აჭარის განათლების სამინისტროს განმარტება აჭარის მოდის კვირეულის მხარდაჭერაზე


აჭარის განათლებისა და კულტურის სამინისტრო აჭარის მოდის კვირეულზე, Adjara Fashion Week-ზე მოწვეული 5 სტუმრისათვის თვითმფრინავის ბილეთებს შეიძენს და ასევე, ხუთი სტუმრის VIP კლასის სასტუმროში განთავსებისთვის გადაიხდის ფულს. ამისათვის  სამინისტრო ჯამში 15 ათასამდე ლარის დახარჯვას აპირებს. ტენდერები ამ მომსახურების შესაძენად უკვე გამოცხადებულია.

„ბათუმელებმა“ ჰკითხა სამინისტროს სტუმრების ვინაობისა და აჭარის მოდის კვირეულის ბიუჯეტიდან მხარდაჭერის მიზანშეწონილობის შესახებ.

აჭარის განათლების სამინისტროში გვითხრეს, რომ აჭარის მოდის კვირეული ხელს უწყობს ბათუმის ხელოვნების უნივერსიტეტის სტუდენტებსა და კურსდამთავრებულებს, ახალგაზრდა დიზაინერებს, წარმოადგინონ საკუთარი ნამუშევრები, რაც მათთვის მნიშვნელოვანია და სწორედ ამიტომ უჭერს სამინისტრო მხარს მოდის კვირეულს.

რაც შეეხება სტუმრების ვინაობას, სამინისტროში ამბობენ, რომ მიმდინარეობს მოლაპარაკებები და ამის შემდეგ დაზუსტდება, კონკრეტულად ვინ დაესწრება Adjara Fashion Week-ს, ტენდერები ბილეთისა და სასტუმროს ნომრების შესაძენად კი წინმსწრებად გამოაცხადეს, დროში ცდომილების თავიდან ასაცილებლად.

________

ფოტო Adjara Fashion Week-ის ფეისბუქგვერდიდან.

ამავე თემაზე: 

აჭარის მოდის კვირეულზე 5 სტუმრის მგზავრობას და სასტუმროს განათლების სამინისტრო აფინანსებს

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com