დაშენება ძეგლის დაცვის ზონაში, მერიასთან – ახალი ტენდენცია ბათუმში

ბათუმში, ლუკა ასათიანის #21-ში, ოთხსართულიანი შენობის რეკონსტრუქცია დაიწყო. დაახლოებით ერთი თვის წინ შენობის ფასადის ირგვლივ ხარაჩოები განათავსეს და სამშენებლო ბადით შემოსაზღვრეს.

მშენებლობას შპს „სახლი ძველ ბათუმში“ ახორციელებს, ამ კომპანიის მესაკუთრე „ქართული ოცნების“ მხარდამჭერი გიორგი ჭყონიაა. იგი მმართველი პარტიის შემწირველია. ამავე დროს, გიორგი ჭყონია ერთ-ერთია იმ ბიზნესმენებს შორის, ვინც გასულ წელს, კუნძულ მალიორკაზე აჭარის მთავრობასთან ერთად იმყოფებოდა. აჭარის მთავრობის ინფორმაციით, ეს ვიზიტი სწორედ ბათუმელმა ბიზნესმენებმა დააფინანასეს.

ბათუმელი ბიზნესმენები მალიორკაზე აჭარის უმაღლესი საბჭოს თავმჯდომარესთან ერთად.

ბათუმის მერიაში განმარტეს, რომ ლუკა ასათიანის #21-ში პირველი კლასის სამუშაოები სრულდება, იცვლება მხოლოდ ფასადი და კოშკის მოცულობა, რაც მერიასთან შეთანხმებულია [პირველი კლასის სამუშაოებს ისეთივე ნებართვა არ სჭირდება, როგორიც ახალ მშენებლობას, ან რეკონსტრუქციას, რომელიც სართულის დამატებას ან სხვა მნიშვნელოვან ცვლილებას ითვალისწინებს.]

შენობა 2008 წელსაა აშენებული და საცხოვრებელი არ არის, მას კომერციული დანიშნულებით იყენებენ. ამ დროისთვის შენობის ნაწილში შპს „ალიანს ჯგუფის“ ოფისია განთავსებული [რეესტრის მონაცემების მიხედვით, კომპანია მოიჯარედ ფიქსირდება]. შენობაში ფართობები საიჯარო წესით სხვა ორგანიზაციებსაც აქვთ დაქირავებული. გასულ წლებში ამ კორპუსში კოლეჯი „ბლექსი“ ფუნქციონირებდა, უფრო ადრე კი შენობის მესამე სართულზე „ქართული ოცნების“ ოფისიც იყო.

ბათუმში ახალი სამშენებლო ტენდენცია ჩნდება, მშენებლები ადრე აშენებულ კორპუსებზე დაშენების უფლებას ითხოვენ- გვერდით უფრო მაღალი აშენდა და მეც დავამატებო. „ბათუმელების“ ინფორმაციით, მერიაში ასეთი ასობით განაცხადია შესული.

ადგილზე სხვადასხვა დროს ორ მუშას გავესაუბრეთ, ერთის ინფორმაციით შენობას ამატებენ ორ ახალ სართულს, მეორის თქმით კი, „აშენებენ ერთს, მანსარდით.“

დოკუმენტების მიხედვით, რომელიც „ბათუმელებმა“ მოიპოვა, მესაკუთრის სახელით განაცხადი შენობის რეკონსტრუქციის თაობაზე 2021 წლის ივლისში შეიტანეს მერიაში. ბათუმის მერიისთვის გაგზავნილ განმარტებით ბარათში არქიტექტორი გრიგოლ გარუჩავა წერს:

„შენობის მეხუთე სართული წარმოადგენს ღია ტერასას, რომლის კუთხეში განთავსებულია კოშკის პირამიდული ტიპის გადახურვა. შენობის კუთხის მთავარი ელემენტია კუთხურა კოშკი, რომელიც წარმოადგენს კვარტლის კუთხის აქცენტირებულ ელემენტს და თავისი მასშტაბით ლოგიკურად კრავდა ქუჩების კუთხეს მაშინ, როცა მისი მომიჯნავე შენობები ორსართულიანები იყო. დღეისათვის შენობის ორივე მხარეს აშენდა ექვსსართულიანი შენობები, რითაც კუთხური კოშკის მოცულობა აშკარად უმასშტაბოდ გამოიყურება ახლადშექმნილ განაშენიანებაში და მოითხოვს კოშკის სიმაღლის დარეგულირებას, განაშენიანების მასშტაბის შესაბამისად.“

არქიტექტორის განმარტებით, რეკონსტრუქციის პროექტი ძირითადად ითვალისწინებს მხოლოდ ფასადისა და კოშკის კორექტირების სამუშაოებს:

„შეიცვლება მეოთხე სართულის ფასადი ლითონის ფურცლებით მოპირკეთებული კედელი შენობის ძირითადი მოსაპირკეთებელი კერამიკული აგურის ფილებით. დაგეგმილია კოშკის მხოლოდ სიმაღლეში გაზრდა მისი არქიტექტურული იერისა და ელემენტების შეუცვლელად. ასევე ტერასაზე მოეწყობა ანაკრები კონსტრუქციის საჩრდილობელი – ჩარდახის ტიპის გადახურვა. ტერასის პერიმეტრზე განმეორდება მეოთხე სართულის ფასადზე გამომავალი (კარ-ფანჯრების ფრონტონების) არქიტექტურული ელემენტები“, – განმარტა გრიგოლ გარუჩავამ.

რენდერი – შენობის მასშტაბთან დაკავშირებით არქიტექტორი განმარტავს: „შენობის ყველა ძირითადი მახასიათებლები მისი გაბარიტები და ცალკეული ელემენტები რჩება უცვლელი, შესაბამისად უცვლელია მისი ტექნიკურ-ეკონომიკური მაჩვენებლები.“ თუმცა ამ ილუსტრაციის მიხედვით შენობის სიმაღლე იცვლება, ჩნდება მანსარდული სართული ტერასით.

შეიძლება თუ არა მშენებლობა, რომელიც ასათიანის 21-ში მიმდინარეობს ჩაითვალოს მსუბუქ კონსტრუქციად და ხომ არ აქვს ადგილი შეთანხმებული პროექტის დარღვევას ამას მუნიციპალური ინსპექცია გამოარკვევს.

თავად არქიტექტორმა, გრიგოლ გარუჩავამ სატელეფონო საუბარში განგვიმარტა:

„მეოთხე სართულზე იყო დახრილი კედელი, რომელიც ქმნიდა მანსარდის იმიტაციას. ის კედელი სწორდება. ყველაფერი რჩება ისე, როგორც არის. უბრალოდ, ის დახრილი ნაწილები გასწორდა, იმისათვის ამოდის ეს სვეტები, რომლებიც გაჩერებული იყო იატაკის დონეზე, სწორდება რომ შეივსოს და იქ კედელი გაკეთდეს. მესაკუთრე ზემოდან აკეთებს ლანდშაფტურ პერბოლას, პერგოლის მოწყობისა და ფასადის გასწორების ნებართვა აქვს. კოშკი აიწევა და მოიწევა ტერასის თავზე.“

კულტურული მემკვიდრეობის სააგენტოში რეკონსტრუქციის პროექტი არ შეუთანხმებიათ, მიუხედავად იმისა, რომ შენობა ძეგლის დაცვის ზონაშია. აქედან ყველაზე ახლოს, ლუკა ასათიანის #25-ში ძეგლის სტატუსი აქვს თავად მერიის შენობას. შენობის ფანჯრებიდან, დიდი ალბათობით მერის კაბინეტის ფანჯრებიდანაც კი, დაშენების სამუშაოები კარგად ჩანს.

რატომ არ გადააგზავნეს პროექტი კულტურული მემკვიდრეობის სააგენტოში, მიუხედავად იმისა, რომ მერიის ქალაქგანვითარებისა და ურბანული დაგეგმვის სამსახურის უფროსი დოკუმენტურად ადასტურებდა, რომ პროექტი სააგენტოსთან შეთანხმებას საჭიროებდა, რა შეიცვალა? – ამ კითხვაზე პასუხი არ გვაქვს.

განმცხადებელ გრიგოლ გარუჩავას ბათუმის მერიის ქალაქგეგმარებისა და ურბანული პოლიტიკის სამსახურის უფროსი წერდა:

„დოკუმენტაცია კანონით დადგენილ ვადაში გადაეგზავნოს აჭარის კულტურული მემკვიდრეობის დაცვის სააგენტოს საკითხზე მოსაზრება/დასკვნის წარმოდგენის მიზნით.“

2022 წლის დეკემბერში ბათუმის მერმა კომპანიას შეტყობინების მოქმედების ვადა გაუგრძელა, ამავე დოკუმენტში ჩაიწერა, რომ მოთხოვნილია პირველი კლასის მშენებლობა.