ბათუმში ჟიული შარტავას გამზირის „განახლება“ მთავრობის პროგრამა „განახლებული რეგიონების“ ფარგლებში 2022 წლის სექტემბერში მაინც უნდა დასრულებულიყო, თუმცა, სამუშაოები დღემდე გრძელდება და ის სულ მცირე, 2023 წლის ოქტომბრამდე, ალბათ, არც დასრულდება.
პროექტი მთლიანობაში შარტავას გამზირზე მდებარე ხეივნების რეაბილიტაციას და საფეხმავლო ხიდების მშენებლობას ითვალისწინებს. ამ მიზნით ხეივნები 2021 წლის აგვისტოდან შემოღობილია.
ერთი ხიდი შარტავასა და აბუსერიძის ქუჩების კვეთაში შენდება [რომელიც რკინის თაღში გაივლის], ორი ხიდი კი, იუსტიციის სახლის მიმდებარედ უნდა აშენდეს, რომლებიც გმირთა ხეივანს არდაგანის ტბასთან დააკავშირებს.
მომსახურების შესყიდვაზე ტენდერები საქართველოს მუნიციპალური განვითარების ფონდმა პრეისკურანტით გამოაცხადა და, შესაბამისად, გაურკვეველია, აქ მიმდინარე სამუშაოებში კონკრეტულად რა თანხა დაიხარჯება.
მუნიციპალური განვითარების ფონდში, ერთი წლის წინ, „ბათუმელებს“ უთხრეს, რომ „ბათუმის პროექტის ღირებულება 10 მილიონ 600 ათასი ლარია.“
ხეივნების სარეაბილიტაციო სამუშაოებზე და რკინის თაღთან ხიდის მშენებლობაზე შპს „საბა კონსტრაქშენი“ მუშაობს. ამ კომპანიაში „ბათუმელების“ ზარს არ უპასუხეს.
საფეხმავლო ხიდის მშენებლობა ბათუმში / 4.03.2023
საფეხმავლო ხიდის მშენებლობა ბათუმში / 4.03.2023
საფეხმავლო ხიდის მშენებლობა ბათუმში / 4.03.2023
ჟიული შარტავას გამზირის დასაწყისში ორი ხიდის მშენებლობაზე ტენდერი მუნიციპალური განვითარების ფონდმა ცალკე გამოაცხადა. ხელშეკრულება ხიდების მშენებლობაზე კი, ფონდსა და ხელახალ ტენდერში გამარჯვებულ ამხანაგობა „მეგობრობის ხიდს“ შორის, 2022 წლის 2 დეკემბერს გაფორმდა.
ამხანაგობაში ორი კომპანიაა გაერთიანებული. მათგან ერთი „საბა კონსტრაქშენია“.
საფეხმავლო ხიდები, რომლებიც გმირთა ხეივანს არდაგანის ტბასთან აკავშირებს / ესკიზი ტენდერიდან
პირობის მიხედვით, ამხანაგობამ სახელმწიფო შესყიდვის შესახებ ხელშეკრულების გაფორმებიდან 75 დღეში დეტალური საპროექტო-სახარჯთაღრიცხვო დოკუმენტაცია უნდა მოამზადოს, ხოლო შემდეგ 7 თვეში – ხიდების მშენებლობა უნდა დაასრულოს.
თუ ხელშეკრულების დადების თარიღიდან გადავთვლით, ორი ხიდის მშენებლობა 2023 წლის სექტემბერში უნდა დასრულდეს.
—
პირველ ტენდერში წინადადებების მიღება 2022 წლის 20 სექტემბერს დასრულდა, თუმცა მასში ამხანაგობა „მეგობრობის ხიდს“, დისკვალიფიკაცია მისცეს – ტექნიკური დოკუმენტაციის გამო.
ამავე თემაზე „ბათუმელების“ არქივიდან:
https://batumelebi.netgazeti.ge/news/436968/?fbclid=IwAR1BbJf5zwhEik8pwdzMjS4Yin3Zv_ViWK1mp48Py14v1Nvh6nZVIo2fkFc
