ბათუმის მერია და მუსლიმი თემი ახალი მეჩეთის აგებაზე ვერ შეთანხმდნენ. შეხვედრა ბათუმის მერიაში რამდენიმე წუთის წინ დასრულდა.
„უშუალოდ ბათუმის მერი შეგვხვდა – ლაშა კომახიძე… მოვისმინეთ ისევ იგივე, რომ მიწის ნაკვეთი უნდა გადავცეთ სამუფთოს. ეს დამოკიდებულება ჩვენთვის არის შეურაცხმყოფელი. მოლაპარაკების რესურსი უკვე ამოწურულია,“ – გვითხრა ტარიელ ნაკაიძემ, „ქართველ მუსლიმთა კავშირის“ ხელმძღვანელმა. მისივე თქმით, შეხვედრას სამუფთოს წარმომადგენელი არ დასწრებია და არც სხვა საკითხზე უმსჯელიათ.
სასამართლოსთვის მუსლიმი თემის მიმართვიდან ორი წელი გავიდა – ბათუმის მერიის წინააღმდეგ სასამართლოში სარჩელი ააიპ „ბათუმში ახალი მეჩეთის მშენებლობის ფონდმა“ 2017 წლის 10 ივნისს შეიტანა, რადგან ბათუმის მერიამ 2017 წლის 5 მაისს მუსლიმ თემს უარი უთხრა ქალაქში ახალი მეჩეთის მშენებლობის ნებართვის გაცემაზე.
ამ საქმის განხილვა თვეობით ჭიანურდებოდა.
ბოლო სასამართლო სხდომა მეჩეთის მშენებლობის საკითხზე 12 ივნისს შედგა. მოსამართლე ჯუმბერ ბეჟანიძემ კიდევ ერთხელ მისცა ბათუმის მერიას შესაძლებლობა, დალაპარაკებოდა მუსლიმ თემს. ამ დროისთვის უცნობია, როდის განახლდება სასამართლო პროცესი.
ამავე თემაზე:
ბათუმის მერი მუსლიმებთან შეხვედრის შემდეგ: დღეს მივიღეთ წინადადების უარყოფა
