ნეტგაზეთი • RU

500 ლარით დააჯარიმეს კლინიკა ბავშვის პერსონალური მონაცემების გამჟღავნებისთვის

ერთ-ერთი სამედიცინო დაწესებულება გარდაცვლილი ბავშვის პერსონალური მონაცემების გამჟღავნების გამო 500 ლარით დააჯარიმეს.

საქმეს გარდაცვლილი ბავშვის მშობლის მიმართვის საფუძველზე პერსონალურ მონაცემთა დაცვის სამსახური სწავლობდა.

მშობელი დავობდა, რომ სამედიცინო დაწესებულების თანამშრომელმა ერთ-ერთ ტელევიზიას ინტერვიუ მისცა, რა დროსაც გაამჟღავნა მისი აწ უკვე გარდაცვლილი არასრულწლოვანი შვილის პერსონალური, მათ შორის, განსაკუთრებული კატეგორიის მონაცემები.

„სამედიცინო დაწესებულების მიერ წარმოდგენილი ინფორმაციით, არასრულწლოვანი ბავშვის პერსონალური, მათ შორის, განსაკუთრებული კატეგორიის მონაცემების გამჟღავნების მიზანი იყო სამედიცინო დაწესებულების ინტერესების დაცვა, რადგან ბავშვის მშობლებისა და ოჯახის წევრების მხრიდან ხდებოდა არაზუსტი ინფორმაციის გაჟღერება. ამდენად, სამედიცინო დაწესებულების მხრიდან სატელევიზიო კომენტარის გაკეთების მიზანი იყო დაეცვა სამედიცინო დაწესებულება მის მიმართ გაჟღერებული არაზუსტი ინფორმაციისგან და საზოგადოებისთვის მიეწოდებინა რეალური ინფორმაცია თუ რამ გამოიწვია ბავშვის ჯანმრთელობის მდგომარეობის დამძიმება.

სამედიცინო დაწესებულების წარმომადგენლის განმარტებით, პაციენტს დაბადებიდან ჰქონდა მრავალი თანმხლები დაავადება, რომლებმაც ერთობლიობაში გამოიწვიეს შემდგომში ბავშვის გარდაცვალება,“ – ნათქვამია პერსონალურ მონაცემთა დაცვის სამსახურის განცხადებაში.

პერსონალურ მონაცემთა დაცვის სამსახურის განმარტებითვე, მოკვლევის დროს სამედიცინო დაწესებულებამ ვერ დაასაბუთა მისი ინტერესებისა და რეპუტაციის დაცვისათვის რატომ იყო საჭირო გარდაცვლილი არასრულწლოვანი ბავშვის  ჯანმრთელობის მდგომარეობასთან დაკავშირებული დეტალური (მათ შორის სრული დიაგნოზების, გადატანილი დაავადებების და ა.შ.) ინფორმაციის გამჟღავნება და რატომ არ იქნებოდა საკმარისი ზოგადი მითითება ბავშვის ჯანმრთელობის მდგომარეობაზე.

პერსონალურ მონაცემთა დაცვის სამსახურმა მონაცემთა დამუშავების პრინციპის დარღვევისათვის სამედიცინო დაწესებულება კანონდამრღვევად სცნო.

ნეტგაზეთის მასალების სხვა გამოცემებში გადაბეჭდვის წესი
ავტორი