ბათუმში, ქობულეთში, ქედასა და ხულოში „განახლებული რეგიონების“ პროგრამის ფარგლებში ხორციელდება პროექტები, რისთვისაც ხელშეკრულება კერძო კომპანიასთან 20 მილიონ ლარზეა გაფორმებული.
ბათუმელების“ ინფორმაციით, ამ თანხით ოთხივე პროექტით გათვალისწინებული სამუშაოების მხოლოდ პირველი ეტაპი უნდა დასრულდეს. შესაბამისად, სამუშაოების ღირებულება შესაძლოა, კიდევ უფრო გაიზარდოს.
კომპანია „საბა კონსტრაქშენში“, რომელიც სამუშაოებს ახორციელებს, „ბათუმელებს“ დაუდასტურეს, რომ ხელშეკრულება პირველი ეტაპის სამუშაოებს ითვალისწინებს, დეტალების დასაზუსტებლად კი, მუნიციპალური განვითარების ფონდში გადაგვამისამართეს.
მუნიციპალური განვითარების ფონდში დღეს, 3 თებერვალს მხოლოდ ის გვითხრეს, რომ „ცალკე ბათუმის პროექტის ღირებულება 10 მილიონ 600 ათასი ლარია.“
პროექტის ფარგლებში ბათუმში, ჟიულის შარტავს გამზირზე მდებარე ხეივნის [გმირთა ხეივნის და მისი გაგრძელების – ფიროსმანის ქუჩიდან ბაგრატიონის ქუჩამდე] რეაბილიტაციაა დაწყებული.
ამ ეტაპზე შარტავას გამზირზე ხეივნებში სხვადასხვა სამუშაოებთან ერთად, ძირითადად, არსებული ბეტონის საფარის აყრა და ახლის დაგება მიმდინარეობს.
შარტავას გამზირი ბათუმში / ხეივანში მოხსნილი ბეტონის საფარი [ზემოთ] და არსებული ბეტონის საფარი [ქვემოთ], რომელიც პროექტის ფარგლებში უნდა შეცვალონ / 3.02.2022
ჟიული შარტავას გამზირი ბათუმში / ხეივანი რეაბილიტაციის პროცესში / ხელახლა დაგებული ბეტონის საფარი / 2.02.2022
პროგრამის ფარგლებში აჭარაში მიმდინარე პროექტებთან დაკავშირებით „ბათუმელებმა“ ინფორმაცია მუნიციპალური განვითარების ფონდიდან გასული წლის დეკემბერში წერილობით გამოითხოვა, პასუხი კი ფონდიდან 2022 წლის 2 თებერვალს მივიღეთ.
ფონდიდან „ბათუმელებისთვის“ გამოგზავნილ წერილში აღნიშნულია:
„საქართველოს მთავრობის 2021 წლის 26 აპრილის დადგენილებით დამტკიცებული სახელმწიფო პროგრამის – „განახლებული რეგიონები“ ფარგლებში, Design-Build მეთოდით, სარეაბილიტაციო ობიექტებისათვის დეტალური საპროექტო დოკუმენტაციის მომზადების და ამ დოკუმენტაციის საფუძველზე რეაბილიტაციისთვის შერჩეულია ურბანული განახლების პროექტები, კერძოდ:
- ბათუმში მწვანე კორიდორის მოწყობა გმირთა ხეივანში [შარტავას გამზირი];
- ქალაქ ქობულეთის სანაპირო ზოლის კეთილმოწყობა [მდ. აჭყვადან მდ. კინტრიშამდე];
- დაბა ხულოში მემედ აბაშიძის ქუჩის რეაბილიტაცია;
- დაბა ქედის ცენტრალური ტერიტორიის [ცენტრის] მოწესრიგება.
აღნიშნულ პროექტებზე საქართველოს მუნიციპალური განვითარების ფონდმა ხელშეკრულება გააფორმა შპს „საბა კონსტრაქშენ“-თან და ხელშეკრულების ღირებულებამ შეადგინა 20 000 000 ლარი“.
ფონდიდან ასევე მოვითხოვეთ სამუშაოების დასრულების ვადები თითოეული მუნიციპალიტეტის მიხედვით [თითოეული ეტაპის დასრულების ვადის მითითებით – ასეთის არსებობის შემთხვევაში].
„სარეაბილიტაციო სამუშაოების დასრულების ვადად განსაზღვრულია 2022 წლის ივნისი“, – მოგვწერეს ფონდიდან.
ჟიული შარტავას გამზირი ბათუმში / ხეივანი რეაბილიტაციის პროცესში
ფონდის ინფორმაციით: „რაც შეეხება ხელვაჩაურსა და შუახევს, საქართველოს მუნიციპალური განვითარების ფონდსა და აღნიშნულ ორ მუნიციპალიტეტს შორის გაფორმებული ხელშეკრულებების საფუძველზე გადაცემული გრანტის ფარგლებში [„განახლებული რეგიონები“-ის პროგრამა], აღნიშნული მუნიციპალიტეტებში ხორციელდება:
- შუახევის კულტურის ცენტრისა და მიმდებარე ტერიტორიის რეაბილიტაცია,
- ასევე ხელვაჩაურის სკვერის, ახალგაზრდული ცენტრისა და სპორტული მოედნების რეაბილიტაცია.“
კონკრეტულად რა თანხა გადაეცა ამ ორ მუნიციპალიტეტს, ფონდიდან არ მოგვწერეს.
„განახლებული რეგიონების“ პროგრამის ფარგლებში, საქართველოს მასშტაბით, მუნიციპალური განვითარების ფონდის მიერ 15 ლოტზე გაფორმებული ხელშეკრულებების ჯამური ღირებულება შეადგენს 300 000 000 ლარს“, – მოგვწერეს ფონდიდან.
სახელმწიფო პროგრამის — “განახლებული რეგიონები” — შესახებ პრემიერ-მინისტრმა 2021 წლის 26 აპრილს განაცხადა. მთავრობის წევრთა მაშინდელი ინფორმაციით, პროექტის პირველი ეტაპი 4-წლიანია და ამ პერიოდში 500 მილიონი ლარის დახარჯვა იგეგმება.
გმირთა ხეივანი 2019 წელი / 9 აპრილის მემორიალის მოწყობის სამუშაოების დროს
გმირთა ხეივანი /2022 წელი, 2 თებერვალი / სამუშაოები „განახლებული რეგიონების“ პროგრამის ფარგლებში / რენდერის მიხედვით, შარტავას ქუჩაზე გამწვანებასთან ერთად ფეხით მოსიარულეთათვის გადასასვლელი ხიდებიც აშენდება. ხიდი ასევე ერთმანეთთან დააკავშირებს ხეივნის სხვადასხვა ნაწილს. ამ ხიდების საშუალებით კი, ქვეითებს ავტომანქანების სავალი ნაწილის გადაკვეთა აღარ მოუწევთ. ხიდების საშუალებით, გმირთა ხეივნიდან ქვეითად გადახვალთ ასევე არდაგანის ტბასთან ისე, რომ ხიმშიაშვილის ქუჩაზე ავტომობილების სავალ ნაწილზე აღარ გაივლით.
გმირთა ხეივანი / რენდერი / დაახლოებით ასეთი იქნება ხეივანი „განახლებული რეგიონების“ პროექტის დასრულების შემდეგ
ვრცლად:
https://batumelebi.netgazeti.ge/news/360186/
