„გიორგი ოქროპირიძის საქმეზე“ ევროსასამართლომ გადაწყვეტილება მიიღო. სტრასბურგის სასამართლოს გადაწყვეტილებით, გიორგი ოქროპირიძის მიმართ სამართლიანი სასამართლოს უფლება არ დარღვეულა.
საუბარია 2014 წლის 2 სექტემბერს თბილისის ცენტრში მომხდარ მკვლელობაზე. გიორგი ოქროპირიძე ნაფიც მსაჯულთა სასამართლომ მკვლელობაში დამნაშავედ სცნო. მას მოსამართლემ 20 წლით თავისუფლების აღკვეთა შეუფარდა.
მსჯავრდებული მიუთითებდა, რომ საქმე განიხილეს და გადაწყვეტილება მიიღეს ნაფიცმა მსაჯულებმა, რომლებიც მოექცნენ მედიით ინტენსიურად გავრცელებული ინფორმაციისა და მაღალი თანამდებობის პირების მიერ გაკეთებული განცხადებების გავლენის ქვეშ. მოსარჩელე ასევე მიუთითებდა, რომ მტკიცებულებათა გამოკვლევისას დარღვეული იყო კანონით გათვალისწინებული პროცედურა.
„არ დარღვეულა საქმეზე მტკიცებულებათა გამოკვლევის წესი, არ დარღვეულა მის მიმართ უდანაშაულობის პრეზუმფცია. სასამართლოს თქმით, ასევე ვერ დადგინდა ნაფიც მსაჯულთა მიკერძოებულობა და არაობიექტურობა.
სტრასბურგის სასამართლომ არცერთ ნაწილში არ გაიზიარა მომჩივანის პრეტენზიები და დაადგინა, რომ ეროვნულმა სასამართლომ მიიღო ყველა ზომა მსაჯულთა მიუკერძოებლობის უზრუნველსაყოფად.
რაც შეეხება მტკიცებულებათა გამოკვლევას სასამართლომ დაადგინა, რომ ამ დროს პროცესუალური წესების დარღვევას ადგილი არ ჰქონია, რაც ნიშნავს იმას, რომ პროკურატურის მიერ წარდგენილი მტკიცებულებები, რომელთა საფუძველზეც ნაფიცმა მსაჯულებმა გამამტყუნებელი ვერდიქტი გამოიტანეს, განხილული იყო პროცესის ყველა წესის დაცვით,“ – აღნიშნულია საქართველოს პროკურატურის მიერ გავრცელებულ ინფორმაციაში.
მსჯავრდებული გიორგი ოქროპირიძე ამბობს, რომ მას ეს დანაშაული არ ჩაუდენია, მან საკონსტიტუციო სასამართლოსაც მიმართა . გიორგი ოქროპირიძემ ის სამართლებრივი ნორმა გაასაჩივრა, რომლის მიხედვითაც მოსამართლეს შეუძლია ნაფიც მსაჯულთა მიერ მიღებული ვერდიქტი გააუქმოს, თუ ხედავს, რომ ვერდიქტი აშკარად უსაფუძვლოა. მოსარჩელე მიუთითებს, რომ ნაფიც მსაჯულთა უკანონო შემადგენლობა დაიშვა სასამართლოზე და მათ მიერ გამოტანილი ვერდიქტი სამართლებრივად არის უკანონო.
ამ თემაზე:
