მთავარი,სიახლეები

მფრინავი ბავშვები ბორბლებზე ბათუმის სკეიტპარკიდან [Video]

25.05.2021 • 1862
მფრინავი ბავშვები ბორბლებზე ბათუმის სკეიტპარკიდან [Video]

ბათუმის ბულვარის სკეიტპარკი არდაგანის ტბის სიახლოვესაა გაშენებული. საღამოობით აქ ბავშვები, ახალგაზრდები იკრიბებიან და გვიან ღამემდე რჩებიან. ძირითადად სკეიტერები, გოროგოლაჭიანები და ველოსიპედისტები იკრიბებიან, თვითგორიებითაც [სქროლებით] დასრიალებენ.

უსაფრთხო არ არის სკეიტპარკი გამოცდილი მოსრიალეებისთვის: ერთი შეხედვითაც ჩანს, რომ შემაღლებული ადგილების კიდეები და კუთხეები ბასრი და წვეტიანია, წაქცევის შემთხვევაშიც არ არის ტერიტორია სახარბიელოდ მოპირკეთებული – ბეტონის საფარი არაფრითაა დაფარული და რბილი ადგილები აქ არსადაა დამწყები მოსრიალეებისთვის.

მიუხედავად ამ დეტალებისა, მოზარდები აქ კარგად ერთობიან. მეტიც, ამბობენ, რომ სკეიტპარკმა მათი ცხოვრება შეცვალა, გაჯეტებს მოწყვიტა და ნამდვილი მეგობრები შესძინა.

პირველად მისულს შეიძლება შეგეშინდეს – ექსტრემალი მოზარდები რთულ ილეთებს აკეთებენ. გული მიგდის და გგონია, რომ ეს-ესაა რამეს დაიშავებენ, მაგრამ ისე კარგად არიან გაწაფულები, ისე თავდაჯერებულად ტრიალებენ ჰაერში, რომ ოდნავადაც არ ეშინიათ ტრავმების, გეუბნებიან, რომ ექსტრემალისთვის ტრავმა არაფერია და ეს ჩვეულებრივი ყოველდღიურობაა მათთვის.

ექსტრემალები ბათუმის სკეიტპარკიდან

რაც დრო გადის, სკეიტპარკს მით უფრო მეტი ახალგაზრდა აკითხავს. როლერები და სკეიტერები გვეუბნებიან, რომ მომცრო ტერიტორიაზე გაშენებული პარკი მათ მოთხოვნებს უკვე ვეღარ აკმაყოფილებს.

ბავშვები  უფრო დიდი და კეთილმოწყობილი პარკის აუცილებლობასა და მნიშვნელობაზე საუბრობენ.

12 წლის ბარბარე დავითაძე 5 თვეა რაც გორგოლაჭებზე დგას და უკვე ისეთ ილეთებს აკეთებს ჰაერში, გეგონება წლებია სრიალებს. ამბობს, რომ ექსტრემალურმა სრიალმა შიშის დაძლევა ასწავლა და სკეიტპარკი მისთვის იქცა ადგილად, რომლის გარეშეც ვეღარ ძლებს.

„აქ ბევრი მეგობარი შევიძინე, მათ შიში დამაძლევინეს და ბევრი რამ მასწავლეს, მარტო ამას ვერ შევძლებდი. ყველა ბავშვს ვეტყოდი, რომ მოვიდნენ, ყველაფრის სწავლაში დაგეხმარებით. მინდა ეს პარკი გაფართოვდეს, ან სხვა სკეიტპარკებიც გაკეთდეს. ეს სივრცე პატარაა, აღარ გვყოფნის, ბევრნი ვართ,“ – ამბობს ბარბარე.

ბარბარე დავითაძე, 11 წლის

12 წლის გაბრიელ ხახნელიძეც თითქმის ყოველ საღამოს ბულვარის სკეიტპარკში ატარებს. ორწელიწად-ნახევარია გორგოლაჭებით სრიალებს. თავიდან ძალიან ეშინოდა, მაგრამ ამბობს, რომ რაზეც ადრე გული მისდიოდა შიშისგან, ახლა არაფრად ეჩვენება.

„შეიძლება წაიქცე, რამე დაიზიანო, მაგრამ როცა სრიალებ, ამისთვის მზად ხარ. გორგოლაჭებით სრიალს სანამ ვისწავლიდი, საშინელება იყო ჩემი ცხოვრება: სკოლა, სახლი, ტელეფონი, სკოლა, სახლი, ტელეფონი… სკეიტპარკმა ჩემი ცხოვრება გაანათა.

ვირტუალურ მეგობრებს და ნამდვილ მეგობრებს შორის სხვაობა დავინახე, როცა მართლა ერთად ატარებ დროს, მეგობრები სულ სხვა ბედნიერებაა.

ბულვარის ადმინისტრაციას ვთხოვთ, კიდევ გვაჩუქოს დიდი და უფრო მრავალფეროვანი პარკი, ჩვენ უკვე ბევრნი ვართ, აქ აღარ ვეტევით,“ – ამბობს გაბრიელი.

11 წლის ელენე მექვაბიშვილი 6, 7 წლიდან სრიალებს გორგოლაჭებით. ამბობს, რომ კარანტინის პერიოდში დიდ დროს ატარებდა სკეიტპარკში. ყოველ საღამოს გამოდის, რომ ახალი ილეთები ისწავლოს.

დიმიტრი გოგობერიშვილიც გორგოლაჭებით მოსრიალეა. 11 წლის ბიჭი ბავშვებს ურჩევს დატოვონ სახლში სმარტფონები და ბულვარის სკეიტპარკს შეუერთდნენ.

სკეიტპარკი ბათუმში

„იუთუბიზე ვუყურებ ხშირად, როგორი სკეიტპარკებია უცხოეთში. ჩემთვის საოცნებოპ სკეიტპარკი არის დიდი, გადახურული და განათებული, არა ქვით, არამედ ხით ნაშენები – კარგად რომ სრიალებს, ისეთი. დამწყებებისთვის ასეთ პარკებში აუცილებლად უნდა იყოს რბილი მასალით დაფარული ზედაპირი – ტრავმების თავიდან ასაცილებლად.

ვისაც ეს ეხება, მინდა ვთხოვო, რომ გაგვიკეთონ უფრო დიდი პარკი ან დაამატონ კიდევ რამდენიმე ადგილზე ბათუმში.

ერთი სკეიტპარკი საკმარისი არ არის. ქალაქის მეორე ბოლოში ვინც ცხოვრობს, მათთვის ეს პარკი შორსაა და შეიძლება ვერც მოვიდეს აქამდე. ორი ან სამი დიდი სკეიტპარკი მაინც უნდა იყოს,“ -ამბობს დიმიტრი გოგობერიშვილი.

სკეიტპარკში შეხვდებით 4, 5 წლის ბავშვებსაც და 20, 25 წლის ახალგაზრდებსაც, თუმცა სკეიტბორდებით მოსრიალეებმა გვითხრეს, რომ 4, 5 წლის ბავშვების ყოფნა პარკის ტერიტორიაზე დასაშვები არ უნდა იყოს, საშიშია. მათ სურთ, სადმე აბრა იყოს გამოკრული, რაც მშობლებს მიანიშნებს, რომ პატარებისთვის აქ სახიფათო გარემოა.

ხშირად მშობლებს თავად შეჰყავთ პარკის ტერიტორიაზე სასეირნოდ პატარა ბავშვები და ვერ ითვალისწინებენ, რომ ექსტრემალი მოსრიალეებისთვის განკუთვნილი სკეიტპარკი პატარა ბავშვებისთვის სახიფათოა.

გადაბეჭდვის წესი


ასევე: