Batumelebi

„ნიკა გვარამიას სისხლის სამართლის ბრალდების საქმეზე განაჩენი არის დაუსაბუთებელი ფაქტობრივი და სამართლებრივი თვალსაზრისით,“ – მიიჩნევს მაია კოპალეიშვილი, საკონსტიტუციო სასამართლოს ყოფილი მოსამართლე. მან „ნიკა გვარამიას საქმეზე“ სამართლებრივ შეფასება დღეს, 13 ივნისს გამოაქვეყნა.

„საქართველოს სისხლის სამართლის კოდექის 220-ე მუხლის [უფლებამოსილების ბოროტად გამოყენება] შინაარსი არასწორად განმარტა მოსამართლემ და გასცდა მის ფარგლებს გადაწყვეტილება/განაჩენის დასაბუთება, მათ შორის, გულისხმობს, რომ ნორმათა განმარტებისას მოსამართლემ უნდა იმოქმედოს „სამართლის ერთიანობის“ პრინციპის დაცვით, ანუ ნორმის გამოყენების/განმარტების შედეგად მიღებული გადაწყვეტილება წინააღმდეგობაში არ უნდა მოდიოდეს სამართლის სხვა ნორმებთან/დარგებთან,“ – წერს მაია კოპალეიშვილი და საქმის ეპიზოდებს ცალ-ცალკე აფასებს:

„ქიბარ ხალვაშის ეპიზოდი – მოსამართლე მიიჩნევს, რომ 2015 წელს ხელშეკრულების დადებით ქიბარ ხალვაშს გამიზნულად მიადგა ზიანი. ეს ეპიზოდი განაჩენში სავალალოდ გამოიყურება. სამოქალაქო-სამართლებრივი ხელშეკრულების პუნქტებს და სხვადასხვა წლის შესაბამისი თვეების მიხედვით სხვაობებს, მოსამართლე გამიზნულად აფასებს იმგვარად, რომ ნიკა გვარამიას მოქმედება დაუქვემდებაროს სისხლის სამართლის კოდექსით დასჯად ქმედებას.

ავტომანქანის ეპიზოდი -მოსამართლის მსჯელობა ავტომანქანის ეპიზოდში არის დაუსაბუთებელი, მხოლოდ გარიგების დადების პროცესის აღწერა და გარიგების შინაარსის გადმოცემა საკმარისი არ არის ქმედების დანაშაულებრივად მიჩნევისათვის. მოსამართლემ არც კი შეაფასა მის მიერ მტკიცებულებად მიჩნეული ინფორმაციის სიმყარე. მოსამართლის მიერ მოყვანილი მსჯელობა არის ფაქტების მშრალი აღწერა, ყოვლგვარი სამართლებრივი სტანდარტებისა და ანალიზის გარეშე, ვერ დასტურდება მტკიცებულებათა სარწმუნოობა, სანდოობა და რელევანტურობა (შემხებლობა).

მტკიცებულებითი სტანდარტი ნიშნავს იმას, რომ ობიექტურ დამკვირვებელს სასამართლოს მიერ ჩატარებული გამოკვლევის შედეგად ცალკეული ფაქტების არსებობაში, პირის ბრალეულობაში გონივრული ეჭვის საფუძველიც კი არ უნდა გააჩნდეს. წინააღმდეგ შემთხვევაში ნებისმიერი ეჭვი უნდა გადაწყდეს ბრალდებული პირის სასარგებლოდ.

2015 წლის ხელშეკრულების ეპიზოდის შემთხვევაში მოსამართლე ფაქტობრივი ვითარების დადგენისას და შეფასებისას სპეციალურად უვლის გვერდს იმ საკანონმდებლო ცვლილებებს და მათ შეფასებას, რომლებზეც მიუთითებდა დაცვის მხარე. მოსამართლემ ასევე არ შეაფასა ის ფაქტობრივი პოლიტიკურ-სამართლებრივი ვითარება, რომელიც იმ პერიოდში რუსთავი 2-ის ირგვლივ იყო,“ – წერს საკონსტიტუციო სასამართლოს ყოფილი მოსამართლე.

მაია კოპალეიშვილის შეფასებით, „ნიკა გვარამიას საქმის“ განხმხილველმა მოსამართლემ ლაშა ჩხიკვაძემ მნიშვნელოვანი მტკიცებულებები საერთოდ შეფასების გარეშრე დატოვა. საია-ს შეფასებით, ინტერესეთა კონფლიქტის გამო ლაშა ჩხიკვაძეს ამ საქმის განხილვის უფლებაც არ ჰქონდა.

„მოსამართლემ არ გაითვალისწინა დაცვის მხარის არცერთი რელევანტური არგუმენტი, სამაგიეროდ, გაითვალისწინა ბრალდების სასარგებლოდ მოყვანილი სტატისტიკური ინფორმაცია.

სასამართლოს მიერ მნიშვნელოვანი მტკიცებულებების შეფასების გარეშე დატოვება, არათანაბარი ყურადღება მხარეების არგუმენტებისადმი, მხარეების მიერ წარმოდგენილი ურთიერთსაწინააღმდეგო არგუმენტებიდან ერთ-ერთის გათვალისწინება და სხვა არგუმენტების უარყოფა უარყოფის მიზეზის მითითების გარეშე, ეწინააღმდეგება სამართლიანი სასამართლოს მოთხოვნებს.

სსსსკ-ის 82-ე მუხლის მე-3 ნაწილის თანახმად, „გამამტყუნებელი განაჩენით პირის დამნაშავედ ცნობისთვის საჭიროა გონივრულ ეჭვს მიღმა არსებულ მტკიცებულებათა ერთობლიობა“. როგორც განაჩენის სამართლებრივი ანალიზი მიუთითებს, ვერ დასტურდება ნიკა გვარამიას ბრალეულობა, განზრახ ბოროტი განზრახვა, ტელეკომპანიის კანონიერი ინტერესების წინააღმდეგ ქმედება, თავისთვის ან სხვისთვის გამორჩენის ან უპირატესობის მიღების მიზანი. შესაბამისად, არ არის დაკმაყოფილებული სსსკ-ის 82-ე მუხლის მე-3 ნაწილით დადგენილი მოთხოვნა და დაუშვებელი იყო გამამტყუნებელი განაჩენის გამოტანა,“ – წერს მაია კოპალეიშვილი.

ბათუმის საკრებულო უახლოეს სხდომაზე მერიის მიერ მომზადებულ კანონპროექტს განიხილავს, რომლის მიხედვითაც მიკროავტობუსის მძღოლები 2022 წლის დეკემბრამდე სამგზავრო გადაყვანის ნებართვის ფასს არ გადაიხდიან. რაც შეეხება მგზავრობის ფასს, ოფიციალურად ის კვლავ 50 თეთრია ბათუმის ფარგლებში, თუმცა მძღოლები გასული წლიდან მგზავრებს 70 თეთრს ახდევინებენ.

ბათუმის მუნიციპალიტეტის ადმინისტრაციულ საზღვრებში რეგულარული სამგზავრო გადაყვანის ნებართვის გაცემის ფასი ერთ მიკროავტობუსზე 20 ლარითაა განსზღვრული, თუმცა ამ თანხას 2021 წლის მარტიდან ნებართვის მფლობელი კომპანიები ფაქტობრივად არ იხდიან. საკრებულოს გადაწყვეტილებით ისინი სიმბოლურად 10 თეთრს იხდიდნენ ერთ მიკროავტობუსზე.

ეს 10 თეთრი სანებართვო გადასახადი დარჩება 2022 წლის დეკემბრამდეც.

საკრებულო საკითხს 17 ივნისის სხდომაზე განიხილავს.

კანონპროექტის მიხედვით, „2021 წლის 1 მარტიდან 2022 წლის 30 ნოემბრის ჩათვლით პერიოდისათვის ქალაქ ბათუმის მუნიციპალიტეტის ადმინისტრაციულ საზღვრებში რეგულარული სამგზავრო გადაყვანის ნებართვის გაცემის ფასი M2 და M3 კატეგორიის ავტობუსებისათვის განისაზღვროს 0,1 ლარით“.

„მიმდინარე ეტაპისათვის აღნიშნული სახის ცვლილება განპირობებულია ბაზარზე საპოხი და საწვავი მასალების, სათადარიგო ნაწილების ფასების საგრძნობი ზრდით, რამაც მგზავრთა გადამყვან კომპანიებში დასაქმებულ მძღოლებზე და მათ საქმიანობაზე მოახდინა ნეგატიური გავლენა. აქედან გამომდინარე მიღებული იქნა გადაწყვეტილება ეკონომიკური საქმიანობის მხარდაჭერის მიზნით მიმდინარე ეტაპზე დაუწესდეთ ნებართვის ფასის გადახდის სიმბოლური თანხა 0.10 ლარის ოდენობით“ – აღნიშნულია მერიის მიერ მომზადებული პროექტის განმარტებით ბარათში.

საწვავისა თუ სხვა მასალების ფასების ზრდის გამო, ბათუმში მიკროავტობუსების მძღოლებმა მგზავრობა თვითნებურად გააძვირეს და დაწესებული 50 თეთრის ნაცვლად მგზავრებს 70 თეთრს ახდევინებენ.

მგზავრობის ტარიფის ცვლილებაც საკრებულოს კომპეტენციაა, თუმცა ქალაქის მერია ამ ეტაპზე არ გეგმავს მიმართოს საკრებულოს ამ საკითხზე.

„ქალაქის ფარგლებში სამარშრუტო მიკროავტობუსებით მგზავრობის ტარიფი რჩება იგივე – 50 თეთრი. ამ ეტაპზე მერიას საკრებულოსთვის არ მიუმართავს ამ ტარიფის ცვლილებაზე. ჯერ საკრებულომ ნებართვის ფასთან დაკავშირებით უმდა იმსჯელოს და ვნახოთ, რა გადაწყვეტილებას მიიღებს. რაც შეეხება იმას, რომ მიკროავტობუსებში მგზავრებს 70 თეთრს ახდევინებენ, ამ კუთხით ალბათ მუნიციპალური ინსპექცია გააძლიერებს კონტროლს“ – უთხრეს დღეს მერიაში „ბათუმელებს“.

ბათუმის მუნიციპალურმა ინსპექციამ 2022 წლის იანვარში ექვსივე შპს დააჯარიმა, რომლებსაც ბათუმში სამარშრუტო მიკროავტობუსებით მგზავრთა გადაყვანის ნებართვა აქვთ.

გააგრძელა თუ არა, იანვრიდან დღემდე, ამ კუთხით კონტროლი მუნიციპალურმა ინსპექციამ და რა ზომები მიიღო მიკროავტობუსებში მგზავრობის ფასის 50-ის ნაცვლად 70 თეთრამდე თვითნებურად გაზრდის გამო? – ამ კითხვით „ბათუმელებმა“ ინსპექციას მიმართა.

„საზოგადოებრივ ტრანსპორტში საფასურის თვითნებურ გაზრდასთან დაკავშირებით სამართლებრივ რეაგირებას მუნიციპალური ინსპექცია ახორციელებს. მიმდინარე წელს პარკირებისა და ტრანსპორტის ზედამხედველობის სამსახურმა აღნიშნულ ფაქტზე 91-ჯერ დააჯარიმა მგზავრების გადაყვანაზე პასუხისმგებელი შეპესეები.“ – მოგვწერეს მუნიციპალური ინსპექციიდან დღეს, 13 ივნისს.

მერიის სატრანსპორტო სამსახურში „ბათუმელებს“ 5 თვის წინ უთხრეს, რომ კომპანიებმა, რომლებიც მგზავრთა გადაყვანას ემსახურებიან სამარშრუტო მიკროავტობუსებით, მგზავრობის ტარიფის 80 თეთრამდე გაზრდის მოთხოვნით მერიას 2021 წლის დეკემბერში მიმართეს.

მოგვიანებით მერიაში გვითხრეს, რომ საკითხის განხილვის გაჭიანურება გამოიწვია იმან, რომ ბათუმის საკრებულო ვერ იკრიბებოდა.

ბათუმის საკრებულო 30 მაისს შეიკრიბა და თავმჯდომარეც აირჩია.

ამავე თემაზე:

მთავარი ფოტო „ბათუმელების“ არქივიდან

„დაფიქსირდა კრიტიკული შეუსაბამობა,“ – განაცხადეს შრომის ინსპექციის პრესცენტრში ბათუმის ბეტონის ქარხნის შესახებ, სადაც მუშაობა უკვე შეაჩერეს. შრომის ინსპექციამ კომპანია „ორბი ჯგუფის“ მიერ ზღვის პირას მოწყობილ ბეტონის ქარხანაში მუშაობის დაწყებიდან 5 წლის შემდეგ დაადასტურა პრობლემის არსებობა.

„დაფიქსირდა კრიტიკული შეუსაბამობა შრომის უსაფრთხოების კუთხით, დაჯარიმდა 50 ათასი ლარით… სამუშაოები შესაძლოა თუ გამოსწორდება მითითებული პრობლემები, რის გამოც კომპანიას მიეცა გონივრული ვადა,“ – აღნიშნეს შრომის ინსპექციის პრესცენტრში.

ბეტონის ქარხნის დაჯარიმება მოითხოვა გარემოსდაცვითმა დეპარტამენტმაც 3 ივნისს, როცა ქარხნიდან ქალაქში კიდევ ერთხელ გაიფრქვა მტვრის ბუღი. ეს ჯარიმა ბათუმის საქალაქო სასამართლოს ჯერ არ განუხილავს, შრომის ინსპექციის გადაწყვეტილება კი, მიღებისთანავე შედის ძალაში.

ბეტონის უკანონო ქარხნის შესახებ, რომელიც ბათუმში, ზღვის პირას უკვე ხუთი წელია უპრობლემოდ მუშაობს, „ბათუმელები“ 9 ივნისსაც წერდა. იმის მიუხედავად, რომ ბათუმის საქალაქო სასამართლოში ეს საქმე 2019 წელს დაეწერა მოსამართლე ჯუმბერ ბეჟანიძეს, მან ამ დრომდე ბეტონის ქარხნისთვის ვერ მოიცალა. 2023 წელს კი, კომპანია „ორბს“ ისედაც უწევდა დროებითი ქარხნის დანგრევა.

ამ თემაზე:

ბიუჯეტი ისევ ვერ შესრულდა 2021-ში, თვითმმართველობის არჩევნების წელს – აჭარის რესპუბლიკური ბიუჯეტის შემოსულობების გეგმა 392 მილიონი იყო. ფაქტობრივმა შესრულებამ კი 307 მილიონი შეადგინა. ეს გეგმის 78,2 პროცენტია. მთავრობა აცხადებს, რომ მთავარი ხელშემშლელი პანდემიის მეორე ტალღა იყო. აუდიტორის განმარტებით კი, რომელმაც ბიუჯეტი შეისწავლა, რეგიონის მთავარ ფინანსურ დოკუმენტში პროგნოზები არარეალური იყო თავიდანვე, თუმცა მთავრობამ ეს არ გაითვალისწინა.

გადასახდელებთან შედარებით უკეთესი მდგომარეობაა, თუმცა არასახარბიელო შემოსავლების მიღების ნაწილში, მთავრობას გათვლა 303 მილიონზე ჰქონდა, ამოღებულია 285 მილიონი, ანუ გეგმა შესრულებულია 93,8 პროცენტით. წინა წლის ანალოგიურ მაჩვენებელთან შედარებით შემოსავლების ფაქტობრივი შესრულება გაზრდილია 37 219,2 ათასი ლარით, შესაბამისად, 15,0 პროცენტით.

2021 წლის რესპუბლიკური ბიუჯეტის შემოსავლების უდიდესი ნაწილი, საერთო შემოსავლების 95,9 პროცენტი მოდის გადასახადებზე, რომელიც მოიცავს მხოლოდ საშემოსავლო გადასახადს.

საანგარიშგებო პერიოდის საშემოსავლო გადასახადის გეგმა 290 მილიონით იყო განსაზღვრული. ფაქტობრივმა შესრულებამ კი შეადგინა 273 მილიონი ლარი, ანუ გეგმის 94,3 პროცენტი.

• სხვა შემოსავლები

რესპუბლიკური ბიუჯეტის 2021 წლის სხვა შემოსავლების გეგმა განისაზღვრა 13 მილიონი ლარით, ხოლო შესრულებამ 11 მილიონი,  ანუ გეგმის 83,9 პროცენტი შეადგინა. მათ შორის: პროცენტებიდან შემოსავლების საანგარიშო პერიოდის გეგმა 5 მილიონი ლარით იყო განსაზღვრული, ფაქტობრივი შესრულებამ კი 3 638 800 ლარი შეადგინა, ეს გეგმის 72,8 პროცენტია [ ეს არის სახაზინო ანგარიშზე არსებულ ნაშთზე დარიცხული სარგებელი].

დივიდენდებიდან შემოსავლის საანგარიშო პერიოდის გეგმა განისაზღვრა 3 მილიონი ლარით. ფაქტობრივმა შესრულებამ შეადგინა გეგმის 49,3 პროცენტი. რენტიდან შემოსავლის საანგარიშო პერიოდის გეგმა განისაზღვრა 2 მილიონ 767,0 ათასი ლარით, ფაქტობრივმა შესრულებამ შეადგინა 1 396,1 ათასი ლარი, ანუ გეგმის 50,5 პროცენტი [რენტიდან შემოსავლები მოიცავს მიწის იჯარიდან
და მართვაში გადაცემიდან და სარგებლობის ლიცენზიის გაცემის საფასურით მიღებულ შემოსავლებს].

• არაფინანსური აქტივების კლება – „აუქციონები ჩაიშალა“

2021 წელს აჭარის მთავრობა სახელმწიფო ქონების გაყიდვით 85 მილიონ ლარს ელოდა ბიუჯეტში, ხოლო ფაქტობრივი შესრულება შეადგენს 22 მილიონს, ანუ გეგმის 25 პროცენტს. აჭარის ფინანსთა და ეკონომიკის სამინისტროს განმარტებით, ვერ მოხერხდა 2021 წელს დაგეგმილი რიგი ქონების, მათ შორის მსხვილი ობიექტების პრივატიზება, რომელთა განკარგვის შედეგად უპირობოდ
განხორციელდებოდა დაგეგმილი შემოსულობების შესრულება.

სამინისტრო თავს იმართლებს, რომ  ქონების პრივატიზების მიზნით გამოცხადდა აუქციონები, მათ შორის რიგ ქონებაზე არაერთგზის, თუმცა აუქციონები არ შედგა:

„რაც განპირობებულია ქვეყანაში არსებული პანდემიით გამოწვეული მდგომარეობით. გარდა ამისა, ახალი კორონავირუსის [COVID-19] გავრცელებასთან დაკავშირებით გამოცხადებული პანდემიის ფონზე, მოსალოდნელი მძიმე ეკონომიკური გამოწვევების საპასუხოდ ბიზნეს სუბიექტებისათვის ხელშეწყობის მიზნით, აჭარის ავტონომიური რესპუბლიკის მთავრობის 2020 წლის 31 ივლისის N7 დადგენილებით გათვალისწინებულ იქნა შეღავათები. კერძოდ, ინვესტორებს საპრივატიზებო თანხების გადასახდელად მიეცათ დამატებითი ვადები. აღნიშნული ანტიკრიზისული ღონისძიებების გათვალისწინებით, ინვესტორებმა ისარგებლეს შეღავათით და 2021
წლის საანგარიშო პერიოდში ქონების პრივატიზებიდან განსახორციელებელი გადახდები მთლიანად ან ნაწილობრივად გადაავადეს.“

• გადასახდელები

2021 წლის აჭარის რესპუბლიკური ბიუჯეტის გადასახდელების გეგმა 414 221 ლარი იყო, ხოლო ფაქტობრივმა დაფინანსებამ
328  ლარი შეადგინა, რაც გეგმის 79,3 პროცენტია.

„მისი მდგომარეობა მძიმეა, ხელოვნური სუნთქვის აპარატზეა მიერთებული,“ – გვითხრეს კლინიკა BAU-ში, სადაც მოათავსეს 20 წლის დაშავებული კაცი. მას დღეს, 12 ივნისს, სავარაუდოდ მშენებლობიდან ჩამოვარდნილი ძელი თავში მოხვდა, როცა ბათუმში, კობალაძის ქუჩაზე ფეხით მიდიოდა.

თვითმხილველის თქმით, ფეხით მიმავალ ახალგაზრდა კაცს DS გრუპის მშენებლობიდან ჩამოვარდნილი საგანი დაეცა. ბიჭმა გონება დაკარგა და ის სასწრაფო-სამედიცინო სამსახურმა კლინიკაში გადაიყვანა.

BAU-ს პრესცენტრის ინფორმაციით, დაშავებულს მრავლობითი დაზიანება აქვს, თუმცა მთავარი დაზიანება მას კეფის არეში აქვს მიღებული.

„ამჟამად უტარდება გამოკვლევები და რეანიმაციულ განყოფილებაშია,“ – ამბობს BAU-პრესცენტრის უფროსი, ცირა აბულაძე.

„ბათუმელები“ დაუკავშირდა DS გრუპსაც, რომლის მშენებარე კორპუსიც არის კობალაძის 16-ში, სადაც ახალგაზრდა კაცს თავში ხის სამშენებლო ძელი მოხვდა.

„არ ვიცით, რა მოხდა, ჩვენც ვცდილობთ გავიგოთ და ახლა ვიკვლევთ… უცებ მოვარდა ურაგანი. ეს ნივთი, რაც იმ ბიჭს  მოხვდა თავში, ნამდვილად მშენებლობაზე გამოიყენება, მაგრამ არ ვიცი, ჩვენგან თუ ჩამოვარდა ნამდვილად… ჩვენ გვაქვს უსაფრთხოების ნორმები დაცული, ბადეც გვაქვს და არასდროს დავუჯარიმებივართ,“ – გვითხრა ოთარ ბერიძემ, DS გრუპის ერთ-ერთმა ხელმძღვანელმა.

მშენებარე კორპუსზე სამშენებლო ბადე მხოლოდ ორ სართულზეა მოწყობილი – ერთი კორპუსის მე-14 სართულზე, ხოლო მეორე იქ, სადაც ახლა მშენებლობა გრძელდება. კომპანიის ხელმძღვანელი, ოთარ ბერიძე ამბობს, რომ მას კანონის მოთხოვნის შესაბამისად აქვს სამშენებლო ბადეები მოწყობილი.

ამ მისამართზე ქარის დროს დაშავდა ბათუმის მუნიციპალური ინსპექციის თანამშრომლის მანქანაც. მუნიციპალურ ინსპექციაში ამ დრომდე შემთხვევის შესახებ განმარტება არ გაუკეთებიათ.

განახლება: ბათუმის მუნიციპალური ინსპექციის პრესცენტრში განმარტეს, რომ დაზიანებული ავტომანქანა ინჯსპექციის თანამშრომლის საკუთრებაა და „როცა არ არის საკმარისი სამსახურებრივი ავტომობილები, ოპერატიული რეაგირების დროს, ვისაც სურვილი აქვს საკუთარ ავტომობილს იყენებს, აქედან გამომდინარე აქვს საშვი. არასამუშაო საათების გამო, ავტომობილი საცხოვრებელი სახლის მიმდებარედ ჰყავდა პარკირების ზონაში გაჩერებული, რაც შეეხება მეპატრონეს, მას შემთხვევის შედეგად არავითარი ზიანი არ მიუღია“, – მოგვწერეს მუნიციპალური ინსპექციიდან.

ამავე უწყების ინფორმაციით, სანებართვო პირობების დარღვევაზე მიმდინარეობს სამართალწარმოება შპს „დიეს ვაით ლაინის“ მიმართ, თუმცა მუნიციპალურ ინსპექციაში ვერ დაგვიკონკრეტეს, კონკრეტულად რა დაარღვია კომპანიამ და უკავშირდება თუ არა ეს მშენებლობის უსაფრთხოებას.

ქარის გამო, ბათუმში, კობალაძის ქუჩაზე მოქალაქე მშენებლობიდან სავარაუდოდ ჩამოვარდნილი ნივთის დაცემის შედეგად დაშავდა.

თვითმხილველების თქმით, ფეხით მიმავალ ახალგაზრდა კაცს DS გრუპის მშენებლობიდან ჩამოვარდნილი საგანი დაეცა. ბიჭმა გონება დაკარგა და ის სასწრაფო-სამედიცინო სამსახურმა კლინიკაში გადაიყვანა.

მშენებარე კორპუსიდან ჩამოვარდნილი საგნების შედეგად დაზიანდა ავტომანქანაც, რომელიც მუნიციპალური ინსპექციის საკუთრებაა.

მანქანაში მსხდომების დაზიანების შესახებ „ბათუმელები“ ინფორმაციას არ ფლობს.

სასწრაფო-სამედიცინო სამსახურის ინფორმაციით, დაშავებულს თავში ღია ჭრილობა დაუფიქსირეს.

ბათუმში ქარი დაახლოებით ნახევარი საათის [16:00] წინ ამოვარდა.

„ისე ნუ წარმოვაჩენთ, თითქოს სასწაულს კარგავს ქვეყანა,“ – განაცხადა პრემიერ-მინისტრმა ირაკლი ღარიბაშვილმა დღეს, 11 ივნისს, როცა მან ჟურნალისტებთან საქართველოსთვის კანდიდატის სტატუსის მინიჭებაზე ისაუბრა.

პრემიერმა კანდიდატის სტატუსის მინიჭებას მნიშვნელობის გაუფასურება აქტიურად სცადა ევროკავშირის კრიტიკული რეზოლუციის და ამჯერად უკვე საქართველოს პრეზიდენტისგან საქართველოს მთავრობის კრიტიკის შემდეგ.

პრემიერი არც იმას მოერიდა, რომ ევროკავშირი რეზოლუციაში ტყუილების ჩაწერაში დაედანაშაულებია.

„ასეთ რეზოლიციას არავითარი გადამწყვეტი მნიშვნელობა არ აქვს და მათი როლი არის სიმბოლური, რა თქმა უნდა შეურაცხმყოფელია ის რეზოლუცია, რომელიც გაჯერებულია ტყუილებით, ამაში მე დავინახე ირაციონალურობა… კანდიდატის სტატუსი არის სიმბოლური, მე ოპტიმიზმს ვინარჩუნებ, რომ ევროკავშირში გონივრულ გადაწყვეტილებას მიიღებენ,“ – აღნიშნა ირაკლი ღარიბაშვილმა.

არ დააკონკრეტა, თუმცა თქვა, რომ თუკი საქართველოს კანდიდატის სტატუსს არ მიანიჭებენ, ის „ყველაფერს ფარდას ახდის“. პრემიერმა ვერ თქვა, რით ემუქრება სტრატეგიულ პარტნიორებს და რატომ?

„ჩვენ ვართ უძველესი ცივილიზაციის ქვეყანა… ისე ნუ წარმოვაჩენთ, რომ რაღაცას ვმათხოვრობთ და ვითხოვთ რამეს, ჩვენ არაფერს არ ვითხოვთ დაუმსახურებელს… მე შევინარჩუნებ რეზერვაციას რომ უფრო მეტი არ ვილაპარაკო, თუ გადაწვეტილება არ იქნება სამართლიანი და ისეთივე შეურაცხმყოფელი იქნება ჩვენი ხალხისთვის, მე ვიტოვებ რეზერვაციას, რომ ყველაფერს ფარდას ავხდი და ყველაფერს ვეტყვი, თუ ამის საჭიროება დადგება, ვალდებული ვიქნები, ჩემს ხალხს ჩავაბარო ანგარიში,“ – აღნიშნა ირაკლი ღარიბაშვილმა.

ბათუმში ტურისტული სეზონის ძალაში შესვლასთან ერთად აქტიურდება კაფე-ბარების მიერ ოკუპირებული ტროტუარების პრობლემა.

„ბათუმელებმა” რამდენიმე ადგილი გადაიღო, სადაც კვების ობიექტებს მაგიდებით, მცენარეებითა და დაფა-მენიუებით სრულად აქვთ ათვისებული ტროტუარი, ფეხით მოსიარულეებსა და ეტლით მოსარგებლეებისთვის კი გზის ამ მონაკვეთში მხოლოდ ველობილიკი დატოვეს.

რამდენი ასეთი ობიექტი დაჯარიმდა წელს ტროტუარის მაგიდებითა და სხვა ინვენტარით ჩახერგვისთვის, ეს ბათუმის მუნიციპალურ ინსპექციაში დათვლილი არ აქვთ. ინფორმაციას, ამ დარღვევისთვის დაჯარიმებული და გაფრთხილებული ობიექტების შესახებ, მიღებისთანავე გამოვაქვეყნებთ.

სტანდარტის მიხედვით, ტროტუარზე ფეხით მოსიარულეებისთვის სავალი ნაწილი მინიმუმ 80 და მაქსიმუმ 150 სანტიმეტრი უნდა იყოს.

გაფრთხილების შემდეგ, ამ სტანდარტის დარღვევისთვის იურიდიული პირები პირველ ჯერზე 2000 ლარით ჯარიმდებიან, განმეორების შემთხვევაში კი – 4000 ლარით.

ამავე თემაზე:

„ახლა ივანიშვილი კედელთან მიყენებულად გრძნობს თავს, ერთგვარ აფექტშია“, – ამბობს პოლიტოლოგი გია ხუხაშვილი. მას „ბათუმელებთან“ ქვეყანაში მიმდინარე პროცესებზე და პარლამენტარ დიმიტრი ხუნდაძის პირით გახმოვანებულ პოზიციაზე ვკითხეთ – რომელმაც თქვა, რომ თუკი EU სტატუსს „უსამართლო ვალდებულებებით“ მივიღებთ, უარი უნდა ვთქვათ სტატუსზე.

• ბატონო გია, აქამდე თითქმის არავის ჰქონდა მოლოდინი, რომ ევროკავშირში გაიხსნებოდა დისკუსია ბიძინა ივანიშვილის დასანქცირებაზე. ახლა რა შეიცვალა თქვენი აზრით?

სამწუხაროდ ასეთი მოცემულობაა, რომ კონსენსუსია ქვეყნის გარეთაც და ქვეყნის შიგნითაც იმაზე, რომ ქვეყანაში არის ასეთი არაინსტიტუციური ჩრდილოვანი მმართველობა დამკვიდრებული. თუმცა, ამას გარკვეული პერიოდის განმავლობაში მაინც დისტანციურად უყურებდნენ, რადგან ჩვენი ხელისუფლების რიტორიკა თითქოს აქამდე იყო პროევროპული, დასავლური, თითქოს რაღაც კეთდებოდა, მაგრამ უკრაინის ომთან დაკავშირებულმა მოვლენებმა ყველაფერი უფრო მეტად გააშიშვლა და, შესაბამისად, ამ ლუსტრაციის საფუძველზე გამოჩნდა პრობლემა.

• რა არჩევანი აქვს დღეს ივანიშვილს თქვენი აზრით – ვთქვათ ის, რომ კარგავს ქონებას სანქციების შემთხვევაში, ან მის სიცოცხლეს ემუქრება საფრთხე, რადგან ის არის პუტინის მძევალი?

ივანიშვილს აქვს ორი არჩევანი. დღეს, ვითომ დამალვა და იმის ძახილი, რომ ვითომ პოლიტიკაში არ არის, უკვე მნიშვნელობა აღარ აქვს. მიუხედავად იმისა, ის მონაწილეობს თუ არა დღეს პოლიტიკურ მართვაში ან რა დოზით მონაწილეობს.

რადგან არსებობს კონსენსუსი და ისტორიამ მას დააკისრა პასუხისმგებლობა მიმდინარე მოვლენებზე და თუნდაც აი ამ ძირითად დილემაზე, თუ საით მიდის ქვეყანა ბოლოს და ბოლოს, დასავლეთისკენ თუ რუსეთისკენ.

მისი მხრიდან ამ ვითარებაში დამალვას და ისევ იმის ძახილი, რომ თავი გამანებეთ, აზრი არ აქვს, მასზეა ეს პასუხისმგებლობა. ისტორიული პასუხისმგებლობაც, შეიძლება ეწოდოს ამას. ახლა დადგა დრო, რომ ის გამოჩნდეს და წაიყვანოს ქვეყანა ამ ორიდან ერთ-ერთი მიმართულებით.

ერთი მიმართულება, რომ ის დაბრუნდეს ცივილიზებული განვითარების გზაზე, მიიღოს ის პირობები, რასაც გვიყენებს დასავლეთი ან მეორე – დაჯდეს „ალტ-ინფოს“ ტალღაზე, გამოაცხადოს, ვისჯები იმის გამო, რომ მეორე ფრონტის გახსნა უნდოდათ ევროპელებს საქართველოშიო. ხალხო მე თქვენთვის მშვიდობა მინდოდა და ამის გამო მსჯიანო. ორ ცხენზე ვიჯდე და თან ისე, რომ თითქოს მე არაფერ შუაში ვარ და თურმე ორი ირაკლი მართავს ქვეყანას, ამას უკვე აზრი აღარ აქვს. რაც უფრო მეტს ილაპარაკებს ეს ორი ირაკლი (კობახიძე, ღარიბაშვილი), კიდევ უფრო დიდ პრობლემებში შევა ივანიშვილი სამომავლოდ.

• ხუნდაძის დღევანდელი განცხადება ნიშნავს იმას, რომ ივანიშვილმა უკვე აირჩია რუსული გზა?

„ქართული ოცნების“ პოზიცია ივანიშვილის პოზიციის გარეშე არ არსებობს, ხელისუფლება ახლა აკეთებს მოსინჯვებს, რომ უარყოფითი შედეგის მიღების შემთხვევაში როგორ უნდა ელაპარაკონ ხალხს.

ხუნდაძესაც ეს იმიტომ ათქმევინეს, რომ ჯერ ძირითადი სპიკერები არ უნდათ გამოიყვანონ არენაზე და გატესტეს სრული აბსურდი. რა „უსამართლო პირობებზეა“ აქ საუბარი? დიდი ბოდიში, მაგრამ თქვენ თუ გინდათ ჩემს სახლში ცხოვრება, მე პირობებს გიყენებ. გეუბნები, რომ ჩემს ოჯახში სიგარეტს არ ეწევიან, მაგიდაზე არ ცეკვავენ, შუაღამისას არ ხმაურობენ, – ვიღაცამ შეიძლება ჩათვალოს, რომ ეს არის უსამართლო პირობები, რადგან ეწევა ან სხვანაირად ცხოვრობს. როგორ შეიძლება აქ სამართლიანობაზე ან უსამართლობაზე საუბარი, ეს არის პირობა, ხომ? ეს არის ერთ ოჯახში თანაცხოვრების წესი. შეასრულებ პირობას იცხოვრებ, არადა კარგად იყავი. ამაზეა საუბარი.

ესენი ახლა პრევენციულად ცდილობენ და შეიძლება იქეთ წაიყვანონ საქმე, რომ სანამ ევროპაში მიიღებენ გადაწყვეტილებას, მანამდე გამოაცხადონ, ჩვენ თვითონ ვამბობთ უარსო. სხვათა შორის, ასეთი ისტორია ერთხელ გაითამაშეს კიდეც, 315 მლნ დოლარის დახმარება მოგვიხსნეს და სანამ ამას ოფიციალურად გამოაცხადებდა ევროკავშირი, ღარიბაშვილმა გამოგვიცხადა, რომ „არ გვჭირდება, ჩვენ თვითონ ვთქვით უარიო“.

ახლაც შეიძლება თქვან იგივე, გააგრძელონ „ომი გინდათ?“ ისტორიით – რომ ევროკავშირი ჩვენ ასეთ პირობებს გვთავაზობდა, გახსენით მეორე ფრონტი თუ გინდათ კანდიდატის სტატუსი მოგცეთ, ჩვენ ამაზე უარი ვუთხარით და ამის გამო დავისაჯეთო.

• ამას „ქართული ოცნება“ ხომ უკრაინაში ომის დაწყების შემდეგ სულ იმეორებს, მაგრამ საზოგადოების მაინც ვერ მოახდინა გავლენა.

თქვენ გგონიათ ვერ მოახდინა? „ომი გინდათ“ რიტორიკამ არ იმუშავა? იმუშავა, სამწუხაროდ.

• უკრაინაში მოაწყეს მაიდანი, როდესაც იანუკოვიჩმა ხალხს უთხრა, რომ ევროკავშირზე უარს ამბობდა. საქართველოს მოქალაქეები ძალიან გაბრაზდნენ, როცა პარლამენტის სავარძელში რუსი დეპუტატი ჩაჯდა. ივანიშვილმა წესით იცის, რამაც გამოიწვია „გავრილოვის ღამე“. გამოდის ვა-ბანკზე მიდის თუ ფიქრობს, რომ საქართველოს მოსახლეობას აღარ ექნება რეაქცია თუკი ევროპულ კურსზე უარს იტყვის ხელისუფლება?

რა თქმა უნდა, ეშინია ხალხის წინააღმდეგობის. ის ახლა ძალიან რთულ მდგომარეობაშია – ბევრი პრობლემა აქვს და მარტო ეს კი არა: ვიცით, რომ Credit Suisse-თან დავა აქვს უზარმაზარ თანხაზე. ბუნებრივია, Credit Suisse-ს არ უნდა ამის გადახდა და ცდილობს რაღაც სასანქციო სიაში მოახვედროს ივანიშვილი. შესაბამისად, მათთვის ევროპარლამენტის რეზოლუცია არის საჩუქარი, ისინი გააძლიერებენ ამ მხრივ მუშაობას. ბიძინა ივანიშვილს მარტო პოლიტიკაში კი არ აქვს პრობლემები, პრობლემები აქვს პირად უსაფრთხოებაში და კეთილდღეობაში. ბევრი პრობლემა აქვს ძალიან. ეშინია, მაგრამ რა ქნას, უნდა ჩამოყალიბდეს რა გზით მიდის.

პირადი პრობლემები მისი გადასაწყვეტია, მაგრამ, სამწუხაროდ, მისი პრობლემები ქვეყნის პრობლემებზეა გადაჯაჭვული. ამიტომ, ჩვენ ქართულ საზოგადოებას გვინდა, რომ მან მიიღოს სწორი გადაწყვეტილებები.

• ვთქვათ ივანიშვილი დასანქცირდა, გაუყინეს ანგარიშები, როგორ შეიძლება განვითარდეს პროცესები?

მე ასე შორს არ წავიდოდი, ამ ეტაპზე არ ვისაუბრებდი, რადგან ეს მრავალმდგენელიანი პრობლემაა, – არის პირადი თემები, არის პოლიტიკური. თუ გაუყინავენ, ეს მისი პირადი პრობლემაა ხომ?

• „ქართული ოცნების“ არა? ის ხომ ივანიშვილისგან ფინანსდება, როგორი იქნება მისი მომავალი?

ესენი ფულს ახლაც კარგად შოულობენ, ისწავლეს ფულის კეთება. როგორ ფიქრობთ, ბიუჯეტს ხელს არ ახლებენ?

პროცესები დღეს არის უკვე ძალიან მძიმე. ჩვენი ფუნდამენტური პრობლემა ახლა არის ის, თუ საით მიდის ქვეყანა. ჩვენ უნდა გვესმოდეს, რომ რკინის ფარდა დაეშვა. სამყარო ისევ ორ ნაწილად გაიყო. ჩვენ ან მივდივართ ევროპაში ან მივდივართ რუსეთში. სხვა არჩევანი არ გვაქვს. სხვა არჩევანი კიდევ შეიძლება იყოს ეგრეთ წოდებული 3+3 ანუ რუსეთს ირანი რომ დაემატოს კიდევ. შესაბამისად, თუ ევროპას ვშორდებით, ესე იგი ავტომატურად მივდივართ რუსეთში. ანუ გარანტირებული გვაქვს „ტრაქტატი 2“. (მით უმეტეს, ერეკლე მეორეს თემა ახლა ძალიან აქტუალურია ამ ბოლო პერიოდში).

• ივანიშვილის ადვოკატი ამბობს, რომ ამ ზეწოლის ავტორი, ინიციატორი სათანადოდ ვერ აფასებს ივანიშვილის ფსიქოტიპს, – რომ ივანიშვილი „შეეგუა კიდეც ამ ზეწოლას“. რას ნიშნავს ეს „შეგუება“ როგორ შეიძლება ავხსნათ?

ფსიქიატრია ეს კაცი თუ ადვოკატი, რა ფსიქოტიპაჟებზე ლაპარაკობს, რაზე საუბრობს საერთოდ, აზრზე არ არის კაცი. ადვოკატის ლაი-ლაი ჰქვია ამას. არაფერს არ შეჰგუებია, როგორ შეიძლება ამას შეეგუოს ადამიანი.

• პრინციპში, რის შეცვლასაც ითხოვს ევროპა საქართველოს მთავრობისგან ეს გაახმოვანა დეპუტატმა კრამონმა: „შეწყვიტეთ მაპოლარიზებელი ენის გამოყენება, დაუბრუნდით 19 აპრილის [შარლ მიშელის] შეთანხმებას, დაიწყეთ სასამართლო სისტემის გამოსწორება, შეწყვიტეთ რუსული დეზინფორმაცია“. როგორ ფიქრობთ, რას დათმობთ აქედან ივანიშვილი?

მე ვთვლი, რომ არ დათმობს – მივდივართ რუსეთში, დათმობს – დავბრუნდებით ნორმალური განვითარების გზაზე. ახლა ივანიშვილი კედელთან მიყენებულად გრძნობს თავს, ერთგვარ აფექტშია, მშვიდად კი არ არის. აფექტურ მდგომარეობაში ადამიანი როგორ მოიქცევა ამის პროგნოზირება ძალიან რთულია.

ჩვენ შეიძლება მას შევთავაზოთ, რომ მოიქცეს სწორად, რაც ქვეყნისთვისაც კარგი იქნება და მისთვისაც, მაგრამ საბოლოო ჯამში არჩევანს თვითონ აკეთებს, სამწუხაროდ.

• დღეს ყველა საუბრობს იმაზე, რომ ივანიშვილს მთელი საქართველო მძევლად ჰყავს. ხუნდაძის განცხადებაც ხომ ამაზე მიანიშნებს. ამას როგორ ბედავენ?

საზოგადოებას აქვს ინსტრუმენტი, რომ აიძულოს ხელისუფლება, მაგრამ, სამწუხაროდ, ჩვენი საზოგადოება ამას ვერ იყენებს სათანადოდ.

საზოგადოება ქირაობს ხელისუფლებას ხომ? ხელისუფლება, რომელიც არ ასრულებს საზოგადოების დაკვეთას, საზოგადოება, როგორც დამქირავებელი ვალდებულია, აიძულოს ხელისუფლება მოიქცეს ისე, როგორც სჭირდება ქვეყანას.

თუ ხელისუფლება ამას ვერ აკეთებს, მაშინ უნდა გაუშვას ის და დაიქირაოს ისეთი, რომელიც გააკეთებს. თუ ამას ვერ ახერხებს საზოგადოება, მაშინ ჩვენც არ ვვარგივართ, მაშინ ჩვენც პასუხისმგებლები ვართ ყველაფერზე, რაც ხდება ქვეყანაში.

• როგორ ელოდებით პირადად თქვენ, მოვლენების განვითარებას?

ბევრი რამ დამოკიდებულია თუნდაც იმაზე, როგორ განვითარდება უკრაინაში ომი, საით წავა ეს პროცესი. ძალიან ბევრი სუბიექტური ფაქტორი მუშაობს. არსებობს ძალიან ნეგატიური სცენარები, მაგალითად ის, რაც ვახსენე – „ტრაქტატი 2“ და შესაძლოა აქეთ წავიდეს პროცესი. არსებობს პოზიტიური სცენარიც, რომ ქვეყანამ დაიწყოს შემობრუნება ცივილიზებული განვითარებისკენ.

ბევრი რამ კულუარებში ხდება და არ გვაქვს საკმარისი ინფორმაცია რომ შევაფასოთ. არ ვიცით, რუსეთისგან არსებობს ზეწოლა თუ უბრალოდ მენტალური პრობლემაა, თუ ბიძინა ივანიშვილის პოლიტიკური ტექნოლოგიაა, რომ ორ სკამზე იჯდეს ერთად, არ ვიცით და არც აქვს ამას მნიშვნელობა, რადგან ჩვენ ვუყურებთ პროცესს როგორ მიდის. პროცესი მიდის ძალიან ცუდად, მაღალი რისკის ზონაში ვართ დღეს.

ასე, რომ ბოლო სიტყვა ყოველთვის საზოგადოებაზეა დამოკიდებული. ჩვენ უნდა ვაიძულოთ ხელისუფლება, რომ იქცეოდეს ნორმალურად. ხმა მივეცით და შემდეგ 4 წელი დავიძინეთ, ასე არ მუშაობს საზოგადოება ცივილიზებულ ქვეყნებში. საზოგადოებას მუდმივი კონტროლის ქვეშ უნდა ჰყავდეს ხელისუფლება, რომ მას ემსახუროს და არა იბატონოს.

„მე არ მიმაჩნია, რომ ვინმეს უნდა გადავყვეთ ამ პროცესის წინ წასვლაში: არც სააკაშვილს, არც გვარამიას და არც ბიძინა ივანიშვილს,“ – აცხადებს საქართველოს პრეზიდენტი სალომე ზურაბიშვილი. დღეს, 10 ივნისს, მან განაცხადა, რომ ბრიუსელში იმყოფება და საქართველოს მთავრობამ მას ოფიციალური ვიზიტის გაგრძელებაზე უარი უთხრა.

სალომე ზურაბიშვილი ამბობს, რომ მას საშუალება არ მისცეს დაიცვას საქართველოს პოზიცია ევროკავშირის კანდიდატის სტატუსის მინიჭების პროცესში. სალომე ზურაბიშვილი აპირებდა ვიზიტებს საფრანგეთში, პოლონეთსა და უკრაინაში.

„მე ვიმყოფები ბრიუსელში, სადაც ჩამოვედი ოფიციალური, სახელმწიფო ვიზიტის შემდეგ იტალიიდან, იმისთვის, რომ ბოლო ძალისხმევა არ დამეშურებინა აქ ევროკავშირის ხელმძღვანელობასთან ჩვენი კანდიდატურის მხარდასაჭერად.

სამწუხაროდ, ისეთი რეზოლუცია იქნა მიღებული და კიდევ უფრო სამწუხაროდ ამ რეზოლუციას მოჰყვა ისეთი კომენტარები სახელისუფლებო გუნდიდან, რომელიც რეალურად არ მაძლევს საშუალებას, რომ მე ეფექტურად დავიცვა ჩვენი კანდიდატურა დღეს.

მე მინდოდა ჩასვლა საფრანგეთში, პოლონეთში, შესაძლებელია უკრაინაში, ვისთან ერთადაც  ვართ ამ საქმეში და რომლის მადლიერიც უნდა ვიყოთ და ვის გარეშეც არ იქნებოდა დაჩქარებული კანდიდატურის პროცესი. მე მივიღე კიდევ ერთი უარი ამ მოგზაურობაზე,“ – აღნიშნა სალომე ზურაბიშვილმა.

სალომე ზურაბიშვილის თქმით, მას საქართველოს მთავრობის წევრებმა უთხრეს, რომ „ზედმეტი აქტიურობა“ საჭირო არ იყო.

„მითხრეს, რომ თურმე მთავრობამ ყველაფერი გააკეთა ჩვენი კანდიდატურის მხარდასაჭერად და აღარ იყო საჭირო ზედმეტი აქტიურობა, მე თვითონ ჩავთვალე, რომ  არ არის მიზანშეწონილი, ეს არ არის ის საქმე, სადაც შემიძლია მარტო გადავარჩინო მთლიანად მთავრობის უმოქმედობა. მე ვთვლი, რომ ვალდებული ვარ კონსტიტუციის წინაშე, რამეთუ კონსტიტუციის 78-ე მუხლი მავალდებულებს, რომ ყველაფერი გავაკეთო, რაც შესაძლებელია იმისთვის, რომ წინ წავწიოთ ეს პროცესი.

მე არ მჯერა, რომ არსებობდეს საქართველოსთვის რამე სხვა მომავალი, თუ არა ევროპული მომავალი… ამისთვის ვბრუნდები საქართველოში და იქ დავიცავ ამ მომავალს,“ – განაცხადა სალომე ზურაბიშვილმა.

____________

ფოტოზე: სალომე ზურაბიშვილი. ფოტო: EPA/ADAM BERRY

საქართველოში თურქეთის ელჩის, ფატმა სერენ იაზგანის განცხადებით, ბიზნესმენ გალიფ ოზთურქის თურქეთში ექსტრადაციის მოთხოვნა ისევ ძალაშია.

„გალიპ ოზთურქი თურქეთის მოქალაქეა, რომელსაც თურქეთის სასამართლომ მიუსაჯა პატიმრობა. იგი საქართველოში 2014 წელს ჩამოვიდა, როდესაც ჯერ კიდევ მიმდინარეობდა სასამართლო პროცესი და მიიღო საქართველოს მოქალაქეობა.

შემდეგ თურქეთის უზენაესმა სასამართლომ მის მიმართ გამოიტანა განაჩენი, რის საფუძველზეც თურქეთმა მოითხოვა საქართველოდან მისი ექსტრადიცია.

ეს მოთხოვნა ახლაც ძალაშია,“ – ამბობს საქართველოში თურქეთის ელჩი ფატმა სერენ იაზგანი.

მისი კომენტარი თურქეთის საელჩომ „ბათუმელებს“ წერილობით მოაწოდა.

მილიონერი ბიზნესმენი გალიფ ოზთურქი ბათუმში 31 მაისს დააკავეს.

ბიზნესმენის დასაკავებლად საქართველოს ფინანსთა სამინისტროს საგამოძიებო სამსახურს 9-საათიანი სპეცოპერაცია დასჭირდა.

საგამოძიებო სამსახურის მიერ თავდაპირველად გავრცელებული ინფორმაციის თანახმად, გალიფ ოზთურქის კუთვნილ კომპანიაში საგამოძიებო მოქმედებები „განსაკუთრებით დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის შესაძლო ფაქტზე მიმდინარე გამოძიების პროცესში, საქმის ვითარების გასარკვევად საჭირო მტკიცებულებების მოპოვების მიზნით“ განხორციელდა. საგამოძიებო სამსახურის მტკიცებით, სპეცოპერაციის დროს გალიფ ოზთურქის საცხოვრებელ მისამართზე აღმოჩენილი იქნა სავარაუდოდ ნარკოტიკული და ფსიქოტროპული ნივთიერებები.

თუმცა 2 ივნისს ოზთურქს ბრალი მხოლოდ სისხლის სამართლის კოდექსის 260-ე მუხლის შესაბამისად წარუდგინეს, რაც გულისხმობს „ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენას, შენახვას, გადაზიდვას ან გადაგზავნას“.

გალიფ ოზთურქს ორმაგი მოქალაქეობა აქვს – საქართველოს და თურქეთის. ის ბიზნესს საქართველოში 2011 წლიდან ეწევა. 2011 წელს,  ბათუმის მერიამ გაავრცელა ოფიციალური ინფორმაცია, რომლის თანახმადაც გალიფ ოზთურქის კომპანია ბათუმში ავტოსადგურს აშენებდა.

„ახალი ავტოსადგურის ტერიტორია 109 000 კვ.მ ფართობს მოიცავს, სადაც 60000 კვ.მ-ს 3-სართულიანი მრავალპროფილიანი სავაჭრო ცენტრი დაიკავებს. ავტოსადგურის მფლობელი ქართულ-თურქული კომპანია „ავრასია-ჯორჯია“ აღნიშნული პროექტის განსახორციელებლად დაახლოებით 20 მლნ. დოლარის ინვესტიციას განახორციელებს. მასშტაბური სამშენებლო სამუშაოები მიმდინარე წლის ივნისში დაიწყო“, – ეწერა გავრცელებულ რელიზში.

საქართველოს პარლამენტის წევრი ტარიელ ნაკაიძე, მისი კოლეგის, „ქართული ოცნების“ წევრის, დიმიტრი ხუნდაძის განცხადებას გამოეხმაურა ფეისბუქში. ბიძინა ივანიშვილთან დაახლოებულმა დეპუტატმა განაცხადა, რომ იმ შემთხვევაში, თუ საქართველო ევროკავშირის კანდიდატობის სტატუსს ვალდებულებებით მიიღებს, როგორც რეზოლუციაშია, საქართველომ სტატუსზე უარი უნდა თქვას.

„დღეს დიმიტრი ხუნდაძის აბსურდულმა განცხადებამ ცხადყო, რომ „ქართულ ოცნებას“ ევროკავშირის წევრობა არ სურს. ადრეც იყო კულუარული საუბრები, რომ [ირაკლი] კობახიძის ფრთას განსაკუთრებით არ სურდა ევროკავშირის წევრობაზე განაცხადის შეტანა, რასაც კობახიძის მაშინდელი განცხადებებიც ადასტურებდა.

თუმცა ქართველი ხალხის შემართებამ და ბრძოლამ „გადაღუნა“ ქართული ოცნება და შეიტანა განაცხადი. და თუ მართლა იმ სისულელეს, რასაც ხუნდაძე გაიძახის, ჩაიდენს ეს ხელისუფლება, აი, მაშინ დაგატყდებათ ქართველი ხალხის რისხვა.

„ქართული ოცნება“, რა ხდება, ომი გინდათ? თუ ასეა, გექნებათ, ქართველი ხალხი უმოკლეს დროში დაგასამარებთ“, – წერს ტარიელ ნაკაიძე.

—–

„ქართული ოცნების“ დეპუტატის, დიმიტრი ხუნდაძის განცხადებას იმის შესახებ, რომ  თუ საქართველო ევროკავშირის კანდიდატობის სტატუსს „უსამართლო ვალდებულებებით” მიიღებს, როგორც რეზოლუციაშია, საქართველომ სტატუსზე უარი უნდა თქვას, საქართველოს პარლამენტის წევრი, დამოუკიდებელი დეპუტატი თამარ კორძაია ეხმიანება ფეისბუქზე.

„გუშინ ეთერში ვთქვი, რომ ბიძინა ივანიშვილს მძევლად ჰყავს საქართველოს მოქალაქეები და მათი და სახელმწიფოს მომავლით ვაჭრობს საკუთარი კეთილდღეობის უზრუნველსაყოფად.

დღეს, მისი მსტოვრები, უკვე ტოლობას სვამენ, ევროპის მიერ რუს ოლიგარქად აღიარებულ ბიძინა ივანიშვილსა და სახელმწიფოს, საქართველოს შორის!

იანუკოვიჩს სხვა არაფერი გაუკეთებია უკრაინისთვის და მოქალაქეებმაც გასცეს პასუხი!

არ დავუთმოთ საკუთარი მომავალი რუს ოლიგარქს!

პ.ს. შეგახსენებთ პროპორციული საარჩევნო სისტემის დაპირების არ შესრულება, დიმიტრი ხუნდაძის მიერ გახმოვანდა, ახლაც ის ახმოვანებს ბ. ივანიშვილის გეგმას“ – წერს თამარ კორძაია.

ხუნდაძის განცხადებას დღეს გამოეხმაურა საქართველოს სახალხო დამცველი ნინო ლომჯარია.

„რას ბედავთ თქვენ?! საქართველოს მოსახლეობის უმრავლესობამ და კონსტიტუციამ უკვე გადაწყვიტა ევროპული არჩევანი. ამ ქვეყნის სახელით ამის თქმის უფლება ვინ მოგცათ?“ – წერს ნინო ლომჯარი სოციალურ ქსელში.