დიდი ბრიტანეთის დაზვერვის პროგნოზით, 30 სექტემბერს, რუსეთის პარლამენტში სიტყვის გამოსვლისას, ვლადიმერ პუტინი, სავარაუდოდ, უკრაინის ოკუპირებული ტერიტორიების რუსეთთან შეერთების შესახებ გამოაცხადებს.
„რეფერენდუმები“, რომლებიც ამჟამად ოკუპირებულ რაიონებში მიმდინარეობს, 27 სექტემბრისთვის უნდა დასრულდეს.
„რუსეთის ლიდერები იმედოვნებენ, რომ უკრაინის ტერიტორიების რუსეთთან შეერთების ოფიციალურად გამოცხადება საზოგადოებაში „სპეციალური სამხედრო ოპერაციის“ გამართლებად წარმოჩინდება და კონფლიქტის პატრიოტული მოტივებით მხარდაჭერას გააძლიერებს,“ – აღნიშნავს უწყება 27 სექტემბრის რელიზში.
თუმცა დაზვერვის შეფასებით, ამ მიზნის მიღწევას ორი ფაქტორი შეუშლის ხელს – ერთი, რომ ქვეყანაში საზოგადოება უკეთაა ინფორმირებული რუსეთის ბოლოდროინდელ სამხედრო წარუმატებლობებზე და მეორე – გასულ კვირაში „ნაწილობრივი მობილიზაციის“ გამოცხადების გამო დაწყებული მღელვარება იმატებს.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება აღნიშნავდა, რომ რუსეთი მობილიზაციის გამო ძალიან მალე წააწყდება ადმინისტრაციულ და ლოგისტიკურ პრობლემებს.
დიდი ბრიტანეთის დაზვერვის ცნობით, რუსეთის არმიას არ ჰყოფნის ინსტრუქტორები ახალწვეულთა გასაწვრთნელად: „სამხედრო ინსტრუქტორების ნაკლებობა და სიჩქარე, რომლითაც რუსეთმა მობილიზაცია დაიწყო, იძლევა ვარაუდის საფუძველს, რომ გაწვეული სამხედროების დიდი ნაწილი ფრონტზე მინიმალური მომზადებით გაემგზავრება და, სავარაუდოდ, ძალიან სწრაფად გამოიფიტება.“
