დღეს, 26 სექტემბერს, „ლელომ“ ბათუმში რუსეთის მოქალაქეებისთვის საზღვრის ჩაკეტვის მოთხოვნით აქცია გამართა.
პარტიის აჭარის ორგანიზაციის ხელმძღვანელის, გენო თებიძის თქმით, „ლელო“ საზღვრის ჩაკეტვას უსაფრთხოებასთან დაკავშირებული რისკების გამო ითხოვს.
„ერთი კვირის განმავლობაში უკვე რუსეთის 100 000-ზე მეტი მოქალაქეა შემოსული და ვფიქრობთ, რომ ეს არის საფრთხის შემცველი ჩვენი ქვეყნისათვის. ძალიან ბევრი, ვინც გადმოდის თავს ეძახის დევნილს. დღეს ჩვენ რუსეთის ტერიტორიაზე ვერ ვხედავთ რაიმე სახის საომარ მოქმედებებს. ამ ადამიანებს აქვთ რაღაც სახის განზრახვა.
„ლელოს“ აქცია ბათუმში
ძალიან დიდი ნაწილი უკრაინის მოქალაქეებისა გამოექცა იმ უბედურებას, რაც გააკეთა უკრაინაში რუსეთის სახელმწიფომ.
რუსეთის მოქალაქეების გადმოსვლა უნდა შეჩერდეს, შემდეგ კი სახელმწიფო დონეზე გადაიხედოს ეს ყველაფერი. თუ პოლონეთი და სხვა მოწინავე ქვეყნები მოიქცნენ ასე, ჩვენთვისაც მნიშვნელოვანი იქნება იმავეს გაკეთება“ – განაცხადა გენო თებიძემ.
კითხვაზე, უნდა ჩაიკეტოს თუ არა არა საზღვარი რუსეთის იმ მოქალაქეებისთვის, რომლებიც რეჟიმს გაურბიან და არ უნდათ ომში წასვლა უკრაინის წინააღმდეგ, გენო თებიძე პასუხობს, რომ მათ თავიანთ ქვეყანაში უნდა აიმაღლონ ხმა და გამოხატონ პროტესტი საკუთარი მთავრობის წინააღმდეგ.
