დღეს, 10 ივლისს, შეკვეთილში, ივანიშვილის რეზიდენციასთან აქციის მონაწილეებს კარავი დაუნგრიეს და ბანერები გაიტაცეს. ვიდეოში, რომელიც ადგილზე მყოფმა აქციის მონაწილემ გადაიღო, ამბობენ, რომ მათ „ოცნების“ წევრები დაუპირისპირდნენ, შინაგან საქმეთა სამინისტრო კი სხვა ვერსიაზე საუბრობს.
შსს-ს ცნობით, მოშიმშილეების აქციას ადგილობრივი მოსახლეობის ნაწილი დაუპირისპირდა.
„ადგილობრივი მოსახლეობის ნაწილი მივიდა აქციის მონაწილეებთან, მოშიმშილეებთან და მოუთხოვიათ, ჩვენი სოფლის ტერიტორია დატოვეთო, მოუხსნიათ ეს პლაკატები და ამას მოჰყვა შელაპარაკება. ჩაერია პოლიცია და ადგილობრივი მოსახლეობა, ვინც იქ მივიდა, განარიდეს იმ ადგილს. ამ წუთისთვის ვითარება სტაბილურია, სამართალდამცავები აკონტროლებენ სიტუაციას, ადგილზე იმყოფებიან და იცავენ მართლწესრიგს და აქ მყოფი მოქალაქეების, მათ შორის მოშიმშილეების უსაფრთხოებას,“ – გვითხრეს შს სამინისტროში.
ადგილი, სადაც აქცია იმართება, დასახლებული ტერიტორიიდან მოშორებით მდებარეობს, აქ მოსახლეობა არ ცხოვრობს.
მოშიმშილეების დარბეული კარავი ივანიშვილის რეზიდენციის წინ, შეკვეთილში
_________________________
