„აუქციონი თუ ჩატარდება, ვერ გავიმარჯვებთ, წინა წლებში კი, როცა პანდემია იყო, ჩვენ არ ჩავაგდეთ ტურისტული სეზონი, ვიმუშავეთ, ახლა კონკურენტუნარიანი აღარ ვართ“, – ამბობს ბექა გუგუნავა. ის პლაჟის მეოიჯეარია ბათუმში და ზაფხულოლობით შეზლონგებს აქირავებს. დღეს, 12 ივნისს, აჭარის მთავრობის ადმინისტრაციული შენობის წინ პლაჟის მეიჯარეებმა საპროტესტო აქცია გამართეს და მოითხოვეს, აუქციონის ნაცვლად მათთან ისევ პირდაპირი ხელშეკრულებები გაფორმდეს.
მეიჯარეები განმარტავენ, რომ პანდემიის პერიოდში, ანუ 2020 და 2021 წლებში აქუციონი საპლაჟე სერვისების შექმნაზე აღარ გამოცხადებულა და მათ გაუფორმეს პირდაპირი ხელშეკრულებები, რაც თითოეული მეიჯარის შემთხვევაში წლიურად დაახლოებით 10 ათასი ლარია. ასეთი სულ 150 მეიჯარეა.
„ჩვენ შევიძინეთ ინვენტარი, ბანკიდან ფული გამოვიტანეთ იმიტომ, რომ დაგვპირდნენ, ამ წელსაც იქნებოდა პირდაპირი ხელშეკრულება, ახლა გვითხრეს, რომ ცხადდება აუქციონი. იმდენი ფულიანი ბიზნესმენია შემოსული, ჩვენ როგორ მოვუგებთ აუქციონს?“ – კითხულობს მეიჯარე ჯაბა გოხიძე.
მეიჯარეების თქმით, მათ აჭარის ფინანასთა და ეკონომიკის მინისტრისგან, ასევე აჭარის მთავრობის თავმჯდომარისსგან შეხვედრებზე მოისმინეს დაპირება, რომ აუქციონი წელსაც არ გაიმართება, რადგან ეს ჯგუფი პანდემიის დროს ზღვის სეზონის ჩავარდნის დროს დაზარალდა.
„გასაგებია, რომ აუქციონი არის აპრობირებული ფორმა და არ ვდაობთ იმაზე, რომ აუქციონი უნდა ჩატარდეს, მაგრამ რადგან ჩვენც დავზარალდით, ამიტომაც ვითხოვთ, რომ ეს ერთი წელიც არ ჩატარდეს აუქციონი“, – გვითხრა ბექა გუგუნავამ.
აქციის მონაწილეებს აჭარის მთავრობის ადმინისტრაციაში უთხრეს, რომ დღეს არასამუშაო დღეა და მათ ხვალ შეხვდებიან.
