ყაზახეთში მკვეთრად გაიზარდა რუსეთის იმ მოქალაქეების რაოდენობა, რომლებიც ტოვებენ ქვეყანას პუტინის მიერ მობილიზაციის გამოცხადების შემდეგ. ყაზახური მედია წერს, რომ ქალაქებში მკვეთრად გაიზარდა საცხოვრებელი სახლების ქირა. ქალაქ ურალსკში, ადგილობრივი გამოცემა mgorod.kz-ს ცნობით, სასტუმროები და ჰოსტელები გადაიტვირთა რუსეთში მობილიზაციის გამოცხადებიდან მეორე დღესვე.
გამოცემა წერს, რომ ქალაქში რუსეთიდან ჩასულების ნაწილი ღამეს ათევს მანქანებსა და ქუჩებში, 24 სექტემბერს კი მობილიზაციას გაქცეული 200-მდე რუსეთის მოქალაქე ღამის გასათევად კინოთეატრმა შეიფარა.
„ხალხი მართლაც შეშინებული და დაბნეული იყო, დაახლოებით 23:00 საათიდან ხალხმა დაიწყო მოსვლა, თქვეს, რომ მთელი დღე ფეხით დადიოდნენ და ღამის გასათევს ვერ პოულობდნენ. ერთი დარბაზი გავათავისუფლეთ, მოხალისეებმა ცხელი საკვები მოიტანეს. ოთხ დარბაზში დაახლოებით 200 ადამიანი შეიკრიბა“ – უთხრა ყაზახურ გამოცემას კინოთეატრის დირექტორმა.
21 სექტემბრიდან რუსეთში ნაწილობრივი სამხედრო მობილიზაცია გამოცხადდა. ამ ეტაპზე, პუტინის განმარტებით, გაწვევა ეხებათ მხოლოდ იმ მოქალაქეებს, ვინც ამ დროისთვის რეზერვში იმყოფება ან/და აქვს შესაბამისი სამხედრო გამოცდილება.
მობილიზაციის გამოცხადების შემდეგ რუსეთს ათასობით მოქალაქე ტოვებს.
_______________
ფოტო: BBC
