შვებულებაში გავიდა მოსამართლე, რომელიც განიხილავს ბათუმში ახალი მეჩეთის აშენების საქმეს


მოსამართლე ჯუმბერ ბეჟანიძე, რომელიც „ბათუმში ახალი მეჩეთის აშენების საქმეს“ განიხილავს, შვებულებაში გავიდა. მას საქმის განხილვა ამ დღეებში დასკვნით სხდომაზე უნდა დაესრულებინა იმ შემთხვევაში, თუკი მუსლიმ თემსა და ბათუმის მერიას შორის შეთანხმება ვერ შედგებოდა. შეთანხმება მერიაში 9 ივლისს გამართულ შეხვედრაზე ვერ შედგა.

„ბოლო სასამართლო სხდომაზე შევთანხმდით, რომ 8 ივლისს გაიმართებოდა შეხვედრა მერიაში და სავარაუდოდ 9 ივლისს იქნებოდა სასამართლო განხილვა. მერმა მოუცლელობის მოტივით შეხვედრა რვის ნაცვლად ცხრაში ჩაგვინიშნა. სასამართლოს იმავე დღეს მივმართეთ და ვუთხარით, რომ შეთანხმება ვერ შედგა, მაგრამ გვითხრეს, რომ მოსამართლე შვებულებაში გადის,“ – გვითხრა დავით ბერძულმა, მუსლიმი თემის ინტერესების დამცველმა სასამართლოში.

ბათუმის საქალაქო სასამართლოში განმარტეს, რომ მოსამართლე ჯუმბერ ბეჟანიძე შვებულებაში გავიდა და საქმის განხილვა ამ მიზეზით ჯერ დანიშნული არ არის.

სასამართლოსთვის მუსლიმი თემის მიმართვიდან ორი წელი გავიდა – ბათუმის მერიის წინააღმდეგ სასამართლოში სარჩელი ააიპ „ბათუმში ახალი მეჩეთის მშენებლობის ფონდმა“ 2017 წლის 10 ივნისს შეიტანა, მას შემდეგ, რაც ბათუმის მერიამ 2017 წლის 5 მაისს მუსლიმ თემს უარი უთხრა ქალაქში ახალი მეჩეთის მშენებლობის ნებართვის გაცემაზე.

ამ საქმის განხილვა თვეობით ჭიანურდებოდა.

ბოლო სასამართლო სხდომა მეჩეთის მშენებლობის საკითხზე 12 ივნისს შედგა. მოსამართლე ჯუმბერ ბეჟანიძემ კიდევ ერთხელ მისცა ბათუმის მერიას შესაძლებლობა, დალაპარაკებოდა მუსლიმ თემს.

ამ თემაზე:

ბათუმის მერი მუსლიმებთან შეხვედრის შემდეგ: დღეს მივიღეთ წინადადების უარყოფა

ნეტგაზეთის მასალების სხვა გამოცემებში გადაბეჭდვის წესი
ავტორი