება ტყვეობის ამბავს ვერ ვიჯერებ, ნუთუ ეს მართლა მოხდა-მეთქი, ვფიქრობ.

უცხო მამაკაცი ახლდათ თურმე. უბრალოდ, ფეხით გადმოდიოდა მათთან ერთად, შეეკედლა ჯგუფს და სამხედრო ზედა ეცვა.

სომეხი ბოევიკები ჩაეჭიდნენ ამ კაცს და აიძულებდნენ, გაგვიმხილე, რომლები არიან ამათგან მებრძოლებიო. მებრძოლებს შორის იყვნენ მამაჩემი, ბიძაჩემი და ჩემი ძმაც.

ნაკუწ-ნაკუწ, ცოცხალს მოაჭრეს თურმე ალაგ-ალაგ ხორცი ჩემი ძმის თვალწინ და ნახევრად ცოცხალი ხრამში გადააგდეს. ამ ბიჭს არცერთი მეომარი არ დაუსახელებია.

დღეს გავრცელდა კადრები, სადაც აფხაზეთიდან დევნილებს ადარებდნენ რუსეთიდან გამოქცეულ ხალხს ლარსზე, ეს ჩვენთვის, აფხაზეთიდან დევნილებისთვის ჭრილობაზე მარილის მოყრასავითაა.

გული მწყდება ჩვენს საზოგადოებაზე, რადგან ჩვენ არ აღგვიქვამდნენ როგორც ადამიანებს, რომლებმაც საშინელება გამოიარეს. ვიყავით უბრალოდ „დევნილები“. არავინ ინტერესდებოდა, რა მოხდა, რა გავიარეთ, ყველა უბრალოდ გვეკითხებოდა – თქვენ დევნილი ხართ? მთელი ამხელა ტრაგიკული ამბების შემდეგ.

როცა ვხედავ რუსები როგორ მორბიან… მათ მიწას არავინ ართმევს და მაინც გამორბიან. ჩვენ კი აფხაზეთიდან ძალით გამოგვდევნეს. ჩვენივე თანამოქალაქეები გვეუბნებოდნენ: რატომ თოხებით და ბარებით არ დაიცავით თქვენი მიწა, რატომ არ დარჩით იქვეო. ახლა მე ვეკითხები ქართულ საზოგადოებას, გაბედავენ და ჰკითხავენ იმავეს რუსეთიდან გამოქცეულ დეზერტირებს? ჰკითხავენ თამამად, რატომ არ რჩებიან რუსეთში და რატომ არ იცავენ თავიანთ ღირსებას სამშობლოში ბარებით?

თავიდან აფხაზეთის თემა და მოლაპარაკებები აქტუალური იყო, ახლა აღარ. ამას აფხაზეთიდან დევნილი ყველა ადამიანი გრძნობს.

ჩვენი ამბების მსმენელი საქართველოში უკვე აღარ არის…“

დღეს, 27 სექტემბერს, თბილისის დროით 18:10 საათზე მიწისძვრა მოხდა.

ძლიერი ბიძგები იგრძნობოდა ბათუმში.

დედამიწის შემსწავლელ მეცნიერებათა ინსტიტუტის სეისმური მონიტორინგის ეროვნული ცენტრის ინფორმაციით, მიწისძვრის ეპიცენტრი თურქეთში, საქართველოს სახელმწიფო საზღვრიდან 64 კმ-ში იყო.

პირველადი ინფორმაციით, მიწისძვრის სიმძლავრე 5.3 (ML) მაგნიტუდა იყო.

ინფორმაცია ზუსტდება.

ამავე თემაზე: 

ბირთვულ იარაღის შესაძლო გამოყენებაზე ვლადიმერ პუტინის განცხადების შემდეგ, თავის მოსაზრებას რუსეთის უშიშროების საბჭოს მდივნის მოადგილე, დიმიტრი მედვედევი აქვეყნებს. ტელეგრამის პოსტში, ის სიძულვილის ენით, სექსიზმითა და შეურაცხმყოფელი ლექსიკით ესხმის თავს უკრაინისა და დასავლეთის ლიდერებს და ახსენებს რუსეთის უფლებას – გამოიყენოს ნებისმიერი იარაღი საკუთარი სახელმწიფოებრიობის დასაცავად.

„ბაიდენი და ტრასი, სხვადასხვა მეორეხარისხოვანი ბლინკენები და სალივანები, ატლანტიკურ ნერწყვს იფურთხებიან და რუსეთისგან ითხოვენ, ხელი აიღოს „ბირთვული ღილაკიდან“. თან გაუთავებლად გვემუქრებიან „უსაშინელესი“ შედეგებით, თუ რუსეთი ბირთვულ იარაღს გამოიყენებს. ჭკუით ნორჩი ლონდონელი დეიდა საერთოდაც მზადაა, ჩვენს ქვეყანასთან ბირთვული დარტყმების გაცვლა დაუყოვნებლივ დაიწყოს,“ – წერს მედვედევი.

უშიშროების საბჭოს მდივანი კიდევ ერთხელ ახსენებს დასავლეთის ლიდერებს, რომ რუსეთი გამოიყენებს ბირთვულ იარაღს, თუ ამის საჭიროებას დაინახავს:

„კიდევ ერთხელ მიწევს შეხსენება – იმ დაყრუებულებისთვის, ვისაც მხოლოდ საკუთარი ხმას ესმით. რუსეთს უფლება აქვს გამოიყენოს ბირთვული იარაღი, თუ ეს აუცილებელი იქნება. წინასწარ განსაზღვრულ შემთხვევებში. ბირთვული შეკავების სფეროში სახელმწიფო პოლიტიკის საფუძვლების მკაცრი დაცვით. თუ ჩვენზე ან ჩვენს მოკავშირეებზე იქნება თავდასხმა მსგავსი ტიპის შეიარაღებით. ან თუ იქნება აგრესია ჩვეულებრივი იარაღით და ჩვენს სახელმწიფოებრიობას საფრთხე შეექმნება.“

თუმცა მედვედევის პროგნოზით, იმ შემთხვევაში, თუ რუსეთი ბირთვულ იარაღს უკრაინის წინააღმდეგ გამოიყენებს, NATO და ევროპა ამაზე თვალს დახუჭავს.

„ჩვენ ყველაფერს გავაკეთებთ, რათა არ დავუშვათ ბირთვული იარაღის გაჩენა ჩვენდამი მტრულად განწყობილ მეზობლებთან, მაგალითად ნაცისტურ უკრაინაში, რომელსაც დღეს NATO-ს ქვეყნები მართავენ. კიევის რეჟიმის გონებრივი შესაძლებლობებისა და პოლიტიკური ნების იმედად ყოფნა უაზრობაა, მათ მიერ წაქეზებული ქვეყნების თვითგადარჩენის ინსტინქტისა და გონიერების მცირე იმედი კიდევ შეიძლება გვქონდეს. მათ ესმით: თუ რუსეთისადმი საფრთხე გარკვეულ ზღვარს გადააჭარბებს, ჩვენ იძულებული გავხდებით, ვუპასუხოთ.

და არავის დავეკითხებით ნებართვას, არ დავიწყებთ ხანგრძლივ კონსულტაციებს. ეს ნამდვილად არაა ბლეფი.

თუმცა საქმე სხვა რამეშია. წარმოვიდგინოთ, რომ რუსეთი იძულებულია გამოიყენოს ყველაზე საშიში იარაღი უკრაინის რეჟიმის წინააღმდეგ, რომელმაც აგრესიის მასშტაბური აქტი ჩაიდინა, რომელიც ჩვენი სახელმწიფოს არსებობისთვის საშიშია. ვვარაუდობ, რომ NATO პირდაპირ არ ჩაერთვება კონფლიქტში ასეთ სიტუაციაშიც კი. ვაშინგტონის, ლონდონის, ბრიუსელის უსაფრთხოება ჩრდილო ატლანტიკური ალიანსისთვის გაცილებით მნიშვნელოვანია, ვიდრე არავისთვის საჭირო და მომაკვდავი უკრაინის ბედი,“ – წერს მედვედევი და დასძენს, რომ თანამედროვე შეიარაღების მიწოდება უკრაინაში დასავლეთისთვის მხოლოდ ბიზნესია, ამიტომ  „ოკეანისგაღმელი და ევროპელი დემაგოგები ბირთვული აპოკალიფსით სიკვდილს არ აპირებენ – გადაყლაპავენ ნებისმიერი იარაღის გამოყენებას მიმდინარე კონფლიქტში“.

ნაწილობრივი მობილიზაციის გამოცხადების შემდეგ, 21 სექტემბერს, ბირთვული იარაღის გამოყენებაზე ილაპარაკა ვლადიმერ პუტინმა. მან რუსეთის მიმართ დასავლეთის აგრესიულ პოლიტიკას გაუსვა ხაზი, დასავლეთი ბირთვულ შანტაჟში დაადანაშაულა და გაფრთხილებაც გაუგზავნა – „რუსეთს NATO-ზე თანამედროვე იარაღიც აქვს“ და „საკუთარი ქვეყნის დასაცავად ყველა საშუალებას გამოიყენებს“.

„ჩვენი ქვეყნის ტერიტორიულ მთლიანობის, ჩვენი ქვეყნისა და ჩვენი ხალხის დასაცავად, რასაკვირველია, ჩვენს ხელთ არსებულ ყველა შესაძლებლობას გამოვიყენებთ. ეს ბლეფი არაა,“ – თქვა რუსეთის პრეზიდენტმა და დასძინა. – „ხოლო მათ, ვინც ბირთვული საფრთხით ჩვენს დაშანტაჟებას ცდილობს, უნდა იცოდნენ, რომ ქარების ვარდი შეიძლება მათკენაც შებრუნდეს.“

„სამინისტრო მოქმედებს კანონის სრული დაცვით… ეს იყო კანონის ფარგლებში მონიჭებული უფლებამოსილების ფარგლებში მიღებული გადაწყვეტილება,“ – გვითხრა აჭარის განთლების, კულტურის და სპორტის მინისტრმა მაია ხაჯიშვილმა, რომელსაც ვკითხეთ: რატომ დანიშნა ბათუმის დრამატული თეატრის სამხატვრო ხელმძღვანელად უკონკურსოდ და ასევე, რატომ გაუორმაგა ხელფასი ნუკრი ქანთარიას, რომელიც მანამდე პარლამენტარი იყო „ქართული ოცნებიდან“?

ნუკრი ქანთარია მინისტრმა მაია ხაჯიშვილმა კონკურსის გარეშე დანიშნა. მისი ხელფასი 6 ათასი ლარია, მანამდე ამ პოზიციაზე ანაზღაურება 2940 ლარი იყო. ახალი სამხატვრო ხელმძღვანელი ბათუმში სტალინზე სახოტბო პიესის დადგმას გეგმავს.

რატომ არ გაითვალისწინეთ კანონის ის მოთხოვნა, რომელიც ითვალისწინებს საჯარო პოზიციებზე „საუკეთესო კანდიდატის შერჩევის პრინციპს“ და ამ შედეგს კონკურსი უფრო უზრუნველყოფს, ვიდრე ერთპიროვნული გადაწყვეტილება? – ვკითხეთ მაია ხაჯიშვილს.

„პროცესი, რომელიც წინ უძღოდა კანდიდატურების შერჩევას, გულისხმობს არამხოლოდ კონკურსის გამოცხადებას, არამედ შესაბამის კონსულტაციებს, რაც იყო გავლილი….“, – გვიპასუხა მაია ხაჯიშვილმა.

მას შემდეგ, რაც მინისტრისგან ვერ მივიღეთ პასუხი, თუ კონკრეტულად რა არგუმენტით გაუორმაგა ხელფასი „ქართულ ოცნებასთან“ დაახლოვებულ ნუკრი ქანთარიას, მინისტრს ვკითხეთ, მისი მინისტრობის პერიოდში კიდევ ვის გაუორმაგა, მაგალითად, ხელფასი?

„ჩვენ გვაქვს სახელფასო პოლიტიკის ზრდა კულტურის დაწესებულებებში და ამ კუთხით არაერთი დადებითი გადაწყვეტილება იქნა მიღებული აჭარის მთავრობის მიერ,“ –  ვერ დაგვისახელა ხელფასის გაორმაგების კონკრეტული შემთხვევა მინისტრმა.

აჭარის კულტურის მინისტრი ასევე ვერ დაგვისახელა არგუმენტი, რის გამო თქვა სამინისტრომ უარი ბათუმის ერთ-ერთი მთავარი კულტურული ღონისძიების – ბათუმის კინოფესტივალის დაფინანსებაზე?

„სამინისტროს ყველა არგუმენტი და გადაწყვეტილება მიწოდებულია საზოგადოებისთვის… მუშაობდა კომისია საკონკურსო პირობების და წინასწარ განსაზღვრული კრიტერიუმების შესაბამისად,“ – ისევ ზოგადი პასუხით სცადა  კითხვის არიდება მინისტრმა.

მაია ხაჯიშვილს შევახსენეთ, რომ წინა წლებში იგივე სამინისტრო აფინანსებდა Biaff-ს, ხოლო სამინისტრომ კინოფესტივალამდე რამდენიმე დღით ადრე  ფული – 73 ათასი ლარი, მაგალითად, მმართველ პოლიტიკურ გუნდთან დაახლოებულ „პრაიმშოუს“ პირდაპირი წესით მისცა. მინისტრმა ეს კითხვებიც უპასუხოდ დატოვა.

„2022 წლის 25 სექტემბრის სატელიტური ფოტოებია აჩვენებს გრძელ საცობს მანქანებისას, რომლებიც უკრაინაში ომისთვის პუტინის მიერ მობილიზაციის გამოცხადების შემდეგ, ტოვებენ რუსეთს და ლარსის გამშვებ პუნქტზე საქართველოს საზღვრის გადაკვეთას ცდილობენ“, – წერს Maxar Technologies ტვიტერში და სატელიტურ ფოტოებს აქვეყნებს.

მაქსარი კოსმოსური ტექნოლოგიებისა და დაზვერვის კომპანიაა, რომელიც სატელიტის საშუალებით იღებს თანამგზავრულ სურათებს.

დღეს, 27 სექტემბერს, საქართველოს შს მინისტრმა ვახტანგ გომელაურმა ლარსის გამშვებ პუნქტთან შექმნილ ვითარებაზე განაცხადა, რომ „დაახლოებით 4-5 დღის წინ 5-6 ათასამდე იყო შემომსვლელები და ახლა გაიზარდა სადღაც 10 ათასამდე, 40-45 პროცენტით მოიმატა… გუშინ იყო მაგალითად 11 200 ადამიანი, გუშინწინ 10 400-მდე იყო, თუ არ ვცდები…. და არა 250 ათასი და 2 მილიონი. არ ვიცი საიდან მოგაქვთ“.

რუსულმა მხარემ დღეს განაცხადა, რომ რუსეთ-საქართველოს საზღვარზე, ზემო ლარსის სასაზღვრო გამშვებ პუნქტზე, რუსეთი სამხედრო აღრიცხვისა და გაწვევის სამობილიზაციო პუნქტს მოაწყობს. ინფორმაციას რუსეთის ფედერაციაში შემავალი ჩრდილოეთ ოსეთი შინაგან საქმეთა სამინისტრო ავრცელებს.

დეტალურად: რუსეთი ამბობს, რომ ლარსზე სამხედრო-სამობილიზაციო პუნქტს მოაწყობს

რუსული სახელმწიფო მედიის, TASS-ის თანახმად, გუშინდელი მდგომარეობით, საქართველოს საზღვარზე რუსული საბაჟო პუნქტი „ზემო ლარსი“ ერთი კვირის განმავლობაში ორივე მიმართულებით 37 000-ზე მეტმა მანქანამ და 115 000-ზე მეტმა ადამიანმა გადაკვეთა. რუსული TASS-ის თანახმად, ეს ინფორმაცია მათ რუსეთის ფედერაციაში შემავალი ჩრდილოეთ ოსეთის ვიცე-პრემიერმა, ირბეკ ტომაევმა დაუდასტურა.

ცნობილი გახდა, რამდენმა ადამიანმა გადაკვეთა რუსეთ-საქართველოს საზღვარი მობილიზაციის შემდეგ

დღეს, 27 სექტემბერს, აჭარის უმაღლეს საბჭოში კენჭი უყარეს აჭარის უმაღლესი საარჩევნო კომისიის წევრის სამ ვაკანტურ თანამდებობაზე  წარდგენილ კანდიდატურებს.

ფარული კენჭისყრის შედეგად კომისიის წევრებად აირჩიეს ციალა შავაძე, ზაალ ზაალიშვილი და თამარ ქამადაძე.

არჩეულმა კანდიდატებმა 13-13 ხმა მიიღეს.

სხვა კანდიდატები იყვნენ: სოფიო კახაძე, დავით ფარტენაძე და სოფიო შაქარიშვილი.

არჩეული წევრები 5 წლის ვადით დარჩებიან ამ თანამდებობაზე. მათი უფლებამოსილების ვადა დაიწყება დღეიდან, ანუ 2022 წლის 27 სექტემბრიდან.

კენჭისყრაში არ მონაწილეობდნენ უმაღლესი საბჭოს წევრები „ნაციონალური მოძრაობიდან“.

უმაღლესი საბჭოს ინფორმაციით, უმაღლეს საარჩევნო კომისიაში ერთი ადგილი მას შემდეგ გახდა ვაკანტური, რაც კომისიის ერთ-ერთი წევრი, ირაკლი გვარამია კორონავირუსის დიაგნოზით გარდაიცვალა, ორი ადგილი კომისიას კი საარჩევნო კანონმდებლობაში შესული ცვლილების შედეგად დაემატა.

ამავე თემაზე: 

დღეს, 27 სექტემბერს, შს მინისტრ ვახტანგ გომელაურს ჟურნალისტებმა ჰკითხეს ლარსის სასაზღვრო გამშვებ პუნქტთან შექმნილ მდგომარეობაზე, სადაც რუსეთის მოქალაქეების რამდენიმე კილომენტრიანი რიგი დგას, რომლებიც საქართველოში შემოსვლას ცდილობენ.

ჟურნალისტებმა გომელაურს ჰკითხეს, განიხილება თუ არა საზღვრის ჩაკეტვის საკითხი და როგორ აპირებენ მდგომარეობის გაკონტროლებას.

„250 ათასი ადამიანის შემოსვლა, არასწორია, ტყუილია. მაგდენი არ შემოსულა, საიდან მოაქვთ ეს ციფრები არ ვიცი. დაახლოებით 4-5 დღის წინ 5-6 ათასამდე იყო შემომსვლელები და ახლა გაიზარდა სადღაც 10 ათასამდე, 40-45 პროცენტით მოიმატა. გუშინ იყო მაგალითად 11 200 ადამიანი, გუშინწინ 10 400-მდე იყო, თუ არ ვცდები. და არა 250 ათასი და 2 მილიონი. არ ვიცი საიდან მოგაქვთ“, – ამბობს გომელაური.

რუსული სახელმწიფო მედიის, TASS-ის თანახმად, გუშინდელი მდგომარეობით, საქართველოს საზღვარზე რუსული საბაჟო პუნქტი „ზემო ლარსი“ ერთი კვირის განმავლობაში ორივე მიმართულებით 37 000-ზე მეტმა მანქანამ და 115 000-ზე მეტმა ადამიანმა გადაკვეთა. რუსული TASS-ის თანახმად, ეს ინფორმაცია მათ რუსეთის ფედერაციაში შემავალი ჩრდილოეთ ოსეთის ვიცე-პრემიერმა, ირბეკ ტომაევმა დაუდასტურა.

ტომაევის ინფორმაციით, ეს მაჩვენებელი 23,3%-ით მეტია გასულ საანგარიშო კვირასთან შედარებით.

ვრცლად: ცნობილი გახდა, რამდენმა ადამიანმა გადაკვეთა რუსეთ-საქართველოს საზღვარი მობილიზაციის შემდეგ

საქართველოს შს მინისტრის თქმით, ორი მოსაზრება არსებობს რუსეთის მოქალაქეების შემოსვლაზე. „ერთი ნაწილი ითხოვს, რომ შემოვუშვათ ეს ადამიანები, რომ არ წავიდნენ და არ მოკლან უკრაინელები. მეორე ნაწილი ამბობს, რომ არ შემოვუშვათ. ჩამოყალიბდეს ოპოზიცია, რომელი უნდათ – შემოვუშვათ თუ არ შემოვუშვათ ეს ადამიანები?“ – ამბობს გომელაური.

კითხვაზე, გაიზრდება თუ არა კრიმინალი მიგრანტების შემოსვლასთან ერთად, გომელაური ამბობს, რომ „შესაძლოა გაიზარდოს, შესაძლოა – არა“.

პიკზე ვართ უკვე, ვცდილობთ გავფილტროთ და ამაში უსაფრთხოების სამსახურიც გვეხმარება“, – განაცხადა მან.

___

დღეს, 27 სექტემბერს, რუსულმა მხარემ გაავრცელა ინფორმაცია, რომ რუსეთ-საქართველოს საზღვარზე, ზემო ლარსის სასაზღვრო გამშვებ პუნქტზე, რუსეთი სამხედრო აღრიცხვისა და გაწვევის სამობილიზაციო პუნქტს მოაწყობს. ინფორმაციას რუსეთის ფედერაციაში შემავალი ჩრდილოეთ ოსეთი შინაგან საქმეთა სამინისტრო ავრცელებს.

___________________________

ამავე თემაზე:

„ქალი ვარ, გესმის ჩემი?“ ასე ქვია ირანული თეატრალური ჯგუფის, „პრაქისის“ ერთსაათან წარმოდგენას, რომლის რეჟისორიც ქამელია ღაზალია. სპექტაკლი თბილისის თეატრალურ ფესტივალზე უნდა ეჩვენებინათ, თუმცა ირანში განვითარებული მოვლენების გამო სპექტაკლი გაუქმდა, მსახიობები ირანიდან ვერ ჩამოდიან.

სპექტაკლი – „ქალი ვარ, გესმის ჩემი?“ თეატრის კრიტიკოსის, დავით ბუხრიკიძის წერილის მიხედვით დიდი წარმატებით უჩვენეს ევროპის კულტურის დღეებზე გერმანიაში, ქალაქ კარლსრუეში.

„2019 წელს კი ლამის ტრიუმფით ჩაიარა ირანული დასის გასტროლებმა მილანის სახელოვანი „პიკოლო თეატრის“ სცენაზე.

რეჟისორი სამი თაობის ირანელი ქალების – ბებიის, დედისა და ქალიშვილის ტკივილებსა და დრამას, აქრომატულ სცენურ გარემოში გვიხატავს. ნაცრისფერის, შავისა და თეთრის მონაცვლეობა და ლამის გამუდმებული თოვა სცენაზე ზუსტად გადმოსცემს ატმოსფეროს, რომელშიც ქალების შიში, უიმედობა, სიყვარული თუ სიძულვილი ერთმანეთს ენაცვლება“, – წერს დავით ბუხრიკიძე სპექტაკლის შესახებ.

რეჟისორი ქამელია ღაზალი ამბობს, რომ „ამ ქალებისა არასოდეს არავის ესმოდა. ეს ის ხმაა, რომელიც ათწლეულების განმავლობაში იმალებოდა თოვლისა და სიცივის ქვეშ;  ხმა, რომლის ექოსიც კი გვეშინოდა… ეს ქალის ხმაა“.

ირანელმა მსახიობმა ქალმა თბილისის თეატრალური ფესტივალის ორგანიზატორებს წერილობით აცნობა, რომ ვერ ჩამოდიან:

„ირანში ახლა ინტერნეტი არ არის, საბედნიეროდ ხანდახან VPN-ს ვპოულობ Wi-Fi რომ ჩავრთო, მაგრამ არ ვიცი სანამდე მექნება ამაზე წვდომა, ძალიან ვწუხვართ, ერთმანეთსაც კი ვერ ვპოულობთ, რადგან ხანდახან მობილური ტელეფონიც არ მუშაობს“, – წერია მსახიობის მიერ მოწერილ წერილში.

თბილისის თეატრალური ფესტივალის ორგანიზატორების განცხადებით მაყურებლებს ამ სპექტაკლზე დასასწრები ბილეთების დაბრუნება მარჯანიშვილის თეატრის სალაროში შეუძლიათ. ონლაინ შეძენილი ბილეთები კი დაბრუნდება საიტიდან biletebi.ge

„ფესტივალი მხარს უჭერს ირანელი ქალების თავგანწირვას სინათლისთვის, მომავლისთვის, თავისუფლებისა და პერსპექტივისთვის!“ წერია ფესტივალის ორგანიზატორების მიერ გავრცელებულ განცხადებაში.

ირანელი რეჟისორის სპექტაკლი მარჯანიშვილის თეატრში უნდა გამართულიყო.

მთავარ ფოტოზე: სცენა სპექტაკლიდან: „ქალი ვარ, გესმის ჩემი!”

ბათუმის რუსთაველის სახელობის სახელმწიფო უნივერსიტეტში ჯანმრთელობისა და უსაფრთხოების თანამედროვედ აღჭურვილი ლაბორატორია გაიხსნა ევროკავშირის მხარდაჭერით.

ბსუ-ს ცნობით, პროექტი, რომელიც ევროკავშირის მხარდაჭერით ხორციელდება, მიზნად ისახავს საქართველოს ოთხ უნივერსიტეტში (ბათუმში, თბილისში – თსუ, თელავსა და ქუთაისში) ლაბორატორიული ჯანმრთელობისა და უსაფრთხოების პროფესიული გადამზადების პროგრამების დანერგვას.

„სხვადასხვა პროფილის ლაბორატორიებში დასაქმებული პერსონალის უსაფრთხო ლაბორატორიული პრაქტიკის უნარ-ჩვევების ამაღლება დასაქმების ბაზრის ერთ-ერთი მნიშვნელოვანი გამოწვევაა, რაც განსაკუთრებით გამოიკვეთა კოვიდ-19 პანდემიის პირობებში.

ამიტომ, ბსუ-ში მოქმედი აკრედიტებული პროფესიული გადამზადების კურსები – „ლაბორატორიული ჯანმრთელობისა და უსაფრთხოება“ ძალიან მნიშვნელოვანია აჭარის რეგიონში ამ მიმართებით არსებული გამოწვევების  დაძლევის თვალსაზრისით“ – აცხადებენ ბსუ-ში.

პროექტის პირველ ეტაპზე გადამზადდა 9 ტრენერი და შეიქმნა ქართულენოვანი სახელმძღვანელო. ჯამში დაგეგმილია 250 მსმენელის გადამზადება. როგორც ბსუ-ში გვეუბნებიან 10 მსმენელი უკვე გადამზადდა, დანარჩენი მსურველები კი მომავალში გადამზადდებიან. კურსის დაწყების შესახებ ინფორმაცია უნივერსიტეტის ვებგვერდზე განთავსდება.

„პროექტი შესაძლებლობას ქმნის გადამზადებული კადრები დასაქმდნენ კერძო და სახელმწიფო ლაბორატორიებში, ფარმაცევტულ, აგრო-კვების ინდუსტრიაში და ჯანდაცვის ინსტიტუტებში. ასევე შესაძლებელია თანამედროვე აპარატურით აღჭურვილი ლაბორატორიის სასწავლო მიზნით  გამოყენება ბიოლოგიის და მედიცინის მიმართულების სტუდენტებისათვის და ბიოსამედიცინო მიმართულების კვლევებისთვის“- აღნიშნულია ბსუ-ს მიერ გავრცელებულ ინფორმაციაში.

პროექტის საერთაშორისო პარტნიორები არიან მილანისა და ტერამოს უნივერსიტეტები.

პროექტი წარმოადგენს ევროკავშირის სექტორული რეფორმის განმახორციელებელი პროგრამის „დასაქმების ბაზრის საჭიროებების შესაბამისი უნარების განვითარების მხარდაჭერა/უნარები სამუშაოსთვის, მე-2 ფაზა“  ნაწილს, რომლის  მიზანია ხელი შეუწყოს საქართველოს ეკონომიკის მდგრად განვითარებას ადამიანური რესურსების გაძლიერებისა და  პროფესიული უნარების განვითარების გზით.

დღეს, 26 სექტემბერს, ბათუმის ბულვარში, კოლონადებთან, აჭარული ხის მეჩეთების ფოტოების გამოფენა მიმდინარეობს.

გამოფენა საღამოს 18 საათამდე გაგრძელდება და მასზე დასწრება თავისუფალია.

„აჭარული ხის მეჩეთები ქართული ისლამური კულტურის უნიკალური და საუკუნოვანი ნიმუშებია, რომლებსაც სჭირდებათ მოვლა, ხილვადობა და აღიარება.

ამ გამოფენის მიზანია თვალხილული გახდეს ეროვნული ქარგის ეს შეუმჩნეველი ნაწილი და წარმოჩინდეს მისი პოტენციალი აჭარის ტურისტული შესაძლებლობების განვითარებაში”, – აღნიშნავს გამოფენის ორგანიზატორი, ახალგაზრდა რეგიონული სამოქალაქო საზოგადოება „სოლიდარობის თემი“.

„სოლიდარობის თემმა“ პეტიცია მოამზადა აჭარის ხის მეჩეთების გადასარჩენად და აჭარის უმაღლეს საბჭოს მიმართა.

_____________________

მთავარი ფოტო გამოფენიდან. ფოტო: ჰურიე აბაშიძე.

დღეს, 26 სექტემბერს, სოციალურ ქსელებში ვრცელდება ფოტო, რომელზეც საქართველო-რუსეთის საზღვართან, რუსეთის მხარეს, ჯავშანჯექნიკაა ასახული. ტელეგრამზე წერენ, რომ სავარაუდოდ რუსეთი ზედა ლარსთან საგუშაგოს შექმნას გეგმავს.

რუსული გამოცემა РБК-ას ცნობით, რუსეთის სასაზღვრო დეპარტამენტში ადასტურებენ ჯავშანტექნიკის მოძრაობას საქართველოს საზღვართან, ზედა ლარსის გამშვებ პუნქტთან.

გამოცემის ცნობით, რუსეთის სასაზღვრო დეპარტამენტში აცხადებენ, რომ ჯავშანტექნიკა საზღვართან არ არის ბლოკპოსტის შესაქმნელად.

„ინფორმაცია საგუშაგოს მოწყობის შესახებ ყალბია. ჯავშანტექნიკა იქ მოძრაობს, მაგრამ არა ბლოკ-პოსტის შესაქმნელად.

ეს, უხეშად რომ ვთქვათ, რეზერვია გაუთვალისწინებელი შემთხვევისთვის, თუ რეზერვისტები მოინდომებენ გაარღვიონ სასაზღვრო პუნქტი და დოკუმენტების გაფორმების და ფორმალობის გარეშე დატოვონ ქვეყანა. მხოლოდ ამ მიზნით“, – თქვა რუსეთის სასაზღვრო დეპარტამენტის წარმომადგენელმა სამხრეთ ოსეთის რესპუბლიკაში РБК-სთან.

გამოცემისვე ცნობით, დეპარტამენტში ამბობენ, რომ სამხედრო ასაკის მამრობითი სქესის რუსეთის მოქალაქეების გასვლაზე შეზღუდვა არ დაწესებულა.

21 სექტემბრიდან რუსეთში ნაწილობრივი სამხედრო მობილიზაცია გამოცხადდა. ამ ეტაპზე, პუტინის განმარტებით, გაწვევა ეხებათ მხოლოდ იმ მოქალაქეებს, ვინც ამ დროისთვის რეზერვში იმყოფება ან/და აქვს შესაბამისი სამხედრო გამოცდილება.

მობილიზაციის გამოცხადების შემდეგ რუსეთს ათასობით მოქალაქე ტოვებს.

საქართველო-რუსეთის საზღვარზე, ლარსის სასაზღვრო-გამშვებ პუნქტზე, რუსეთის მოქალაქეები კილომეტრიან რიგებში დგანან.

„საერთაშორისო გამჭვირვალობა – საქართველოს“ ცნობით, ბათუმის მერის, არჩილ ჩიქოვანის და აჭარის მთავრობის თავმჯდომარის, თორნიკე რიჟვაძის ფეისბუკის გვერდის რეკლამირებაში აჭარის მთავრობის საერთაშორისო ურთიერთობათა და პროტოკოლის დეპარტამენტის უფროსი, გოგი ფუტკარაძეა ჩართული.

ორგანიზაციის შეფასებით, ეს პრობლემურია, რადგან „გაუმჭვირვალეა თავად ასეთი საქმიანობის დაფინანსების მექანიზმი და წყაროები“.

ორგანიზაციის განცხადებით, მთავრობის ადმინისტრაცია და ბათუმის მერია „გამჭვირვალობას“ ოფიციალურ წერილებში წერენ, რომ სოციალურ ქსელებში თანამდებობის პირების ანგარიშების რეკლამისთვის თანხა არ დაუხარჯავთ.

„შესაბამისად, კითხვები ჩნდება დაფინანსების წყაროს წარმომავლობასთან დაკავშირებით“ – აცხადებს „გამჭვირვალობა“.

• კითხვები რეკლამების ხარჯის წარმომავლობაზე

„არჩილ ჩიქოვანი ბათუმის მერის მოვალეობას 2020 წლის 16 ივლისიდან ასრულებს. „გამჭვირვალობის“ კვლევის თანახმად, Facebook-ში მისი ოფიციალური გვერდი მეორე დღესვე, 2020 წლის 17 ივლისს შეიქმნა. Facebook-ის მიერ საჯაროდ გამოქვეყნებული ცნობების თანახმად, ჩიქოვანის გვერდიდან სხვადასხვა ინფორმაციას 180-ჯერ გაუკეთეს რეკლამა.

„ჯამში, გვერდზე გამოქვეყნებული ინფორმაციის რეკლამირებისთვის 3,200 აშშ დოლარამდე დაიხარჯა.

2021 წლის თვითმმართველობის არჩევნებამდე არჩილ ჩიქოვანის გვერდს „ქართული ოცნება” არეკლამებდა. წინასაარჩევნო პერიოდში პარტიამ ამ მიზნით 2,200 აშშ დოლარამდე დახარჯა.

მოგვიანებით კი, არჩევნების მეორე ტურში გამარჯვების შემდეგ, ჩიქოვანის გვერდის მიერ გავრცელებული ინფორმაციის რეკლამირებაში გოგი ფუტკარაძე, მთავრობის ადმინისტრაციის საერთაშორისო ურთიერთობებისა და პროტოკოლის დეპარტამენტის უფროსი, მონაწილეობს, საკონტაქტო პირად სწორედ ფუტკარაძეა მითითებული“ – წერს, „საერთაშორისო გამჭვირვალობა-საქართველო“.

ორგანიზაციის ინფორმაციით, მთავრობის ადმინისტრაციის წარმომადგენელი არჩილ ჩიქოვანის გვერდის შემთხვევაში იყენებს აჭარის მთავრობის ელექტრონული ფოსტის ოფიციალურ მისამართს, სამსახურის ვებგვერდადაც აჭარის მთავრობის საიტი – adjara.gov.ge-ა მითითებული.

„გოგი ფუტკარაძე მონაწილეობს მთავრობის თავმჯდომარის, თორნიკე რიჟვაძის ოფიციალური გვერდის გამოქვეყნებული მასალების რეკლამირებაშიც“ – წერს „გამჭვირვალობა“.

ორგანიზაციის განცხადებით, მთლიანობაში, არჩილ ჩიქოვანისა და თორნიკე რიჟვაძის ანგარიშებზე გამოქვეყნებული მასალების რეკლამირებისთვის 5,765 აშშ დოლარი დაიხარჯა. პოლიტიკური რეკლამების ბიბლიოთეკის მონაცემებით, ამ თანხიდან 2,177 აშშ დოლარი პარტია „ქართულმა ოცნებამ“ დახარჯა, დანარჩენი თანხის წარმომავლობა  კი დაუდგენელია.

• რას ამბობენ ბათუმის მერიასა და აჭარის მთავრობის ადმინისტრაციაში?

„საერთაშორისო გამჭვირვალობა – საქართველომ” საჯარო ინფორმაცია გამოითხოვა აჭარის მთავრობის ადმინისტრაციიდანაც და ბათუმის მერიიდანაც.

„გვაინტერესებდა, თუ რა თანხა დახარჯეს უწყებებმა სოციალურ ქსელში ოფიციალური გვერდების რეკლამირების მიზნით.

მთავრობის ადმინისტრაციამ და მერიამ მოგვწერეს, რომ ამ მიზნით თანხა საერთოდ არ დაუხარჯავთ“.

„საერთაშორისო გამჭვირვალობა-საქართველო“ მერიას და მთავრობას რეკომენდაციას აძლევს და მოუწოდებს, რომ დროულად და ამომწურავად უპასუხონ საზოგადოებას გამოვლენილ გარემოებებზე.

კონკრეტულად:

„რატომ იხარჯება არჩილ ჩიქოვანისა და თორნიკე რიჟვაძის ფეისბუკის გვერდებზე ინტერნეტ აუდიტორიის გაზრდისთვის თანხა არა დაწესებულებათა ბიუჯეტიდან, არამედ, სავარაუდოდ, მთავრობის ადმინისტრაციის წარმომადგენლის მხრიდან. დაუდგენელია ამ თანხის წარმომავლობაც.

ეს ფაქტი მიუთითებს რომ აჭარის  მთავრობის წარმომადგენელი ერევა ბათუმის მერის საქმიანობაში. ამგვარი პრაქტიკა წარმოაჩენს მუნიციპალიტეტსა და აჭარის მთავრობას შორის არსებულ მანკიერ ურთიერთობას, არღვევს ორგანული კანონის – ადგილობრივი თვითმმართველობის კოდექსის მოთხოვნებს და უგულებელყოფს თვითმმართველობის პრინციპებს.

მერის, მისი მოადგილეების, მერიის სამსახურების გამართული კომუნიკაცია საზოგადოებასთან, მათ შორის ინტერნეტსივრცეშიც, უნდა უზრუნველყოს მერიის საზოგადოებასთან ურთიერთობის განყოფილებამ“-წერს, „საერთაშორისო გამჭვირვალობა – საქართველო“.

„ბათუმელები“ აჭარის მთავრობaს კომენტარისთვის დაუკავშირდა. თუმცა, როგორც პრესსამსახურში გვითხრეს, ამ საკითხზე მთავრობა კომენტარს არ გააკეთებს.

„არ გაკეთდება ჩვენგან არავითარი კომენტარი საპასუხოდ, თუ რაიმე განცხადება იქნება, გაკეთდება ოფიციალურად. გოგის რაც შეეხება, ჩვენი თანამშრომელი სულ ახლახანს, უკვე აღარაა“-გვითხრეს პრესსამსახურში.

თუმცა აქ არ გვიკონკრეტებენ, როდის გაათავისუფლეს გოგი ფუტკარაძე სამსახურიდან. „სულ ახალახანს, დღეს ვერ დაგიზუსტებთ, მაგრამ დიდი ხნის ამბავიც არ არის“ – ამბობენ აჭარის მთავრობის პრესსამსახურში.