მთავარი,სიახლეები

10 საინტერესო ფაქტი ვალერი ზალუჟნიზე Time-ის სტატიიდან – „ომის სუნი არაფერში აგერევა“

27.09.2022 • 1868
10 საინტერესო ფაქტი ვალერი ზალუჟნიზე Time-ის სტატიიდან – „ომის სუნი არაფერში აგერევა“

გენერალი – ასეთი სათაურით გამოჩნდა გავლენიანი ამერიკული ჟურნალის TIME-ის ახალი ნომრის გარეკანზე უკრაინის შეიარაღებული ძალების მთავარსარდალი ვალერი ზალუჟნი.

ჟურნალის სტატია ეყრდნობა ვალერი ზალუჟნის ინტერვიუს, რომელიც რუსეთის შეჭრის შემდეგ გენერლის ერთადერთი ინტერვიუა; ინფორმაციას მისი ბიოგრაფიიდან და უკრაინელი ჩინოვნიკებისა და უცხოელი სპეციალისტების კომენტარებს.

TIME წერს, რომ უკრაინისა და მთელი მსოფლიოსთვის ზალუჟნი რუსეთთან „ომის სახე“ გახდა და მასთან ერთად ასახელებს იმ უკრაინელ ოფიცრებს, რომელთა დახმარებითაც უკრაინის შეიარაღებული ძალები რუსეთის არმიისთვის წინააღმდეგობის გაწევას ახერხებენ. ასეთ ოფიცრებად ჟურნალი გამოყოფს გენერალ-პოლკოვნიკ ოლექსანდრ სირსკის – უკრაინის სახმელეთო ჯარების მეთაურს, რომელიც კიევის თავდაცვას და აღმოსავლეთში კონტრშეტევას ხელმძღვანელობდა და კირილ ბუდანოვს, უკრაინის თავდაცვის დაზვერვის სამსახურის ხელმძღვანელს.

უკრაინის პრეზიდენტი ვოლოდიმირ ზელენსკი, მთავარსარდალი ვალერი ზალუჟნი და უკრაინელი ჟურნალისტი სევგილ მუსაიევა TIME-მა მაისში მსოფლიოს 100 გავლენიანი ადამიანის სიაში შეიყვანა.

TIME-ის უახლესი სტატიიდან ვალერი ზალუჟნის შესახებ 10 მნიშვნელოვანი ფაქტი Новое Время-მ ამოკრიფა.

  1. „ნოკაუტი“: ზალუჟნი გაოცებული დარჩა, როდესაც ზელენსკიმ მას უკრაინის შეიარაღებული ძალების მეთაურობა შესთავაზა.

2021 წლის ივლისში, როდესაც ვალერი ზალუჟნიმ უკრაინის პრეზიდენტის თანაშემწეებისგან პირველად შეიტყო, რომ შეიძლებოდა მისთვის შეიარაღებული ძალების ხელმძღვანელობა ჩაებარებინათ, აღელვებულმა იკითხა: „რას გულისხმობთ?“

როდესაც უკვე ცხადი გახდა, რომ მართლაც ხდებოდა უკრაინის არმიის მთავარსარდალი, როგორც TIME-ს თავად ეუბნება, ეს მისთვის „წელს ქვევით დარტყმა კი არა, პირდაპირ ნოკაუტი აღმოჩნდა.“

ოფიციალური შეთავაზება ზალუჟნიმ პირადად ზელენსკისგან მიიღო. იხსენებს, რომ როდესაც პრეზიდენტმა დაურეკა, ლუდით ხელში ცოლის დაბადების დღეს აღნიშნავდა.

ჟურნალისტები ხაზს უსვამენ, რომ ზელენსკიმ შეიარაღებული ძალების მთავარსარდალი ზუსტად იმ დროს შეცვალა, როდესაც უკრაინის საზღვრებთან რუსეთის ძალების სერიოზული კონცენტრაცია შეინიშნებოდა და აშშ უკვე შიშობდა, რომ უკრაინა შეიძლებოდა რუსეთის სრულმასშტაბიანი თავდასხმის მსხვერპლის გამხდარიყო.

  1. გენერალი რუსეთის სამხედრო აგრესიას „დროის საკითხად“ მიიჩნევდა

ზელენსკისგან განსხვავებით, რომელიც სკეპტიკურად უყურებდა აშშ-ის დაზვერვის ცნობებს, რომ რუსეთის სამხედრო აგრესია გარდაუვალი იყო, ზალუჟნი იმ უკრაინელი ოფიცრების რიცხვს მიეკუთვნებოდა, რომლებიც „ამას დროის საკითხად განიხილავდნენ,“ – წერს TIME და დასძენს, რომ მთავარსარდალმა უკრაინის შეიარაღებულ ძალებში მნიშვნელოვანი ცვლილებები უკვე დანიშვნიდან რამდენიმე კვირაში დაიწყო.

გენერალმა უფლება მისცა ოფიცრებს, ფრონტის ხაზზე (მაშინ ჯერ კიდევ გაერთიანებული ძალების ოპერაციის ფარგლებში) რუსების თავდასხმების პასუხად „ნებისმიერი ხელმისაწვდომი იარაღიდან“ გაეხსნათ ცეცხლი უფროსი მეთაურის ნებართვის გარეშე. „ჩვენ უნდა ჩაგვექრო მათში თავდასხმის სურვილი,“ – განმარტავს ზალუჟნი. – „და ასევე, კბილებიც უნდა გვეჩვენებინა.“

  1. ზალუჟნიმ საფუძვლიანად შეისწავლა რუსეთის არმიის დოქტრინა ჯერ კიდევ სრულმასშტაბიანი ომის დაწყებამდე.

TIME-თან საუბარში ვალერი ზალუჟნი ჰყვება, რომ ძალიან კარგად იცნობს ე.წ. „გერასიმოვის დოქტრინას“ და შეისწავლა „ყველაფერი, რაც კი  როდესმე დაუწერია“ თანამედროვე ომების შესახებ რუსეთის ფედერაციის შეიარაღებული ძალების გენერალური შტაბის ხელმძღვანელს ვალერი გერასიმოვს.

ზალუჟნიმ იქვე მიანიშნა,  რომ გერასიმოვის არმიისგან უკრაინაში „ცოტა მეტს ელოდა“.

  1. იშვიათი შემთხვევა, როდესაც ვალერი ზალუჟნი „აფეთქდა“.

ეს ამბავი, რომელზეც ვალერი ზალუჟნიმ ჟურნალისტებს მოუთხრო, თებერვლის დასაწყისში მოხდა, როდესაც რუსეთის სამხედრო აგრესიამდე ორიოდ კვირა რჩებოდა. მაშინ უკრაინამ გადაწყვიტა, ათასი სამხედროს მონაწილეობით ამბიციური სამხედრო სწავლება ჩაეტარებინა.

ძირითადი მანევრები ეხებოდა რუსეთის თავდასხმის იმიტირებას და მათი მიზანი უკრაინის თავდაცვაში ხარვეზების გამოვლენა იყო.

ზალუჟნი ამ წვრთნებს უკრაინის თავდაცვის სტრატეგიის ცენტრალურ ელემენტად და „გადარჩენის საუკეთესო შანსად“ მიიჩნევდა – აღნიშნავს TIME, თუმცა უკრაინის არმიის მეთაურების ნაწილი, ზალუჟნის შეფასებით, სწავლებას არასაკმარისად სერიოზულად მოეკიდა.

„მთელი საათი ვყვიროდი“, – იხსენებს ზალუჟნი. – „ავფეთქდი“.

გამოცემა დასძენს, რომ იმ მომენტში მაგიდასთან, ზალუჟნის გარშემო, ისხდნენ მასზე ასაკით უფროსი და მეტად გამოცდილი სამხედრო მეთაურები, თავად უკრაინის შეიარაღებული ძალების მთავარსარდლისთვის კი ეს ემოციის გამოვლინების ძალიან უჩვეულო მომენტი იყო – მას ისეთი ადამიანის რეპუტაცია აქვს, რომელიც თავის „ცივსისხლიანობას“ არასდროს კარგავს.

„მე მათ ვუხსნიდი, რომ თუ ისინი ამას ვერ გაუმკლავდებიან (წვრთნების მაქსიმალურად ეფექტიანად ჩატარებას), ამისი შედეგები ჩვენ მხოლოდ სიცოცხლედ კი არა, ჩვენი ქვეყნის დაკარგვად დაგვიჯდება,“ – უთხრა ზალუჟნიმ ჟურნალისტებს.

  1. „ომის სუნი არაფერში აგერევა“ – როგორ ემზადებოდა უკრაინის არმია

ზალუჟნი ჰყვება, როგორ ემზადებოდნენ უკრაინელი სამხედრო მეთაურები რუსეთის სამხედრო აგრესიისთვის: გადააადგილეს და შენიღბეს სამხედრო ტექნიკა, გამოიყვანეს ჯარები და გამოიტანეს შეიარაღება ბაზებიდან. ასეთი მანევრები შეეხო თვითმფრინავებს, ტანკებს, ჯავშანტექნიკას, საზენიტო დანადგარებს, რომლებიც უკრაინისთვის კრიტიკულად მნიშვნელოვანი იყო.

„ომის სუნი არაფერში აგერევა და ეს სუნი უკვე ჰაერში იდგა“, – ამბობს ზალუჟნი და დასძენს, რომ თავისი სტრატეგიის დეტალებს ის საიდუმლოდ ინახავდა. – „მეშინოდა, რომ მოულოდნელობის მომენტს დავკარგავდით. ჩვენთვის აუცილებელი იყო, მოწინააღმდეგეს ეფიქრა, რომ ჩვენ კვლავაც ჩვენს ტრადიციულ ბაზებზე ვრჩებოდით, ვეწეოდით „ბალახს“, ვუყურებდით ტელევიზორს და ვპოსტავდით ფეისბუქში“.

  1. ომის დასაწყისში ზალუჟნიმ უკრაინის შეიარაღებულ ძალებს ორი მიზანი დაუსახა

როდესაც 24 თებერვლის დილას რუსეთის არმია უკრაინაში შეიჭრა, გენერალ ზალუჟნის უკრაინის დაცვის ორი სტრატეგიული მიზანი ჰქონდა.

პირველი: შეენარჩუნებინა დედაქალაქი – „კიევი არ უნდა დაცემულიყო“.

მეორე – მოეხერხებინა ისე, რომ მტერს, შეტევის პარალელურად, რაც შეიძლება მეტი დანაკარგი განეცადა. „ყველა დანარჩენ მიმართულებაზე უნდა გვეიძულებინა ისინი (რუსები), საკუთარი სისხლი დაეღვარათ, მაშინაც კი, თუ ცალკეულ მონაკვეთებზე ეს ტერიტორიების დაკარგვას ნიშნავდა“, – განმარტავს ზალუჟნი.

ომის მეექვსე დღეს უკრაინის შეიარაღებული ძალების მთავარსარდალმა დაასკვნა, რომ ტაქტიკა მუშაობდა. რუსებმა ვერ შეძლეს კიევის გარშემო აეროპორტების დაკავება, თუმცა ისე ღრმად შევიდნენ ოლქის ტერიტორიაზე, რომ მათი მომარაგების ხაზი დაუცველი აღმოჩნდა.

ზალუჟნი აღნიშნავს, რომ გაოცებული დარჩა რუსეთის სარდლობის ძალიან უხეში გათვლებით. როდესაც მტერი ომის დასაწყისში უკრაინელთა მოულოდნელად ძლიერ წინააღმდეგობას წააწყდა, შემდეგ კი აღმოაჩინა, რომ ფრონტის წინა ხაზზე მყოფი ჯარების მომარაგების შესაძლებლობას კარგავდა, არც კი უცდია, შეტევებისადმი მიდგომა შეეცვალა. „ისინი უბრალოდ მიერეკებოდნენ თავიანთ ჯარისკაცებს სასაკლაოზე,“ – ამბობს ზალუჟნი. – „და ის სცენარი აირჩიეს, რომელიც მე ყველაზე მეტად მაწყობდა“.

  1. გენერალმა ევაკუაციაზე უარი თქვა

ამის შესახებ TIME-ს გენერალმა მარკ მილიმ უამბო, აშშ-ის არმიის შტაბების მეთაურების გაერთიანებული კომიტეტის ხელმძღვანელმა. ზალუჟნის ამერიკელი კოლეგა აღიარებს, რომ ომის პირველ კვირებში უკრაინელთა სიმტკიცით გაოცებული დარჩა. სწორედ იმ პერიოდში უკითხავს მილის ზალუჟნისთვის, ხომ არ აპირებდა უფრო უსაფრთხო ადგილას ევაკუაციას.

„მე მას ვუპასუხე: მე თქვენი არ მესმის,“ – იხსენებს ზალუჟნი. – „ჩემთვის ომი 2014 წელს დაიწყო. არც მაშინ გავქცეულვარ და არც ახლა ვაპირებ.“

  1. ზელენსკი და ზალუჟნი – რა უნდა იცოდეს ომზე პრეზიდენტმა

როდესაც 2019 წელს ვოლოდიმირ ზელენსკი უკრაინის პრეზიდენტი გახდა, ვალერი ზალუჟნი უკრაინის შეიარაღებული ძალების გაერთიანებულ ოპერატიულ შტაბს ხელმძღვანელობდა – გაერთიანებული ძალების მეთაურის პირველი მოადგილე იყო.

სწორედ მას ევალებოდა ახალი პრეზიდენტის ინფორმირება სამხედრო ოპერაციებსა და შეიარაღებული ძალების სამეთაურო სტრუქტურებზე. ზალუჟნიმ იცოდა, რომ ზელენსკის არასოდეს უმსახურია არმიაში, თუმცა მისთვის „ომის წარმოების ტაქტიკური ნიუანსების სწავლებას არ აპირებდა.“

„პრეზიდენტს სამხედრო საქმის ცოდნა ისევე სჭირდება, როგორც მედიცინის ან ხიდების მშენებლობის,“ – ამბობს ზალუჟნი და იხსენებს, რომ მის ამ მოსაზრებას, მისდა გასაოცრად, ზელენსკიც დაეთანხმა.

„ეს მისი (ზელენსკის) ერთ-ერთი ძლიერი თვისება აღმოჩნდა,“ – ამბობს TIME-თან ოლექსეი მელნიკი, უკრაინის თავდაცვის მინისტრის ყოფილი თანაშემწე. – „ზელენსკიმ მისცა თავის გენერლებს შესაძლებლობა, ემართათ მეჯლისი სამხედრო საქმეში მისი ჩარევის გარეშე“.

  1. როგორ ხედავს ზალუჟნი უკრაინის გამარჯვებას

ვალერი ზალუჟნი TIME-ს ეუბნება, რომ ის მზადაა ხანგრძლივი და მძიმე ბრძოლისთვის. ასევე, იმისთვისაც, რომ უკრაინის გამარჯვება ამ ომში წერტილს არ დასვამს.

„საკმარისი ვიცი რუსებზე საიმისოდ, რომ მესმოდეს, ჩვენი გამარჯვება ფინალი ვერ იქნება“. – ეუბნება ჟურნალისტებს ზალუჟნი. – „ჩვენი გამარჯვება საშუალებას მოგვცემს ამოვისუნთქოთ და შემდეგი ბრძოლისთვის მოვემზადოთ“.

  1. იუმორის გრძნობა და ონავრული ხასიათი – გენერალი მაისურსა და შორტებში

ჟურნალისტები წერენ, რომ როდესაც ზალუჟნის სამხედრო ფორმა არ აცვია, ის „უპირატესობას ანიჭებს მაისურსა და შორტებს, რომლებიც მის იუმორის გრძნობას ძალიან შეეფერება.“

ჟურნალი აღნიშნავს, რომ ამბიციური და მტკიცე მხედართმთავრის ახლანდელი იმიჯის მიუხედავად, ზალუჟნის სამხედროები ყოველთვის თავისი ხუმრობებით იცნობდნენ.

როგორც TIME  წერს, ზალუჟნი კარიერულ კიბეზე ადიოდა „ოფიცრების ახალ თაობასთან ერთად, რომლებსაც განსხვავებული ეპოქების გამოცდილება აკავშირებდათ: ისინი საბჭოთა უკრაინაში გაიზარდნენ, თუმცა საბჭოთა კავშირის სამხედრო დოგმებისგან გათავისუფლებას ცდილობდნენ“.

გადაბეჭდვის წესი


ასევე: