რუსეთის სამხედრო-პოლიტიკური ხელმძღვანელობა ეცდება, უკრაინის ოკუპირებული ტერიტორიების ანექსირება 1 ოქტომბრამდე ან ოქტომბრის პირველ რიცხვებშივე მოასწროს, რათა უკრაინის მოქალაქეების მობილიზაცია შეძლოს – მიიჩნევს აშშ-ის ომის კვლევის ინსტიტუტი (ISW).
სწორედ ამ დროს იწყება რუსეთში საშედგომო გაწვევა.
„კრემლი, დიდი ალბათობით, უკრაინის ოკუპირებულ ტერიტორიებზე მცხოვრებ მოქალაქეებსაც მოაქცევს რუსეთის გაწვევის ციკლში, ეცდება გააფართოვოს იძულებითი მობილიზაცია და უკრაინის მოქალაქეები უკრაინის წინააღმდეგ ბრძოლაში წაიყვანოს,“ – ნათქვამია ინსტიტუტის უახლეს ანგარიშში.
ISW-ის ანალიტიკოსები აღნიშნავენ, რომ ამჟამად, სამართლებრივი კრიტერიუმებით, ოკუპირებულ ტერიტორიებზე მცხოვრებ მოქალაქეებს პუტინის ბრძანება არ ეხებათ.
„როგორც „რუსეთის მოქალაქეები“, ანექსირებულ ტერიტორიებზე მცხოვრები 18-დან 27 წლამდე უკრაინელი კაცები, რუსეთის კანონმდებლობის შესაბამისად, სამხედრო სამსახურში წასვლის უფლებას მიიღებენ,“ – მიუთითებენ ექსპერტები.
ინსტიტუტის ანალიტიკოსების ცნობით, ზოგიერთი უკრაინელი უკვე რუსეთის შეიარაღებული ძალების შემადგენლობაშია. როგორც სევასტოპოლის „გუბერნატორმა“ 25 სექტემბერს განაცხადა, ოკუპირებულ ყირიმსა და სევასტოპოლში უკვე 2 ათასი ადამიანი „გაიწვიეს”.
„რუსეთის საოკუპაციო ხელისუფლება იძულებით და უკანონოდ ახდენს მშვიდობიანი უკრაინელი მოქალაქეების მობილიზაციას ოკუპირებულ ტერიტორიებზე,“ – მიუთითებს ISW.
ინსტიტუტის ინფორმაციით, ოკუპირებული რაიონებიდან 35 წლამდე კაცებს გასვლა შეეზღუდათ, მელიტოპოლის საოკუპაციო ხელისუფლებამ კი მიიღო ბრძანება, 10 ოქტომბრამდე შექმნას 3 000-კაციანი „მოხალისეთა ბატალიონი“.
აშშ-ის ომის კვლევის ინსტიტუტი ჯერ კიდევ გუშინდელ ანგარიშში წერდა, რომ რუსეთში მობილიზაცია ვერ მოახდენს გავლენას ომის მიმდინარეობაზე 2022 წელს და სავარაუდოდ, ვერ მოახდენს დრამატულ გავლენას ვერც რუსეთის შესაძლებლობაზე, 2023 წელსაც შეინარჩუნოს თავისი საბრძოლო ოპერაციების ახლანდელი დონე.
ISW-ის შეფასებით, მობილიზაციის ფარგლებში გაწვეული რუსი რეზერვისტების მომზადების ხარისხი – ძალიან დაბალი, მათი საბრძოლო მოტივაცია კი კიდევ უფრო უარესი იქნება.
21 სექტემბრიდან რუსეთში „ნაწილობრივი სამხედრო მობილიზაცია“ დაიწყო. პუტინის განმარტებით, გაწვევა ეხებათ მხოლოდ იმ მოქალაქეებს, ვინც რეზერვში იმყოფება და აქვს შესაბამისი სამხედრო გამოცდილება. თავდაცვის მინისტრ შოიგუს თქმით, ბრძანება 300 000 კაცს შეეხება.
მობილიზაციის გამოცხადების შემდეგ რუსეთში საპროტესტები აქციები დაიწყო, ქვეყნის საზღვრებს კი მასობრივად მიაწყდნენ მოქალაქეები, რომლებსაც მობილიზაციისთვის თავის არიდება სურთ.
