ნეტგაზეთი • RU

„ძალიან შეიცვალა“ – სერგეი ვოლინას და ძმის მდგომარეობაზე

ტყვეობიდან გათავისუფლებული 36-ე ბრიგადის მეთაურის, სერგეი ვოლინას და ტატიანა ხარკო ამბობს, რომ მისი ძმა ტყვეობაში ისე შეიცვალა, რომ ბევრი ვეღარც ცნობს.

„ძალიან შეიცვალა, ძალიან გახდა. ვეღარ ცნობენ. ფოტოების ქვეშ კომენტარებს წერენ: სადაა ვოლინა? ვხედავ, რომ თვითონაც შოკშია. შოკშია, რომ დაბრუნდა, ამ სიტყვის ყველაზე კარგი გაგებით,“ – უთხრა ტატიანამ Суспільне-ს.

მისი თქმით, ვოლინა გათავისუფლებას არ ელოდა.

„მითხრა, რომ ბოლო წუთამდე არ ესმოდა, სად მიჰყავდათ. როდესაც უკვე თურქეთის მიწაზე უკრაინის ხელისუფლების წარმომადგენლები დაინახეს, მხოლოდ მაშინ მიხვდნენ, რომ ჯოჯოხეთი დასრულდა,“ – ამბობს ტატიანა, რომელიც ძმას გათავისუფლების შემდეგ ორჯერ ელაპარაკა ტელეფონით.

ტატიანა იმ სამხედრო ტყვეებსაც შეხვდა, რომლებიც უკვე დაბრუნდნენ უკრაინაში.

„აზოვსტალის“ მეთაურები პრეზიდენტს ზელენსკისთან პირდაპირი ჩართვის დრო, ცენტრში სერგეი ვოლინსკი, ვოლინა/კადრი ვიდეოდან

„ზოგიერთმა 60 კილოგრამიც კი დაიკლო. ყველამ ვნახეთ მიხაილო დიანოვის ფოტო, საზღვაო ქვეითის. უმძიმეს მდგომარეობაშია,“ – თქვა ტატიანამ.

22 სექტემბრის ღამით ცნობილი გახდა, რომ უკრაინამ რუსეთის ტყვეობიდან 215 ადამიანი დაიბრუნა, მათ შორის 108 – „აზოვის“ მებრძოლია. „აზოვსტალის“ 5 მეთაური ახლა თურქეთში იმყოფება, ისინი იქ ომის დამთავრებამდე დარჩებიან. უკრაინელებთან ერთად გაათავისუფლეს 10 უცხოელი, რომლებიც უკრაინის მხარეს იბრძოდნენ.

ტყვეები უკრაინამ 55 რუს სამხედროში და პუტინთან დაახლოებულ ოლიგარქში, ვიქტორ მედვედჩუკში გაცვალა.

მთავარ ფოტოზე: სერგეი ვოლინსკი, ვოლინა

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.