Batumelebi

კულტურული მემკვიდრეობის საკითხებზე მომუშავე ორგანიზაციების გაერთიანება მემკვიდრეობის პლატფორმა რუსული კანონპროექტის გამო საქართველოს პარლამენტის წევრებს მიმართავს და სთხოვს, შეწყვიტოს პარლამენტმა მისი განხილვა.

მიმართვის ტექსტს „ბათუმელები“ უცვლელად გთავაზობთ:

„პარლამენტში დაიწყო „უცხოური გავლენის გამჭვირვალობის შესახებ“ კანონის განხილვა. კანონის მიხედვით, უცხოური გავლენის აგენტად ითვლება ისეთი არასამეწარმეო (არაკომერციული) იურიდიული პირი, რომლის მიერ კალენდარული წლის განმავლობაში მიღებული მთლიანი შემოსავლის 20%-ზე მეტის წყარო უცხოური რესურსია.

მოგახსენებთ, რომ „მემკვიდრეობის პლატფორმის“ წევრი  ორგანიზაციები მუშაობენ საქართველოს მატერიალური და არამატერიალური კულტურული მემკვიდრეობის შენარჩუნებისა და აღდგენისათვის.

საქართველოს სახელმწიფო ინსტიტუციები წლების განმავლობაში იზიარებდნენ პლატფორმის წევრი ორგანიზაციების მიერ შეთავაზებულ კონსულტაციებსა და რეკომენდაციებს კულტურული მემკვიდრეობის სფეროში. მაგალითისთვის, ევროკავშირის მხარდაჭერით არის შემუშავებული ისეთი ფუძემდებლური დოკუმენტი, როგორიცაა „საქართველოს კულტურის სტრატეგია 2025“.

სწორედ რომ უცხოური დაფინანსების მხარდაჭერითა და ჩვენი მუშაობის შედეგად შევძელით:

ისტორიული შენობების, ქუჩების, უბნების რეაბილიტაცია თბილისსა და რეგიონებში; საქართველოს საეკლესიო არქიტექტურის საუკეთესო ნიმუშების რესტავრაცია ფიტარეთსა და იკორთაში; ტრადიციული სამშენებლო ხერხების, ხელოსნობის კვლევა და სწავლება; კულტურული მემკვიდრეობის რეაბილიტაციის მოხალისეთა ახალგაზრდული ბანაკების შექმნა;

კულტურული მემკვიდრეობის უსაფრთხოების გზამკვლევების შედგენა; სამუზეუმო სფეროს განვითარების ხელშეწყობა მუზეუმებისა და მუზეუმის პროფესიონალებისთვის სწავლების საერთაშორისო პროგრამების შექმნით, საუკეთესო პრაქტიკის გაზიარებითა და კვლევებით;

ტრადიციული რეწვის დარგების რეაბილიტაცია, განვითარება, ოსტატების ხელშეწყობა და პროდუქციის შექმნა; სათემო ორგანიზაციების შესწავლა რეგიონებში და სათემო ინიციატივების მხარდაჭერა და ა.შ.

მიგვაჩნია, რომ მსგავსი კანონის ინიციირება და განხილვა დისკრედიტაციას უწევს დამფინანსებელ საერთაშორისო ორგანიზაციებს, რომლებიც, თავის მხრივ, საკუთარი ქვეყნის მოქალაქეების გადასახადების დახმარებით ზრუნავენ ჩვენს ქვეყანაში კულტურული მემკვიდრეობის დაცვაზე.

კანონი ლახავს ჩვენს პირად და პროფესიულ ღირსებას, რომლის დაცვაც კონსტიტუციით გვაქვს მონიჭებული. გარდა ამისა, გვეზღუდება კონსტიტუციით მონიჭებული უფლება: დავიცვათ კულტურული მემკვიდრეობა.

საქართველოს კულტურული მემკვიდრეობის შენარჩუნებაზე ზრუნვა ერთ-ერთი მნიშვნელოვანი ფაქტორია საქართველოს სახელმწიფოს ევროინტეგრაციის კურსისათვის, რომელიც ქართველი ხალხის გადაწყვეტილებით გახდა სახელმწიფო სტრატეგიის საყრდენი.

კანონი ეწინააღმდეგება საქართველოს ევროინტეგრაციის პროცესს.

მოგმართავთ, შეწყვიტოთ „უცხოური გავლენის გამჭვირვალობის შესახებ“ კანონის განხილვა, რომელიც თავისი შინაარსით დამაზიანებელია საქართველოს სახელმწიფოსათვის,  მოქალაქეებისა და  მათი კულტურული მემკვიდრეობის დაცვისა და შენარჩუნებისათვის“.

წერილს ხელს „მემკვიდრეობის პლატფორმაში შემავალი 7 ორგანიზაცია აწერს: ლურჯი ფარის საქართველოს ეროვნული კომიტეტი, საზოგადოება ბათომი, საქართველოს ეროვნული ფონდი, საქართველოს ტრადიციული რეწვის ასოციაცია, CDC სათემო განვითარების ცენტრი, ICOM საქართველო, ICOMOS საქართველო.

მასწავლებლის ეროვნული ჯილდოს მასწავლებლები ერთობლივ განცხადებას ავრცელებენ, რომელსაც „ბათუმელები“ უცვლელად გთავაზობთ:

„ჩვენ, საქართველოს მასწავლებლები, უკიდურესად შეწუხებულნი ვართ „უცხოელი აგენტების“ შესახებ კანონპროექტებით, რომლებსაც საქართველოს პარლამენტი განიხილავს.

მიგვაჩნია, რომ კანონპროექტი არ ემსახურება საქართველოს მოსახლეობის საჭიროებებს და ზიანს მოუტანს მის უდიდეს უმრავლესობას. რაც მთავარია, მისი განხილვაც კი, საფრთხეს უქმნის საქართველოსთვის ევროკავშირის კანდიდატის სტატუსის მინიჭებას და საქართველოს ევროკავშირსა და ნატო-ში გაწევრიანებას.

აქედან გამომდინარე, მოვუწოდებთ ავტორებს გაიწვიონ აღნიშნული კანონპროექტი; მოვუწოდებთ საქართველოს პარლამენტსა და მმართველ პარტიას, არ დაუჭირონ მხარი აღნიშნულ კანონპროექტს.

ამავდროულად, მოვუწოდებთ საჯარო უწყებებს და იქ დასაქმებულ ადამიანებს, განსაკუთრებით კი საქართველოს საგარეო საქმეთა სამინისტროს და საქართველოს განათლებისა და მეცნიერების სამინისტროს, რომ ხმა აიმაღლონ არსებული კანონპროექტის წინააღმდეგ.

და ბოლოს, მოვუწოდებთ საზოგადოებას, განსაკუთრებით კი ჩვენს კოლეგებს, გამოხატონ თავიანთი პროტესტი, რათა არ დავუშვათ აღნიშნული კანონპროექტის მიღება,“ – ნათქვამია განცხადებაში.

საქართველოს საპარლამენტო უმრავლესობა გეგმავს კანონპროექტის მიღებას, რომლის ანალოგის დამტკიცების შედეგად რუსეთში არაერთი არასამთავრობო ორგანიზაცია ჯერ „უცხოურ აგენტად“ გამოაცხადეს, შემდეგ კი სრულად აკრძალეს. „უცხოური აგენტების“ შესახებ კანონით ქვეყანაში ებრძვიან მედიასაც.

ამჟამად უმრავლესობის წევრებს „უცხოური გავლენის აგენტების“ შესახებ ორი კანონპროექტი აქვს ინიციირებული: 1. როგორც თავად ამბობენ, აშშ-ში მოქმედი „უცხოური აგენტების რეგისტრაციის აქტის“ [FARA] “უფრო შერბილებულ” ვერსია და 2. “ალტერნატივის სახით ამერიკული კანონის ანალოგი”.

საქართველოში მსგავსი კანონის მიღებას აკრიტიკებენ როგორც ქვეყნის შიგნით, ასევე, მისი არმიღებისკენ ხელისუფლებას მოუწოდებენ დასავლელი პარტნიორებიც, მათ შორის, აშშ, ევროკავშირი, გაერო, ევროპის საბჭო.

ევროკავშირის საგარეო სამსახური „უცხოეთის გავლენის აგენტების“ კანონპროექტთან დაკავშირებით აცხადებს, რომ ის ეწინააღმდეგება 12-პუნქტიან რეკომენდაციებს, რომელიც საქართველომ უნდა შეასრულოს კანდიდატის სტატუსის მისაღებად.

„მინდა მივმართო ჩემს სტუდენტებს. ორშაბათს მე მაქვს პირველ საათზე ლექცია. ვინც ჩემი სტუდენტი ხართ, მე ლექციაზე ვერ მოვალ და ვერ ჩავატარებ გამორიცხულია.

მე არ მოვალ ორშაბათს უნივერსიტეტში, იმიტომ, რომ გაცილებით სხვა და დიდი ბრძოლა გვაქვს საქართველოს პარლამენტში,” – დამოუკიდებელმა დეპუტატმა თამარ კორძაიამ ეს განცხადება ტელეკომპანია პირველის გადაცემა „დღის ამბებში“ გააკეთა.

ხვალ, 6 მარტს, საქართველოს პარლამენტში პარლამენტის იურიდიული კომიტეტი განიხილავს კანონს „უცხოეთის გავლენის აგენტების“ შესახებ, რომელიც რუსული კანონის ანალოგია.

სამოქალაქო სექტორი ხვალ დილიდან გეგმავს საპროტესტო აქციის გამართვას პარლამენტთან.

დეპუტატმა თამარ კორძაიამ, „დღის ამბებში“ სტუმრობისას, თავის ყველა სტუდენტს მიმართა და უთხრა, რომ ახლა მთავარი ბრძოლა საქართველოს პარლამენტში იქნება, ამიტომ ვინც თვლის, რომ ევროპულ სახელმწიფოში ცხოვრება უნდა, ხვალ პარლამენტთან აქციაზე უნდა მივიდეს.

„ჩემს ახლანდელ სტუდენტებს, ჩემს ყველა სტუდენტს, რომელსაც ჩემს ლექციაზე მოუსმენია ჩემი საუბარი და არასოდეს პოლიტიკაზე მე მათთან არ მისაუბრია, დღეს მივმართავ, რომ მოვიდნენ.

მოვიდნენ იმიტომ, რომ ჩვენ არ ვართ საკმარისი იმისათვის, რომ ამ მონსტრს, „ქართულ ოცნებას“, რომელიც დღეს გვართმევს სახელმწიფოს, მოვერიოთ.

ჩვენ გვჭირდება მხარდაჭერა. ჩვენ ყველაფერს გავაკეთებთ შიგნით, მაგრამ თქვენ უნდა მოხვიდეთ. უთქვენოდ ჩვენ მათ ვერ მოვერევით. და არ არის სირცხვილი იმის თქმა, რომ ჩვენ არ გვყოფნის ძალა.

თუ გვინდა ეს სახელმწიფო, ეს სახელმწიფო როგორც ჩვენია, ისე თქვენი არის და ეს სახელმწიფო უნდა შევინარჩუნოთ,“ – თქვა თამარ კორძაიამ.

პარლამენტარმა მოქალაქეებსაც მიმართა და თქვა, რომ ახლა ბრძოლის მოგება თითოეული მოქალაქის ინდივიდუალურ პასუხისმგებლობაზეცაა დამოკიდებული.

„როდესაც სახლში ხართ და შვილისთვის საჭმელს ჰყიდულობთ, ფეხსაცმელს ჰყიდულობთ, ტანსაცმელს, მოქალაქეებო, ვინც ახლა გვისმენთ, რომელიმე რუსულ პროდუქციას ყიდულობთ? რუსული წარმოების ფეხსაცმელს უყიდით საკუთარ შვილს?

და მოვა დრო, როდესაც შეიძლება უბრალოდ ვერ უყიდოთ, ეს ტანსაცმელი თქვენს შვილებს, იმიტომ, რომ ეს არხები გადაიკეტება.

ამ კანონზე რომ გვეუბნებიან, გამჭვირვალობაა, ეს არის კენჭს შუშაზე რომ დაარტყამ და მერე იფშვნება ყველაფერი.

ეს მასშტაბი ექნება ასეთ პატარა ქვეყანაში ამ კანონის მიღებას. აი, ეს არის რეალობა, რაც ჩვენ გვაქვს ქვეყანაში. ამიტომ დაგვიჭირეთ მხარი.

ჩვენ არ დავზოგავთ საკუთარ თავს, იმიტომ, რომ ისინი ჩვენს კვალიფიკაციას არ უსმენენ.

მათ არ აინტერესებთ რა გვაქვს წაკითხული, მათ არ აინტერესებთ ჩვენი გამოცდილება, მათ არ აინტერესებთ ევროპის სასამართლოს გადაწყვეტილება, ლუქსემბურგის გადაწყვეტილება. მათ არ აინტერესებთ ვენეციის კომისია. მათ არ აინტერესებთ არაფერი.

ერთადერთი რისიც ეშინიათ, ეს არიან მოქალაქეები. ამიტომ გთხოვთ მხარდაჭერას. თუ გვინდა სახელმწიფო, დაგვიჭირეთ მხარი,“ – თქვა თამარ კორძაიამ.

საზღვარგარეთ მცხოვრები ქართველი სტუდენტები რუსული კანონის შესახებ მიმართვას ავრცელებენ.

„ჩვენ, საზღვარგარეთ მცხოვრები ქართველი სტუდენტები, ვაპროტესტებთ საკანონმდებლო ინიციატივას უცხოური გავლენის გამჭვირვალობის შესახებ.

თითოეული ჩვენგანი ვცხოვრობთ და ვსწავლობთ სხვადასხვა ქვეყანაში, იმ მიზნით, რომ აქ მიღებული განათლება და გამოცდილება ჩვენი ქვეყნის განვითარებას მოვახმაროთ.

აღნიშნული საკანონმდებლო ინიციატივა კი გვაშორებს განვითარებასა და ევროპულ ღირებულებებს, რაც ასევე ეწინააღმდეგება ჩვენი ქვეყნის კონსტიტუციით განსაზღვრულ საგარეო კურსს.

საკანონმდებლო ინიციატივისთვის მხარდაჭერით, ასეულობით ქართველ ახალგაზრდას  გვიკარგავთ იმის შესაძლებლობას, რომ განათლების მიღების შემდეგ ჩვენს სამშობლოში დავბრუნდეთ და მას ვემსახუროთ.

გარდა ამისა, ყველანაირ პერსპექტივას უკარგავთ თაობებს, რომელთაც დამოუკიდებელ, დემოკრატიულ და განვითარებულ ევროპულ საქართველოში სურთ ცხოვრება.

ისე, როგორც არასდროს, ჩვენ გვჯერა, რომ საქართველოს მომავალი ევროპაშია და არა რუსეთში!“.

მიმართვა გუშინ, 3 მარტს გავრცელდა და ჯერ 55-მდე ხელმომწერი ჰყავს. მიმართვის ავტორები ავსტრიის ქართველ სტუდენტთა ასოციაციის წევრები არიან.

„ბათუმელები“ ესაუბრა ავსტრიის ქართველ სტუდენტთა ასოციაციის ხელმძღვანელს, სალომე სალაძეს, რომელიც ამჟამად ავსტრიაში ცხოვრობს და მაგისტრატურაზე სწავლობს.

„თითოეულ მოქალაქეს, არ აქვს მნიშვნელობა ის სტუდენტია თუ არა, თუ შეუძლია ობიექტურად კონკრეტული ნათქვამის ან ფაქტების აღქმა და ერთხელ მაინც აქვს ეს კანონპროექტი წაკითხული, მგონია, რომ აუცილებლად გაუჩნდება პროტესტი, რადგან ეს არ არის ის, რისკენაც ჩვენ მივდივართ.

ეს არ არის ევროპული ღირებულებების მქონე ქვეყნისთვის მისაღები კანონი.

მარტივად რომ გადავხედოთ, ევროკავშირის წევრ ქვეყანას, უნგრეთს ამ კანონის გაუქმება მოუწია, მისი იმ ღირებულებებთან შეუსაბამობის გამო, რომელიც შეიძლება ჰქონდეს ევროკავშირში მყოფ ან ევროკავშირთან დაახლოების სურვილის მქონე ქვეყანას.

იმედი გვაქვს სხვა სტუდენტებიც შემოგვიერთდებიან, ვინც ფიქრობს, რომ ეს არ არის ის მომავალი, რომელიც ჩვენ გვინდა, რომ გვქონდეს, რომელიც ჩვენ გვინდა, რომ ჩვენს ქვეყანას ჰქონდეს.

გულწრფელად რომ ვთქვა, მე მგონია, ეს არის მმართველი პარტიის მოწინააღმდეგე ადამიანების დაქსასვის, გაჩუმების მცდელობა, რის ძალიან კარგ შესაძლებლობასაც მისცემთ ამ კანონპროექტის მიღება“, – ამბობს სალომე სალაძე.

იგი მიიჩნევს, რომ აგენტის იარლიყმა შესაძლოა სხვა პრობლემებიც შექმნას:

„ძალიან თავისუფლად შეიძლება მხოლოდ იმიტომ, რომ ვიღაცას ვთქვათ „აგენტი“ დაერქვა, ქუჩაში გავლის დროს მიაყენონ შეურაცხყოფა, ან შენი ოჯახის წევრს შეეხონ [ფიზიკურად]“, – გვითხრა სალომემ.

სალომე ფიქრობს, რომ შესაძლოა ერთმა პროტესტმა ვერაფერი შეცვალოს, მაგრამ თუ ყველა გაერთიანდება და იტყვის, რომ ამ კანონპროექტის მიღება დაგვიკეტავს ევროკავშირისკენ მიმავალ გზებს, მის მიღებას ვეღარავინ გაბედავს.

„მე მართლა მგონია, რომ მათაც [რუსული კანონპროექტის მხარდამჭერებმა] იციან ეს ყველაფერი, მაგრამ ჯიუტად აკეთებენ იმას, რაც შემდეგ თაობებს გაურთულებს, უკეთესი ცხოვრება ჰქონდეთ საქართველოში და თაობები დაგვაშორებს ევროპისგან.

დღეს, როდესაც შეიძლება დღე-დღეზე მოგვენიჭოს ევროკავშირის წევრობის კანდიდატის სტატუსი, რომელსაც აუცილებლად იმსახურებს საქართველო, თუნდაც მხოლოდ იმიტომ, რომ გადავრჩეთ ამ გეოპოლიტიკურ მდგომარეობაში, ვანიავებთ ამ შანსს, რაც ვფიქრობ, მიუღებელია ნებისმიერი ადამიანისთვის, რომელსაც შეუძლია გაიაზროს, რა გვჭირდება უკეთეს ქვეყანაში ცხოვრებისთვის“, – ამბობს სალომე სალაძე.

______________

ფოტოზე: სალომე სალაძე

თურქეთში, ჰატაის პროვინციაში, 6 თებერვალს მომხდარი მიწისძვრიდან 25-ე დღეს ნანგრევებიდან ძაღლი ამოიყვანეს.

ცოცხალი ძაღლი იპოვეს დანგრეულ შენობაში, საიდანაც ნანგრევები გაჰქონდათ. მცირე სივრცეში, სადაც ტერიერის ჯიშის ძაღლი იყო მომწყვდეული, იპოვეს საკვებიც, რომელიც მას გადარჩენაში დაეხმარა.

მიწისძვრის შემდეგ ნანგრევებიდან მოხალისეებმა და მაშველებმა არაერთი კომპანიონი ცხოველი გამოიყვანეს. კიდევ ერთი შემთხვევა უკავშირდება ჰასკის, რომელიც სამაშველო ჯგუფმა მიწისძვრის შემდეგ 23-ე დღეს იხსნა ნანგრევებიდან.

6 თებერვალს თურქეთის სამხრეთ-აღმოსავლეთით შვიდ მაგნიტუდაზე მეტი სიმძლავრის ორი მიწისძვრა მოხდა, რასაც მასობრივი ნგრევა და უდიდესი ადამიანური მსხვერპლი მოჰყვა.

სამხრეთ თურქეთში მომხდარი დამანგრეველი მიწისძვრის შედეგად დაღუპულთა რიცხვი 45 ათასზე მეტია.

„წარმოდგენილი კანონპროექტები, ჩემი აზრით, ანტიკონსტიტუციურია, ვინაიდან ეწინააღმდეგება რამდენიმე კონსტიტუციურ ნორმას,“ – ამბობს კონსტიტუციონალისტი ვახტანგ ხმალაძე რუსული კანონის შესახებ.

„კანონის ნებისმიერი ნორმა ან კანონი ანტიკონსტიტუციურია, თუ ეწინააღმდეგება კონსტიტუციის ნებისმიერ ნორმას/ნორმებს.

ჩვენს შემთხვევაში ევროკავშირი გვეუბნება, რომ ამ კანონის/კანონების მიღება მნიშვნელოვნად შეაფერხებს საქართველოსთვის წევრობის კანდიდატის სტატუსის მინიჭებას. მაშასადამე, ამ კანონის მიღებით ჩვენი ხელისუფლება დაარღვევს 78-ე მუხლს.

აგენტების შესახებ კანონები ეწინააღმდეგება ევროპის კავშირის ფუძემდებლურ პრინციპებს და, შესაბამისად, მათი მიღებით დაირღვევა საქართველოს კონსტიტუციის 78-ე მუხლი, რომელიც კონსტიტუციურ ორგანოებს ავალდებულებს, „თავიანთი უფლებამოსილების ფარგლებში მიიღონ ყველა ზომა ევროპის კავშირსა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად,“ – ამბობს ვახტანგ ხმალაძე.

კონსტიტუციონალისტი ვახტანგ ხმალაძე საკუთარ ფეისბუქგვერდზე საჯარო პოსტითაც გამოეხმაურა რუსულ კანონს.

„ეს არ არის ამერიკული კანონი,“ – წერს ვახტანგ ხმალაძე, – „დემოკრატიულ სახელმწიფოებში სტუდენტებს ასწავლიან [საქართველოშიც ასე ვასწავლით], რომ კანონით თითქმის ყოველთვის იზღუდება ვიღაც ან/და რაღაც [ვინმესთვის რაიმე ვალდებულების დაკისრებაც შეზღუდვაა]. ამიტომ კანონი სამართლიანია და მისი მიღება გამართლებულია მხოლოდ მაშინ, როცა არსებობს პრობლემა, რომლის გადაჭრაც აუცილებელია საზოგადოების ინტერესების დასაცავად და ამის გაკეთება შეუძლებელია შეზღუდვის დაუწესებლად.

მაშასადამე, უნდა არსებობდეს ლეგიტიმური მიზანი. ამ მიზნის მიღწევის საშუალებებიც ლეგიტიმური უნდა იყოს – უნდა იყოს მინიმალურად შემზღუდავი, არ უნდა ეწინააღმდეგებოდეს კონსტიტუციას, საერთაშორისო ხელშეკრულებებსა და უპირატესი იურიდიული ძალის მქონე კანონებს.

გარდა ამისა, უნდა შეფასდეს მოსალოდნელი შედეგები – დასახული მიზნის მიღწევამ არ უნდა დააზიანოს უფრო მნიშვნელოვანი საჯარო ინტერესები. ვნახოთ, აკმაყოფილებს თუ არა ეს კანონპროექტები ზემოაღნიშნულ პირობებს?

ამ კანონპროექტების ინიციატორები გვეუბნებიან, რომ მათი მიზანია მედია-საშუალებებისა და ე.წ. არასამთავრობო ორგანიზაციების შემოსავლებისა და ხარჯების გამჭვირვალობის უზრუნველყოფა, თუ მათი შემოსავლების 20%-ზე მეტი უცხოეთიდანაა მიღებული.

მედია-საშუალებების შემოსავლების გამჭვირვალობა უკვე უზრუნველყოფილია „მაუწყებლობის შესახებ“ კანონით [მუხლი 70], ხოლო მათი ხარჯების კანონიერებას აკონტროლებს შემოსავლების სამსახური. მაშასადამე, დასახული მიზანი დიდი ხანია მიღწეულია და ამ კანონების მოქმედება არ უნდა გავრცელდეს მედია-საშუალებებზე.

თუ ყველაფერი უცვლელად დარჩება, სიახლე იქნება ის, რომ:

• ზემოაღნიშნულ მედია-საშუალებებს მიაწებებენ „უცხოური გავლენის აგენტის“ ან „უცხოელი აგენტის“ იარლიყს, რითაც მოხდება მათი სტიგმატიზაცია;
• მოხდება იმ პირთა პერსონალური მონაცემების გასაჯაროება, რომლებიც მუშაობენ მედია-საშუალებებში ან თანამშრომლობენ მათთან. ეს კი ეწინააღმდეგება პირადი ინფორმაციის კონფიდენციალურობის კონსტიტუციურ პრინციპს, ვინაიდან ასეთი ინფორმაციის მიმართ არანაირი საჯარო ინტერესი არ არსებობს [საქართველოს კონსტიტუცია, მუხლი 18.3];

არასამთავრობო ორგანიზაციების შემოსავლები და ხარჯები მათი ყოველწლიური დეკლარაციების მეშვეობით ცნობილია შემოსავლების სამსახურისთვის. გრანტის მიმცემსა და შემომწირველს შეუძლიათ მიიღონ სრული ინფორმაცია მათ მიერ გადაცემული თანხების გამოყენების შესახებ. ეს ინფორმაცია კონფიდენციალურია, თუმცა, არასამთავრობო ორგანიზაციების ნაწილი ყოველწლიურად აქვეყნებს თავისი საქმიანობის ანგარიშს. რა მოხდება იმ შემთხვევაში, თუ საჯარო გახდება ყველა შემოსავალი და ხარჯი:

• მოხდება ზემოაღნიშნული არასამთავრობო ორგანიზაციების სტიგმატიზაცია;
• მოხდება ასეთი არასამთავრობო ორგანიზაციების შემომწირველთა და იმ პირთა პერსონალური მონაცემების გასაჯაროება, რომლებიც მუშაობენ ამ ორგანიზაციებში, რაც ეწინააღმდეგება პირადი ინფორმაციის კონფიდენციალურობის კონსტიტუციურ პრინციპს [საქართველოს კონსტიტუცია, მუხლი 18.3];
• მოხდება ასეთი არასამთავრობო ორგანიზაციების დისკრიმინაცია მათ მიერ სამეწარმეო საქმიანობის განხორციელებისას, რაც ეწინააღმდეგება თავისუფალი მეწარმეობისა და კონკურენციის განვითარების კონსტიტუციურ პრინციპს (საქართველოს კონსტიტუცია, მუხლი 6.2).

საქმე ის გახლავთ, რომ არასამთავრობო ორგანიზაციას აქვს სამეწარმეო საქმიანობის უფლება, ოღონდ იმ პირობით, რომ მიღებული მოგება მოახმაროს ორგანიზაციის საწესდებო მიზნების შესრულებას [მაგალითად, ქველმოქმედებას, კვლევას, განათლებას და ა.შ.], და თუ მისი სამეწარმეო საქმიანობის დეტალები საჯარო გახდება, იგი დისკრიმინირებულ მდგომარეობაში აღმოჩნდება კონკურენტ მეწარმეთა მიმართ, რომელთა სამეწარმეო საქმიანობის დეტალებიც კონფიდენციალურია.

ზემოაღნიშნული მედია-საშუალებებისა და არასამთავრობო ორგანიზაციების სტიგმატიზაციასა და პირადი ინფორმაციის გასაჯაროების ვალდებულებას ექნება „მსუსხავი“ ეფექტი – უცხოური და საერთაშორისო ორგანიზაციების დიდი ნაწილი აღარ მოინდომებს „უცხოური გავლენის აგენტის“ ან „უცხოელი აგენტის“ სტატუსის მქონე სუბიექტების დაფინანსებას;

საქველმოქმედო ორგანიზაციები დაკარგავენ პოტენციური შემომწირველი ფიზიკური პირების დიდ ნაწილს (როგორც წესი, ქველმოქმედი ფიზიკური პირები თავის ვინაობას არ ასაჯაროებენ);

მედია-საშუალებებისა და არასამთავრობო ორგანიზაციების ნაწილი თავს შეიკავებს უცხოური დაფინანსების მიღებისაგან, რათა თავიდან აიცილონ „აგენტის“ სახელი და ამის გამო არ დაკარგონ მოქმედი თუ პოტენციური თანამშრომლები. ყოველივე ეს, ბუნებრივია, დიდ ზიანს მიაყენებს მათ საქმიანობას, რაც გამოიწვევს კონსტიტუციით დაცული გამოხატვის თავისუფლების, მასობრივი ინფორმაციის საშუალებათა თავისუფლებისა და გაერთიანების თავისუფლების პრინციპების დარღვევას [საქართველოს კონსტიტუცია, მუხლები: 17 და 22];

როგორც ვხედავთ, განხილული კანონპროექტები ეწინააღმდეგება სამართლიანი კანონის ყველა ფუძემდებლურ პრინციპს და მათი მიღება არ შეიძლება!“ – წერს ვახტანგ ხმალაძე ფეისბუქზე.

___________________

საქართველოს საპარლამენტო უმრავლესობა გეგმავს კანონპროექტის მიღებას, რომლის ანალოგის დამტკიცების შედეგად რუსეთში არაერთი არასამთავრობო ორგანიზაცია ჯერ „უცხოურ აგენტად“ გამოაცხადეს, შემდეგ კი სრულად აკრძალეს.

„უცხოური აგენტების“ შესახებ კანონით ქვეყანაში ებრძვიან მედიასაც. ამჟამად უმრავლესობის წევრებს „უცხოური გავლენის აგენტების“ შესახებ ორი კანონპროექტი აქვს ინიციირებული: 1. როგორც თავად ამბობენ, აშშ-ში მოქმედი FARA-ს „უფრო შერბილებული“ ვერსია — „უცხოური გავლენის გამჭვირვალობის შესახებ“ და 2. „ალტერნატივის სახით ამერიკული კანონის ანალოგი“ — „უცხოელი აგენტების რეგისტრაციის შესახებ“.

კანონპროექტებს მხარი პირველი მოსმენით 2 მარტს დაუჭირეს საგარეო და თავდაცვის საპარლამენტო კომიტეტებმა. „ოცნება“ ამბობს, რომ ამგვარი კანონი აშშ-დან გადმოიღეს. აშშ-ში ნამდვილად მოქმედებს „უცხოური აგენტების რეგისტრაციის აქტი“ (FARA), თუმცა აქაც მნიშვნელოვანია კონტექსტი: ხსენებული აქტი აშშ-ში გასული საუკუნის 30-იან წლებში, ნაცისტური და საბჭოთა პროპაგანდის აღსაკვეთად მიიღეს.

ამჟამად, იმისათვის, რომ სუბიექტი აგენტად აშშ-ში რეგისტრაციას დაექვემდებაროს, ნათლად უნდა ჩანდეს მის მიერ სხვა სახელმწიფოს ინტერესების ლობირება.

საქართველოში კანონის მიღებას აკრიტიკებენ როგორც ქვეყნის შიგნით, ასევე, მისი არმიღებისკენ ხელისუფლებას მოუწოდებენ დასავლელი პარტნიორებიც, მათ შორის: აშშ-ი, ევროკავშირი, გაერო, ევროპის საბჭო. ევროკავშირის საგარეო სამსახური „უცხოეთის გავლენის აგენტების“ კანონპროექტთან დაკავშირებით აცხადებს, რომ ის ეწინააღმდეგება 12-პუნქტიან რეკომენდაციებს, რომელიც საქართველომ უნდა შეასრულოს კანდიდატის სტატუსის მისაღებად.

ამავე თემაზე: 

2 მარტს საქართველოს პარლამენტთან, საპროტესტო აქციაზე, 35 მოქალაქე დააკავეს.

მოქალაქეები აპროტესტებდნენ პარლამენტში რუსული კანონპროექტის განხილვას, რომლის რეალური მიზანი გამოხატვის თავისუფლების, მედიის, არასამთავრობო სექტორის და ხელისუფლების მიმართ კრიტიკულად განწყობილი სამოქალაქო საზოგადოების გაქრობაა.

აქციაზე დაკავებულ პირებს შორის არიან სტუდენტები, ძმები – დავით და ნიკა ჩხობაძეები, დავით სეხნიაშვილი და დავით გოჩაშვილი.

დავით და ნიკა ჩხობაძეების დედა მაია ძაძამია „ბათუმელებთან“ საუბარში ამბობს, რომ პოლიციამ მისი შვილები მხოლოდ იმის გამო დააკავა, რომ ისინი აქციაზე „არა რუსულ კანონს“ სკანდირებდნენ.

მისი თქმით, დაკავებული ახალგაზრდები სტუდენტური მოძრაობა „ნაბიჯის“ აქტიური წევრები და დამფუძნებლები არიან.

„ეს ახალგაზრდები პოლიტიკურად აქტიურები არიან, 24-შიც ახალგაზრდული სტუდენტური მოძრაობის სულისჩამდგმელები იყვნენ, ძალიან ხშირად ჩანან მედიაში და ვფიქრობ, ამიტომ არ გამოუშვეს.

პოლიციას უფლება აქვს 48 საათი არ გამოუშვას, რადგან ორი მუხლით აქვთ, როგორც მითხრეს, ბრალი წაყენებული – ეს არის წვრილმანი ხულიგნობა და პოლიციისადმი დაუმორჩილებლობა,“- ამბობს მაია ძაძამია.

მისი თქმით, ამ დროისთვის დაკავებულები დიღომში იმყოფებიან.

„როგორც მითხრეს, შიგნით ცუდად არ ექცევიან, მაგრამ დაკავებისას გამოიყენეს ძალადობრივი მეთოდები, ბევრმა ტელევიზიამ გადაიღო დაკავების კადრები და დავინახეთ, როგორ ტენიდნენ ამ ახალგაზრდებს პოლიციის მანქანებში.

განსაკუთრებით დავითს როგორ უმოწყალოდ სცემდნენ მხოლოდ იმის გამო, რომ ახალგაზრდები სკანდირებდნენ იმას, რომ არ უნდათ რუსული კანონი და რუსული წესები და უნდათ თავისუფალ საქართველოში ცხოვრება“ – ამბობს მაია ძაძამია.

2 მარტს პარლამენტში საგარეო ურთიერთობათა და თავდაცვის კომიტეტების გაერთიანებულ სხდომაზე, სადაც რუსულ კანონპროექტს განიხილავდნენ, შეხლა-შემოხლა იყო, სხდომა თითქმის საათ-ნახევარი დაგვიანებით დაიწყო და მას წინ უსწრებდა მედიებისა და არასამთავრობო ორგანიზაციების პროტესტი.

მას შემდეგ, რაც კანონპროექტის მოწინააღმდეგეებს იძულებით დაატოვებინეს პარლამენტის შენობა, საპროტესტო აქცია შენობის გარეთ გაიმართა, სადაც პოლიციამ 35 მოქალაქე, მათ შორის, ჟურნალისტები დააკავა.

ბოლო ცნობებით, აქციაზე დაკავებული 30-მდე მოქალაქე კვლავ არ გაუთავისუფლებიათ. 

„პოლიტიკასთან ახლოს ვიყავი, ახლა ძალიან შორს ვარ, მაგრამ მიმაჩნია, რომ ეს კანონი უცხო ქვეყნის გავლენის აგენტების შესახებ, ზედმეტი ბარგია.

კომუნისტების დროიდან გვესმის სიტყვა „აგენტი“, ეს ჟღერს, როგორც „შპიონაჟი“, „აგენტურა“. შეიძლება ამ სიტყვის იარლიყად მიკერება ვინმემ პოლიტიკური მიზნებისთვის გამოიყენოს“, – ამბობს ნოდარ შერვაშიძე, მეწარმე და მევენახე ქედიდან, რომელსაც ევროკავშირის პროექტის ფარგლებში „ქედის ლაგმა“ [ქედის ადგილობრივი განვითარების ჯგუფი] 46 ათასი ლარით დაუფინანსა კოტეჯების მშენებლობა სოფელ პირველ მაისში.

2 მარტს საქართველოს პარლამენტის ორმა კომიტეტმა პირველი მოსმენით მხარი დაუჭირა რუსულ კანონპროექტს უცხო ქვეყნების გავლენის აგენტების შესახებ, რომელიც ავალდებულებს მედიასაშუალებებს, არასამთავრობო ორგანიზაციებსა და ფიზიკურ პირებს დარეგისტრირდნენ უცხო ქვეყნის გავლენის აგენტებად იმ შემთხვევაში, თუკი მათი უცხოური დაფინანსება აღემატება 20%-ს.

„ჩემი ბიზნესის 70 % ევროკავშირის პროექტით დაფინანსდა, ჩემი ფინანსური წვლილი მხოლოდ 30% იყო. გასული წლის ზაფხულში 300-ზე მეტ უცხოელ ტურისტს ვუმასპინძლეთ, ვიცი, რომ მომავალში მოთხოვნა კიდევ უფრო გაიზრდება და მეტ სტუმარს ველოდებით.

მე, როგორც ერთი მოქალაქე, ვფიქრობ, რომ აუცილებელიცაა სოფლებს ეხმარებოდნენ ევროპის ძლიერი ქვეყნები. ამ დახმარებაში მხოლოდ ფინანსურ დახმარებას არ ვგულისხმობ, რადგან არის გამოცდილება, რაც აქვთ განვითარებულ ქვეყნებს სხვადასხვა ბიზნესში. სამწუხაროდ, ეს ცოდნა ჩვენთან ჯერ არ არის დაგროვილი. დასავლეთის ქვეყნები ასეთ გამოცდილებასაც გვიზიარებენ.

მხოლოდ მე არ მიმიღია ასეთი მხარდაჭერა. მარტო ჩემი მუნიციპალიტეტის, ქედის მაგალითზე რომ ვიმსჯელოთ, უამრავ ქედელს დაუფინანსეს სოფლის მეურნეობის განსავითარებლად პროექტი, დაეხმარნენ საოჯახო სასტუმროების გამართვასა და კოტეჯების მშენებლობაში. არის მაგალითები, როცა ნახევარ მილიონამდე დაფინანსებაც გასცეს თითო პროექტისთვის“, – ამბობს ნოდარ შერვაშიძე.

თავიდან ნოდარ შერვაშიძემ 3 200 ძირი ვაზი გააშენა, მათ შორის: ცოლიკაური, ოჯალეში, დირბულა და 24 დასახელების საკოლექციო ჯიშის ყურძენი. შემდეგ კი ტურისტების მოჭარბებულმა ნაკადმა ბიზნესის გაფართოება მოითხოვა.

ევროკავშირი მხარს უჭერს სოფლის მეურნეობასა და სოფლის განვითარებას საქართველოში ENPARD-ის პროგრამის დახმარებით. სწორედ ამ პროგრამის ფარგლებში მუშაობს ქედის ადგილობრივი განვითარების ჯგუფი (LAG).

ევროკავშირის მხარდაჭერით ვენახის ზვარში შერვაშიძეებმა 4 კოტეჯი ჩადგეს.

ევროკავშირის მხარდაჭერით ჩამოყალიბებული „ქედის ლაგი“ განსაზღვრავს სოფლის განვითარების პრიორიტეტებს, შეიმუშავებს ადგილობრივი განვითარების სტრატეგიებს, შემდეგ კი, ევროკავშირის დაფინანსებით, ადგილობრივი მცხოვრებლების ინიციატივების მხარდასაჭერად დაფინანსებას გასცემს.

ევროკავშირის მხარდაჭერით ადგილობრივი განვითარების ჯგუფები უკვე 12 მუნიციპალიტეტშია ჩამოყალიბებული – ლაგოდეხი, ბორჯომი, ყაზბეგი, თეთრიწყარო, ახალქალაქი, დედოფლისწყარო, ქედა, ხულო, წალკა, ახმეტა, წყალტუბო და მესტია.

ევროკავშირის მხარდაჭერილი LAG-ების მიერ დაფინანსდა სოფლის განვითარების 500-ზე მეტი ინიციატივა სოფლის მეურნეობის, ტურიზმის, სოციალური და სოფლის ინფრასტრუქტურისა და გარემოს დაცვის მიმართულებით. შედეგად, დასაქმების შესაძლებლობები გაუჩნდა სოფლად მცხოვრებ 1000-ზე მეტ ოჯახს.

დიდთოვლობა ზამთარში მაღალმთიანი აჭარის მუნიციპალიტეტებში არავის უკვირს, თუმცა ადგილობრივების თქმით, წელს, გასულ წლებთან შედარებით, დიდთოვლობამ კიდევ უფრო რთული მდგომარეობა შექმნა.

როცა დიდთოვლობის გამო სოფლის უბნების ან  ცენტრალური გზისკენ მიმავალი გზები იკეტება და ადგილობრივებს სასწრაფო სამედიცინო დახმარება სჭირდებათ, რა ხდება ამ დროს? 

„ბათუმელების“ ინფორმაციით, რამდენიმე დღის წინ ხულოს სოფელ ბოძაურში სტუმრად მყოფ ფეხმძიმე ქალს სასწრაფო სამედიცინო დახმარება დასჭირდა.

ბოძაურში გვითხრეს, რომ ქალის ხულოს კლინიკაში დიდხანს ვერ გადაიყვანეს, რადგან შიდა სასოფლო გზები თოვლისგან გაწმენდილი არ იყო. ადგილობრივების თქმით, ქალი ჯერ ციგით გამოიყვანეს სახლიდან, შემდეგ კი სასწრაფო დახმარების ავტომანქანით გადაიყვანეს.

„ბათუმელების“ ინფორმაციით, ფეხმძიმე ქალმა ნაადრევად იმშობიარა ხულოს კლინიკაში. ნაყოფი ცოცხალი დაიბადა, თუმცა საბოლოოდ ახალშობილის გადარჩენა ვერ მოხერხდა. საფრთხე ემუქრებოდა დედის სიცოცხლესაც.

მედიასთან ამაზე საუბარი პაციენტმა და მისი ოჯახის წევრებმა არ ისურვეს. აღნიშნულ შემთხვევაზე „ბათუმელებმა“ სასწრაფო სამედიცინო სამსახურის პრესცენტრსაც მიმართა კითხვებით, თუმცა პასუხი ამ დრომდე არ მიგვიღია.

ერთი კვირის წინ სასწრაფო სამედიცინო დახმარება დასჭირდა შუახევის სოფელ ახალდაბაში მცხოვრებ ქალსაც, რომელსაც წარსულში გულის ოპერაცია აქვს გადატანილი. როგორ მივიდა ოჯახამდე სასწრაფო დახმარების მანქანა, ამის შესახებ პაციენტის რძალი, ნარგიზ ქათამაძე გვიყვება.

„ჩემი დედამთილი შეუძლოდ დილით გახდა. სასწრაფო დახმარება შუადღის შემდეგ გამოვიძახეთ, იქნებოდა ასე 5-6 საათი. ჩვენი ძალებით ვეხმარებოდით იქამდე პაციენტს ოჯახში.

მანამდე გამოძახებას აზრი არ ჰქონდა, დიდი თოვლი იყო, ჩაკეტილი იყო გზები. კი წმენდენ ყოველდღიურად, მაგრამ მაინცადამაინც იმ ღამით მოვიდა თოვლი კიდევ. ჯერ ტრაქტორი გამოვიძახეთ, გზა რომ გაეწმინდა და მერე – სასწრაფო დახმარება.

ძლიერ თოვდა და ჩვენი ძალებით ვერ მოხერხდებოდა პაციენტის გადაყვანა, რომ არ მოსულიყო ტრაქტორი, ვერ მოვიდოდა სასწრაფო დახმარებაც“, – გვითხრა ნარგიზ ქათამაძემ.

მისი თქმით, სასწრაფო დახმარება გამოძახებიდან ერთი საათის შემდეგ მათ ეზომდე მივიდა. ამ დროს ტრაქტორს უკვე ჰქონდა გზა გაწმენდილი.

„[სასწრაფო დახმარების] მანქანას ცოტათი გაუჭირდა ამოსვლა, თორემ მალე მოვიდა. ხომ იცით, ახალგაწმენდილი გზა როგორია. სოფლის თავში ვცხოვრობთ“, – გვითხრა მან.

ნარგიზის თქმით, პაციენტი ჯერ მუნიციპალიტეტის კლინიკაში, იქიდან კი მალევე, რეანომობილით ბათუმში, კლინიკა ბაუ-ში გადაიყვანეს.

„პაციენტი ახლა კარგად გრძნობს თავს. ქალაქში რჩება,“ – გვითხრა ნარგიზ ქათამაძემ.

_____________

ფოტოზე: პაციენტის გადაყვანის პროცესი სოფელ ახალდაბაში.

„გამჭვირვალობის მიზეზად დასახელება ხომ დემაგოგიაა? გამჭვირვალობა აკლიათ NGO-ებს? გამჭვირვალობა დეპუტატებს აკლიათ ზუსტად და მთავრობას, მათი შემოსავლები გაასაჯაროვონ, ეს ჯობია. „ალტ-ინფოს“ ვინ აფინანსებს კიდევ, ისიც ძალიან მაინტერესებს.

ეს რუსული კანონია და ძალიან სახიფათო თამაშია,“ – ამას ეტყოდა ქობულეთში მცხოვრები ნანა კალანდაძე  ზაალ მიქელაძეს, ქობულეთის მაჟორიტარ დეპუტატს საქართველოს პარლამენტში და რუსული კანონის ავტორს.

„ბათუმელები“ რამდენიმე ქობულეთელს ესაუბრა: როგორ აფასებენ ისინი მაჟორიტარის საქმიანობას, როცა დეპუტატი რუსული კანონის მიღებით არის დაკავებული?

ნანა კალანდაძე წლებია სამოქალაქო ორგანიზაციის – „ღირსეული სიბერე“ ხელმძღვანელია. ეს ორგანიზაცია ქობულეთში ხანდაზმული ადამიანების უფლებების დაცვაზე მუშაობს.

„დღეს იმდენად ნათელია, რომ ეს არის რუსული კანონი, ეს ისტორიაში შევა. მიზანი არის ის, რომ განსხვავებული აზრი აღარ ფიქსირდებოდეს, კრიტიკული აზრის მოსმენაც აღარ უნდათ. ცდილობენ, რომ იარლიყები მოგვაკრან და დონორებმაც თავისით უარი თქვან დაფინანსებაზე. უნდათ, რომ კრიტიკისგან სრულად დაიცალოს ქვეყანა – ვინც გააკრიტიკებს, უთხრან, შენ ხომ აგენტი ხარ? ისეც იმდენად ვართ დაყოფილი, ახლა კიდევ აგენტებად და არააგენტებად დაყოფა გვინდა?

აქამდე ივანიშვილი ცდილობდა, რომ ორ სკამზე მჯდარიყო ერთდროულად, ახლა კი, დასავლეთის გინების მეტს არაფერს აკეთებენ. პირიქით, რუსეთ-უკრაინის ომის ფონზე აგვისტოს ომის გამოძიება დაიწყეს. ეს რაში სჭირდებათ, თუ  რუსულ საქმეს არ აკეთებს ეს ინჯია?

ასე, რომ ეს რუსული კანონია და მარტივად ჩანს ეს. არავითარი გამჭვირვალობა აქ არ არის მიზანი. ესენი ემზადებიან მეოთხედ ხელისუფლებაში მოსვლისთვის და მანამდე ალბათ ყველა, ვინც რაღაცას აპროტესტებს, გაიქცევა ქვეყნიდან. ამასთან შეგუება არაფრით არ შეიძლება. მეც წავალ ალბათ ემიგრაციაში. ვიცი, რომ ეს არ არის გამოსავალი, მაგრამ მთელი სიცოცხლე რუსთაველზე ვდგავარ და დროშა მიჭირავს ხელში, დავიღალე, ნერვებმა მიმტყუნა…

ზაალ მიქელაძე ავტორიტეტული ადამიანია ქობულეთში, მე პატივს ვცემ, მაგრამ ვერ გამიგია, რად უნდოდა ეს?

ბატონ ზაალს ვეტყოდი იმას, რომ ჩვენ გვჭირდება პარლამენტი და დეპუტატები, რომლებიც, პირველ რიგში, კონსტიტუციას დაიცავენ და პირიქით, კონსტიტუციის წინააღმდეგ არ წავლენ. კონსტიტუციის 78-ე მუხლში კი, გვიწერია, რომ ჩვენი მიზანია ევროატლანტიკური ინტეგრაცია. თქვენ თქვენი უფლებამოსილების ფარგლებში ამას უნდა შეუწყოთ ხელი და არა იმას, რომ დასავლეთის დისკრედიტაცია მოახდინოთ.

რუსული კანონის ინიცირებაც სირცხვილია, არათუ მისი განხილვა და მიღება საერთოდ,“ – აღნიშნა ნანა კალანდაძემ „ბათუმელებთან“.

„ბატონ ზაალს ვეტყოდი, რომ არ დაკარგოს ის სახელი, რაც აქვს ქობულეთში და დააგროვა წლების განმავლობაში ქობულეთში, როგორც ჯანდაცვის და სოციალური დაცვის საკითხების სპეციალისტმა. ცუდია, რომ ის არის ინიციატორი ამ კანონის,“ – ამბობს ჟურნალისტი ზურა ბაუჟაძე. ისიც ქობულეთელია.

„დიდი ფიქრი არ სჭირდება ამას, რომ ეს არის კანონი დემოკრატიული პროცესის ჩასახშობად, მოსაშთობად და ქვეყნის საკონტროლებლად, მეტი არაფერი.

პოლიტიკა აშკარად არ არის ზაალ მიქელაძის ძლიერი მხარე. ის მოექცა გავლენის ქვეშ და შეიყვანეს შეცდომაში… მარტივია საფრთხის დანახვა, თუ გავიხედავთ ჩრდილოეთით და ვნახავთ, რა შედეგი მოჰყვა მსგავსი კანონის მიღებას რუსეთში. იქ სრულად ჩაახშეს დემოკრატიული პროცესები, სიტყვის თავისუფლება და ფუნდამენტური უფლებები ამ კანონის მიღების შემდეგ.

ამ ქვეყანაში თუ რამე კეთდება, ყველაფერი კეთდება დასავლეთიდან შემოსული ფულით და გამოდის, რომ თუ ვინმე რამეს აკეთებს და ამბობს, ყველა აგენტია?

მაშინ ვინ არის პატრიოტი?

მე არა მგონია, რომ ვინც ამ კანონს მიიღებს და საზოგადოებას დააზარალებს, შემდეგ მისი მიმღები კომფორტულად იყოს.

ვფიქრობ, ყველამ უნდა გაუგზავნოს მთავრობას მესიჯი, რომ მსგავს გადაწყვეტილებას მხარს არ უჭერს და ეწინააღმდეგება რუსული კანონის მიღებას,“ – გვითხრა ზურა ბაუჟაძემ.

ქობულეთის მაჟორიტარ დეპუტატთან, ზაალ მიქელაძესთან შეკითხვა აქვს იურისტ არჩილ ხახუტაიშვილს. მას სამოქალაქო სექტორში 13-წლიანი მუშაობის გამოცდილება აქვს. არჩილ ხახუტაიშვილიც ქობულეთიდანაა.

„უცხოური გავლენის აგენტი რატომ ვარ, როცა ჩემი საქმიანობა ეფუძნება კონსტიტუციიდან გამომდინარე დეკლარირებულ პრინციპებს? მართლა მაინტერესებს ბატონი ზაალისგან: ფიქრობს, რომ საქართველოში მედიის და სამოქალაქო სექტორის გამჭვირვალობა ისეთი საშიშროებაა, რომ ამის გამო რეესტრის შექმნაა საჭირო? მედიას და სამოქალაქო ორგანიზაციებს ცალსახად დიდი წვლილი მიუძღვის ქვეყნის კონსტიტუციით გარანტირებული მართლმსაჯულების, თავისუფლების, თანასწორობის დაცვისთვის.

მე, როგორც ძველ ენჯეოშნიკს, აგენტს დამიძახებ თუ არა, მეორეხარისხოვნად ჩავთვლიდი, მაგრამ მაფიქრებს ამ კანონპროექტის დაფარული მიზანი. ეს მიზანია წვეთ-წვეთად კონტროლის მექანიზმის შემოღება ქვეყანაში. იციან, რომ ერთიანად ამას ვერ შეძლებენ. შემდეგ გვეტყვიან, რომ კანონში რაღაც ხარვეზია, მოდით, კანონს რაღაც დავამატოთ, რაღაც ხარვეზია ასამოქმედებელი.

დღეს ოპოზიცია დაქსაქსულია. ძირითადი სპექტრი, რაშიც ხედავს ხელისუფლება პრობლემას, არის მედია და არასამთავრობო სექტორი. ეს არის საინფორმაციო ომის გაძლიერება: აქამდე თუ ენჯეოშნიკებს ეძახდნენ გრანტიჭამიებს, ახლა იტყვიან, რომ ისინი ჩვეულებრივი აგენტები არიან,“ – ამბობს არჩილ ხახუტაიშვილი.

არის თუ არა ეს რუსული ჰიბრიდული ომი საქართველოსთან, როცა რუსეთი სამოქალაქო სექტორის განადგურებასთან ერთად ცდილობს დასავლეთის და საქართველოს სტრატეგიული პარტნიორების მიმართ ნდობის შესუსტებას?

„აქცენტს აკეთებენ ამერიკულ კანონზე, როცა ამერიკული კანონის მიზანი იყო სულ სხვა რამ. შტატებში ეს კანონი მიიღეს გლობალური საფრთხეების გამო, რომ რეალურად მართლად მტრულად განწყობილი სახელმწიფოებიდან შესული ფული გაეკონტროლებიათ. აქ კი მტრული სახელმწიფოებიდან შემოსული თანხის გამჭვირვალობაა მიზანი?

დღეს ამაზე საუბრობს ყველა ჩვენი პარტნიორი ქვეყნის ელჩი, ამათ მაინც მოუსმინონ. თუ დიპლომატებსაც არ უსმენენ, ეს კიდევ უფრო დიდი პრობლემაა,“ – აღნიშნა არჩილ ხახუტაიშვილმა „ბათუმელებთან“.

საქართველოში იწყება კამპანია „მილიონი ხელმოწერა ევროკავშირისთვის”.

დოკუმენტზე ხელის მოწერა ელექტრონულად შეუძლია საქართველოს ნებისმიერ მოქალაქეს, რომელიც მიიჩნევს, რომ ევროკავშირში გაწევრიანება არის ქართველი ხალხის არჩევანი.

კამპანიის ორგანიზატორები ქართული ოპოზიციური პარტიები არიან.

„რადგან საქართველოს ხელისუფლება არ ასრულებს საქართველოს კონსტიტუციით დაკისრებულ ვალდებულებას, საქართველოს ევროკავშირსა და ნატო-ში გაწევრიანების შესახებ, თანახმა ვარ, ჩემი სახელით ხელისუფლების შეცვლამდე პროდასავლური ოპოზიციის წარმომადგენლებმა გამართონ მოლაპარაკებები ჩვენს დასავლელ პარტნიორებთან საქართველოსთვის ევროკავშირის კანდიდატის სტატუსის მიღებისა და შემდგომში, საქართველოს ევროკავშირსა და ნატო-ში (ჩრდილოატლანტიკური ხელშეკრულების ორგანიზაციაში) გაწევრიანების საკითხზე“ – წერია ხელმოწერის ტექსტში.

„ეს არის ერთადერთი გზა, რომ ჩვენ, ჩვენი საერთო, ქართველი ხალხის მანდატით, პირდაპირ დავიწყოთ საუბარი ჩვენს ევროპელ და ამერიკელ პარტნიორებთან.

ეს მილიონი ხელმოწერა ჩავა ვაშინგტონში, ევროპულ დედაქალაქებში, ბრიუსელში და ამით მკაფიოდ გამოვხატავთ ქართველი ხალხის აზრს, რომ საქართველო იმსახურებს ევროკავშირის და ნატოს წევრობას, საქართველო დგას ცივილიზებული სამყაროს გვერდით და ვერცერთი ხელისუფლება და პოლიტიკური დაჯგუფება, რაც არ უნდა მიბმული იყოს რუსეთთან, ვერ გადაგვაფიქრებინეს ამ მნიშვნელოვანი მისიის შესრულებას“, – ნათქვამია კამპანიის ორგანიზატორთა განცხადებაში.

განაცხადის ნახვა შეგიძლიათ ამ ბმულზე.

„სხვა პრობლემა ამ ქვეყანაში არ იყო, რომ ეს დავიდარაბა არ შემოგეტანათ?“ – ასე მიმართა დღეს, 2 მარტს, პარლამენტარმა ალეკო ელისაშვილმა მიხეილ ყაველაშვილს „ოცნებიდან“, საგარეო ურთიერთობათა და თავდაცვის კომიტეტების გაერთიანებულ სხდომაზე, სადაც რუსული კანონპროექტები განიხილეს.

„პრობლემა არ არის ამ ქვეყანაში? ყველაფერი მოვაგვარეთ აბსოლუტურად, ერთი დარჩა, რომ არასამთავრობო ორგანიზაციებს, რომლებიც მართლა მუხლჩაუხრელად მუშაობენ, რომ უკეთესი ქვეყანა იყოს…

თბილისის ჰამქრის [არასამთავრობო ორგანიზაცია] თავმჯდომარე ვიყავი.

მერე ხომ კარგად გიხაროდათ, გუდიაშვილის მოედანი რომ კარგად გაკეთდა. ჩემი და ჩემი მეგობრების ხარჯზე გაკეთდა. აგენტები ვიყავით ჩვენ და ჯაშუშები? იმელის შენობა რომ დგას, საშიში რომ იყო აქციაზე, რამდენი იდექით ჩემთან აქციაზე, აბა?! ჯაშუში ვიყავი, აგენტი და ეს უნდა მიძახოთ?

თან მეგობრები რომ გვეუბნებიან, ვისაც 30 წელია ჩვენი ქვეყანა უჭირავს, რუსის ტანკი რომ თბილისში არ შემოვიდა, იმათი დამსახურებაა, აფხაზეთი და სამაჩაბლო რომ არ უცნიათ, იმათი დამსახურებაა, ჩვენი საგარეო საქმეთა მინისტრის კი არ ეშინიათ, ამერიკის შეერთებული შტატების საელჩოების ეშინიათ, რომელმაც ყველას უთხრა – „არ გაბედოთ“.

ხორბალი რომ შემოგვიტანეს, როცა საჭმელი არ იყო და ის ხალხი გვეხმარებოდა… ახლაც რომ გვეუბნებიან – „ნუ აკეთებთ ამას, იმიტომ, რომ ეს არის ზუსტად ის, რაც ერთი ერთში გააკეთა პუტინმა და რუსეთმა. გვეუბნებიან – გინდათ ჩვენთან, გინდათ ცივილიზებული სამყაროს ნაწილი იყოთ? მაშინ ამას ნუ აკეთებთ!“

და რატომ აკეთებთ, სხვა დარდი ქვეყანაში არ არის, სხვა პრობლემას ვერ ხედავთ?!

წავიდეთ ნავთლუღის ბაზარში, ჯიპებიდან შეიძლება არ ჩანს, მაგრამ გავიაროთ ნავთლუღის ბაზარში, აი, იქ რომ ხალხია გაჭირვებული, ამაზე ფიქრობს, ოღონდ აგენტების კანონი მიიღონ, აი, ესღა დარჩაო? ხომ ამას არ ფიქრობს?!

მე რომ გუდიაშვილის მოედანს ვიცავდი, აგენტი ვიყავი?

პერსპექტივას უკლავთ ამ ქვეყანას, მაშინ ალალად მითხარი და უფრო პატიოსანი კაცი იქნები, თუ მეტყვი, რომ „ხო, მინდა რუსეთი, აი, ასეთი ხოში გვაქვს, რომ რუსეთში უნდა შევიყვანოთ ეს ქვეყანა“.

არ გახდება ეს ქვეყანა რუსეთი, ეს არის საქართველო და აღარ გახდება რუსეთი!“ – განაცხადა ელისაშვილმა კომიტეტების სხდომაზე.

დღეს საგარეო ურთიერთობათა და თავდაცვის კომიტეტების გაერთიანებული სხდომიდან, სადაც რუსული კანონპროექტები განიხილეს, ოპოზიციონერ დეპუტატთა ნაწილი ძალის გამოყენებით გააძევეს.

დღეს პარლამენტში საკომიტეტო განხილვაზე არ შეუშვეს მედიისა და არასამთავრობო ორგანიზაციების წარმომადგენლები.