„სანდასუფთავება“: თუ ვერ დავადგინეთ ვინ დაყარა ნაგავი ჭოროხთან, ვის დავუწეროთ ჯარიმა? [ფოტო]

ახალი ბულვარის ბოლოს, გამწმენდ ნაგებობასთან ახლოს, მდინარე ჭოროხის ნაპირის სამშენებლო მასალებით დანაგვიანების ამსახველი ფოტოები „ბათუმელებს“ მოქალაქემ მოაწოდა.

ფოტომასალაზე ჩანს, რომ ცენტრალურ გზასთან ახლოს, მდინარეში სამშენებლო და საყოფაცხოვრებო ნარჩენებია გადაყრილი. მოქალაქის თქმით, როგორც ჩანს, სანაპიროზე დიდი სატვირთო მანქანებიდან ცლიან სამშენებლო ნაგავს, რაზეც ჩამტვრეული ლუქი და ამოვარდნილი ბორდიურიც მიუთითებს.

სამშენებლო ნარჩენებით დანაგვიანებული გარემო ბათუმში, მდინარის პირას
ფოტო: ნუკრი ყველაშვილი

ფოტო: ნუკრი ყველაშვილი

ბათუმში სისუფთავის მონიტორინგზე „სანდასუფთავების“ მონიტორინგის და ზედამხედველობის სამსახური მუშაობს. „ბათუმელები“ მერიის  „სანდასუფთავების“ მონიტორინგის და ზედამხედველობის სამსახურის უფროსს შოთა თოდაძეს ესაუბრა, რომელიც ამბობს, რომ მათ გარემოს დანაგვიანებაზე რეაგირება იმ შემთხვევაში შეუძლიათ, თუ დამნაგვიანებელი იდენტიფიცირებულია.

სამშენებლო ნარჩენებით დანაგვიანებული გარემო ბათუმში. ფოტო: ნუკრი ყველაშვილი

„თუ ვერ დავადგინეთ ვინ დაყარა, ვის დავუწეროთ ჯარიმა?  დაზუსტებით თუ ვინმემ არ დაადო ხელი, არ ვიცით, ისევ ვერ დავაჯარიმებთ. იცით რამდენი მასეთი ფოტო გვაქვს და რამდენი უკანონო ნაგავსაყრელია? რამდენი ფაქტზე დავიჭირე, ჯარიმა დავუწერე, მაგრამ სასამართლოში გამისაჩივრეს,“ – გვითხრა მან.

გარემოს დანაგვიანებაზე ჯარიმა 200 ლარიდან იწყება. „გააჩნია, რა რაოდენობის ნაგავი დაყარა,“ – ამბობს შოთა თოდაძე.

მისივე თქმით, სანდასუფთავების სამსახურს არ აქვს იმის რესურსი, რომ გარემოს დანაგვიანებაზე ხშირი მონიტორინგი აწარმოოს. „საზოგადოების მენტალობის ბრალია ეს. როცა დაინახავენ, რომ ჩაყარა ვიღაცამ ნაგავი, უნდა მოკიდონ ხელი ტელეფონს და დაგვირეკონ,“ – ამბობს თოდაძე.