Batumelebi

ევროინტეგრაციის მხარდამჭერი კამპანია „ახლა“ აგრძელებს ბათუმის ფესტივალთან თანამშრომლობას და მის მასშტაბურ ღონისძიებებზე არის წარმოდგენილი.

ფესტივალზე კამპანიამ „ახლა“ არაერთი აქტივობით გაავრცელა ინფორმაცია ევროკავშირთან ინტეგრაციის შესახებ. შეკრებილ საზოგადოებას იმ სიკეთეებზე ესაუბრა,  რასაც ქართული ოჯახები ევროკავშირში გაწევრებით მიიღებენ, ასევე აჩვენა ის მაგალითები, თუ რამდენად სწრაფად და თვალსაჩინოდ შეიცვალა სოციალურ-ეკონომიკური მდგომარეობა უკეთესობისკენ იმ ქვეყნებში, რომლებიც ახლახან შეუერთდნენ ევროკავშირს.

კამპანიის მხარდამჭერები ფესტივალზე შეკრებილ საზოგადოებას იმაზეც ესაუბრებიან, რომ ევროკავშირის წევრობა საქართველოს მოსახლეობის ურყევ მისწრაფებად რჩება და მნიშვნელოვანია მოვთხოვოთ ხელისუფლებას კანდიდატის სტატუსის მისაღებად საჭირო ქმედითი ნაბიჯები და რეფორმები ახლა.

ევროინტეგრაციის მხარდამჭერი კამპანიის კუთხის სტუმრობით ბათუმის ფესტივალის ვიზიტორ ყველა ასაკის ადამიანს შესაძლებლობა აქვს ევროკავშირში შემავალი ქვეყნების ღირებულებების შესახებ მეტი ინფორმაცია მიიღოს, ისაუბროს იმაზე, თუ რამდენად მნიშნელოვანია ხელისუფლების მხრიდან ყველაფერი გაკეთდეს რათა საქართველომ კანდიდატის სტატუსი მოიპოვოს და ამასთან ერთად ითამაშოს შემეცნებითი სამაგიდო თამაში საქართველოს ევროპული ისტორიის შესახებ.

კამპანიის „ახლა“ შესახებ:

კამპანია “ახლა“ კოალიცია ინფორმაციის სანდოობის ორგანიზებით აპრილის თვეში დაიწყო და ის წარმოაჩენს თუ რა მნიშვნელოვან სარგებელს მიიღებს თითოეული ოჯახი საქართველოს ევროკავშირში გაწევრებით. კამპანიის ფარგლებში დაგეგმილი მრავალფეროვანი ღონისძიებები, აერთიანებს საზოგადოების სხვადასხვა ჯგუფებს და საინფორმაციო პლატფორმით შესაძლებლობას აძლევს საკუთარი შვილების მომავლისთვის, ძლიერი ოჯახებისთვის, მოსთხოვონ ხელისუფლებას ხელიდან არ გაუშვას ეს შესაძლებლობა, არ დაკარგოს დრო და მოიპოვოს ევროკავშირის კანდიდატის სტატუსი.

კამპანია „ახლა“, როგორც სოციალურ ქსელებში, ასევე თბილისსა და საქართველოს სხვა ქალაქებში ბილბორდებზე, ავტობუსებსა და მეტროში ბანერების განთავსებით დაიწყო. მომდევნო თვეების განმავლობაში, ევროინტეგრაციის მხარდამჭერ არაერთ პარტნიორთან ერთად, კამპანია სხვადასხვა არხებისა და ღონისძიებების მეშვეობით საქართველოს მასშტაბით გაიშლება. 

ახლა მოქმედების დროა! მოითხოვე რეფორმები დაპირებების ნაცვლად!

მასალა მომზადებულია „კოალიცია ინფორმაციის სანდოობის“ პროგრამასთან პარტნიორობით. პროექტს ახორციელებს Zinc Network. მასალაში გამოთქმული შეხედულებები და მოსაზრებები არ არის აუცილებელი გამოხატავდეს ორგანიზაციის შეხედულებებს.

„საია უკვე წლებია იცავს იმ ადგილობრივების ინტერესებს სასამართლოში, რომლებმაც დაიწყეს სასამართლოში დავა ჰესის მშენებლობის ნებართვის კანონიერებასთან დაკავშირებით. დავის დაწყებიდან დღემდე გასულია 9 წელი და ჯერ კიდევ არ არის დასრულებული საქმის განხილვა სასამართლოში,“ – აღნიშნულია საია-ს მიერ დღეს, 12 სექტემბერს „შუახევი ჰესის“ შესახებ გავრცელებულ განცხადებაში.

ახალგაზრდა იურისტთა ასოციაციამ სასამართლოში 2013 წელს გაცემული ნებართვა გაასაჩივრა, რაც ტექნიკური და სამშენებლო ზედამხედველობის სააგენტომ გასცა შუახევის და ხულოს ტერიტორიაზე, მდინარე აჭარისწყალზე ჰიდროელექტროსადგურების კასკადის [სხალთა ჰესისა და შუახევიჰესის] მშენებლობაზე.

საია ამ განცხადებით „მთავარი არხის“ სიუჟეტს ეხმაურება „შუახევი ჰესთან“ დაკავშირებით, სადაც ჩანს, რომ შუახევის მერის მოადგილე, გურამ ზოიძე მზადაა, ყოველგვარი მოკვლევის გარეშე ის უთხრას ჟურნალისტს ჰესთან დაკავშირებულ საფრთხეზე, რასაც დაავალებენ. სიუჟეტის მიხედვით, მას თითქოს გარემოს დაცვის ზედამხედველობის სამსახურიდან ურეკავენ და ეუბნებიან, რომ ჟურნალისტი დარეკავს ჰესთან დაკავშირებით, მან კი უნდა გამოიყენოს ფრაზა: „კარსტულ-კატაკომბური ბეტონით აშენებულია და ჩამოშლის საფრთხე არ არსებობს“. შუახევის მერის მოადგილე ზუსტად ამ ფრაზას იმეორებს, როცა მას „მთავარი არხის“ ჟურნალისტი ურეკავს.

რა რეაგირება მოჰყვა ამ სიუჟეტს შუახევის მერიაში და რა ინფორმაცია აქვთ მერიაში ჰესთან დაკავშირებით? – „ბათუმელებს“ შუახევის მერმა ომარ ტაკიძემ არ უპასუხა. „ბათუმელების“ სატელეფონო ზარს არც შუახევის მერის პრესცენტრში უპასუხეს.

_________________

ფოტოზე: დიდაჭარის კაშხლის ერთ-ერთი მონაკვეთი, საიდანაც წყალი ჟონავს. ფოტო „ბათუმელების“ არქივიდან 

ამ თემაზე:

საქართველოს ფინანსთა სამინისტროს საგამოძიებო სამსახურის ინფორმაციით, შემოსავლების სამსახურის საბაჟო დეპარტამენტთან კოორდინაციით, გატარებული საგამოძიებო მოქმედებების შედეგად, საბაჟო კონტროლისგან მალულად, საქართველოს საბაჟო საზღვარზე განსაკუთრებით დიდი ოდენობით საქონლის გადმოტანის ფაქტზე დაკავებულ იქნა უცხო ქვეყნის მოქალაქე.

„გამოძიებით დადგინდა, რომ ბრალდებულმა, საბაჟო გამშვები პუნქტის გავლით, საბაჟო კონტროლისაგან მალულად, საქართველოს საბაჟო საზღვარზე გადმოიტანა 46 029 ლარის საბაჟო ღირებულების სხვადასხვა ზომისა და ხარისხის დაწახნაგებული არადეკლარირებული ბრილიანტის ქვები და ოქროს ბეჭედი.

გამოძიება მიმდინარეობს საქართველოს სისხლის სამართლის კოდექსის 214-ე მუხლის მეორე ნაწილით, რაც სასჯელის სახით ითვალისწინებს თავისუფლების აღკვეთას 5-დან 7-წლამდე ვადით.“ – აცხადებს საგამოძიებო უწყება.

„როგორ დავიჯეროთ, რომ კარგი რამ კეთდება ხალხისთვის, როცა ჩვენ ამას გვიმალავენ?!“ – კითხულობს გურიაში, სოფელ გომში მცხოვრები გურამ ცომაია. ის ერთ-ერთია მათ შორის, ვინც ბჟუჟის ხეობაში  3 ახალი ჰესის აშენების წინააღმდეგია.

გურიაში შემთხვევით გაუგიათ, რომ ტყეში ახალი ჰესების მოსაწყობად გზა გაჰყავთ. ადგილზე მისულებს მძიმე ტექნიკა დახვდათ და მშენებლების პასუხი – „მემორანდუმი ოზურგეთის მერიასთანაა გაფორმებული, ყველა საჭირო ნებართვა გვაქვს“.

კონკრეტული დოკუმენტები მოსახლეობისთვის არც კომპანიას უჩვენებია და არც ოზურგეთის მერიას.

გაირკვა, რომ ჰესის ასაშენებლად გზა კი გაჰყავთ, მაგრამ ჰესის მშენებლობის ნებართვა ჯერ არ არსებობს. არც სეისმური, ჰიდროლოგიური ან სხვა სახის კვლევები ჩაუტარებია ჯერ ვინმეს, რაც ჰესის აშენებამდე უნდა ჩატარდეს.

„ეს სეისმურად საშიში ზონაა, ღვარცოფული მდინარე, რამდენჯერ ჩაკეტილა გომისმთისკენ მიმავალი გზა იმის გამო, რომ მეწყერი ჩამოწვა,“ – გვიყვება გურამ ცომაია, ვისთვისაც ახალი ჰესების აშენება ახლა – გურიის ტრაგედიის შემდეგ კიდევ უფრო ემოციური გახდა.

გურამ ცომაია ჩვენთან საუბარს იმაზე აქცენტით იწყებს, რომ ის და მისი თანასოფლელები ჰესების წინააღმდეგნი არ არიან, მაგრამ ამგვარად – მალულად და ნებართვის გაცემამდე წინმსწრებად დაწყებული პროცესი ეჭვს უჩენს, რომ კარგი არაფერი ხდება.

„ჩვენ პროგრესის წინააღმდეგი კი არ ვართ, მაგრამ, პირველ რიგში, უნდა გვითხრან, რას აშენებენ, როგორ აისახება ეს გარემოზე.რატომ უნდა ყოფილიყო დაფარული ეს პროცესი?!

მე რაც ვნახე, ვნახე ასწლოვანი ხე-ტყის გაჩეხა და დაზიანება. ჯერ ამაზე ვინ გასცა ნებართვა? ულამაზესი სოფელი გვაქვს და უზარმაზარი ტურისტული პოტენციალია აქ. პროფესიონალის შეფასების გარეშეც ჩანს ყველაფერი, რომ ეს საფრთხეა.

ჯერ ერთი, მოწყობილია უკვე „ბჟუჟჰესი“ და შეღავათი არაფერი გვაქვს. ჩვეულებრივად ვიხდით ჩვენ შუქის გადასახადს, როგორც სხვები.

დაახლოებით 120-მა კაცმა მოაწერა ხელი განცხადებას ახალი ჰესების წინააღმდეგ. ჩვენ კატეგორიულად არ დაგვიფიქსირებია პოზიცია, კითხვა დავსვით, გვინდა თუ არა ჰესი? უმრავლესობამ თქვა, რომ ჰესი არ სურს. ბევრს ინფორმაცია არ აქვს, რა ხდება და რატომ ხდება,“ – გვითხრა გურამ ცომაიამ.

„ეს ჰესი, რაც შენდება, არის 1.9 მეგავატი სიმძლავრის, მცირე ჰესია,“ – ჰესის სიმძლავრეზე ამახვილებს ყურადღებას ზურაბ ბესელია, კომპანია „პარვუს ჯგუფის“ პროექტის ხელმძღვანელი. მას ვუთხარით გარემოსდამცველების ეჭვზე, რომ ჰესები მიზანმიმართულად დაანაწილეს სამ ნაწილად და პატარ-პატარა სიმძლავრეებად, რომ კანონმდებლობით გათვალისწინებულ ზოგიერთ ვალდებულებას კომპანიამ თავი აარიდოს, მაგალითად, პროექტის საჯარო განხილვას.

„არაა ასე, სამ ლოკაციაზე გვაქვს, იმიტომ, რომ წყლის გასანაწილებლად დიდი ნაკადი არ აგვეღო, ასე გადაწყდა ტექნიკურად. როცა მცირე ჰესია, არ გვაქვს ვალდებულება კანონმდებლობით, რომ ჩვენ გავაკეთოთ გარემოზე ზემოქმედების დოკუმენტი ანუ გზშ,“ – გვითხრა ზურაბ ბესელიამ.

კომპანიის წარმომადგენელმა დაგვიდასტურა, რომ კვლევის შედეგები ჯერ არ არსებობს და შესაბამისად, არც ჰესის მშენებლობის პროექტი.

რატომ გაჰყავთ მაშინ გზა წინმსწრებად, როცა დადგენილი არ არის, ჰესის ასაშენებლად შესაბამისი გარემო არის თუ არა?!

„გარანტიები არანაირი არ გვაქვს. გზა რომ არ გაგვკეთებია, ვერ გავაკეთებდით სრულყოფილ კვლევებს. კვლევებისთვის და დეტალური პროექტისთვის არის ეს საჭირო.

ამ გზის ნებართვა გვაქვს მთავრობისგან მიღებული, მთავრობასთან გაფორმებული მემორანდუმის საფუძველზე, გზის პარამეტრები კი ადგილობრივ მუნიციპალიტეტთან არის შეთანხმებული. იმედი გვაქვს, რომ კვლევებიც გამოვა და სამშენებლო ნებართვასაც მივიღებთ. თუ ასე არ იქნება, მაშინ გზა დარჩება მოსახლეობას.

დაახლოებით ერთ თვეში გვექნება უკვე პროექტი, რაც მოგვცემს უფლებას, გადავიდეთ სამშენებლო ეტაპზე, ანუ მოვიპოვოთ სამშენებლო ნებართვა“, – განმარტავს ზურაბ ბესელია.

კომპანიის წარმომადგენელმა „ბათუმელებთან“ საუბრის დროს ყურადღება გაამახვილა იმაზეც, რომ ეს სრულად ქართული ინვესტიციაა და გურიაში ასაშენებელი ჰესების შემთხვევაში პროექტის თანამონაწილეა სახელმწიფო სს „ენერგეტიკის განვითარების ფონდი“.

კომპანია „პავრუს ჯგუფი“ 2019 წელსაა დაფუძნებული. მისი მეწილეები არიან სულხან ზუმბერიძე და მამუკა პაპუაშვილი.

„გურიაში სხვა ჰესი აშენებული არ გვაქვს, მაგრამ 8 ჰესი გვაქვს აშენებული სხვა რეგიონში, მაგალითად, დუშეთში, ხევსურეთში, ახალციხეშიც ვაშენებთ მცირე ჰესს“, – დასძინა ზურაბ ბესელიამ „ბათუმელებთან“.

რაც შეეხება კვლევებს, რომლითაც უნდა შეფასდეს, რამდენად უსაფრთხოა ჰესების აშენება გურიაში ღვარცოფული ბჟუჟის ხეობაში, ზურაბ ბესელია ისევ კანონმდებლობას გვახსენებს, რომ ვალდებულება არ აქვს, მაგრამ რადგან მოსახლეობა ამას ითხოვს და ჟურნალისტები შეკითხვებს სვამენ, 4 სახის კვლევას ატარებენ:

„ეს არის მცირე ჰესი და ზემოქმედება გარემოზე არის ნაკლები, ჩვენ არ ვაკეთებთ წყლის შეგუბებას, არ იქნება კაშხალი, მილში გამოედინება მდინარის წყლის ნაწილი, შენარჩუნდება ფლორა და ფაუნაც, მილში რა წყალიც იქნება, ის ატრიალებს გენერატორს და უბრუნდება მდინარეს.

მიუხედავად იმისა, რომ მცირე ჰესია და კანონმდებლობა არ გვთხოვს ამას, ვაკეთებთ სეისმოლოგიურ კვლევას, ასევე კვლევას, რომლითაც განისაზღვრება ბუნებრივი კატაკლიზმების პროვოცირება ხომ არ მოხდება, იქტიოლოგიური კვლევაც ჩატარდება, ანუ ჰესები თევზებზე ხომ არ იმოქმედებს და, რა თქმა უნდა, ჰიდროლოგიური კვლევა.

გზა, რაც უნდა გაკეთდეს, ჯერჯერობით მესამედია გაკეთებული,“ – გვითხრა ზურაბ ბესელიამ.

მას მემორანდუმისა და იმ ნებართვის გაცნობა ვთხოვეთ, რომლითაც ბჟუჟის ხეობაში, ტყეში გზა გაჰყავთ. ის დაგვპირდა, რომ იურისტებთან კონსულტაციის შემდეგ შეიძლება მოგვაწოდოს დოკუმენტები.

„ეგ ორთვიანი კვლევა, დაკოპირებული გეიწეპონ შპალერად კედელზე,“ – ეს სამოქალაქო აქტივისტისა და გარემოსდაცვითი, სათემო ორგანიზაციის – „ეკოს“ ხელმძღვანელის, ირმა გორდელაძის რეაქციაა. მასაც შემთხვევით გაუგია, ჰესი რომ შენდება ბჟუჟის ხეობაში და მშენებლებს ტყეში თავზე დასდგომია.

„აბსურდია, 2 თვეში ჩაატარო კვლევა. მდინარის კვლევა ტარდება სეზონურად, წელიწადში კი ოთხი სეზონია. ყველა სეზონზე მდინარეს სხვადასხვა მორფოლოგია აქვს, დინამიკა და დინების სიჩქარე. ოთხივე სეზონზე მდინარე უნდა შეისწავლონ თანამედროვე მეთოდებით. ეს მეთოდები, როგორც უნდა ჩატარდეს წესიერი კვლევა, USAID-ის მხარდაჭერით გამოცემულია. პრაქტიკაში რასაც ვხედავთ, როცა კვლევებს ამზადებენ, არის დაკოპირებული შპარგალკები, ვითომ კვლევა ჩაატარეს,“ – ამბობს ირმა გორდელაძე.

სოფელ გომში მცხოვრები მოქალაქის მსგავსად, ირმაც აქცენტს იმაზე აკეთებს, რომ ჰესების მშენებლობას ზოგადად არ ეწინააღმდეგება.

„დადონ ევროპული სტანდარტი და ააშენონ, ჩუმად რატომ დაიწყეს?“ – ეჭვი აქვს ირმა გორდელაძესაც.

იგი გვესაუბრა იმაზეც, რომ ბჟუჟის ხეობა სეისმურად საშიში ზონაა, მდინარე ბჟუჟი – ღვარცოფული.

„თუ ამას არ გავითვალისწინებთ, საფრთხე იქნება სერიოზული. ასე უთავბოლოდ რომ ვუდგებით საქმეს, იმიტომაც გვაქვს ეს მდგომარეობა ახლა გურიაში – უკონტროლო მიდგომით გამოუღეს ფსკერი მდინარეებს.

გურიაში ყველა მდინარე არის მთის, ბჟუჟის ხეობა კი განსაკუთრებით დამრეცია. აბსურდია იმის თქმა, რომ გზშ თურმე ამას არ სჭირდება.

უმთავრესი ამ პროცესში არის გამჭვირვალობა – საქართველოს კონსტიტუციით მოქალაქეს ნებისმიერ ეტაპზე აქვს უფლება, ჩაერთოს პროექტის განხილვაში, რაც ეხება თავის საცხოვრებელ გარემოს. მე კი, ოზურგეთის მერია მემორანდუმსაც არ მაწვდის, რის საფუძველზე მისცეს გზის გაყვანის უფლება კომპანიას?

მოსახლეობასთან მუშაობენ, რომ წინააღმდეგ არ წავიდეს ხალხი, მაგრამ თუ არ იქნება გარემოსდაცვითი სტანდარტების შესაბამისი ეს პროცესი, აუცილებლად მივმართავ სამართლებრივ გზებს,“ – გვითხრა ირმა გორდელაძემ.

„ბათუმელები“ დაუკავშირდა ოზურგეთის მერიას იმის გასარკვევად, თუ რა სახის ნებართვაა გაცემული ბჟუჟის ხეობაში ახალი ჰესების მშენებლობაზე, მათ შორის, ტყეში გზის გაყვანის კუთხით? – ოზურგეთის მერიის პრესცენტრში თავდაპირველად გვითხრეს, რომ ამ საკითხს მოიკითხავდნენ, თუმცა მალევე გვიპასუხეს, რომ ამ დღეებში შეკითხვებს ვერ უპასუხებენ, რადგან სტიქიაზე მუშაობენ.

ბოლო წლებში ოჯახში ძალადობის საქმეებზე გამამართლებელი განაჩენების გამოტანის მაჩვენებელმა იმატა, რასაც მოსამართლეები ძირითადად ისევ ძალადობის მსხვერპლ ქალს უკავშირებენ – მათ დუმილი აირჩიეს.

უზენაესი სასამართლოს მიერ 2023 წელს მიღებულ ერთ-ერთ გადაწყვეტილებაში წერია, რომ ნამტირალევმა ქალმა, რომელიც დაახლოებით ღამის 12 საათზე მივიდა სასტუმროს მისაღებში და 112-ში დარეკვა ითხოვა…საბოლოო ჯამში „დუმილი არჩია“.

„…საცხოვრებელ სახლში ურთიერთშელაპარაკების ნიადაგზე პ. ზ-მა ხელის სახის არეში რამდენჯერმე დარტყმით იძალადა მისი ოჯახის წევრზე, მეუღლე კ. ზ-ზე, რა დროსაც ამ უკანასკნელმა განიცადა ფიზიკური ტკივილი,“ – ეს ოჯახში ძალადობის მორიგი საქმეა, რაზეც ბათუმის საქალაქო სასამართლომ გამამტყუნებელი განაჩენი მიიღო.

მსჯავრდებულს ბათუმის საქალაქო სასამართლომ სასჯელის სახედ და ზომად განუსაზღვრა საზოგადოებისათვის სასარგებლო შრომა 90 საათით.

ეს განაჩენი გაუსაჩივრებია როგორც მსჯავრდებულს, ისე პროკურორს. პროკურატურამ უფრო მკაცრი სასჯელი მოითხოვა სააპელაციო სასამართლოში, მსჯავრედებულმა – გამამართლებელი განაჩენი.

ქუთაისის სააპელაციო სასამართლომ მსჯავრდებული გაამართლა.

პროკურატურის შეფასებით, ეს გამამართლებელი განაჩენი უკანონოა. „…რადგან დაზარალებულის მიერ ჩვენებაზე უარის თქმის მიუხედავად წარმოდგენილი მტკიცებულებები სრულად ადასტურებენ პ. ზ-ს ბრალეულობას, კერძოდ: მოცემულ საქმეზე გამოძიების დაწყებას საფუძვლად დაედო სასტუმროს თანამშრომლის – ა. ჩ-ს შეტყობინება.

ა. ჩ-ს გამოკითხვის ოქმით ირკვევა, რომ სასტუმროში ყოფნისას მას დახმარებისთვის მიმართა დაზარალებულმა, რომელსაც სახის არეში აღენიშნებოდა შეწითლება და უთხრა, რომ მასზე იძალადა მეუღლემ, მოწმე პოლიციის თანამშრომლებმა კი, დაადასტურეს, რომ დაზარალებული, რომელსაც სახეზე აღენიშნებოდა შეწითლების კვალი, ამბობდა, რომ მასზე იძალადა მეუღლემ. გარდა ამისა, შემაკავებელ ორდერში მითითებულია, რომ პ. ზ-მა მეუღლეს – კ. ზ-ს მიაყენა ფიზიკური შეურაცხყოფა,“ – ვკითხულობთ განჩინებაში.

ამ საქმეში უდავოდ მიჩნეული მტკიცებულება და მთავარი მოწმე სასტუმროს ადმინისტრატორია, რომელმაც მოსამართლეს უთხრა, რომ დაახლოებით ღამის 12 საათი იყო, როცა სასტუმროს მისაღებში ქალი შევიდა. სასტუმრო იმ კორპუსშია, სადაც დაზარალებული ქალი ცხოვრობს.

„…მითხრა, რომ კ.ზ-ს. ესაჭიროებოდა პოლიციის დახმარება, ქალბატონს სახეზე ეტყობოდა სიწითლე, იყო აღელვებული და ჰქონდა ნამტირალევი ხმა. მითხრა, რომ ბინაში მეუღლესთან მოუვიდა კონფლიქტი, რა დროსაც ქმარმა მიაყენა ფიზიკური შეურაცხყოფა. მთხოვა, დამერეკა 112-ში.

პოლიციელებს იმავე ღამით დაუკავებიათ პ.ზ. „რომელსაც ვიზუალურად მარჯვენა ლოყის და ორივე ხელის მკლავის მიდამოში აღენიშნებოდა ნაკაწრები ფუფხის სახით. კაცმა პოლიციელებს უთხრა, რომ კონფლიქტი მეუღლესთან ჰქონდა.

სასამართლოს არც ამ შემთხვევაში  მისცა ჩვენება დაზარალებულმა.

„მოცემულ შემთხვევაში პირდაპირი მტკიცებულება, რაც დაადასტურებდა პ. ზ-ის მხრიდან დაზარალებულზე ძალადობას, წარმოდგენილი არ არის, თავად დაზარალებულს კი, სასამართლოში ჩვენება არ მიუცია,“ – აღნიშნულია განჩინებაში, სადაც უზენაესი სასამართლო ასაბუთებს, რატომ მიიჩნევს სამართლიანად ქუთაისის სააპელაციო სასამართლოს გადაწყვეტილებას.

__

სტატია ამავე თემაზე:

ბათუმის ბულვარი მონუმენტური შადრევნის ქანდაკება „გოგონა ველოსიპედით“ აღდგენა-რეაბილიტაციისთვის 40 ათას ლარს გადაიხდის. მომსახურების ტენდერის გარეშე შესყიდვაზე ბულვარის ადმინისტრაციამ სახელმწიფო შესყიდვების სააგენტოს უკვე მიმართა.

ბულვარი ხელშეკრულებას ქანდაკების რეაბილიტაციაზე მის ავტორთან, ირაკლი ჟვანიასთან გააფორმებს.

„აღნიშნული ქანდაკება წარმოადგენს ერთ-ერთ ღირშესანიშნაობას, რომლებიც მუდმივად იზიდავენ ქალაქის სტუმრებსა და ბულვარის ვიზიტორებს. ქანდაკება ბულვარის ტერიტორიაზე განთავსდა 2012 წელს, ბათუმისთვის დამახასიათებელი ხშირი წვიმისა და მეტეოროლოგიური პირობების გამო დაკარგა ვიზუალური მიმზიდველობა და ფუნქცია. ზემოაღნიშნულიდან გამომდინარე საჭიროა ქანდაკებების დაუყოვნებლივ რეაბილიტაცია.“ – აცხადებს „ბათუმის ბულვარი“

ბულვარის ინფორმაციით, რესტავრაციისთვის საჭირო თანხის ოდენობა „ქანდაკების ავტორის მიერ წარმოდგენილი აღდგენა-რესტავრაციისთვის საჭირო მომსახურების ხარჯთაღრიცხვის მიხედვით“ განისაზღვრა.

„რაც შეეხება სამუშაოების ჩატარებას, ჩემი აზრით ჩასატარებელია ქანდაკების გაწმენდა და ახლიდან დაჟანგვა, დასამატებელია ერთი დამატებითი ტუმბო ვინაიდან ქოლგიდან წყლის დინება არ არის საკმარისი; შადრევანზე გასაკეთებელია საინფორმაციო წარწერა, პოსტამენტზე შეიძლება გაკეთდეს ბრინჯაოს ბარელიეფები ქანდაკების გამოსახულებით და ქანდაკების ღამის განათება, რაც აუცილებელია.

ჩემის მხრიდან მზად ვარ შევასრულოთ ყველა ზემოთ ჩამოთვლილი სამუშაო თქვენის მხრიდან ხელშეკრულების გაფორმების შემთხვევაში.“ – წერს ირაკლი ჟვანია  „ბათუმის ბულვარის“ დირექტორის მოვალეობის შემსრულებელს, ლაშა მიქელაძეს.

განაცხადის მიხედვით, ქანდაკების ავტორთან შეთანხმებით, რესტავრაცია ხელშეკრულების გაფორმებიდან 70 დღეში უნდა დასრულდეს.

ბულვარის ინფორმაციით, „ი/მ „ირაკლი ჟვანია“-ს მიერ წარმოდგენილია ცნობა, საქართველოს საავტორო უფლებათა ასოციაციიდან, რომლის თანახმადაც ირაკლი ჟვანია გაწევრიანებულია საქართველოს საავტორო უფლებათა ასოციაციაში და მას ქანდაკებაზე „გოგონა ველისიპედით“ დაარეგისტრირებული აქვს საავტორო უფლებები“.

ბულვარის განაცხადს გამარტივებულ შესყიდვაზე სააგენტო 2023 წლის 13 სექტემბერს განიხილავს.