28 სექტემბერს, ცოფთან ბრძოლის მსოფლიო დღის აღსანიშნავად, სურსათის ეროვნული სააგენტო, მთელი ქვეყნის მასშტაბით, შინაური და მიკედლებული ცხოველებისთვის (ძაღლი და კატა) უფასო ვაქცინაციის აქციას მართავს.
ცხოველების აცრა 28-დან 30 სექტემბრის ჩათვლით, 11-დან 15 საათამდე, სპეციალურად გამოყოფილ სივრცეებსა და სააგენტოს რეგიონულ ოფისებთან იქნება შესაძლებელი.
აჭარაში უფასო ვაქცინაცია შესაძლებელია შემდეგ მისამართებზე:
-
- ბათუმი – გოგებაშვილის 46ა – რეგიონული სამმართველოს ოფისი;
- ხულო – შინდისის გმირების ქ. №2;
- შუახევი – სელიმ ხიმშიაშვილის ქ. №1;
- ქედა – 26 მაისის ქ.№ 2;
- ხელვაჩაური – მაჭახლის №23;
- ქობულეთი – აღმაშენებლის №44.
ცოფი ადამიანისა და ცხოველის საშიში ინფექციური დაავადებაა. თუმცა, მისი პრევენცია შესაძლებელია. ჯანმრთელობის მსოფლიო ორგანიზაციის მონაცემებით, ცოფისგან მსოფლიოში, 59,000 ადამიანი იღუპება ყოველწლიურად. ცოფის საწინააღმდეგო პროფილაქტიკური აცრის დამსახურებით, ეს დაავადება ადამიანისთვის მომაკვდინებელი აღარ არის.
ადამიანებში ცოფის შემთხვევების 99% გამოწვეულია დაავადებულ ძაღლთან კონტაქტით.
ცოფის ნიშნები ძაღლებში: უარი საკვებისა და წყლის მიღებაზე, გაძლიერებული ნერწყვდენა, მომატებული აგრესია, მომატებული მგრძნობელობა შუქსა და ხმაურზე, ხმის ტემბრის ცვლილება (ხრინწიანი ყეფა), კოორდინაციის დარღვევა, დამბლა.
NCDC-ს ცნობით, ცოფზე საეჭვო ექსპოზიციის შემთხვევაში ჭრილობა დაუყოვნებლივ უნდა ჩამოიბანოს საპნით და გამდინარე წყლის უხვი რაოდენობით 15 წუთის განმავლობაში, შემდგომ დამუშავდეს იოდის შემცველი ან მსგავსი ვირუციდული საშუალებებით;
პროფილაქტიკური ვაქცინაცია დაუყოვნებლივ უნდა დაიწყოს. მისი დაყოვნება ან გადადება დაუშვებელია. ანტირაბიული ვაქცინაცია და საჭიროების შემთხვევაში, იმუნოგლობულინით მკურნალობა უნდა დაიწყოს რაც შეიძლება სწრაფად.
