ბათუმის ბულვარის ადმინისტრაცია კოლონადების რესტავრაციას გეგმავს. რესტავრაცია-რეაბილიტაციის სამუშაოების საპროექტო-სახარჯთაღრიცხვო დოკუმენტაციას კი, ბულვარი ტენდერით შეისყიდის, რისთვისაც ბიუჯეტიდან 20 ათას 550 ლარია გამოყოფილი. ბათუმის ძველ ბულვარში არსებული კოლონადები კულტურული მემკვიდრეობის ძეგლია.
ტექნიკური დავალების მიხედვით, პროექტირებისას, სხვადასხვა დეტალების გათვალისწინების პარალელურად, უნდა მომზადდეს:
- არქიტექტურული ანაზომები ლოკალურ დაზიანებათა დატანით;
- საინჟინრო-გეოლოგიური კვლევა, ტექნიკური ანგარიშის, დასკვნებისა და რეკომენდაციების მომზადება [გრუნტების ფიზიკურ-მექანიკური თვისებების შეფასება, სინჯების ლაბორატორიული ანალიზი, ანალიზის შედეგების დამუშავება და დასკვნების მომზადება];
- სახელოვნებათმცოდნეო კვლევა ჩასატარებელ სამუშაოთა დასაბუთებით;
- რესტავრაცია-რეაბილიტაციის პროექტი უნდა მომზადდეს ძეგლზე ჩატარებული კვლევის პროექტის რეკომენდაციებისა და დასკვნების გათვალისწინებით;
- კვლევების შედეგად ძეგლის გამოვლენილი მდგომარეობის ანალიზზე დაყრდნობით საკონსერვაციო-სარესტავრაციო სამუშაოების მეთოდოლოგიის და მასალების განსაზღვრა და სხვა.
ტენდერში წინადადებების მიღება 2022 წლის 4 ოქტომბერს დაიწყება და 7 ოქტომბერს დასრულდება.
მიმწოდებელმა სრული საპროექტო-სახარჯთაღრიცხვო დოკუმენტაცია ბულვარის ადმინისტრაციას უნდა მიაწოდოს ხელშეკრულების გაფორმებიდან 50 დღის ვადაში [ექსპერტიზის მომსახურების ვადის ჩათვლით].
მიმწოდებელი ასევე ვალდებულია წარმოადგინოს ექსპერტიზის დადებითი დასკვნა, რომელიც გაცემული უნდა იქნას „ლევან სამხარაულის სახელობის ექსპერტიზის ეროვნული ბიურო“-ს ან სხვა აკრედიტირებული პირის მიერ.
ამავე თემაზე:
https://batumelebi.netgazeti.ge/news/437216/
მთავარი ფოტო: კოლონადები / ფოტო „ბათუმელების“ არქივიდან
