ბათუმის მერია 225 ტელევიზორს ყიდულობს


ბათუმის მერია სოციალური უზრუნველყოფის პროგრამის ფარგლებში 225 ტელევიზორს შეიძენს. ტენდერი შესყიდვაზე მერიამ უკვე გამოაცხადა. შესყიდვის სავარაუდო ღირებულება 61 875 ლარია.

ტელევიზორები სოციალურად დაუცველ იმ პირებს გადაეცემათ, რომლებიც მერიის პროგრამის – მოწყვლადი სოციალური კატეგორიებისთვის მინიმალური სოციალური პირობების შექმნა – პირობებს აკმაყოფილებენ. ამ პროგრამით გათვალისწინებულია: პირველადი საყოფაცხოვრებო ნივთების, ავეჯის, ტექნიკის, სოციალური დანიშნულების საქონლისა და სარემონტო მასალის შეძენა, ასევე,  საკუთრებაში არსებული საცხოვრებელი ფართობის რემონტი სოციალურად დაუცველი შშმ  და ბინაზე მოვლის საჭიროების მქონე პირებისთვის, რომელთა სარეიტინგო ქულა არ აღემატება 57.001-ს; გარდა ამისა, სამი და მეტშვილიანი, სოციალურად  დაუცველი ოჯახებისთვის, რომელთა სარეიტინგო ქულა არ აღემატება 30.001-ს და სოციალურად  დაუცველი ოჯახებისთვის, რომელთა სარეიტინგო ქულა არ აღემატება 1.001-ს.

„შემოდის განცხადებები, სერვისცენტრები სწავლობენ კონკრეტულ მდგომარეობას, ადასტურებენ საჭიროებას და იმის მიხედვით, თუ რაზეა მოთხოვნა, ტელევიზორზე, მაცივარზე, ლეიბებზე თუ ავეჯის შეძენაზე, ცხადდება ტენდერი,“ – ამბობს ლელა სურმანიძე, ბათუმის მერის მოადგილე.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com