Batumelebi

განათლების მინისტრის მოადგილე, ირინა აბულაძე დღეს, 12 ივლისს, პანელის მონაწილე იყო კონფერენციაზე – „საქართველოს ევროპული გზა“, სადაც კითხვები დაისვა ქვეყნიდან ე.წ „ტვინების გადინების პრობლემაზე.

მინისტრის მოადგილეს დისკუსიის დროს კითხვა დაუსვა საქართველოს პარლამენტის წევრმა ბექა ნაცვლიშვილმა. მან თქვა, რომ ქვეყნიდან კომპეტენტური და განათლებული ადამიანების გადინების მიზეზი არა მხოლოდ დაბალი ხელფასია, არამედ ეკონომიკური სისტემა, რომელიც არ აძლევს ამ ადამიანებს დასაქმების შესაძლებლობას.

„თუ მთავრობა აპირებს ქვეყნის მშპ-ს 6 პროცენტი დახარჯოს განათლებაზე, მაგრამ ამავდროულად, ხელს აწერ რაღაც შეთანხმებებს სხვადასხვა ქვეყანასთან, მაგალითად, ცირკულარული მიგრაციის შესახებ მაღალი კვალიფიკაციის მქონე ადამიანებისთვის… პრემიერ-მინისტრმა ამაყად გამოაცხადა, რომ მათ მიაღწიეს ამ შეთანხმებას გერმანიასთან, საფრანგეთთან, პორტუგალიასთან, რომ მაღალკვალიფიციური ადამიანებისთვის გაიხსნება მათი ბაზარი, ანუ მიიღებენ სამუშაო უფლებას. ეს არ ნიშნავს, რომ ჩვენ ვაფინანსებთ სხვა ქვეყნის ეკონომიკას? და ეს დიდი პრობლემა“, – ამბობს ბექა ნაცვლიშვილი.

მისი აზრით,  ამ დიდი პრობლემის მიზეზი არის საქართველოს ეკონომიკის სტრუქტურა, რადგან მას არ სჭირდება კვალიფიციური ადამიანები.

„თუ ქვეყანაში ტურიზმია წამყვანი სფერო, ქვეყანას არც სჭირდება კვალიფიციური ადამიანები იმიტომ, რომ აღარ აქვს მნიშვნელობა რა კვალიფიკაციას მიიღებენ, თუ ვერ დასაქმდნენ. სწორედ ამიტომ გადიან განათლებული ადამიანები ქვეყნიდან. არა მხოლოდ ხელფასების გამო, უფრო იმიტომ, რომ ელემენტარულად, სამსახურს ვერ შოულობენ“, – ამბობს ნაცვლიშვილი.

ირინა აბულაძის თქმით, ხელისუფლება ვერ შეზღუდავს ადამიანების არჩევანს:

„ჩვენ ვერ მოვახდენთ ლიმიტირებას და ვერ გადავეღობებით ადამიანებს, თუკი მათ აქვთ შანსი მიიღონ უკეთესი განათლება სხვაგან ან დასაქმდნენ. მაგრამ ჩვენ უნდა უზრუნველვყოთ,  რომ ახალგაზრდებმა აქ, ამ ქვეყანაში მიიღონ კარგი განათლება და ყველა სამინისტრო, მუნიციპალიტეტები უნდა ჩაებას ამ მოძრაობაში, რომ მივცეთ საშუალება ადამიანებს დასაქმდნენ“.

ირინა აბულაძის თქმით, ქვეყანას ასევე ძალიან სჭირდება აღმოსავლეთ პარტნიორობის ქვეყნებთან თანამშრომლობა და გამოცდილების გაზიარება. ასეთ შემთხვევაში მიგრაცია შეიძლება იყოს ერთ-ერთი გზა, მაგრამ უკვე გვაქვს იურიდიული და სხვა მექანიზმები, რომ  ახალგაზრდებმა მიიღონ მაღალი კვალიფიკაცია უცხოეთში და შემდეგ დაბრუნდნენ ქვეყანაში“.

აჭარის განათლებისა და კულტურის სამინისტრო აჭარის მოდის კვირეულზე, Adjara Fashion Week-ზე მოწვეული 5 სტუმრისათვის თვითმფრინავის ბილეთებს შეიძენს და ასევე, ხუთი სტუმრის VIP კლასის სასტუმროში განთავსებისთვის გადაიხდის ფულს.  ამისათვის  სამინისტრო ჯამში 15 ათასამდე ლარის დახარჯვას აპირებს.

ამ მომსახურების შესასყიდად სამინისტრომ ტენდერები უკვე გამოაცხადა. ტენდერის თანახმად, აჭარის მოდის კვირეულზე ორი სტუმარი მილანიდან ჩამოფრინდება, სამი კი – პარიზიდან. სამინისტრო მათ მგზავრობას ორივე მიმართულებით [იქეთ-აქეთ] დააფინანსებს. ტენდერში აღნიშნულია, რომ საჰაერო ტრანსპორტირება უნდა განხორციელდეს პირდაპირი ფრენით. შესყიდვის სავარაუდო ღირებულება 4 750 ლარია.

სამინისტრო გადაიხდის აჭარის მოდის კვირეულის ფარგლებში მოწვეული ხუთი სტუმრის სასტუმროში განთავსების ღირებულებასაც. ტენდერში აღნიშნულია, რომ  სასტუმრო საერთაშორისო ქსელს უნდა ეკუთვნოდეს, ხუთივე ნომერი ერთადგილიანი უნდა იყოს და VIP კლასის. სამინისტრო ხუთ დღეში ხუთი ადამიანის სასტუმროში განთავსებისთვის 10 250 ლარის დახარჯვას გეგმავს – სწორედ ეს თანხაა ტენდერით გამოცხადებული შესყიდვის სავარაუდო ღირებულება.

აჭარის მოდის კვირეული ბათუმში 26-28 ივლისს არის დაგეგმილი. მოდის კვირეული წელს მეხუთედ იმართება და მისი დამაარსებელი მანანა გოგლიჩიძეა, მოდისა და დიზაინის ასოციაციის პრეზიდენტი.

2017 წელს ბათუმის საკრებულომ აჭარის მოდის კვირეული 30 ათასი ლარით დაფინანსებას მხარი დაუჭირა. მაშინ საკრებულოს რამდენიმე წევრი და არასამთავრობო ორგანიზაციების წარმომადგენლები  ამ დაფინანსების წინააღმდეგნი იყვნენ. 2017 წელს აჭარის მოდის კვირეულს ბათუმის მერიისა და საკრებულოს, აჭარის მთავრობის წარმომადგენლები და დეპუტატი ფატი ხალვაშიც ესწრებოდნენ.

Adjara Fashion Week-ის დამფუძნებელმა, მანანა გოგლიჩიძემ „ბათუმელებთან“ აღნიშნა, რომ ოთხი წლის განმავლობაში ორგანიზაციას თანხა არ ჩარიცხვია და ბიუჯეტიდან მოთხოვნილი თანხით ხდება მხოლოდ მომსახურების შესყიდვა.

___________

ფოტოზე: კოლექციის ჩვენება „აჭარა ფეშენ ვიკის“ გახსნაზე, 2017 წ. ფოტო: ლელა დუმბაძე/„ბათუმელები“

საერთაშორისო კონფერენციაზე „საქართველოს ევროპული გზა“, რომელიც მეორე დღეა მიმდინარეობს ბათუმში, ანაკლიის ღრმაწყლოვან პორტთან დაკავშირებით კითხვა დაუსვეს რეგიონული განვითარებისა და ინფრასტრუქტურის მინისტრს, ვიცე-პრემიერ მაია ცქიტიშვილს.

ანაკლიის ღრმაწყლოვანი პორტის  პროექტი ძალიან მნიშვნელოვანია ევროპისთვის, როგორი იქნება ამაზე ხელისუფლების მხარდაჭერა?

პანელზე დასმულ კითხვას ვიცე-პრემიერმა შემდეგი პასუხი გასცა: „ანაკლიის ღრმაწყლოვანი პორტის პროექტი, რა თქმა უნდა, არის ტრანსევროპული პროექტი და ძალიან მნიშვნელოვანია დავაკავშიროთ ჩვენი სარკინიგზო ინფრასტრუქტურა პორტებს, საიდანაც შემდეგ დავუკავშირდებით ევროპას. ეს არის დამატებითი შესაძლებლობა ევროპელი, აზიელი ბიზნესმენებისთვის, რათა ისინი დაუკავშირდნენ ერთმანეთს საქართველოს გავლით და საქართველოს მეშვეობით.

რაც შეგვიძლია გავაკეთოთ არის ის, რომ კერძო კონსორციუმს დავუჭიროთ მხარი, კერძო ბიზნესს, რომელიც ჩაბმულია ამ პროექტის განხორციელებაში და, რა თქმა უნდა, ის შეიცავს როგორც ფინანსურ, ასევე პოლიტიკურ ძალისხმევას. ვაწარმოებთ მოლაპარაკებებს ევროპის საინვესტიციო ბანკთან იმისთვის, რომ შევაგროვოთ საჭირო თანხები და ძალისხმევას არ ვიშურებთ, რომ საუკეთესო გარემო შევქმნათ და საფუძველი და მხარი დავუჭიროთ კერძო ინვესტორებს ამ პროექტის განხორციელებაში.

ეს, რა თქმა უნდა, რთულია, მაგრამ ნებისმიერ შემთხვევაში, მე დარწმუნებული ვარ, რომ კერძო ინვესტორები, ყველა დაინტერესებული მხარე, გაიღებს გარკვეულ კომერციულ რისკებს და მიიღებს გადაწყვეტილებებს, რომელიც შეარბილებს ამ რისკებს. ხოლო სახელმწიფო ყოველ ღონეს იხმარს იმისთვის, რომ სახარბიელო საფუძველი შეექმნას ამ პროექტის განხორციელებას“, – განაცხადა მაია ცქიტიშვილმა.

კონფერენციის დღევანდელი დილის პანელის მომხსენებლები არიან: მაია ცქიტიშვილი, იური ლავრენუკი – უკრაინის ინფრასტრუქტურის მინისტრი, ვასილ ჰუდაკი – ევროპის საინვესტიციო ბანკის ვიცე-პრეზიდენტი და დანიელა მორარი – მოლდოვას საგარეო საქმეთა და ევროპული ინტეგრაციის სახელმწიფო მდივანი.

საერთაშორისო კონფერენცია ბათუმში გუშინ, 11 ივლისს დაიწყო და დღეს, 12 ივლისს, დაასრულებს მუშაობას. კონფერენციის გახსნას ესწრებოდნენ: ევროსაბჭოს პრეზიდენტი დონალდ ტუსკი, საქართველოს პრეზიდენტი და პრემიერი, ასევე, სხვა ოფიციალური პირები.

ამავე თმაზე:

https://netgazeti.ge/news/346866/

აჭარის მაღალმთიანეთში წიწვოვანი ტყე ხმება. ხმობის პროცესი შუახევისა და ხულოს მუნიციპალიტეტების სოფლებში თვალნათლივ ჩანს. მაგალითად, წიწვოვანი ხეები გამხმარია შუახევში, სოფელ ნენიაში. ხეები ასევე ხმება სოფლებში: ღურტაში, ჩანჩხალოში, ყინჩაურში.

გამხმარი ტყის მასივის ნაწილი იმ არეალშია, სადაც „შუახევი ჰესისათვის“ საჭირო გვირაბები გაჰყავთ. ადგილობრივი მოსახლეობა ხეების ხმობას სწორედ ჰესის მშენებლობას უკავშირებს.  თუმცა „აჭარისწყალი ჯორჯია“, კომპანია, რომელიც „შუახევი ჰესს“ აშენებს, უარყოფს, რომ ტყეების ხმობის მიზეზი ჰესია.

„ჰესის მშენებლობის არეალში მცხოვრები მოსახლეობა  ყველაფერს ჰესს უკავშირებს, მაგალითად, ფუტკარი დაიხოცა შუახევში, ისინი უკავშირებდნენ ჩვენს პროექტს. მერე აღმოჩნდა, რომ ფაროსანას წამალი რაც გამოიყენეს, იმის გამო იყო,“ – უთხრა „ბათუმელებს“ „აჭარისწყალი ჯორჯიას“ აღმასრულებელმა დირექტორმა პრაშანტ ჯოშმა.

ოფიციალური ინფორმაციით, წიწვოვან ხეებს აჭარის მაღალმთიანეთში მავნებელი მწერი –  კენწეროს ქერქიჭამია ანადგურებს. აჭარის სატყეო სააგენტოს უფროსის მოადგილე ჯუმბერ აბულაძე პროცესს კლიმატის ცვლილებას უკავშირებს.

„კლიმატის ცვლილების უარყოფითი მხარე ბოლო სამი წლის მანძილზე გამოისახა ამაში – იქ, სადაც წიწვოვანი ხეებია შუახევსა და ხულოში, ზაფხულში 60-70 დღე წვეთი ნალექი არ მოდის. ამის გამო ძლიერ სიცხეში იქმნება მავნებლის განვითარების ხელშეწყობის პირობები. ნიადაგიდან წყლის უკმარისობის გამო ხეები ვეღარ იღებს წყლის საკმარის რაოდენობას, სუსტდება, მავნებელი ამ დასუსტებულ ხეს პოულობს და ანადგურებს,“ – ამბობს ჯუმბერ აბულაძე.

მისივე თქმით, ნაძვნარებში სააგენტო 2014 წლიდან ათავსებს მწერსაჭერ ფერომონებს, რომლებიც მავნებლებს იჭერს და ანადგურებს. კითხვაზე, უკავშირდება თუ არა ხეების ხმობა შუახევი ჰესის მშენებლობას, ჯუმბერ აბულაძე ამბობს, რომ არა.

„უარყოფითი და არასწორი აზრია გავრცელებული, იმიტომ, რომ ბორჯომის ხეობაშიც იგივე მდგომარეობაა, შეიძლება ითქვას, უარესიც. კონკრეტულად  აჭარაში, ავიღოთ ნენია, ბუთურაული და ის მხარე, მდინარის გაღმა მხარე, სადაც საერთოდ არ არის გვირაბი, იქაც ხმება წიწვოვანი ხეები.  სოფელ ბუთურაულის თავზე მასობრივად ერთ მონაკვეთში ცხრაასამდე ძირი აღვრიცხეთ, სრულად რომ გახმა.  საერთოდ, შორსაა ჰესის გვირაბთან. ამიტომ ეს არასწორი აზრია. დაემთხვა ისე, რომ სადაც ჰესია, იქ ხმება, მაგრამ მარტო იმ ზოლში არ ხმება, სხვაგანაც ხმება“.

საქართველოს ფინანსთა სამინისტროს საგამოძიებო სამსახურის ცნობით, გატარებული ოპერატიულ – სამძებრო ღონისძიებებისა და საგამოძიებო მოქმედებების შედეგად, ყალბი აქციზური მარკების გასაღების ფაქტზე, ერთი პირი დააკავეს.

გამოძიებით დადგინდა, რომ ბრალდებულმა აჭარის რეგიონში გაასაღა სიგარეტის კოლოფების ნიშანდებისათვის განკუთვნილი ყალბი აქციზური მარკები.

საქმეზე გრძელდება გამოძიება საქართველოს სისხლის სამართლის კოდექსის მე-200 პრიმა მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 2-დან 4 წლამდე ვადით.

ისინი ერთჯერადად 1-1.5 ტონა ტვირთს ეზიდებიან – მათ ამ სიმძიმით დატვირთული ურიკები ხან 30-ჯერ გადააქვთ ყოველდღიურად, ხან ათჯერ და თუ არ გაუმართლათ – ერთხელ. ამის მიუხედავად, უმუშევრობას ეს ყოფა მაინც ურჩევნიათ – იმიტომ, რომ მხოლოდ ასე შეუძლიათ როგორც საკუთარი, ისე ოჯახის წევრების ფიზიკური გადარჩენა. ქართული კანონმდებლობით ეს ადამიანებიც დასაქმებულებად მიიჩნევიან.

2017 წელს საქართველოში უმუშევრობის დონე 12.7% იყო. საქსტატის მონაცემებით, წლების მანძილზე ეს მაჩვენებელი კლებულობს. თუმცა, აქვე აღსანიშნავია, რომ საქართველოში დასაქმებულებს შორის, ტრადიციულად, ჭარბობს თვითდასაქმებულთა წილი. სწორედ ამ ჯგუფს მიეკუთვნებიან ბაზარში ურიკებით ტვირთის გადამზიდავებიც. ისინი მცირედი ანაზღაურების სანაცვლოდ, დილის ხუთი საათიდან შუადღემდე, ბაზრის ტერიტორიაზე მძიმე ტვირთს ეზიდებიან.

41 წლის ემზარ კეკელიძე მეათე წელია ბათუმის ბაზარში ტვირთის გადამზიდად მუშაობს. თავიდან ურიკას ქირაობდა, დღეში ხუთ ლარს იხდიდა, შემდეგ შეიძინა. მუშაობას გამთენიისას ხუთ საათზე იწყებს – “დილას არიან ბითუმად მოვაჭრეები, მაღაზიები, მარკეტები – ყველას სჭირდება მომარაგება, ჩვენ გადაგვაქვს მათთვის ტვირთი. ეს ტვირთი შეიძლება იყოს 1.2 – 1.5 ტონა. ძალიან რთულ პირობებში გვიწევს მუშაობა და ოჯახების შენახვა, ანაზღაურება კი მცირეა. კომუნალური გადასახადების გარდა, დღის განმავლობაში ჭამა ხომ გინდა? გადაადგილების ხარჯი… ასე 10-30 ლარი მრჩება დღეში, მაგრამ აქ მთავარი შრომის სიმძიმეა”, – ამბობს ის.

ემზარი შუახევიდანაა, ოჯახიც იქ ჰყავს. ბათუმში ძმასთან ცხოვრობს. გადატვირთული გრაფიკის გამო ოჯახს იშვიათად ნახულობს. “მთავარი შემომტანი მე ვარ და კიდევ ჩემი მშობლების პენსია. სხვა არანაირი დახმარება, შემოსავალი არ გვაქვს”, – ამბობს ის. – “გრაფიკი გადატვირთულია, მაგრამ ეს იმიტომ, რომ გამომუშავებით ვმუშაობთ, რაც მეტს ვიმუშავებ, მით მეტი ფულია, თორემ აქ არავის უხარია მოწყდეს ოჯახის სითბოს და დილის ხუთ საათზე ბაზარში გამოვიდეს. სახლში ასვლას თვეში ერთხელ ვახერხებ”.

ემზარ კეკელიძე ამბობს, რომ ამ ბაზარში ხშირად ახალგაზრდა ბიჭებიც იწყებენ ტვირთის გადამზიდავებად მუშაობას. მასაც ორი შვილი ჰყავს, 15 და 19 წლის ბიჭები. ისურვებდა, რომ მათ თაობას უკეთესი სამუშაო ადგილები ჰქონდეთ: “მინდა, რომ დაინტერესდეს ჩვენი ხელისუფლება იმით, რომ ახალგაზრდებს, ჩვენს მომავალ თაობას, არ უწევდეს ბაზარში ჩამოსვლა, ურიკაზე მუშაობა ან სხვა მძიმე ფიზიკური შრომა. არის ჩვენს ქვეყანაში იმის საშუალება, რომ იყოს წარმოება, ფაბრიკა-ქარხნები, მაგრამ ყურადღების მომქცევი არავინაა”.

ამ ბაზარში ახალგაზრდა მტვირთავებიც არიან, ზოგიერთმა აქ მუშაობა ბავშვობაში დაიწყო. გიორგი (სახელი შეცვლილია) 19 წლისაა, მან თავის სამსახურზე ღიად საუბარი არ ისურვა, თუმცა გვითხრა, რომ ბაზარში 9 წლის ასაკიდან მუშაობს.

“9 წლის ვიყავი, პირველად ამ ბაზარში რომ შემოვედი. თავიდან დავიწყე ტრაილერების დაცლაზე მუშაობა, ვცლიდით ხახვს, კარტოფილს… ეს ყველაზე მძიმე ტვირთია. შემდეგ დავიწყე ურიკაზე მუშაობა და შემრჩა ეს ურიკა, ახლაც ტვირთის გადამზიდად ვმუშაობ”, – ამბობს ის.

გიორგის სამუშაო დღეც გამთენიისას, ხუთ საათზე იწყება. ერთ გადატანაზე ამ ურიკით ტონა-ორასი ან ტონა-ნახევარი ტვირთი გადააქვს. ამბობს, რომ ანაზღაურება შესაძლოა დღის განმავლობაში საკმარისად მოაგროვოს, თუმცა ეს მაინც ვერ იქნება იმ მძიმე შრომის შესაბამისი, რასაც ის და სხვა გადამზიდავები სწევენ.

63 წლის ტარიელ ლომაძე პროფესიით ქორეოგრაფია, წლების განმავლობაში მუშაობდა ოზურგეთის ქორეოგრაფიულ ანსამბლში, მაგრამ თითქმის 15 წელია ძირითად პროფესიაში შეკვეთები შეუმცირდა, ამიტომ ბაზარში, ტვირთის გადამზიდავის საქმე შეითავსა.

“დღესაც მაქვს საკუთარი აპარატურა, ქორწილებშიც ვუკრავთ, სხვადასხვა დღესასწაულზეც, მაგრამ ვინაიდან სარიტუალო დარბაზები მომრავლდა, მათ კი თავიანთი ბენდი ჰყავთ, საშუალება აღარ იყო, იმ შემოსავლით ოჯახი მერჩინა. იძულებული გავხდი, ხელი მომეკიდა ამ საქმეზე (ტვირთის გადამზიდავი) და ვაკეთებ ამ საქმეს გემრიელად, ტკბილად და კარგად… იმიტომ, რომ ლუკმა პური მივუტანო შვილებსა და შვილიშვილებს სახლში… ზაფხულობით დავდივართ ურეკში, იქაური კაფე-ბარები გვიწვევენ ხოლმე როცა მუსიკოსები სჭირდებათ, მაგრამ ეს სეზონურია”, – ამბობს ტარიელი.

ტარიელ ლომაძის ოჯახში შვიდნი არიან, აქედან სამი ბავშვია. უფროსი შვილიშვილი ანამარია – 7 წლის ხდება – “უკვე ბაბუას ხელოვნებას მიჰყვება, თან მღერის, თან ცეკვავს, პატარაა ისე ჯერ… საბა ხუთი წლისაა, ლუკა – სამის”.

ტარიელ ლომაძის სამუშაო დღეც გათენებისთანავე იწყება და შუაღამემდე გრძელდება, მაგრამ მაინც კმაყოფილია. “დილას ხუთ საათზე გამოვდივარ სამუშაოდ. 11 საათამდე დატვირთული მუშაობაა. საბითუმო მოვაჭრეები არიან ამ დროს, შემდეგ უფრო მცირდება ხალხის რაოდენობა… ვამარაგებთ მაღაზიებს, ხალხს, ეს “ობტავოი” ბაზარია, იტვირთება ჩვენი ურიკა და გადაგვაქვს გარკვეულ მანძილზე, ანაზღაურება – კაპიკები. ხან 15 ლარი მრჩება დღის განმავლობაში, ხან 20-30, მაგრამ გააჩნია, სად მიგაქვს, რა მიგაქვს… რთულია, მაგრამ მე კმაყოფილი ვარ, იმიტომ, რომ სულ არაფერს – მირჩევნია. სულ სახლში რომ დავჯდე, ერთ თეთრსაც არ ჩამოგიგდებს არავინ ეზოში, არც ერთი მთავრობა და არც მეორე” – ყვება ტარიელი.

 

See more

 

 

ახალი ბულვარის ბოლოს, გამწმენდ ნაგებობასთან ახლოს, მდინარე ჭოროხის ნაპირის სამშენებლო მასალებით დანაგვიანების ამსახველი ფოტოები „ბათუმელებს“ მოქალაქემ მოაწოდა.

ფოტომასალაზე ჩანს, რომ ცენტრალურ გზასთან ახლოს, მდინარეში სამშენებლო და საყოფაცხოვრებო ნარჩენებია გადაყრილი. მოქალაქის თქმით, როგორც ჩანს, სანაპიროზე დიდი სატვირთო მანქანებიდან ცლიან სამშენებლო ნაგავს, რაზეც ჩამტვრეული ლუქი და ამოვარდნილი ბორდიურიც მიუთითებს.

ბათუმში სისუფთავის მონიტორინგზე „სანდასუფთავების“ მონიტორინგის და ზედამხედველობის სამსახური მუშაობს. „ბათუმელები“ მერიის  „სანდასუფთავების“ მონიტორინგის და ზედამხედველობის სამსახურის უფროსს შოთა თოდაძეს ესაუბრა, რომელიც ამბობს, რომ მათ გარემოს დანაგვიანებაზე რეაგირება იმ შემთხვევაში შეუძლიათ, თუ დამნაგვიანებელი იდენტიფიცირებულია.

„თუ ვერ დავადგინეთ ვინ დაყარა, ვის დავუწეროთ ჯარიმა?  დაზუსტებით თუ ვინმემ არ დაადო ხელი, არ ვიცით, ისევ ვერ დავაჯარიმებთ. იცით რამდენი მასეთი ფოტო გვაქვს და რამდენი უკანონო ნაგავსაყრელია? რამდენი ფაქტზე დავიჭირე, ჯარიმა დავუწერე, მაგრამ სასამართლოში გამისაჩივრეს,“ – გვითხრა მან.

გარემოს დანაგვიანებაზე ჯარიმა 200 ლარიდან იწყება. „გააჩნია, რა რაოდენობის ნაგავი დაყარა,“ – ამბობს შოთა თოდაძე.

მისივე თქმით, სანდასუფთავების სამსახურს არ აქვს იმის რესურსი, რომ გარემოს დანაგვიანებაზე ხშირი მონიტორინგი აწარმოოს. „საზოგადოების მენტალობის ბრალია ეს. როცა დაინახავენ, რომ ჩაყარა ვიღაცამ ნაგავი, უნდა მოკიდონ ხელი ტელეფონს და დაგვირეკონ,“ – ამბობს თოდაძე.

მიხაელ როთი, გერმანიის სახელმწიფო მინისტრი ევროპის საკითხებში: 

„რუსეთი რჩება ჩვენი მეზობელი და შესაბამისად, ჩვენი დიდი ინტერესია, რომ რუსეთი ასრულებდეს კონსტრუქციულ როლს გლობალურ დონეზე სხვადასხვა კონფლიქტში და ასე შემდეგ, მაგრამ აღმოსავლეთ ევროპა არ არის პუტინის ბაღჩა.

მეამაყება, რომ აღმოსავლეთ ევროპის ქვეყნებს სურვილი აქვთ, გაიზიარონ ჩვენი ღირებულებები. და თუ ადამიანები გადიან ქუჩაში, ითხოვენ დემოკრატიას, სასამართლო სისტემის დამოუკიდებლობას და ასე შემდეგ, ამას მივესალმები. სომხეთშიც იგივე პროცესები იყო, ახლა საქართველოშიც მიმდინარეობს ეს პროცესები და მეამაყება ეს.

მაგრამ არცერთმა ქვეყანამ არ უნდა მიიღოს გადაწყვეტილება და არ უნდა გააკეთოს არჩევანი ევროკავშირსა და მეზობელ ქვეყანას შორის. ეს არის მნიშვნელოვანი, ჩემი აზრით. გეოპოლიტიკური ინტერესები არის ძალიან მნიშვნელოვანი, მაგრამ ზოგჯერ ეს ცოტა ცინიკურადაც ჟღერს.

ევროკავშირი ვალდებულია მკაფიოდ განაცხადოს, რომ ჩვენ გვაინტერესებს ძლიერი, სანდო ურთიერთობები რუსეთთან, მაგრამ არავითარ შემთხვევაში აღმოსავლეთ ევროპამ არ უნდა გადაიხადოს ამის საფასური, არასოდეს. ეს ჩემი პირადი აზრია. მე ვიცი, რომ ეს არის ძალიან სენსიტიური საკითხი ევროკავშირში, მაგრამ საბოლოო ჯამში, ევროკავშირისათვის ერთადერთი შანსი, გადარჩეს პოლიტიკურად, არის ის, რომ ერთხმად გამოვაცხადოთ ჩვენი პოზიცია, გვქონდეს ერთიანი მიდგომა ყველაფერზე, რუსეთის ჩათვლით“.

“ევროპაში ყველას უნდა, რომ გაჩნდეს ინტერესი და სურვილი, დაინახოს, როგორ ვითარდებიან ჩვენი პარტნიორი ქვეყნები აღმოსავლეთში,” – უთხრა ჟურნალისტებს ვაზილ ჰუდაკმა. იგი ევროპის საინვესტიციო ბანკის ვიცე-პრეზიდენტია და ბათუმის საერთაშორისო კონფერენციას ესწრება.

კონფერენციის ფარგლებში ვაზილ ჰუდაკმა და საქართველოს საგარეო საქმეთა მინისტრმა, დავით ზალკალიანმა დღეს, 11 ივლისს, ხელი მოაწერეს ურთიერთგაგების მემორანდუმს, რომლის მიხედვითაც ევროპის საინვესტიციო ბანკი მომდევნო ხუთი წლის განმავლობაში საქართველოში საჯარო სექტორის განვითარების პროექტებს დააფინანსებს. ამ დროისთვის უცნობია კონკრეტულად რა კუთხით მიიღებს საქართველო ამ დაფინანსებას.

საინვესტიციო ბანკის ვიცე-პრეზიდენტმა საქართველოსა და აღმოსავლეთ ევროპის კიდევ 5 ქვეყანაში ბოლო 10 წლის განმავლობაში ამ ბანკის მიერ დახარჯულ 8.8 მილიარდი ევროს ეფექტურობაზეც ისაუბრა.

“ბოლო 10 წლის განმავლობაში ჩვენ განვახორციელეთ 8.8 მლრდ ევროს ინვესტიცია აღმოსავლეთ ევროპის ქვეყნებში, რომელიც მოხმარდა 100-მდე პროექტის დაფინანსებას, როგორც საზოგადოებრივი ინფრასტრუქტურის გაძლიერების, ასევე კერძო ბიზნესის განვითარების კუთხით. ჩვენ უკვე ვხედავთ ამ პროექტების პოზიტიურ შედეგებს რეგიონში ადამიანთა ცხოვრების სტანდარტების ამაღლებისა და მათი ევროკავშირთან დაახლოების თვალსაზრისით. ვიმედოვნებთ, რომ მომავალში კიდევ უფრო მეტ შედეგებს ვიხილავთ,” – აღნიშნა ევროპის საინვესტიციო ბანკის ვიცე-პრეზიდენტმა, ვაზილ ჰუდაკმა.

ამ ბანკის მიერ გამოყოფილი დახმარების ფარგლებში, მაგალითად, ამ დრომდე ხორციელდება ქუთაისის წყლის გასუფთავების მექანიკური ქარხნის მშენებლობა, ასევე რიკოთზე შემოვლითი გზის, სამტრედია-გრიგოლეთის და გრიგოლეთი-ჩოლოქის გზების მოწყობა.

ევროპის საინვესტიციო ბანკი აღმოსავლეთ ევროპის ქვეყნებში ამ პროექტების შედეგად 370 ათასი სამუშაო ადგილის შექმნას ელის.

მთავარი ფოტო: ვაზილ ჰუდაკი

______

“ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება ბათუმში. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

 

 

საქართველოს საპატრიარქოს პრესსამსახურის უფროსმა, დეკანოზმა ანდრია ჯაღმაიძემ, დღეს ბათუმში, საერთაშორისო კონფერენციაზე – „საქართველოს ევროპული გზა“, რომელშიც ევროკავშირის ქვეყნების ლიდერები მონაწილეობენ, კითხვა დასვა იმის შესახებ, ავალდებულებს თუ არა ევროკავშირი საქართველოს ლგბტქ პრაიდის ჩატარებას, რაზეც პანელის მონაწილე ქვეყნების წარმომადგენლებმა მას უპასუხეს, რომ აქ საუბარია ადამიანის ფუნდამენტურ უფლებაზე.

„ჩვენ ვხედავთ ქართული საზოგადოების პოლარიზაციას ლგბტქ პრაიდის საკითხზე.  ჩვენ ვამბობთ, რომ საქართველოში ლგბტქ ხალხის წინააღმდეგ არ არსებობს აგრესია მანამ, სანამ ისინი საკუთარი ცხოვრების წესის დემონსტრირებას არ იწყებენ. ჩვენ გვაინტერესებს, იქნება თუ არა კატეგორიული მოთხოვნა, რომ საქართველოს ქუჩებში მსგავსი პრაიდები ჩატარდეს?“- განაცხადა სასულიერო  პირმა.

კერსტინ ლუნდგრენმა, რომელიც შვედეთის პარლამენტის (რიკსდაგის) ვიცე-სპიკერია, სასულიერო პირს ასე უპასუხა: „ჩვენთვის ეს არის ადამიანის თავისუფლების ფუნდამენტურ უფლებებთან დაკავშირებული საკითხი და იქნება ეს რელიგიური თუ ეთნიკური, პოლიტიკური თუ სექსუალური უმცირესობების შესახებ საკითხები, ეს არის ადამიანის უფლებებთან დაკავშირებული. ეს ყველაფერი გულისხმობს, თუ როგორ უნდა შევქმნათ დამთმენი, ტოლერანტული საზოგადოება, აი, ეს არის მთავარი მიზანი, ყველა ამ პრინციპის გათვალისწინებით“.

აღნიშნულ კითხვას გერმანიის სახელმწიფო მინისტრმა ევროპის საკითხებში მიხაელ როთიმაც უპასუხა: მე მირჩევნია გულღია და გულწრფელი საუბარი. მე რელიგიური ადამიანი ვარ და ჩემი ეკლესიის ერთგული ვარ და მესმის, რომ არის გარკვეული გაუგებრობები   და ეს გაუგებრობები რუსი პოლიტიკოსებისგანაც მომდინარეობს. ადამიანის ფუნდამენტური უფლებები არასდროს არ უნდა განვასხვავოთ.

ეკლესიისთვისაც უმნიშვნელოვანესია, რომ გავაძლიეროთ საზოგადოებები, რომლებიც მუდმივად პატივისცემას, ტოლერანტობას გამოხატავს უმცირესობების მიმართ. არ არსებობს გასასამართლებელი საბუთი არც რელიგიური წრეების წარმომადგენლებისგან, რომ დავადანაშაულოთ სექსუალური უმცირესობები. ეს არის სრულიად და ტოტალურად მიუღებელი“.

პანელის მონაწილე კიდევ ერთმა წევრმა,  სომხეთის საგარეო საქმეთა მინისტრმა ზოჰრაბ მნაცაკიანიანმაც ისაუბრა სექსუალურ უმცირესობათა უფლებებზე: „დღეს ჩვენ ვერ გავექცევით ამ საკითხებზე მსჯელობას. ჩვენ ვცდილობთ ვიპოვოთ ის ახალი მეთოდები, რომლის მეშვეობითაც გადავალთ განზოგადებული დებატებიდან კონკრეტულზე. ამიტომ გვჭირდება ჩვენ ექსპერტული ცოდნის დაგროვება სამოქალაქო საზოგადოებაში, რომ შემდეგ ეს საყოველთაო ღირებულებები დავამკვიდროთ.

ჩვენ უნდა შევახსენოთ ჩვენს თავს, რომ ვსაუბრობთ ადამიანის უფლებებზე, ჩვენ ვსაუბრობთ იმ ღირებულებაზე, რომ ადამიანი ხარ, ჩვენს შემთხვევაშიც იყო გარკვეული დისკრიმინაციის ფაქტები, როცა ადამიანებს სდევნიდნენ რწმენის გამო და მე მიმაჩნია, რომ არანაირი საფუძველი არ უნდა გააჩნდეს დისკრიმინაციის რომელიმე ფორმას.

არ აქვს მნიშვნელობა, ჩვენ დასავლური აზროვნება გვაქვს თუ აღმოსავლური. როცა სომხეთი შევიდა ევროსაბჭოში, ჩვენ მაშინ განვიხილეთ ეს საკითხი სერიოზულად. თუ ვინმე ტრადიციული შეხედულებით მიიჩნევს, რომ დისკრიმინაცია მისაღებია, რა თქმა უნდა, ჩვენ ეს უნდა დავგმოთ და ეროვნული დებატის დონეზე უნდა ავიყვანოთ ამ თემებზე მსჯელობა. ფუნდამენტურ საკითხებზე უნდა გვქოდეს ერთიანი შეთანხმება.

რატომ არ ვსაუბრობთ სხვა ჯგუფებზე და მაინც და მაინც აქცენტს ვაკეთებთ ლგბტქ ჯგუფებზე? ჩვენ ყველას ერთნაირად უნდა ველაპარაკოთ, სადაც კი ვხედავთ, რომ ადამიანის ფუნდამენტური უფლებები ირღვევა.“

დღეს, 11 ივლისს, ბათუმში გაიხსნა საერთაშორისო კონფერენცია „საქართველოს ევროპული გზა“, რომელსაც ევროსაბჭოს პრეზიდენტი დონალდ ტუსკი და სხვა ოფიციალური პირები ესწრებიან.

____

“ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება ბათუმში. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

მიხაელ როთმა, გერმანიის სახელმწიფო მინისტრმა ევროპის საკითხებში, დღეს, 11 ივლისს, ბათუმში მიმდინარე საერთაშორისო კონფერენციაზე საქართველოს ევროპასთან ინტეგრაციის საქმეში სამოქალაქო საზოგადოების ჩართულობას გაუსვა ხაზი. მან აღნიშნა, რომ იგი შეხვდა სამოქალაქო საზოგადოების წარმომადგენლებს და ისინი გაწბილებულნი არიან იმით, რაც დღეს ხდება საქართველოში.

„ევროკავშირი არა მხოლოდ ერთიანი ბაზარია, ეკონომიკური პროექტი, არამედ ეს გახლავთ თემი საერთო ღირებულებებისა და ეს ღირებულებები ყველას ეხება. მშვიდობა, სტაბილურობა, დემოკრატია – ჩვენი საერთო ინტერესია, ეს ჩვენი ახალგაზრდობის ინტერესიც არის და ამიტომაც შეიქმნა აღმოსავლეთის პარტნიორობა. ეს არ არის რაღაც მეორეხარისხოვანი შეთავაზება ჩვენი პარტნიორებისადმი, ეს არის უფრო რეალისტური მიდგომა სხვადასხვა საკითხისადმი.

ძალიან ბევრი ადამიანი ევროკავშირში დაღლილია, მათაც გადაიარეს ბევრი კონფლიქტი, კრიზისები, ბრექსიტი… მიგრაცია ერთ-ერთი დიდი პრობლემაა, ნაციონალიზმისა და პოპულიზმის ზრდა… ეს ყველაფერი ძალიან დიდ ზეგავლენას ახდენს ევროპაზე, ევროკავშირზე და ამიტომაც ჩვენ უნდა ვიფიქროთ გაფართოებაზე, პროცესების დაჩქარებაზე.

შეიძლება ჩვენ არ გვიმსჯელია ჯერ სამოქალაქო საზოგადოების როლზე ამ ყველაფერში, მაგრამ ყველა ეს ვალდებულება არ ეკუთვნის მხოლოდ პოლიტიკურ ელიტას, მმართველ პარტიებს და მთავრობებს, არა, აუცილებელია, რომ სამოქალაქო საზოგადოებაც იყოს ჩართული.

მე შევხვდი აქ სამოქალაქო საზოგადოების წარმომადგენლებს და ისინი ძალიან გაწბილებულნი არიან იმით, რაც ხდება ახლა საქართველოში, გაწბილებულნი არიან ამ მოვლენებით საქართველოში და ევროკავშირშიც, მინდა გითხრათ.

დგება ძალიან სერიოზული საკითხი – არის თუ არა იმის შესაძლებლობა, რომ გავაძლიეროთ სამოქალაქო საზოგადოება აღმოსავლეთ პარტნიორობის საშუალებით?! შესაძლებელია თუ არა გავაგებინოთ ყველას, რომ კი, შესაძლებელია, ჩვენ სხვადასხვა ვარიანტი გვაქვს. ერთი ვარიანტია რეფორმების დაჩქარება აღმოსავლეთ ევროპაში, აქ, საქართველოში და მეორე ვარიანტია – მთელი ეს ახალგაზრდობა ტოვებს ამ ქვეყანას და ჩამოდის ევროკავშირში. ამ დილით შევხვდი ერთ-ერთ სტაჟიორს, რომელიც მუშაობს საგარეო საქმეთა სამინისტროში და მან მითხრა, რომ ყველა მისი მეგობარი ცხოვრობს, მუშაობს და სწავლობს გერმანიაში. ეს არის ჩვენთვის ძალიან კარგი, მაგრამ ასეთი ინტელექტის გადინება ძალიან ცუდია ამ მშვენიერი ქვეყნისათვის,“ – განაცხადა მიხაელ როთმა.

„მე ახლა წავიკითხავ ქართველი კლასიკოსის, ვაჟა-ფშაველას ციტატას “ყველა პატრიოტი კოსმოპოლიტია და პირიქით, ყველა კოსმოპოლიტი პატრიოტია. კოსმოპოლიტები თავიანთ ქვეყანას ემსახურებიან და ცდილობენ, აამაღლონ ქვეყნის ინტელექტუალური და მორალური მდგომარეობა“, – ასე დაიწყო დღეს თავისი გამოსვლა დონალდ ტუსკიმ, ევროსაბჭოს პრეზიდენტმა ბათუმის საერთაშორისო კონფერენციაზე.

ამის საპასუხოდ და პროტესტის ნიშნად ბათუმში საინიციატივო ჯგუფმა – „ბათუმი თავისუფლებისთვის“, რომელიც ანტისაოკუპაციო აქციას მართავს და შს მინისტრის, გახარიას გადადგომას ითხოვს, ვაჟა-ფშაველას ბიუსტს თვალი აუხვია წითელი ლენტით. ჯგუფმა თავის ფეისბუქ გვერდზე დონალდ ტუსკისადმი მიმართვის მოკლე ტექსტიც გამოაქვეყნა:

„ბატონო ტუსკი,

– საქართველოს მთავრობა არ ადგას ევროპულ გზას!

– ის სამ კვირაზე მეტია, უგუბელყოფს მოქალაქეთა სამართლიან მოთხოვნას შინაგან საქმეთა მინისტრის გადადგომაზე!

– ის ესვრის მშვიდობიან დემონსტრანტებს რეზინის ტყვიებს, ასახიჩრებს ახალგაზრდებს და სამუდამოდ ცვლის მათ ცხოვრებას!

– საქართველოს მთავრობას არაფერი აქვს საერთო ვაჟა-ფშაველასთან, შოთა რუსთაველთან, სხვა ქართველ, პოლონელ, ფრანგ, გერმანელ მწერლებთან, განმანათლებლებთან!

– საქართველოს მთავრობას არ ესმის საკუთარი მოქალაქეების!

გახარია უნდა გადადგეს!“

მიმდინარე კონფერენციის პარალელურად დღეს ბათუმში რამდენიმე საპროტესტო აქციაც გაიმართა გახარიას გადადგომის მოთხოვნით.

______

“ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება ბათუმში. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

ამავე თემაზე: საპროტესტო აქცია

ბათუმის კონფერენციას წელს პირველად ევროსაბჭოს პრეზიდენტი დაესწრება

See more

 

“შეკითხვები აქვთ არამხოლოდ ჩვენს პარტნიორებს და პოლიტიკურ მოკავშირეებს, არამედ პროკურატურასაც,” – ასე გვიპასუხა “ქართული ოცნების” ერთ-ერთმა ლიდერმა და პარლამენტის წევრმა, გია ვოლსკიმ კითხვაზე: რა უპასუხეთ ევროპელ პარტნიორებს, როცა მათ სასტუმროსთან მიმდინარე ანტისაოკუპაციო და გახარიას საწინააღმდეგო აქციის შესახებ გკითხეს?

ბათუმში დღეს, 11 ივლისს, საერთაშორისო კონფერენცია “ევროპული გზა” მიმდინარეობს. კონფერენციის პარალელურად აქტივისტები საპროტესტო აქციას მართავენ. მთავარი გზავნილია: “გახარია წადი”.

გია ვოლსკის თქმით, ტრიბუნის მიღმა, კულუარებშიც იკითხეს ევროპელმა პარტნიორებმა საპროტესტო აქციის შესახებ, თუმცა მათ არ აქვთ კითხვები საქართველოს საგარეო კურსთან დაკავშირებით.

“თქვენ ძალიან ცუდი წარმოდგენა გაქვთ ჩვენს პარტნიორებზე და მათი ინფორმირებულობის ხარისხზე. ისინი ითვალისწინებენ ჩვენი და ჩვენი ოპონენტების ინფორმაციას, მაგრამ შეუძლიათ ობიექტური მსჯელობა. დღევანდელი კონფერენციაც ამის გამოხატულებაა. აქციის დაშლაზეც მათ აქვთ სიღრმისეული ინფორმაცია,” – გვითხრა გია ვოლსკიმ.

პარლამენტის წევრი განმარტავს, რომ ევროპელი პარტნიორების დარწმუნება საქართველოს ხელისუფლებამ შეძლო იმაში, რომ 21 ივნისს მინისტრმა გახარიამ “შეტევა მოიგერია” და “ეს არ იყო სახელმწიფოს მხრიდან ხალხის მიმართ დამოკიდებულება”.

“რაც მოხდა 20 ივნისს, ეს არ არის პოლიტიკის დონეზე მიღებული გადაწყვეტილება… გავრილოვის თემით სპეკულირება უადგილოა,”- აღნიშნა გია ვოლსკიმ “ბათუმელებთან”.

____

ბათუმში საერთაშორისო კონფერენცია „ევროპული გზა“ მიმდინარეობს. “ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

საპროტესტო აქცია სასტუმროსთან, სადაც მიმდინარეობს კონფერენცია – საქართველოს ევროპული გზა.

“გახარია წადი” – ბათუმში ევროპული გზის კონფერენციის პარალელურად აქცია მიმდინარეობს

See more

 

 

საქართველოს ეკონომიკისა და მდგრადი განვითარების მინისტრი ნათია თურნავა აცხადებს, რომ საქართველოში 20 ივნისის შემდგომ განვითარებული მოვლენები იწვევს ტურისტების შემცირებას არა მარტო რუსეთიდან, არამედ სხვა ქვეყნებიდანაც.

„ჩვენ არ ვართ განსაკუთრებულად  დამოკიდებული რუსულ ბაზარზე და რუსულ ტურიზმზე, მაგრამ ეს მიმართულება მაინც ძალიან მნიშვნელოვანია ჩვენი ტურისტული ინდუსტრიისთვის. არ უნდა დაგვავიწყდეს ის საოჯახო სასტუმროები, ის რიგითი ადამიანები, ვინც ელოდებოდნენ ამ ტურისტებს და დღეს სწორედ ამ პრობლემას ვხედავთ.

ტურისტების ნაკლებობა ნამდვილად იგრძნობა, ვიცით, რომ ძალიან ბევრი ჯავშანი გაუქმდა და რა თქმა უნდა, ვისურვებდით, რომ უფრო მეტად იყოს დატვირთული ჩვენი კურორტები“, – განაცხადა თურნავამ.

მინისტრმა ასევე ისაუბრა იმ ზარალზეც, რაც საქართველომ შეიძლება მიიღოს რუსეთიდან ტურისტების შემოსვლის შემცირების შედეგად:

„რომ დაწესებულიყო ემბარგო [რუსეთის დუმა განიხილავდა საქართველოს პროდუქციის აკრძალვას რუსულ ბაზარზე, რასაც პუტინმა მხარი არ დაუჭირა], რაც არ განხორციელდა საბედნიეროდ, მთლიანი ზარალი მიაღწევდა 4 მილიარდ ლარს.

ეს არის, პირველ რიგში, 750 მილიონი დოლარი, ანუ 2 მილიარდ ლარზე მეტი შემოსავალი, რაც უნდა მიგვეღო ჩვენ წლის ბოლომდე რუსი ტურისტების ჩამოსვლის შედეგად; ეს არის 600 მილიონი დოლარის ფულადი გადმორიცხვები, რაც შარშან შემოვიდა და დაახლოებით იმავეს ველოდებით წელსაც და ეს არის ჩვენი ექსპორტი, ღვინის, სასოფლო-სამეურნეო პროდუქციისა და მინერალური წყლების, რაც აღემატება 300 მილიონ დოლარს წლიურად.

ამ წუთას გამოწვევად რჩება ტურისტული სექტორი, რადგან ფრენები არის შეწყვეტილი და ჩვენ ჯერაც არ ვიცით საბოლოო ჯამში როგორ აისახება ეს ტურისტული ნაკადების შემცირებაზე არა მხოლოდ რუსეთიდან, რადგან კითხვის ნიშნის ქვეშ დადგა უსაფრთხოება ჩვენი ქვეყნის, როგორც ტურისტული ქვეყნის და, რა თქმა უნდა, კითხვები გაჩნდა სხვა ქვეყნების ტურისტების მხრიდანაც. ჩვენთვის ღირებულია თითოეული ტურისტი, ვინც ჩვენთან ჩამოდის და თითოეული საექსპორტო ბაზარი. ასევე ღირებულია თითოეული ფერმერი, რომელიც ვერ გაგზავნიდა თავის მოსავალს საგარეო ბაზარზე, მათ შორის რუსეთშიც“, – განაცხადა ნათია თურნავამ დღეს, 11 ივლისს, ბათუმში, საერთაშორისო კონფერენციაზე ჟურნალისტებთან.

ბათუმში, სასტუმრო „შერატონის“ წინ, სადაც საერთაშორისო კონფერენცია მიმდინარეობს, ორგანიზაცია „ალტერნატივას“, ენმ-ს წარმომადგენლები და სამოქალაქო აქტივისტები საპროტესტო აქციას მართავენ.

„თქვენ ხართ პრორუსი მთავრობა, პრორუსი ხელისუფლება, ამიტომ თქვენ არ უნდა ისხდეთ ევროპული, დემოკრატიული განვითარებული ხალხის გვერდით, თქვენ არ გიყვართ საქართველო, რადგან ხელს უწყობთ რუსეთის ინტერესების გატარებას საქართველოში,“ – ასე მიმართავენ საქართველოს ხელისუფლების წარმომადგენლებს აქციის მონაწილეები, რომლებიც ამ წუთებში [13:30] „შერატონის“ წინ, ვერანდაზე იმყოფებიან.

See more

„თქვენ ხართ პუტინისტები, მოღალატეები და არაფერს აკეთებთ საქართველოს დეოკუპაციისთვის და იმის მაგივრად, რომ ახალგაზრდების თვალების დამთხრელი გახარია გადაგეყენებინათ, ხვალ კონფერენციაზე აპირებს გამოსვლას,“ – ამბობს ენმ-ს წარმომადგენელი ბონდო თედორაძე.

აქტივისტები საქართველოს მთავრობის წევრებს საყვედურობენ იმაზე, რომ ისინი არ გამოეხმაურენ პუტინის  განცხადებას, როცა მან საქართველო ოკუპაციასა და გენოციდში დაადანაშაულა. 

„თქვენ ვერ გაბედეთ განცხადების გაკეთებაც კი და თქვენ დაისჯებით ამის გამო. ჩვენ, ახალგაზრდებს არ გვინდა თქვენნაირი მთავრობა და დროზე ჩამოეცალეთ სისტემას,“- აცხადებენ აქტივისტები.

დღეს, 11 ივლისს, სასტუმრო „შერატონში“ საერთაშორისო კონფერენცია „საქართველოს ევროპული გზა“ გაიხსნა, რომელსაც ევროსაბჭოს პრეზიდენტი დონალდ ტუსკიც ესწრება. კონფერენციაზე იმყოფება საქართველოს პრეზიდენტი, პრემიერ-მინისტრი და მთავრობის სხვა წევრები. საპროტესტო აქცია დილით, კონფერენციის გახსნის წინაც გაიმართა.

ამავე თემაზე: 

ბათუმის კონფერენციას წელს პირველად ევროსაბჭოს პრეზიდენტი დაესწრება

See more

 

პაველ ფიშერმა, ჩეხეთის რესპუბლიკის სენატის საგარეო საქმეთა, თავდაცვისა და უსაფრთხოების კომიტეტის თავმჯდომარემ ბათუმის საერთაშორისო კონფერენციის სესიაზე – „სიცოცხლე ასოცირების შემდეგ: უფრო მაღალი მიზნის ძიებაში“ განაცხადა, რომ ევროკავშირი გაფართოებისთვის მზად არ არის, თუმცა საქართველოს სჭირდება მეტი მხარდაჭერა.

„მე ვისაუბრებ ჩეხეთის სენატის სახელით, რადგან ჩეხეთის სენატში საქართველოს ბევრი კარგი მეგობარი ჰყავს.

სოლიდარობა და ნდობა.

ჯერ სოლიდარობას შევეხები. მიმაჩნია, რომ ეს საკითხი, რომელზეც მიმდინარეობდა მსჯელობა ევროპის საბჭოში, რამაც გაუხსნა კარი რუსეთს უკრაინაში შეჭრის შემდეგ, ჩემი აზრით ეს იყო ძალიან დიდი შეცდომა. ბევრი ქვეყანა, ისეთი, როგორიც უკრაინა და საქართველოა, ეწინააღმდეგებოდა ამ გადაწყვეტილებას. შესაბამისად, სოლიდარობა, რომელიც უნდა გამოვიჩინოთ ევროპის საბჭოში, არის ის, რომ ჩვენ, წევრმა ქვეყნებმა, ერთად უნდა ვიმოქმედოთ, ხელი უნდა შევუწყოთ სამართლის უზენაესობის დამკვიდრებას და ჩვენ სოლიდარობა ვერ გამოვიჩინეთ. ჩეხეთი, უკრაინა და საქართველო სულ სხვა მოსაზრებისა იყვნენ და ძალიან დიდი შეცდომა იყო რუსეთის ისევ დაბრუნება ევროპის საბჭოში.

ახლა მეორე საკითხი, ნდობა.

იმისათვის, რომ ვენდოთ ერთმანეთს, აუცილებლად უნდა ვიყოთ გულახდილები. არ დავმალოთ რაღაცები, როგორც წევრმა ქვეყნებმა. ჩვენ უნდა ვაღიაროთ, რომ ევროკავშირის ფარგლებში და ევროსტრუქტურებში ჩვენ არ ვართ მზად გაფართოებისათვის და საქართველოს მიღებისათვის. მაგრამ ამავე დროს ჩვენ უნდა ავიღოთ ჩვენს თავზე ვალდებულება, რომ უფრო მეტი რამ გავაკეთოთ, უფრო მეტი რამ შევთავაზოთ საქართველოს და ეს მეტი შეიძლება იყოს ბიუჯეტი, თანხები, რომელიც გამოიყოფა სხვადასხვა პროექტისთვის.

შეიძლება გავაკეთოთ უფრო მეტი იმ მხრივ, რომ მოვიწვიოთ საქართველო უფრო მეტ სექტორული თანამშრომლობის ფორმატებში, ან შევქმნათ ერთგვარი სივრცე, სადაც საქართველოს ექნება შესაძლებლობა ელაპარაკოს სხვადასხვა ქვეყანას იმაზე, თუ როგორ შეასრულოს თავისი ვალდებულებები და როგორ დააკმაყოფილოს ევროკავშირში არსებული მოლოდინები, რადგან თუ ნდობაზე ვსაუბრობთ, ძალიან მკაფიოდ უნდა ვიცოდეთ, რა განსხვავებაა მოლოდინებს შორის, რომელიც დღეს არსებობს და იმ გაბედულ მესიჯებს შორის, რომელიც ჩვენ მოვისმინეთ საქართველოს პარლამენტის თავმჯდომარისგან, პრემიერისგან, პრეზიდენტისგან, საგარეო საქმეთა მინისტრისგან. ეს იყო ძალიან მკაფიო გზავნილები და ჩვენ უნდა ვთქვათ, რომ ჩვენ ძალიან ყურადღებით ვისმენთ და ძალიან სერიოზულად უნდა მოვეპყროთ ჩვენს ვალდებულებებს და ამავე დროს უნდა შეიქმნას სივრცე, რაც მისცემს საქართველოს საშუალებას, იმოძრაოს წინ,“ – განაცხადა პაველ ფიშერმა.

პაველ ფიშერი ჩეხი დიპლომატია, იგი 2018 წელს ჩეხეთის პრეზიდენტობის კანდიდატი იყო.

ბათუმის საერთაშორისო კონფერენციაზე – „საქართველოს ევროპული გზა“, რომელიც ბათუმში დღეს, 11 ივლისს, გაიხსნა, გერმანიის ბუნდესტაგის ვიცე-პრეზიდენტმა, კლაუდია როთმა, რუსეთის მიერ საქართველოში გავლებულ მავთულხლართებზე ისაუბრა და რუსეთის პრეზიდენტ ვლადიმერ პუტინს უახლეს ისტორიაზე მიუთითა:

„არ უნდა მოხდეს ისე, რომ ქვეყანამ მიაღწიოს რამე მიზანს, გაჩერდეს და თქვას, რომ კმაყოფილია და მეტი არაფერი სჭირდება. არა, საჭიროა რეფორმების სრულყოფა ამ ქვეყნების ევროკავშირში ინტეგრაციისთვის. როდესაც გორში ჩავედი, როდესაც დავინახე მავთულხლართები, ღობეები, მცოცავი ოკუპაციის რეალობა და აგრესია, ჩემზე ამან ძალიან მძიმე შთაბეჭდილება მოახდინა. თუ ვლადიმერ პუტინი ისტორიაზე საუბრობს, გაიხსენოს, რა მოხდა 1991 წელს, როდესაც განისაზღვრა საზღვრები და ისინი აბსოლუტურად განსხვავდებოდა იმისგან, რაც მოხდა მერე უკრაინაში, სამხრეთ ოსეთში, აფხაზეთში. ჩვენ, როგორც ევროკავშირმა, უნდა შევასრულოთ უფრო აქტიური როლი კონფლიქტების მშვიდობიანი დარეგულირებისთვის. საერთაშორისო სამართლის დარღვევას ვერ იტანს ის ხიდები, რომლებიც ამდენი შრომით აიგო სხვადასხვა ქვეყანას შორის“.

კლაუდია როთმა ოკუპირებული ტერიტორიების გარდა ხაზი გაუსვა საქართველოს ევროპასთან ინტეგრაციის, შავი ზღვის უსაფრთხოებისა და განათლების თემებს:

„დარწმუნებული ვარ, „აღმოსავლეთ პარტნიორობა“ არის წარმატების ისტორია… ჩემთვის კი კიდევ უფრო მეტად მნიშვნელოვანი ის არის, რომ სხვადასხვა ქვეყანას შორის ხიდები აიგო. სწორედ ხიდების აგებაა საჭირო და არა კედლების. ამიტომ ეს მიღწევა ჩემთვის არის ყველაზე მნიშვნელოვანი“.

_____

ბათუმში საერთაშორისო კონფერენცია „ევროპული გზა“ მიმდინარეობს. “ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

ბათუმის საერთაშორისო კონფერენციაზე – „საქართველოს ევროპული გზა“, რომელიც ბათუმში დღეს, 11 ივლისს გაიხსნა, საქართველოს პრემიერ-მინისტრმა, მამუკა ბახტაძემ გამოსვლისას  ხაზი გაუსვა საქართველოს ევროპული ინტეგრაციის, შავი ზღვის უსაფრთხოების, ოკუპირებული ტერიტორიებისა და განათლების თემებს.

„ჩვენი ერთ-ერთი რეფორმა ნამდვილად რევოლუციურია, რეფორმა განათლების სექტორში. ახალი რეფორმით მშპ-ს 6 პროცენტი , ¼ ჩვენი ბიუჯეტისა, განათლების სექტორში იქნება ჩადებული და ასევე, კერძო სექტორის ჩართულობით ორციფრიანი აკუმულირება მოხდება მშპ-ში და განათლება გახდება მძლავრი გამძღოლი ჩვენს ეკონომიკურ სტრუქტურაში. ჩვენ აგვიყვანს ეს იმ სიმაღლეებზე, რომელსაც ვჭვრეტთ ჩვენი მომავალი თაობებისთვის“, – განაცხადა ბახტაძემ.

მან ასევე აღნიშნა, რომ საქართველოს ევროპული არჩევანი არ არის მარტივი საკითხი და „ეს არის ქართველი ხალხის ცივილიზაციაზე და ღირებულებებზე დამყარებული არჩევანი“.

„საქართველოს გააჩნია ორი მტკივნეული გამოწვევა: ოკუპაცია და სიღარიბე, რაც გახდა ბაზა ყველა რეფორმის, რომელსაც ჩვენი მთავრობა წარმოადგენს. მიუხედავად იმ პოზიტიური სინერგიისა, რომელიც შევქმენით საქართველოში, ჩვენი ქვეყანა კვლავ აწყდება ადამიანის უფლებების გამოწვევას ოკუპირებულ ტერიტორიაზე, მილიტარიზაცია სრული ტემპით მიდის და მოსახლეობა ოკუპირებულ ტერიტორიებზე ხუთჯერ, ექვსჯერ შემცირდა.  გაგვაჩნია რუსული უკანონო ბაზები საქართველოს შუაგულში და ყოველდღიურად ვაწყდებით საქართველოს მოქალაქეების მოტაცებისა და მკვლელობის შემთხვევებს… ეს გახლავთ ჩვენი ევროპული ამოცანა, დავაკავშიროთ ერთმანეთთან გამყოფი ხაზებით გაყოფილი ოჯახები. მიუხედავად საერთაშორისო სამართლის იგნორირებისა, ადამიანის უფლებათა ასეთი დარღვევები არ იქნება მოთმენილი.

ჩვენი ამოცანა გახლავთ, მივაწოდოთ ოკუპირებულ ტერიტორიებზე მცხოვრებლებს ჯანდაცვისა და განათლების საშუალებები, ასევე, მივცეთ მიკრობიზნესის წარმოების საშუალება, რათა მათ თავიანთი ოჯახების გამოკვება შეძლონ. ეს გახლავთ ახალი ინიციატივები უკეთესი მომავლისთვის და გვჭირდება ევროპის მხარდაჭერა, რათა აღნიშნული პროექტი განხორციელდეს“, – განაცხადა მამუკა ბახტაძემ.

მან მადლობა გადაუხადა ევროსაბჭოს პრეზიდენტს, დონალდ ტუსკს და ევროპელ კოლეგებს და, ასევე აღნიშნა, რომ საქართველოს ევროპასთან ინტეგრაციის გზაზე ევროპის დახმარება სჭირდება.

“ღირებული პარტნიორობის 10 წელი – განვლილი გზა და პერსპექტივები” – წელს ბათუმში კონფერენცია ამ სლოგანით იმართება.

ევროსაბჭოს პრეზიდენტის გარდა, კონფერენციას ესწრებიან ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

 

„მე ახლა წავიკითხავ ქართველი კლასიკოსის, ვაჟა-ფშაველას ციტატას “ყველა პატრიოტი კოსმოპოლიტია და პირიქით, ყველა კოსმოპოლიტი პატრიოტია. კოსმოპოლიტები თავიანთ ქვეყანას ემსახურებიან და ცდილობენ, აამაღლონ ქვეყნის ინტელექტუალური და მორალური მდგომარეობა“, – ასე დაიწყო დღეს თავისი გამოსვლა დონალდ ტუსკიმ, ევროსაბჭოს პრეზიდენტმა ბათუმის საერთაშორისო კონფერენციაზე.

დონალდ ტუსკიმ ისაუბრა იზოლაციონალიზმის საფრთხეებზე და თქვა, რომ ამ კუთხით ვაჟა-ფშაველას ხედვა, რაც საუკენეზე მეტი ხნის წინ გაჟღერდა, მნიშვნელივანია.

“აი, ეს ხედვა ერთ საუკუნეზე მეტია არსებობს და არის გაფრთხილება იზოლაციონიზმის წინააღმდეგ, რომელიც დღეს ევროპასა და მსოფლიოს აწუხებს. მჯერა, რომ აღმოსავლეთ პარტნიორობამ ხელი შეუწყო ამ უარყოფითი ტენდენციებს და ხელი შეუწყო ურთიერთგაგებას,”- აღნიშნა დონალდ ტუსკიმ.

ბათუმში საერთაშორისო კონფერენცია „ევროპული გზა“ მიმდინარეობს.

______

“ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.

ბათუმის საერთაშორისო კონფერენციაზე – „საქართველოს ევროპული გზა“, რომელიც ბათუმში წელს მეათედ იმართება, ევროსაბჭოს პრეზიდენტმა დონალდ ტუსკიმ თავისი გამოსვლა უკვე დაასრულა. მან თქვა:

„აღმოსავლეთ პარტნიორობა ყოველთვის იყო მშვიდობის ინიციატორი და არასდროს ყოფილა მტრულად განწყობილი რომელიმე ქვეყნის მიმართ. პირიქით მისი მიზანი იყო, რომ შეექმნა სამართლის უზენაესობა. სწორი მართლმსაჯულება, გამართული სისტემები თავის ქვეყნებში. ძალიან ბევრი კითხვა ისმება მის აღმოსავლეთ პარტნიორობის მომავალთან დაკავშირებით და თქვენი ევროკავშირში წევრობა არ არის ერთადერთი შეკითხვა, მაგრამ მოდი ნუ დავმალავთ იმ ფაქტს, რომ ეს შეკითხვა კვლავაც დღის წესრიგში რჩება.

არის ძალიან ბევრი ადამიანი ევროკავშირში, რომელთაც ეჭვი ეპარებათ და მინდა გითხრათ, რომ ასეთი პროცესები, რა თქმა უნდა, ერთ დღეში არ ხდება და ერთიანი გეგმა ყველასთან ვერ გავრცელდება და ერთად ვერ იმუშავებს. აუცილებელია დე-ფაქტო სოლიდარობა ყველა ამ ქვეყანას შორის.

ამავე დროს უნდა ვთქვათ, რომ ერთი რამ ძალიან ნათელი და მკაფიოა. ჩვენ გავაგრძელებთ ინკლუზიურ ინიციატივებს ყველა იმ პარტნიორ ქვეყანასთან, გამოვიყენებთ დიფერენცირებულ მიდგომებს ყველა პარტნიორთან მიმართებაში და ვეცდებით, რომ შევქმნათ ახალი შესაძლებლობები აღმოსავლეთ პარტნიორობის ქვეყნებისთვის. მე შემიძლია ვთქვა, რომ ჩვენ აუცილებლად დავაჩქარებთ პოლიტიკურ ასოციაციებს, ევროკავშირთან და სხვა პარტნიორებთან. პრინციპში, ეს იყო პირველადი ამოცანა, რომელიც ადრე დაისვა და ის დღესაც მოქმედია.

ჩვენ ძალიან დიდი იმედი გვაქვს, რომ ევროკავშირის წევრი ყველა ქვეყანა, როგორც აღმოსავლეთ პარტნიორობის ქვეყნები, ისევე როგორც სამოქალაქო საზოგადოება, აქტიურად იქნებიან ჩართულები ამ პროცესში.

გულით მინდა ერთი რამ გითხრათ, როგორც ევროსაბჭოს პრეზიდენტმა და როგორც პოლონელმა, ჩემთვის საქართველო არამხოლოდ მნიშვნელოვანი პარტნიორია ევროკავშირისთვის, როცა მე ვამბობ სიტყვა საქართველოს, მე ვგულისხმობ თავისუფლებას, მე როცა ვამბობ საქართველოს, მე ვგულისხმობ სიამაყეს, როცა მე ვამბობ საქართველოს, მე ვგულისხმობ მამაცობას. თქვენ პატარა ქვეყანა ხართ, მაგრამ უდიდესი ერი, თქვენ მიაღწიეთ შეუძლებელს, იმიტომ, რომ თქვენ ყველანაირი განსხვავების მიუხედავად, ერთიანი მიზნისთვის გაერთიანდით. თქვენ აშენებთ თავისუფალ, დამოუკიდებელ საქართველოს. თქვენ გააოცეთ ევროპა და მთელი სამყარო. მე მოგმართავთ თქვენ, არ მისცეთ არავის უფლება, რომ დაგყონ, ყოველთვის იყავით ერთიანი, როგორც ერთი დიდი ევროპა.

გაუმარჯოს თავისუფალ და დამოუკიდებელ საქართველოს“.

_____

“ღირებული პარტნიორობის 10 წელი – განვლილი გზა და პერსპექტივები” – წელს კონფერენცია ამ სლოგანით იმართება. ევროსაბჭოს პრეზიდენტის გარდა, კონფერენციას დაესწრებიან: ევროკომისარი ჰუმანიტარული დახმარებისა და კრიზისების მართვის საკითხებში – ქრისტოს სტილიანიდესი, აღმოსავლეთ პარტნიორების ინიციატორი ქვეყნების – პოლონეთის და შვედეთის საგარეო საქმეთა მინისტრები – იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი ეკატერინა ზაჰარიევა, გერმანიის ევროპულ საქმეთა სახელმწიფო მინისტრი მიხაელ როტი და სხვები.