ბათუმის მერიამ გარემოს ეროვნულ სააგენტოში „ოცნების ქალაქის“ ტერიტორიაზე საცხოვრებელი კომპლექსის მშენებლობისთვის მომზადებული განაშენიანების დეტალური გეგმის კონცეფციისა და სკრინინგის განცხადების განახლებული დოკუმენტაცია წარადგინა.
სააგენტომ ბათუმის მერიის მიერ ადრე წარდგენილი დოკუმენტაციის საფუძველზე დაწყებული ადმინისტრაციული წარმოება, 2022 წლის აგვისტოში შეწყვიტა და მერიას შენიშვნები გადაუგზავნა.
სააგენტო, სტრატეგიული გარემოსდაცვითი შეფასების [სგშ] ჩატარების საჭიროების დასადგენად, ამჯერად, მერიის მიერ ხელახლა წარდგენილ კონცეფციასა და სკრინინგის განცხადებას განიხილავს.
„აღნიშნული სკრინინგის განცხადებასა და სტრატეგიული დოკუმენტის პროექტთან დაკავშირებული წერილობითი შენიშვნები და მოსაზრებები შეგიძლიათ წარუდგინოთ სსიპ გარემოს ეროვნულ სააგენტოს 2022 წლის 4 ოქტომბრის ჩათვლით, მისამართზე: ქ. თბილისი, მარშალ გელოვანის გამზირი №6, ან ელ. ფოსტის მისამართზე: eia@nea.gov.ge“ – აცხადებს სააგენტო.
„ოცნების ქალაქი“ ბათუმში, დასახლება მეჯინისწყალში [ფ. ხალვაშის ქ. 188] მდებარეობს.
აღნიშნულ ტერიტორიაზე რამდენიმე სოციალური სახლი უკვე შენდება, „ოცნების ქალაქში“ მცხოვრებთა ბინებით სრულად უზრუნველყოფა კი, სწორედ ამ განაშენიანების გეგმის განხორციელებაზეა დამოკიდებული.
განაშენიანების დეტალური გეგმის შემუშავებაზე კონკურსი აჭარის ფინანსთა და ეკონომიკის სამინისტროს ჰქონდა გამოცხადებული.
რა შენიშვნები მისცა სააგენტომ ბათუმის მერიას „ოცნების ქალაქის“ განაშენიანების დოკუმენტებთან დაკავშირებით, ნახეთ ამ ბმულზე:
ვინ [ვერ] მიიღებს ბინას „ოცნების ქალაქში“ – აჭარის მთავრობამ კრიტერიუმები განსაზღვრა
