მთავარი,სიახლეები

მობილიზებული რუსები რეკავენ და კითხულობენ, როგორ ჩაბარდნენ ტყვედ – უკრაინის დაზვერვა

27.09.2022 • 1781
მობილიზებული რუსები რეკავენ და კითხულობენ, როგორ ჩაბარდნენ ტყვედ – უკრაინის დაზვერვა

უკრაინის სამხედრო დაზვერვის წარმომადგენელი ანდრეი იუსოვი ამბობს, რომ დაზვერვის ცხელ ხაზზე რეკავენ რუსები, რომლებიც მობილიზაციის ფარგლებში სამხედრო სამსახურში გაიწვიეს და ინტერესდებიან, როგორ უნდა ჩაბარდნენ ტყვედ უკრაინას.

„ახლა ძალიან ბევრი მოგვმართავს ცხელ ხაზზე, ახალმობილიზებული რუსები და ისინიც, ვინც ჯერ არ გაუწვევიათ. რეკავენ და ამბობენ: „თუ გამიწვევენ, რა უნდა გავაკეთო, როგორ უნდა ჩავბარდე?“ – თქვა იუსოვმა ტელემარათონის ეთერში.

დაზვერვის წარმომადგენლის თქმით, მობილიზებულ სამხედროებს ძალიან დაბალი მოტივაცია და შესაბამისი ფსიქოემოციური მდგომარეობა აქვთ. მსგავს სიტუაციაში არიან ყირიმელები და დონეცკისა და ლუგანსკის თვითგამოცხადებული რესპუბლიკის მცხოვრებლები.

იუსოვის ინფორმაციით, რუსები მობილიზაციის რამდენიმე ტალღას გეგმავენ. დონეცკისა და ლუგანსკის სეპარატისტულ რესპუბლიკებში რუსებმა უკვე გაიწვიეს ყველა, ვისი გაწვევაც შეეძლოთ, დარჩენილია მხოლოდ ის ხალხი, ვისაც ჯანმრთელობა სამხედრო სამსახურის საშუალებას არ აძლევს ან ისინი, ვინც რეგიონისთვის სასიცოცხლოდ მნიშვნელოვან დაწესებულებებში მუშაობენ.

უკრაინის სამხედრო დაზვერვის განცხადებით, უკრაინის სამხრეთში, რუსებმა გამოაცხადეს, რომ გეგმავენ „მოხალისეთა ბატალიონების“ შექმნას, თუმცა „პუტინსაც და რუსეთის სარდლობასაც სინამდვილეში ოკუპირებული ტერიტორიების მცხოვრებთათვის იარაღის დარიგების ეშინიათ“.

„ნაწილობრივი სამხედრო მობილიზაცია“ რუსეთში 21 სექტემბრიდან დაიწყო. პუტინის განმარტებით, გაწვევა ეხებათ მხოლოდ იმ მოქალაქეებს, ვინც რეზერვში იმყოფება და აქვს შესაბამისი სამხედრო გამოცდილება. თავდაცვის მინისტრ შოიგუს თქმით, იგეგმება 300 000 კაცის გაწვევა.

მობილიზაციის გამოცხადების შემდეგ რუსეთში საპროტესტები აქციები დაიწყო, ქვეყნის საზღვრებს კი მასობრივად მიაწყდნენ მოქალაქეები, რომლებსაც მობილიზაციისთვის თავის არიდება სურთ.

გადაბეჭდვის წესი


ასევე: